UPSC ದ CAPF ಡ್ 322 ಸಹಾಯಕ ಕಮಾಂಡೆಂಟ್ ಬೇಲೆಗ್ ಅರ್ಜಿ ಪಾಡೊಲಿ.
ನೆಟ್ಟ್ BSF-86, CRPF-55, CISF-91, ITBP-60 ಬೊಕ್ಕ SSB ಡ್ 30 ಬೇಲೆ ಉಂಡು. ಆಸಕ್ತ ಬೊಕ್ಕ ಅರ್ಹ ಅಭ್ಯರ್ಥಿಲು ವೆಬ್ಸೈಟ್ upsc.nic.in ಗ್ ಭೇಟಿ ಕೊರ್ಪಿನ ಮುಖೇನ ಮೇ 16 ತ್ತ ಉಲಯಿ ಅರ್ಜಿ ಸಂದಾವೊಡು. ಅರ್ಜಿ ಸಂದಾಯೆರೆ ಪದವಿ ಶಿಕ್ಷಣದ ಅರ್ಹತೆ ಇಪ್ಪೊಡು. ಲಿಖಿತ ಪರೀಕ್ಷೆ, ದೈಹಿಕ ಪರೀಕ್ಷೆ ಬೊಕ್ಕ ದಾಖಲೆದ ಪರಿಶೀಲನೆದ ಆಧಾರದ ಮಿತ್ತ್ ಆಯ್ಕೆ ಮಲ್ಪೆರೆ ಆಪುಂಡು ಪಂದ್ ಪ್ರಕಟಣೆ ತೆರಿಪಾದ್ಂಡ್.
ಸಂಚಾರಿ ನಿಯಮ ಉಲ್ಲಂಘನೆ ಮಲ್ತಿನ ಪ್ರಧಾನಿ ಮೋದಿನ ಮಿತ್ತ್ ಒಂಜಿ ಜನ ದೂರು ಕೊರ್ತೆರ್.
ಇಂಚಿಪ್ಪ ಕೇರಳದ ಕೊಚ್ಚಿಡ್ ಪ್ರಧಾನಿ ಮೇರ್ ರೋಡ್ ಶೋ ಪೊರ್ತುಡು ನಿಯಮ ಉಲ್ಲಂಘನೆ ಮಲ್ತಿನೆಕ್ಕ್ ತ್ರಿಶೂರ್ ನಿವಾಸಿ ಪೊಲೀಸೆರೆಗ್ ದೂರು ಕೊರ್ತೆರ್. ಮೋದಿ ಗಾಡಿದ ಬಾಕಿಲ್ ಡ್ ಉಂತುದು ಪ್ರಯಾಣ ಮಲ್ದೆರ್ ಪಂದ್ ಆನ್ ಲೈನ್ ದೂರುಡ್ ಪಂತೆರ್. ಅತ್ತಂದೆ ಕಾರ್ ದ ಗ್ಲಾಸ್ ದ ಮಿತ್ತ್ ಪೂ ಬೂರ್ದಿತ್ತ್ಂಡ್. ಡ್ರೈವರ್ ಗ್ ಎದುರು ತೋಜೊಂದು ಇಜ್ಜಾಂಡ್ ಪಂದ್ ದೂರುಡ್ ಬರೆತೆರ್.
ಕುಡ್ಲ: ಕಾಂಗ್ರೆಸ್ದ 5ನೇ ಗ್ಯಾರಂಟಿನ್ ಕಾಂಗ್ರೆಸ್ ನಾಯಕೆ ರಾಹುಲ್ ಗಾಂಧಿ ಮೇರ್ ಗುರುವಾರ ಘೋಷಣೆ ಮಲ್ದೆರ್.
ಕುಡ್ಲ ಪೇಂಟೆರ್ದ್ ಪಿದಯಿದ ಅಡ್ಯಾರ್ ದ ಸಹ್ಯಾದ್ರಿ ಕಾಲೇಜ್ ಮೈದಾನಡ್ ಆಯೋಜನೆ ಮಲ್ತಿನ ಕಾಂಗ್ರೆಸ್ ವೋಟುದ ಪ್ರಚಾರದ ಸಭೆಟ್ಟ್ ಪಾತೆರಿನ ಮೇರ್, ರಾಜ್ಯಡ್ ಕಾಂಗ್ರೆಸ್ ಸರಕಾರ ಬತ್ತಿನ ಸುರುತ್ತ ದಿನರ್ದೆ ಪೊಂಜೋವ್ ನಕ್ಲೆಗ್ ಸರಕಾರಿ ಬಸ್ ಟ್ಟ್ ಧರ್ಮಗ್ ಪ್ರಯಾಣ ಮಲ್ಪರೆ ಪಂದ್ ಘೋಷಣೆ ಮಲ್ದೆರ್.
ಬಿಜೆಪಿ ಸರ್ಕಾರದ ಪೊರ್ತುಡು ಪೆಟ್ರೋಲ್ ದ ಮಿತ್ತ್ 60 ರ್ದ್ 90 ರೂ. ಗ್ಯಾಸ್ ಗ್ 400 ರ್ದ್ 1100 ರೂ. ಆತ್ಂಡ್. ನೋಟ್ ಬ್ಯಾನ್ ಬಡವೆರೆನ ಕಾಸ್ ನ್ ದೆತೊಂದುಂಡು. ಜವನೆರೆಗ್ ಬೇಲೆ ತಿಕೊಂದು ಇಜ್ಜಿ. ಬಿಜೆಪಿ ಸರ್ಕಾರ ಬೇಲೆ ಕೊರೊಂದು ಇಜ್ಜಿ. 40 ಕೋಟಿ ಜನ ಕೂಡ ಬಡಪತ್ತ್ ಡ್ ಉಲ್ಲೆರ್. 90 ಲಕ್ಷ ಎಲ್ಯ ಬೊಕ್ಕ ಮಧ್ಯಮ ಕೈಗಾರಿಕೆ ಮುಚ್ಚಿದ್ಂಡ್. ಉಂದು ಬಿಜೆಪಿದ ವಿಕಾಸ ಮಂತ್ರ, ಭ್ರಷ್ಟಾಚಾರ 40%, ನಿರುದ್ಯೋಗ ಬೊಕ್ಕ ಬಿಲೆ ಎಚ್ಚ ಮಲ್ದ್ಂಡ್ ಪಂದ್ ರಾಹುಲ್ ಪಂಡೆರ್.
ತಾಳಿಪಾಡಿ ಶ್ರೀ ಧರ್ಮ ಜಾರಂದಾಯ-ಬಂಟ ಬೊಕ್ಕ ಶ್ರೀ ಧೂಮಾವತಿ-ಬಂಟ ದೈವೊಲೆನ ದೈವೊಲ್ಯಡ್ ಪುನರ್ ಪ್ರತಿಷ್ಠೆ, ಕಲಶಾಭಿಷೇಕ ಬೊಕ್ಕ ವರ್ಷಾದಿದ ನೇಮ ಎ.30-ಮೇ4 ಮುಟ್ಟ ನಡಪರೆ ಉಂಡು.
ಈ ಲೇಸ್ ನರಹರಿ ತಂತ್ರಿಲೆನ ಮುತಾಲಿಕೆಡ್, ಪ್ರಧಾನ ಅರ್ಚಕೆರ್ ಬಾಲಕೃಷ್ಣ ಭಟ್ರೆನ ಸಹಕಾರಡ್ ನಡಪರೆ ಉಂಡು.
ಎ.30 ಐತಾರ ಬೊಲ್ಪುಗು ಸಾಮೂಹಿಕ ಪ್ರಾರ್ತನೆ, ತೋರಣ ಮೂರ್ತ, ಉಗ್ರಾಣ ಮೂರ್ತ, ಗಣಯಾಗ ಬಯ್ಯಗ್ ವಾಸ್ತುಪೂಜೆ, ವಾಸ್ತುಹೋಮ, ವಾಸ್ತುಬಲಿ ನಡಪರೆ ಉಂಡು.
ಮೇ1 ಸೋಮಾರ ಬೊಲ್ಪುಗು ದುರ್ಗಾಹೋಮ, ಬಯ್ಯಗ್ ಬಪ್ಪನಾಡ್ ಮೇಳದಕ್ಲೆರ್ದ್ ಆಟ ನಡಪರೆ ಉಂಡು.
ಮೇ2 ಅಂಗಾರೆ ಬೊಲ್ಪುಗು ಸುದರ್ಶನಯಾಗ, ದುರ್ಗಾಯಾಗ, ಬಯ್ಯಗ್ ಮಂಡಲ ರಚನೆ, ಭುವನೇಶ್ವರಿ ಪೂಜೆ, ವನದುರ್ಗಾ ಹೋಮ ಬೊಕ್ಕ ಕಲ್ಲಡ್ಕ ವಿಠಲ್ ನಾಯಕ್ ಮೆರೆರ್ದ್ ಸಾಹಿತ್ಯ, ಸಂಗೀತ, ಸಂಭ್ರಮ ಆದ್ ಧರ್ಮಸಭೆ,ರಾತ್ರೆ ವಿಜಯ ಕಲಾವಿದೆರೆರ್ದ್ ತೊಟ್ಟಿಲ್ ನಾಟಕ ನಡಪರೆ ಉಂಡು.
ಮೇ3 ಬುಧಾರ ಬೊಲ್ಪುಗು ಪ್ರತಿಷ್ಠೆ ಹೋಮ, ತಾರಿಪಾಡಿಗುತ್ತುರ್ದ್ ಭಂಡಾರ ಬರಿಯೆರೆ ಉಂಡು. ಬಯ್ಯಗ್ ಪಟ್ಲ ಸತೀಶ್ ಶೆಟ್ಟಿ ಕೂಟದಕ್ಲೆರ್ದ್ ಯಕ್ಷಗಾನ ನಾಟ್ಯ ವೈಭವ ಆದ್ ಧರ್ಮಸಭೆ, ರಾತ್ರೆ ಲಕುಮಿ ಕಲಾವಿದೆರೆರ್ದ್ ಗರುಡ ಪಂಚಮಿ ನಾಟಕ ನಡಪರೆ ಉಂಡು.
ಮೇ4 ಗುರುವಾರ ಮಧ್ಯಾಹ್ನ ಅನ್ನಸಂತರ್ಪಣೆ ಸೇವೆ, ರಾತ್ರೆ ಗೌರವ ಸಮರ್ಪಣೆ ಲೇಸ್ ಆದ್ ಧರ್ಮ ಜಾರಂದಾಯ-ಬಂಟ ಬೊಕ್ಕ ಧೂಮಾವತಿ-ಬಂಟ ದೈವೊಲೆನ ವರ್ಷಾಧಿದ ನೇಮ, ಕೋರ್ದಬ್ಬು ಬೊಕ್ಕ ಧೂಮಾವತಿ ದೈವೊಲೆನ ಭಂಡಾರ ಬತ್ತ್ ದ್ ಭೇಟಿ ಆಯೆರೆ ಉಂಡು.
ಮೇ5 ಬೊಲ್ಪುಗು ತಾರಿಪಾಡಿಗುತ್ತುಗು ಭಂಡಾರ ಪೋಪುಂಡು.
ಈ ಲೇಸ್ ಗ್ ಮಾತೆರ್ಲಾ ಬತ್ತ್ ದ್ ಸಿರಿಮುಡಿ ಗಂಧ ಪ್ರಸಾದ ದೆತೊಂದು ದೈವೊಲೆನ ಕೃಪೆಗ್ ಪಾತ್ರರಾವೊಡು ಪಂದ್ ಜೀರ್ಣೋದ್ಧಾರ ಸಮಿತಿದ ಅಧ್ಯಕ್ಷೆರ್ ತಾರಿಪಾಡಿಗುತ್ತು ದಿನೇಶ ಭಂಡ್ರಿಯಾಲ್ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಬಂಟ್ವಾಳ : ಪುಗರ್ತೆ ದ ವೈದ್ಯರ್ ಡಾ.ರವೀಶ್ ತುಂಗಾ ಬೊಕ್ಕ ಡಾ.ಸುಚಿತ್ರ ಮುತಾಲಿಕೆಡ್ ಅರ್ಕುಳ ಪರಂಗಿಪೇಟೆ ಉದಿಪನ ಆಯರೆ ಉಪ್ಪುನ ಮಾಮಲ್ಲ ಮನಸ್ವಿನಿ ಆಸ್ಪತ್ರೆದ ಕೈತಾಲ್ ಶನಿವಾರ ಬಯ್ಯಗ್ ಕಟೀಲು ಶ್ರೀ ದುರ್ಗಾ ಪರಮೇಶ್ವರಿ ಪ್ರಸಾದಿತ ದಶಾವತಾರ ಯಕ್ಷಗಾನ ಮಂಡಳಿ ಮೊಕಲೆರ್ದ್ ರಾಮ ದರ್ಶನ – ಶ್ರೀನಿವಾಸ ಕಲ್ಯಾಣ ಪನ್ಪುನ ಯಕ್ಷಗಾನ ಬಯಲಾಟ ನಡಪರೆ ಉಂಡು. ಉಂದೆತ್ತ ಸಲುವಾದ್ ಬಯ್ಯ 5.45ಕ್ಕ್ ಶ್ರೀ ದೇವಿಗ್ ಮಲ್ಲ ಪೂಜೆ ಬೊಕ್ಕ ಅನ್ನಪ್ರಸಾದ ಉಂಡು. ಊರುದ ಮಾತ ಜನ ಸೇರ್ದ್ ಪೊರ್ಲು ಮಲ್ತ್ ಕೊರೊಡು ಪಂದ್ ಬಿನ್ನಾಪು ಮಲ್ದೆರ್.
ವಿಧಾನಸಭೆ ವೋಟುದ ಬಗೆಟ್ ಮಹಾ ಅಭಿಯಾನದ ಅಂಗವಾದ್ ಇನಿ 33ನೇ ಕದ್ರಿ ದಕ್ಷಿಣ ವಾರ್ಡ್ ದ ಇಲ್ಲ್ ಲೆಗ್ ಪೋದು ಅಭ್ಯರ್ಥಿ ಡಿ ವೇದವ್ಯಾಸ ಕಾಮತ್ ಮೆರೆನ ಪರವಾದ್ ವೋಟು ಕೇನ್ದ್ ಕರಪತ್ರ ಕೊರಿಯೆರ್.
ಈ ಪೊರ್ತುಡು ವಿಧಾನಪರಿಷತ್ ಮಾಜಿ ಸದಸ್ಯೆರ್ ಮೊನಪ್ಪ ಭಂಡಾರಿ, ಮಂಡಲ ಅಧ್ಯಕ್ಷೆರ್ ವಿಜಯ ಕುಮಾರ್ ಶೆಟ್ಟಿ, ಚುನಾವಣಾ ಕ್ಷೇತ್ರ ಸಂಚಾಲಕೆರ್ ನಿತಿನ್ ಕುಮಾರ್, ಮಂಡಲ ಉಪಾಧ್ಯಕ್ಷೆರ್ ರಮೇಶ್ ಕಂಡೆಟ್ಟು, ಕೈತಲ್ ದ ಮನಪಾ ಸದಸ್ಯೆರ್ ಮನೋಹರ ಶೆಟ್ಟಿ, ಪಕ್ಷದ ಪ್ರಮುಖೆರ್, ಪಕ್ಷದ ಕೈತಲ್ ದ ಮುಖಂಡೆರ್ ಬೊಕ್ಕ ಕಾರ್ಯಕರ್ತೆರ್ ಇತ್ತೆರ್.
ಕೊಟ್ಟಿಗೆಹಾರ: ಭಾರಿ ಬರ್ಸ ಬತ್ತಿನ ಕಾರಣ ಬೊಡೆದಿನ್ ಬಸ್ ಟ್ಟ್ ಬರ್ತದ್ ಬೈಕ್ ಡ್ ಬರ್ಪೆ ಪಂದ್ ಪಂಡಿನ ಕಂಡನಿ ಹೆಬ್ಬರಿಗೆ ಕೈತಲ್ ಸಂಶಯಾಸ್ಪದವಾದ್ ಪುನ ಆದ್ ಪತ್ತೆ ಆಯಿನ ಘಟನೆ ಬಣಕಲ್ ಪೊಲೀಸ್ ಠಾಣಾ ವ್ಯಾಪ್ತಿದ ಹೆಬ್ಬರಿಗೆಯಡ್ ಬುಧಾರ ನಡಪರೆ ಉಂಡು.
ಚಿಕ್ಕಮಗಳೂರು ತಾಲೂಕ್ ದ ತೇಗೂರುದ ದಿಲೀಪ್ (40) ತೀರ್ ಪೋಯಿನ ಜನ. ಧರ್ಮಸ್ಥಳಡ್ ಮುಡಿ ದೆಪ್ಪುನ ಬೇಲೆ ಮಲ್ತೊಂದು ಇತ್ತಿನ ದಿಲೀಪ್ ಉಜಿರೆಡ್ ವಾಸ ಇತ್ತೆರ್. ಬೊಡಿದಿನೊಟ್ಟಿಗೆ ತೇಗೂರುಗು ಬತ್ತಿನ ದಿಲೀಪ್ ಬುಧಾರ ಬೈಕ್ ಡ್ ಉಜಿರೆಗ್ ಪಿದಾಡ್ ದಿತ್ತೆರ್. ಕೊಟ್ಟಿಗೆಹಾರ ಕೈತಲ್ ಬರೊಂದು ಇತ್ತಿಲೆಕ್ಕನೇ ಬರ್ಸ ಸುರು ಆಯಿನೇರ್ದಾವೆರ ಬೊಡೆದಿನ್ ಬಸ್ಸ್ ಕ್ಕ್ ಬರ್ತದ್ ಉಜಿರೆಗ್ ಪೋಯೆರೆ ಪಂದ್, ಯಾನ್ ಬರ್ಸ ಉಂತಿ ಬೊಕ್ಕ ಬೈಕ್ ಡ್ ಬರ್ಪೆ ಪಂದ್ ಪಂದಿತ್ತೆರ್.
ಆಂಡ ಬುಧಾರ ಬಯ್ಯಗ್ ಹೆಬ್ಬರಿಗೆ ಕೈತಲ್ ದ ಮಾರ್ಗ ಬರಿಟ್ಟ್ ಮೆರೆನ ಪುನ ಪತ್ತೆ ಅತ್ಂಡ್. ಈ ಘಟನೆದ ಜಾಗೆಗ್ ಬಣಕಲ್ ಪೊಲೀಸ್ ಠಾಣಾ ಪಿಎಸ್ ಐ ಜಂಬೂರಾಜ್ ಮಹಾಜನ್, ಎಎಸ್ ಐ ಶಶಿ, ಸಿಬ್ಬಂದಿಲಾಯಿನ ಜಗದೀಶ್ ಭೇಟಿ ಕೊರ್ದು ಪರಿಶೀಲನೆ ನಡಪಾದೆರ್. ಈ ನಗೆಟ್ ಪೊಲೀಸ್ ಠಾಣೆಡ್ ಕೇಸ್ ದಾಖಲ್ ಆತ್ಂಡ್. ತನಿಖೆ ನಡತೊಂದು ಉಂಡು.
ಬಂಟರ ಸಂಘ ಬಂಟವಾಳ ತಾಲೂಕ್ (ರಿ.) ವಾರ್ಷಿಕ ಉಚ್ಚಯದ ಲೆಕ್ಕೊಡು ಬಂಟ್ವಾಳ ತಾಲೂಕ್ ದ ಪ್ರಬುದ್ಧ ಬಂಟ ಕಲಾವಿದೆರೆರ್ದ್ ಸತ್ಯೋದ ಸಿರಿ ತುಳು ಜಾನಪದ ನಾಟಕ ಎ.23 ಐತಾರ ಬಯ್ಯಗ್ ನಡತ್ಂಡ್.
ಈ ನಾಟಕನ್ ಕದ್ರಿ ನವನೀತ ಶೆಟ್ಟಿ ರಚನೆ, ನಿರ್ದೇಶನ ಮಲ್ದೆರ್.
ಮಂಜೇಶ್ವರ: ಉದ್ಯಾವರ ಶ್ರೀ ದೈವೊಲು ಸಾನಿಧ್ಯಡ್ ವರ್ಷಾಧಿದ ಉಚ್ಚಯ ಬೊಕ್ಕ ಐತಿಹಾಸಿಕ ಬಂಡಿ ಉಚ್ಚಯ ಮೇ9-15 ಮುಟ್ಟ ನಡಪರೆ ಉಂಡು.
ಮೇ9 ಅಂಗಾರೆ ರಾತ್ರೆ ತಾಲೀಮು ಪ್ರದರ್ಶನ, ಕೊಡಿ ಏರಿಯೆರೆ, ಕಂಚಿಲ್ ಸೇವೆ, ಕಟ್ಟೆ ದೀಪಾರಾಧನೆ ನಡಪರೆ ಉಂಡು.
ಮೇ10 ಬುಧಾರ ಬಯ್ಯಗ್ ಯಕ್ಷಗಾನ ತಾಳಮದ್ದಳೆ, ರಾತ್ರೆ ಸಾಂಸ್ಕೃತಿಕ ಲೇಸ್ ‘ಭಕ್ತಿ ಗಾನಸುಧಾ’, ಕೊಟ್ಯರಾಯನ ಅಣ್ಣ ದೈವೊದ ನೇಮ ಆದ್ ಕೆರೆ ದೀಪಾರಾಧನೆ ನಡಪರೆ ಉಂಡು.
ಮೇ11 ಗುರುವಾರ ಬೊಲ್ಪುಗು ಮೆಗ್ಯೆ ದೈವೊದ ನೇಮ, ಮಧ್ಯಾಹ್ನ ಮಡಸ್ಥಾನ, ಬಯ್ಯಗ್ ಮುಂಡತ್ತಾಯ ದೈವೊದ ನೇಮ, ರಾತ್ರೆ ನಡುಬಂಡಿ ಉಚ್ಚಯ, ಅಣ್ಣ ದೈವೊದ ನೇಮ ನಡಪರೆ ಉಂಡು.
ಮೇ12 ಸುಕ್ರಾರ ಬೊಲ್ಪುಗು ತಮ್ಮ ದೈವೊದ ನೇಮ, ಬಯ್ಯಗ್ ಮುಂಡತ್ತಾಯ ದೈವೊದ ನೇಮ, ಕಡೆಬಂಡಿ ಉಚ್ಚಯ, ತಮ್ಮ ದೈವೊದ ನೇಮ, ಬೆಡಿ ಮಾರ್ದ್ ಪ್ರದರ್ಶನ ನಡಪರೆ ಉಂಡು.
ಮೇ15 ಸೋಮಾರ ರಾತ್ರೆ ಕೊಡಿ ಜಾವೆರೆ ಉಂಡು.
ಈ ಲೇಸ್ ಗ್ ಮಾತೆರ್ಲಾ ಬತ್ತ್ ದ್ ಸಿರಿಮುಡಿ ಗಂಧ ಪ್ರಸಾದ ದೆತೊಂದು ಶ್ರೀ ದೈವೊಲೆನ ಕೃಪೆಗ್ ಪಾತ್ರರಾವೊಡು ಪಂದ್ ಶ್ರೀ ದೈವೊಲೆನ ಉಚ್ಚಯ ಸಮಿತಿದ ಅಧ್ಯಕ್ಷೆರ್, ಸದಸ್ಯೆರ್, ಆಡಳಿತ ಮಂಡಳಿ ಬೊಕ್ಕ ಕಾರ್ಯ ನಿರ್ವಾಹಣಾಧಿಕಾರಿ ಲೆಪ್ಪೋಲೆಡ್ ತೆರಿಪಾದೆರ್.
ಮುಲ್ಕಿ : ಪ್ರಧಾನಿ ನರೇಂದ್ರ ಮೋದಿ ಉಂದುವೇ ಸುರೂತ್ತ ಸರ್ತಿ ತಾಲೂಕು ಕೇಂದ್ರವಾಯಿನ ಮುಲ್ಕಿ ಗ್ ವೋಟುದ ಪ್ರಚಾರೊಗು ಮೇ 3 ತಾರೀಕ್ ಗ್ ಬರ್ಪಿನ ನಿಲೆಟ್ಟ್ ಮುಲ್ಕಿ ಕೊಲ್ನಾಡ್ ದ ರಾಜಮಾರ್ಗ 66 ಬರಿತ್ತ ಗುಂಡಾಲಗುತ್ತು ಕೈತಲ್ ದೊಂಪ ಮೂರ್ತ ಗುರುವಾರ ಬೊಲ್ಪುಗು ನಡತ್ಂಡ್.
ಬಪ್ಪನಾಡ್ ದೇವಸ್ಥಾನದ ಅರ್ಚಕೆರ್ ಶ್ರೀಪತಿ ಭಟ್ ಮೇರ್ ದೊಂಪ ಮೂರ್ತದ ಪೂಜಾ ವಿಧಿ ವಿಧಾನೊಲೆನ್ ಮಲ್ತ್ ದ್ ಪ್ರಾರ್ಥನೆ ಮಲ್ತೆರ್.
ಈ ಪೊರ್ತುಡು ಪಾತೆರಿನ ಮುಲ್ಕಿ ಬೆದ್ರ ಕ್ಷೇತ್ರದ ಬಿಜೆಪಿ ಅಭ್ಯರ್ಥಿ, ಶಾಸಕೆರ್ ಉಮಾನಾಥ ಕೋಟ್ಯಾನ್ , ಪ್ರಧಾನಿ ಮೋದಿ ನಮ್ಮ ಕ್ಷೇತ್ರೊಗು ಬರ್ಪಿನ ಭಾರಿ ಮಲ್ಲ ಪೆರ್ಮೆದ ವಿಚಾರ. ಆರ್ ಬರ್ಪಿನೆಕ್ಕ್ ಮಾತಾ ರೀತಿದ ತಯಾರಿ ನಡತೊಂದುಂಡು. ಪ್ರಧಾನಿ ಬಾಷಣ ಮಲ್ಪುನ ವೇದಿಕೆ ಪಾಡರೆ ಮಣ್ಣ್ ಸಮತಟ್ಟ್ ಮಲ್ಪುನ ಬೇಲೆ ಭಾರಿ ಬಿರ್ಸ್ ಡ್ ಆವೊಂದುಂಡು. ಜರ್ಮನ್ ತಂತ್ರಜ್ಞಾನದ ಮಿತ್ತರ್ಮೆ ಬೊಕ್ಕ ದೊಂಪದ ಬೇಲೆಗ್ ಇನಿ ಚಾಲನೆ ತಿಕ್ ದ್ಂಡ್.ಕಾರ್ನಾಡ್ ದ ಕೃಷಿ ಮೇಳ ಆತಿನ ಜಾಗೆಡ್ ಹೆಲಿಪ್ಯಾಡ್ ನಿರ್ಮಾಣ ಆವೊಂದುಂಡು ಪಂದ್ ಆರ್ ತೆರಿಪಾಯೆರ್.
ದೊಂಪ ಮೂರ್ತದ ಲೇಸ್ ಡ್ ಪಕ್ಷದ ಮುಖಂಡೆರಾಯಿನ ಸುನಿಲ್ ಆಳ್ವ, ಭುವನಾಭಿರಾಮ ಉಡುಪ, ದೇವಪ್ರಸಾದ್ ಪುನರೂರು, ಕಸ್ತೂರಿ ಪಂಜ, ಸುಭಾಷ್ ಶೆಟ್ಟಿ, ಜಿ.ಎಂ.ಹರ್ಷರಾಜ್ ಶೆಟ್ಟಿ, ರಾಧಿಕಾ ಯಾದವ ಕೋಟ್ಯಾನ್, ನರಸಿಂಹ ಪೂಜಾರಿ, ದಯಾವತಿ, ಶೈಲೇಶ್, ವಿನೋದ್ ಸಾಲ್ಯಾನ್ ಬೆಳ್ಳಾಯಿರು, ವಿನೋದ್ ಬೊಳ್ಳೂರು, ವಿಜಯ ಶೆಟ್ಟಿ, ರಂಗನಾಥ ಶೆಟ್ಟಿ ಮೊಕುಲು ಮಾತ ಇತ್ತೆರ್.
