ಬೊಲ್ತೆರ್ ಸುದ್ದಿ | Belthangady News

ಶ್ರೀ ಮಹಾಲಿಂಗೇಶ್ವರ ದೇವಳ್ಯದ ಭಜನಾ ಸಮಿತಿರ್ದ್ 50 ಜೋಕ್ಲೆಗ್ ಉಚಿತ ಭಜನಾ ತರಬೇತಿ

ಮದ್ದಡ್ಕ: ತುಮಕೂರು ಜಿಲ್ಲೆದ ಶಿರಾ ತಾಲೂಕುಡು ಶ್ರೀ ಮಹಾಲಿಂಗೇಶ್ವರ ದೇವಳ್ಯದ ಭಜನಾ ಸಮಿತಿದ ಮುತಾಲಿಕೆಡ್ ಉಚಿತ ಭಜನಾ ತರಬೇತಿ ಶಿಬಿರದ ಉದಿಪನ ಸೆ.2 ಶನಿವಾರದಾನಿ ನಡತ್‌ಂಡ್.

ತುಮಕೂರು ಜಿಲ್ಲೆದ ಶಿರಾ ತಾಲೂಕುಡು ಸುರುತ ಸರ್ತಿ 3 ತಿಂಗೊಲುದ ಭಜನಾ ತರಬೇತಿ ಸುರು ಮಲ್ತಿನ ಬೋಲ್ತೆರ್ ತಾಲೂಕುದ ಮದ್ದಡ್ಕ ಶ್ರೀ ಮಹಾಲಿಂಗೇಶ್ವರ ದೇವಸ್ಥಾನದ ಭಜನಾ ಸಮಿತಿದ ಗುರ್ಕಾರೆರಾಯಿನ ಸಂದೇಶ್ ಅನಿಲ ಮೇರ್ ಮೂಜರೆ ಸಾವಿರ ಜೊಕ್ಲೆಗ್ ಭಜನಾ ತರಬೇತಿದಾರೆರಾದ್ ಕೆಲಸ ಮಲ್ತೊಂದು ಇತ್ತ್ದ್, ಮೇರ್ ತುಮಕೂರು ಜಿಲ್ಲೆದ ಶಿರಾ ಪನ್ಪುನಲ್ಪ ಸುಮಾರು 50 ಜೊಕ್ಲೆಗ್ ಉಚಿತ ಭಜನಾ ತರಬೇತಿನ್ ಕೊರಿಯೆರ್.

ಬೆಳಾಲು ಹಾ.ಉ.ಸ.ಸಂಘದ ವೋಟ್; ಬಿಜೆಪಿ ಬೆಂಬಲಿತ ನಿರ್ದೇಶಕೆರ್ ಆಯ್ಕೆ

ಬೋಲ್ತೆರ್: ಬೆಳಾಲು ಹಾ.ಉ.ಸ. ಸಂಘದ ಆಡಳಿತ ಮಂಡಳಿಗ್ ಸೆ.3 ದಾನಿ ನಡತ್ತಿನ ವೋಟ್ ಡ್ ಮಾತಾ 13 ಸೀಟ್ ಲ ಬಿಜೆಪಿ ಬೆಂಬಲಿತ ಸದಸ್ಯೆರ್ ಗೆಂದ್ ದೆರ್.

ಬಿಜೆಪಿ ಬೆಂಬಲಿತ ಸದಸ್ಯೆರಾಯಿನ ಜಾರಪ್ಪ ಗೌಡ, ನಾರಾಯಣ, ಪ್ರಭಾಕರ ಗೌಡ, ಬೊಮ್ಮನ ಗೌಡ, ಮಾದವ, ಯಶವಂತ ಬಣಂದೂರು, ಸೀನಪ್ಪ ಗೌಡ, ಶೀಲಾ ಬಿ.ಎಸ್, ವೇದಾವತಿ, ರೋಹಿತಾಕ್ಷ, ಜಯ ನಾಯ್ಕ, ಸುಂದರ ಮೊಕುಲು ಆಯ್ಕೆಯಾತೆರ್.

ಬೋಲ್ತೆರ್: ಇನೋವಾ ಕಾರ್ ಬೊಕ್ಕ ಬೈಕ್ ಆಕ್ಸಿಡೆಂಟ್

ಬೋಲ್ತೆರ್: ಬೋಲ್ತೆರ್ ತಾಲೂಕುದ ಕಾಪಿನಡ್ಕಡ್ ಇನೋವಾ ಕಾರ್ ಬೊಕ್ಕ ಬೈಕ್ ಆಕ್ಸಿಡೆಂಟ್ ಡ್ ಬೈಕ್ ಸವಾರೆ ತೀರ್‌ಪೋಯಿನ ಘಟನೆ ಇನಿ  ನಡತ್‌ಂಡ್.

ತೀರ್‌ಪೋಯಿನ ವ್ಯಕ್ತಿ ಕಾರ್ಲ ತಾಲೂಕುದ ಈದು ಗ್ರಾಮದ ಸುಧೀರ್ ಪಂದ್ ತೆರಿದ್ ಬೈದುಂಡು.

ಬೋಲ್ತೆರ್‌ರ್ದ್ ಒಡಿಪು ಸೈಡ್‌ಗ್ ಪೋವೊಂದು ಇತ್ತಿನ ಇನೋವಾ ಕಾರ್ ಬೊಕ್ಕ ಅರ್ವರ್ದ್ ಬೋಲ್ತೆರ್ ಗ್ ಬರೋಂದಿತ್ತಿನ ಬೈಕ್ ದ ನಡುಟು ಅಪಘಾತ ಆದ್ ಡಿಕ್ಕಿ ಆಯಿನ ರಭಸಗ್ ಬೈಕ್ ಸವಾರೆ ರೋಡುಗ್ ಬೂರ್ದು ಗಂಭೀರ ಗಾಯ ಆದಿತ್‌ಂಡ್.

ಸೌಜನ್ಯಗ್ ನ್ಯಾಯೊಗಾದ್ ಬೋಲ್ತೆರ್ ಡ್ ಮಲ್ಲ ಪ್ರತಿಭಟನೆ

ಬೋಲ್ತೆರ್: ಪ್ರಜಾಪ್ರಭುತ್ವ ವೇದಿಕೆ ಬೊಕ್ಕ ರಾಷ್ಟ್ರೀಯ ಹಿಂದೂ ಜಾಗರಣ ವೇದಿಕೆ ಮುತಾಲಿಕೆಡ್ ಸೌಜನ್ಯ ಅತ್ಯಾಚಾರ ಬೊಕ್ಕ ಕೊಲೆ ಪ್ರಕರಣ ನ್ಯಾಯಗಾದ್ ಬೃಹತ್ ಪ್ರತಿಭಟನಾ ಸಭೆ ಸೆ.3 ಐತಾರ ದಾನಿ ಮಿನಿ ವಿಧಾನ ಸೌದದ ಎದುರು ನಡತ್ಂಡ್.

ಆದಿಚುಂಚನ ಗಿರಿ ಕಾವೂರು ಶಾಖಾ ಮಠತ್ತ ಶ್ರೀ ಧರ್ಮಪಾಲನಾಥ ಸ್ವಾಮೀಜಿ ಸಭೆತ ಉದಿಪನ ಮಲ್ತೆರ್.

ಈ ಪೊರ್ತುಡು ಶ್ರೀ ರಾಮ ಸೇನೆದ ಮುಖ್ಯಸ್ಥೆರಾಯಿನ ಪ್ರಮೋದ್ ಮುತಾಲಿಕ್, ಮಹೇಶ್ ಶೆಟ್ಟಿ ತಿಮರೋಡಿ, ಸಾಮಾಜಿಕ ಹೋರಾಟಗಾರೆರ್ ಗಿರೀಶ್ ಮಟ್ಟೆಣ್ಣನವರ್, ಸಾಮಾಜಿಕ ಹೋರಾಟಗಾರ್ತಿ ಪ್ರಸನ್ನ ರವಿ, ಮಾನವ ಹಕ್ಕು ಆಯೋಗದ ಕಾರ್ಯದರ್ಶಿ ಗೀತಾ, ಸೌಜನ್ಯನ ಅಮ್ಮ ಕುಸುಮಾವತಿ, ವಾಗ್ಮಿ, ಬರವುಗಾರೆ ತಮ್ಮಣ್ಣ ಶೆಟ್ಟಿ, ಪರಶುರಾಮ್, ಹೈಕೋರ್ಟ್ ವಕೀಲೆರ್ ಶ್ರೀನಿವಾಸ್, ಹರೀಶ್ ಬರಿಮೇಲು, ಸಂದೀಪ್, ಮೋಹಿತಾ ಕುಮಾರಿ ಸೇರ್ದ್ ಮಸ್ತ್ ಜನ ಪೊರುಂಬಾಟೊಡು ಪಾಲ್ ಪಡೆದಿತ್ತೆರ್.

ಬೋಲ್ತೆರ್: ಪ್ರತಿಭಟನೆದ ಹಿನ್ನಲೆ ಗಾಡಿಲೆನ ಸಂಚಾರಡ್ ಬದಲಾವಣೆ

ಬೋಲ್ತೆರ್: ಸೌಜನ್ಯ ಪ್ರಕರಣಗ್ ಸಂಬoಧ ಪಟ್ಟಿನಂಚ ಇನಿ ಸೆ.3 ದಾನಿ ನಡಪುನ ಪ್ರತಿಭಟನಾ ಸಭೆಗ್ ಬೋಲ್ತೆರ್ ಪೇಟೆಡ್ ಭಾರಿ ಜನಸಂಖ್ಯೆ ಆವು ಪಂದ್ ರೋಡುಡ್ ಅಡೆ ತಡೆ ಆಪುನ ಸಾಧ್ಯತೆ ಉಂಡು.

ಈ ಕಾರಣಗ್ ಬೋಲ್ತೆರ್ ಪೇಟೆರ್ದ್ ಕಡೂರು-ಬಂಟ್ವಾಳ ಮಾರ್ಗಡ್ ಪೋಪುನ ಮಾತಾ ಗಾಡಿಲೆನ್ ಕಾಂಡೆ 9 ಗಂಟೆರ್ದ್ ಬಯ್ಯ 5 ಗಂಟೆ ಮುಟ ಕೊಯ್ಯೂರು ಕ್ರಾಸ್ ಆದ್ ಅದ್ರುಪೆರಾಲ್ ಮುಖೇನ ಪರಪ್ಪು ಗೇರುಕಟ್ಟೆಯಾದ್ ಕುಡ್ಲಗ್ ಪೊವೆರೆ ಸೂಚನೆ ಕೊರ್ತೆರ್. ಅಂಚನೆ ಕುಡ್ಲರ್ದ್ ಉಜಿರೆ ಗ್ ಬರ್ಪುನ ಮಾತಾ ಗಾಡಿಲು ಗುರುವಾಯನಕೆರೆ, ಉಬಾರ್ ರೋಡುದ ಮುಖೇನ ಪರಪ್ಪು ಕ್ರಾಸ್ ಆದ್ ಅದ್ರುಪೆರಾಲ್ ಆದ್ ಪೊವೆರೆ ಸೂಚನೆ ಕೊರ್ತೆರ್.

ಎಲ್ಯ ಎಲ್ಯ ಗಾಡಿಲು ಚರ್ಚ್ ಕ್ರಾಸ್‌ರ್ದ್ ಕನ್ನಾಜೆ, ಪಡ್ಲಾಡಿ, ಲಾಯಿಲ ಆದ್ ಉಜಿರೆ ಆದ್ ಪೊಪುನಂಚ ಮಾರ್ಗ ಬದಲಾವಣೆ ಮಲ್ತ್ ದ ಪಂದ್ ಅಪರ ಜಿಲ್ಲಾಧಿಕಾರಿ ಆದೇಶ ಕೊರ್ತೆರ್.

ಬೋಲ್ತೆರ್ ಡ್ ಎಲ್ಲೆ ಸೌಜನ್ಯಗ್ ನ್ಯಾಯೊಗಾದ್ ಮಲ್ಲ ಪ್ರತಿಭಟನಾ ಸಭೆ

ಬೋಲ್ತೆರ್: ಪ್ರಜಾಪ್ರಭುತ್ವ ವೇದಿಕೆ ಬೊಕ್ಕ ರಾಷ್ಟ್ರೀಯ ಹಿಂದೂ ಜಾಗರಣ ವೇದಿಕೆ ಬೋಲ್ತೆರ್ ದ ಮುತಾಲಿಕೆಡ್ ಮಹೇಶ್ ಶೆಟ್ಟಿ ತಿಮರೋಡಿ ಮೆರೆನ ನೇತೃತ್ವಡ್ ಸೌಜನ್ಯ ಕೇಸ್ ನ್ ಪಿರ ತನಿಖೆ ಮಲ್ಪೊಡು ಪಂದ್ ಬೃಹತ್ ಪ್ರತಿಭಟನಾ ಸಭೆ ಸೆ.3 ಐತಾರ ಬೋಲ್ತೆರ್ ದ ತಾಲೂಕು ಮೈದಾನಡ್ ನಡಪರೆ ಉಂಡು.

ಈ ಪ್ರತಿಭಟನೆಗ್ ಭಾರಿ ತಿಕ್ಕು0ಡು ಪನ್ಪುನ ನಿರೀಕ್ಷೆಡ್ ಉಲ್ಲೆರ್. ಅಂಚನೆ ಮಲ್ಲ ಮಲ್ಲ ಗಣ್ಯ ವ್ಯಕ್ತಿಲು, ಬೊಕ್ಕ ಸ್ವಾಮೀಜಿಲು, ಕೆಲವು ಜನಪರ ಸಂಘಟನೆಲು ಈ ಪ್ರತಿಭಟನೆಡ್ ಪಾಲ್ ಪಡೆಯೆರೆ ಉಲ್ಲೆರ್. ಸೌಜನ್ಯ ಪರ ಹೋರಾಟಗಾರೆರ್ ಭಾರಿ ಜನಸಂಖ್ಯೆಡ್ ಸೇರಿಯೆರೆ ಉಲ್ಲೆರ್ ಪಂದ್ ತೆರಿದ್ ಬೈದ್ಂಡ್.

ಬೋಲ್ತೆರ್: ತುಳುನಾಡ್ ಒಕ್ಕೂಟ ಸಂಘಟನೆದ ಯುವ ಘಟಕಗ್ ಪೊಸ ಪದಾಧಿಕಾರಿಲೆನ ಆಯ್ಕೆ

ಬೋಲ್ತೆರ್: ತುಳುನಾಡ್ ಒಕ್ಕೂಟ ಸಂಘಟನೆದ ಕಾರ್ಯಕರ್ತೆನ ಸಭೆ ಇಂಚಿಪಗ್ ಬೋಲ್ತೆರ್ ಡ್ ನಡತ್‌ಂಡ್. ಸಭೆತ ಗುರ್ಕಾಮೆನ್ ಬೋಲ್ತೆರ್ ತುಳುನಾಡ್ ಒಕ್ಕೂಟದ ಗುರ್ಕಾರೆ ರಾಜೇಶ್ ಕುಲಾಲ್ ಬೈರೊಟ್ಟು ವಹಿಸಾದ್ ಇತ್ತೆರ್. ಈ ಪೊರ್ತುಡು ತುಳುನಾಡ್ ಒಕ್ಕೂಟ ಬೋಲ್ತೆರ್ ತಾಲೂಕುದ ಯುವ ಘಟಕದ ಪದಾಧಿಕಾರಿಲೆನ್ ಆಯ್ಕೆ ಮಲ್ತೆರ್.

ಗುರ್ಕಾರೆರಾದ್ ಆಕಾಶ್ ಪೂಜಾರಿ ಗೇರುಕಟ್ಟೆ, ಉಪಾಧ್ಯಕ್ಷರಾದ್ ಪುರಂದರ ಗೌಡ ಶಿರ್ಲಾಲು, ಕಾರ್ಯದರ್ಶಿಯಾದ್ ಚಂದ್ರಹಾಸ ಕುಂಬಾರ ಬಂದಾರು, ಜೊತೆ ಕಾರ್ಯದರ್ಶಿಯಾದ್ ರಮೇಶ್ ಸಾಲಿಯಾನ್, ಕೋಶಾಧಿಕಾರಿಯಾದ್ ಅಶ್ವತ್ ಕುಲಾಲ್ ಅರ್ವ ಆಯ್ಕೆ ಆಯೆರ್. ಬೊಕ್ಕ ಪತ್ತ್ ಜನತ ಕಾರ್ಯಕಾರಿ ಸಮಿತಿನ್ ರಚನೆ ಮಲ್ತೆರ್. ಸಂಘಟನೆದ ಸಂಸ್ಥಾಪಕೆರಾಯಿನ ಶೈಲೇಶ್ ಆರ್. ಜೆ. ಪೊಸ ಯುವ ಘಟಕಗ್ ಸಂಘಟನೆದ ಧ್ಯೇಯ, ಉದ್ದೇಶದ ಬಗ್ಗೆ ವಿವರಿಸಾದ್, ತುಳು ಚಳುವಳಿನ್ ದುಂಬು ಕೊನಪುನ ರೀತಿ, ಪ್ರಾದೇಶಿಕ ಚಳುವಳಿ ಯಶಸ್ಸ್ ಆವರೆ ಯುವ ಘಟಕ ಯುವಜನತೆರ್ನ ಒಟ್ಟಿಗೆ ಕೊಂಡಿಯಾದ್ ಕೆಲಸ ಮಲ್ಪೊಡು ಪಂದ್ ತೆರಿಪಾಯೆರ್. ಬೊಕ್ಕ ಪೊಸ ಯುವ ಘಟಕದ ಪದಾಧಿಕಾರಿಲೆಗ್ ಸೊಲ್ಮೆ ಸಂದಾಯೆರ್.

ಬೋಲ್ತೆರ್ ತಾಲೂಕು ಘಟಕದ ಪ್ರಧಾನ ಕಾರ್ಯದರ್ಶಿ ರಾಜು ಬಿ.ಎಚ್. ಲೇಸ್ ಗ್ ಎದ್ಕೊಂದು, ಸುದಾರಿಕೆ ಮಲ್ತ್, ಸೊಲ್ಮೆ ಸಂದಾಯಿತ ಮಲ್ತೆರ್. ಈ ಪೊರ್ತುಡು ತುಳುನಾಡ್ ಒಕ್ಕೂಟ ಸಂಘಟನೆದ ಪದಾಧಿಕಾರಿಲು ಇತ್ತೆರ್.