August 2022

ಆ.27 ಕ್ಕ್ ಮೂಲ್ಕಿ ತಾಲೂಕು ಆಡಳಿತ ಸೌಧಗ್ ವಸತಿ ಸಚಿವೆರೆರ್ದ್ ಕೆಸರ್ ಕಲ್ಲ್ : ಉಮಾನಾಥ ಕೋಟ್ಯಾನ್

ಮುಲ್ಕಿ: ಪೊಸತ್ತಾದ್ ಅಸ್ತಿತ್ವೊಗು ಬೈದಿನ ಮೂಲ್ಕಿ ತಾಲೂಕುಗು ಕಾರ್ನಾಡ್ ಕೈತಲ್ದ ಗೇರುಕಟ್ಟೆಡ್ ೧೦ ಕೋ.ರೂ. ಕರ್ಚಿಡ್ ನಿರ್ಮಾಣ ಆವರೆ ಇತ್ತಿನ ಆಡಳಿತ ಸೌಧಗ್ ಆ.27ಕ್ಕ್ ವಸತಿ ಸಚಿವೆರ್ ವಿ. ಸೋಮಣ್ಣ ಕೆಸರ್ ಕಲ್ಲ್ ಪಾಡರೆ ಉಲ್ಲೆರ್ ಪಂದ್ ಮುಲ್ಕಿ ಬೆದ್ರ ಕ್ಷೇತ್ರದ ಶಾಸಕೆರ್ ಉಮಾನಾಥ ಕೋಟ್ಯಾನ್ ತೆರಿಪಾಯೆರ್. ಆರ್ ಕಿನ್ನಿಗೋಳಿದ ಯುಗಪುರುಷ ಚಾವಡಿಡ್ ಅಂಗಾರೆ ನಡತಿನ ಸುದ್ಧಿಗೋಷ್ಠಿಡ್ ಈ ವಿಷಯ ತೆರಿಪಾಯೆರ್.

ಅವೇ ದಿನ ಲೋಕೋಪಯೋಗಿ ಇಲಾಖೆದ ಸಚಿವೆರ್ ಸಿ.ಸಿ.ಪಾಟಿಲ್ ಮೇರ್ ಕೊಲ್ನಾಡ್ ಬೈಪಾಸ್‌ ದಲ್ಪ ೩ ಕೋ.ರೂ. ಅಂಚೆನೆ ಬೆದ್ರಡ್ ೪ ಕೋ.ರೂ. ಕರ್ಚಿದ ಪ್ರವಾಸಿ ಬಂಗಲೆಗ್ ಕೆಸರ್ ಕಲ್ಲ್ ಅಂಚೆನೆ ಬೆದ್ರಡ್ 5 ಕೋಟಿ ಕರ್ಚಿದ ಚತುಷ್ಪಥ ರಸ್ತೆಗ್ ಕೆಸರ್ ಕಲ್ಲ್ ನ್ ಒಂಜೇ ಪೊರ್ತುಡು ಮಲ್ಪರೆ ಉಲ್ಲೆರ್ಂದ್ ತೆರಿಪಾಯೆರ್.

ಮೂಲ್ಕಿದ ಆಡಳಿತ ಸೌಧ ಬರ್ಪಿನ ಒಂಜರೆ ವರ್ಸದುಲಾಯಿ ಪೂರ್ಣ ಆವರೆ ಉಂಡು.ಉಂದೆಟ್ಟ್ ಶಾಸಕೆರ್ನ ಕಚೇರಿ, ತಹಶೀಲ್ದಾರ್ ಕಚೇರಿ, ಸರ್ವೇಯರ್ ಕಚೇರಿ ಸೇರ್ದ್ 27 ಬೇತೆ ಬೇತೆ ಇಲಾಖೆದ ಕಚೇರಿಲು ನಿರ್ಮಾಣ ಆವರೆ ಉಂಡು. ಉಂದು ಮೂಲ್ಕಿದ ಇತಿಹಾಸೊಡೇ ವಿನೂತನ ಕಾರ್ಯಕ್ರಮವಾದ್ ಚರಿತ್ರೆಡ್ ಸೇರ್ರೆ ಉಂಡು. ಈ ಲೇಸ್ ಡ್ ಅಂದಾಜಿ 2 ಸಾರ ಜನಕ್ಕುಲು ಪಾಲ್ ಪಡೆಯರೆ ಉಲ್ಲೆರ್ ಪಂದ್ ತೆರಿಪಾಯೆರ್.

ವೋಟುದ ಪೊರ್ತುಡು ಕೊರ್ತಿನ ಭರವಸೆನ್ ಈಡೇರಿಸಾಯಿನ ತೃಪ್ತಿ ಎಂಕ್ ಉಂಡು. ಮೂಲ್ಕಿ ತಾಲೂಕುದ ಸಮಗ್ರ ಅಭಿವೃದ್ಧಿಗ್ ಪೂರಕವಾದ್ ಆಡಳಿತ ಸೌಧ ಕೇಂದ್ರ ಬಿಂದು ಆವರೆ ಉಂಡು ಪಂದ್ ಶಾಸಕೆರ್ ಉಮಾನಾಥ ಕೋಟ್ಯಾನ್ ಅಭಿಮಾನೊಡು ಪಂಡೆರ್.

ದುಂಬಗ್ ಫೈರ್ ಸರ್ವಿಸ್ ಸ್ಟೇಶನ್, ಕೋರ್ಟು, ಅಂಚೆನೆ ಮುಲ್ಕಿ ಸಮುದಾಯ ಆರೋಗ್ಯ ಕೇಂದ್ರಗ್ ಎಂಆರ್ ಪಿಎಲ್ ಸಹಕಾರೊಡು 2 ಡಯಾಲಿಸಿಸ್ ಯಂತ್ರ ಮಾತ ಬರ್ರೆ ಉಂಡು ಪಂದ್ ಆರ್ ಪಂಡೆರ್.

ಮುಲ್ಕಿ ಬೆದ್ರ ಕ್ಷೇತ್ರದ ಮಂಡಲದ ಅಧ್ಯಕ್ಷೆರ್ ಸುನಿಲ್ ಆಳ್ವ ಮೇರ್ ಪಾತೆರ್ದ್, ಕ್ಷೇತ್ರಡ್ ಸುರೂತ್ತ ಸರ್ತಿ ಬಿಜೆಪಿ ಶಾಸಕರ್ ಬತ್ತಿನೆರ್ದಾವರ ಅಭಿವೃದ್ಧಿ ಕೆಲಸ ಚುರುಕಾದ್ ಆವೊಂದುಂಡು. ಮೂಲ್ಕಿ ಬೊಕ್ಕ ಬೆದ್ರಗ್ ವಿಶೇಷ ಆದ್ಯತೆ ಕೊರ್ದು ವಿಶೇಷ ಅನುದಾನ ಕೊರ್ಪಾವರೆ ರಾತ್ರೆ ಪಗೆಲ್ ಬಂಗ ಬತ್ತಿನ ಶಾಸಕೆರ್ನ ಕಾರ್ಯವೈಖರಿಗ್ ರಾಜ್ಯೊಡೇ ಪುಗರ್ತೆ ಬೈದ್ಂಡ್ ಪಂದ್ ಪಂಡೆರ್.

ಸುದ್ಧಿಗೋಷ್ಠಿಡ್ ಉಪಾಧ್ಯಕ್ಷೆರ್ ಈಶ್ವರ ಕಟೀಲು, ಪ್ರಧಾನ ಕಾರ್ಯದರ್ಶಿ ಕಸ್ತೂರಿ ಪಂಜ, ಜಿಲ್ಲಾ ಕಾರ್ಯಾಲಯ ಕಾರ್ಯದರ್ಶಿ ಸುಕೇಶ್ ಶೆಟ್ಟಿ ಶಿರ್ತಾಡಿ, ಕೆ. ಭುವನಾಭಿರಾಮ ಉಡುಪ ಮೊಕುಲು ಇತ್ತೆರ್.

ಮೋದಿ ಬನ್ನಗ 5 ಲಕ್ಷ ಜನ ಸೇರುನ ಅಂದಾಜಿ

ಸೆ.2 ತಾರೀಕ್ ಗ್ ಪ್ರಧಾನಿ ನರೇಂದ್ರ ಮೋದಿ ಕುಡ್ಲದ ಎನ್‌ಎಂಪಿಟಿಡ್ ಮಧ್ಯಾಹ್ನ 3 ಗಂಟೆಗ್ ಕೆಲವು ಯೋಜನೆಲೆಗ್ ಶಿಲಾನ್ಯಾಸ ಮಲ್ತ್ ದ್ ಬೊಕ್ಕ ಕೂಳೂರುದ ಗೋಲ್ಡ್ ಫಿಂಚ್ ಸಭಾಂಗಣೊಡು ನಡಪುನ ಬಿಜೆಪಿ ಕಾರ್ಯಕರ್ತೆರ್ನ ಮಾಮಲ್ಲ ಸಮಾವೇಶಡ್ ಪಾಲ್ ಪಡೆವರೆ ಉಲ್ಲೆರ್. ಅವುಲು ೫ ಲಕ್ಷ ಜನ ಸೇರುನ ನಿರೀಕ್ಷೆ ಉಂಡು. ನಮ್ಮ ಕ್ಷೇತ್ರೊರ್ದು 15 ಸಾರ ಕಾರ್ಯಕರ್ತೆರ್ ಪಾಲ್ ಪಡೆವುನ ನಿರೀಕ್ಷೆ ಉಂಡು ಪಂದ್ ಶಾಸಕೆರ್ ಉಮಾನಾಥ ಕೋಟ್ಯಾನ್ ತೆರಿಪಾಯೆರ್.