ಕುಡ್ಲದ ಸುದ್ದಿ | Mangalore News

ಆ.9 : ವರಕೋಡಿದ ಬಾಕ್ಯಾರ್‌ ಕಂಡೊಡು ಕೆಸರ್‌ಡೊಂಜಿ ದಿನ

Jul 28, 2026

ಬಡಗಬೆಳ್ಳೂರು : ಯಕ್ಷ ಕಲಾ ರಂಗ (ರಿ) ವರಕೋಡಿ ಬಡಗಬೆಳ್ಳೂರು ಮೊಕ್ಲೆನ ಆಶ್ರಯೊಡು ಆಗಸ್ಟ್ 9 ಐತಾರ ಕಾಂಡೆ 9.30 ಗಂಟೆರ್ದ್ ಬಯ್ಯ 5 ಗಂಟೆ ಮುಟ್ಡ ವರಕೋಡಿ ಬಾಕಿಮಾರ್ ಕಂಡೊಡು ಕೆಸರು ಗದ್ದೆ ಕ್ರೀಡಾ ಕೂಟ “ಕೆಸರ್‌ಡ್ ಒಂಜಿ ದಿನ” ಲೇಸ್ ನಡಪರೆ ಉಂಡು.
ವರಕೋಡಿ ದಿ.ವಿಶ್ವಂಭರ ಭಂಡಾರಿ ವೇದಿಕೆಡ್ ಕಾಂಡೆ ಲೇಸ್ ಉದಿಪನ ಆದ್ ಬಯ್ಯಡ್ ನಡಪುನ ಮುಗಿತಲದ ಲೇಸ್‌ಡ್ ಇನಾಮು ಪಟ್ಟರೆ ಉಂಡು. ಈ ಲೇಸ್‌ಡ್ ಮಾತೆರ್ಲ ಪಾಲ್ ಪಡೆವೊಡು ಪಂದ್ ಯಕ್ಷ ಕಲಾ ಸಂಘದ ಅಧ್ಯಕ್ಷೆರ್ ಬೊಕ್ಕ ಸರ್ವ ಸದಸ್ಯೆರ್ ಬಿನ್ನಾಪು ಮಲ್ದೆರ್.

ಊರ್ದ ಸುದ್ದಿ Regional News ಕುಡ್ಲದ ಸುದ್ದಿ | Mangalore News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ರಪಕ್ಕ ಸುದ್ದಿ Flash News

ಟೀಮ್ ಸಂರಕ್ಷಣಾ ವತಿರ್ದ್ 27ನೇ ಕಾರ್ಗಿಲ್ ವಿಜಯ್ ದಿವಸ್ ಆಚರಣೆ

Jul 27, 2026

ಕುಡ್ಲ :ಟೀಮ್ ಸಂರಕ್ಷಣಾ ವತಿರ್ದ್ 27ನೇ ಕಾರ್ಗಿಲ್ ವಿಜಯ್ ದಿವಸ್ ಅಂಗವಾದ್ ಕದ್ರಿಡ್ ಇಪ್ಪುನ ಯುದ್ಧ ಸ್ಮಾರಕಡ್ ದೇಶಗಾದ್ ಪ್ರಾಣತ್ಯಾಗ ಮಲ್ತಿನ ವೀರ ಯೋಧೆರೆಗ್ ಪುರ್ಪ ಸಂದೈತ ಮಲ್ಪುನ ಒರುಟು ಗೌರವ ನಮನ ಸಂದಾಯೆರ್ .

ಕಾರ್ಯಕ್ರಮಡ್ ಭಾರತೀಯ ವಾಯುಪಡೆತ ಮಾಜಿ ಸಾರ್ಜೆಂಟ್ ಅಂಚೆನೆ ಭಾರತದ ನಿಯಂತ್ರಕ ಬೊಕ್ಕ ಮಹಾಲೆಕ್ಕ ಪರಿಶೋಧಕರ (C&AG) ಕಚೇರಿದ ನಿವೃತ್ತ ಹಿರಿಯ ಲೆಕ್ಕಪರಿಶೋಧಕೆರ್ ಪ್ರಭಾಕರ ಗುಂಡೇರ ಮೇರ್ ಮಲ್ಲ ಬಿನ್ನೆರಾದ್ ಪಾಲ್ ಪಡೆದ್ ಕಾರ್ಗಿಲ್ ವಿಜಯ್ ದಿವಸದ ಮಹತ್ವ, ಭಾರತೀಯ ಸೈನಿಕೆರೆನ ಶೌರ್ಯ, ತ್ಯಾಗ ಅಂಚೆನೆ ದೇಶಭಕ್ತಿದ ಬಗೆಟ್ ಪಾತೆರಿಯೆರ್.
ಯುವಜನತೆ ದೇಶದ ಭದ್ರತೆ ಬೊಕ್ಕ ರಾಷ್ಟ್ರಪ್ರೇಮದ ಮೌಲ್ಯಲೆನ ಉಡಲ್ ಡ್ ದಿಂಜಾವೊಡು ಪಂಡೆರ್.

ಈ ಪೊರ್ತುಡು ಟೀಮ್ ಸಂರಕ್ಷಣದ ಪದಾಧಿಕಾರಿಲು ಪಾಲ್ ಪಡೆದ್ ದೇಶದ ರಕ್ಷಣೆಗಾದ್ ತನ್ನ ಪ್ರಾಣತ್ಯಾಗ ಮಲ್ತಿನ ವೀರ ಯೋಧೆರೆಗ್ ಮೌನಾಚರಣೆ ಮಲ್ತ್ ದ್ ಗೌರವ ನಮನ ಸಂದಾಯೆರ್ .

ಊರುದ ಕೆಲಸ | Regional Jobs ಊರ್ದ ಸುದ್ದಿ Regional News ಕುಡ್ಲದ ಸುದ್ದಿ | Mangalore News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ರಪಕ್ಕ ಸುದ್ದಿ Flash News

ಬಂಟ್ಸ್ ಹಾಸ್ಟೆಲ್ ಶ್ರೀ ಸಿದ್ಧಿವಿನಾಯಕ ಪ್ರತಿಷ್ಠಾನದ ಗಣೇಶೋತ್ಸವ

Jul 16, 2026

ಗಣಪತಿ ಮೂರ್ತಿಗ್ ಮುರ್ತ, ಕಚೇರಿ ಉದಿಪನ

ಕುಡ್ಲ : ಬಂಟರ ಯಾನೆ ನಾಡವರ ಮಾತೃ ಸಂಘ, ಶ್ರೀ ಸಿದ್ಧಿ ವಿನಾಯಕ ಪ್ರತಿಷ್ಠಾನ ಬೊಕ್ಕ ಸಾರ್ವಜನಿಕ ಶ್ರೀ ಗಣೇಶೋತ್ಸವ ಸಮಿತಿದ ಆಶ್ರಯಡ್ ಬಂಟ್ಸ್ ಹಾಸ್ಟೆಲ್‌ಡ್ ಸೆಪ್ಟಂಬರ್ 14 ರ್ದ್ 16 ತಾರೀಕ್ ಮುಟ್ಟ 20ನೇ ವರ್ಷದ ಸಾರ್ವಜನಿಕ ಗಣೇಶೋತ್ಸವ ನಡಪರೆ ಇತ್ತ್‌ದ್, ಈ ಹಿನದನೆಲೆಡ್ ಜು. 15 ಕ್ಕ್ ಶರವು ರಾಧಾಕೃಷ್ಣ ದೇವಸ್ಥಾನಡ್ ಗಣಪತಿ ದೇವೆರ್‌‌ನ ಮೂರ್ತಿ ರಚನೆಗ್ ಮುಹೂರ್ತ ನಡತ್ಂಡ್.
ಶ್ರೀ ಸಿದ್ಧಿವಿನಾಯಕ ಪ್ರತಿಷ್ಠಾನದ ಮ್ಯಾನೇಜಿಂಗ್ ಟ್ರಸ್ಟಿ ಅಜಿತ್ ಕುಮಾರ್ ರೈ ಮಾಲಾಡಿ, ಡಾ. ಆಶಾಜ್ಯೋತಿ ರೈ ದಂಪತಿಲು ಪೂಜಾ ವಿಧಿವಿಧಾನಡ್ ಪಾಲ್ ಪಡೆಯೆರ್. ಬೊಕ್ಕ ಶ್ರೀ ಶರವು ಮಹಾಗಣಪತಿ ದೇವಸ್ಥಾನಡ್ ಪೂಜೆ ಸಂದಾಯೆರ್.
ಶ್ರೀ ಸಿದ್ಧಿವಿನಾಯಕ ಪ್ರತಿಷ್ಠಾನದ ಟ್ರಸ್ಟಿಲಾಯಿನ ನಿಟ್ಟೆಗುತ್ತು ರವಿರಾಜ್ ಶೆಟ್ಟಿ, ಕೃಷ್ಣಪ್ರಸಾದ್ ರೈ, ಶೆಡ್ಡೆ ಮಂಜುನಾಥ ಭಂಡಾರಿ, ಬಾಲಕೃಷ್ಣ ಶೆಟ್ಟಿ ಲಾನ್ಸ್ ವೇ, ಗಣೇಶೋತ್ಸವ ಸಮಿತಿದ ಅಧ್ಯಕ್ಷೆರ್ ಜಯಶೀಲ ಅಡ್ಯಂತಾಯ ಅಡ್ಯಾರ್ ಗುತ್ತು, ಬಂಟರ ಯಾನೆ ನಾಡವರ ಮಾತೃ ಸಂಘದ ಪ್ರಧಾನ ಕಾರ್ಯದರ್ಶಿ ಎಮ್ ಕರುಣಾಕರ ಶೆಟ್ಟಿ, ಕೋಶಾಧಿಕಾರಿ ಸಿಎ ರಾಮ್ ಮೋಹನ್ ರೈ, ಉಪಾಧ್ಯಕ್ಷೆರ್ ಕಾವು ಹೇಮನಾಥ ಶೆಟ್ಟಿ, ಗಣೇಶೋತ್ಸವ ಸಮಿತಿದ ಪದಾಧಿಕಾರಿಗಳು, ಬೇತೆ ಬೇತೆ ಬಂಟರ ಸಂಘಲೆನ ಅಧ್ಯಕ್ಷೆರ್ ಇತ್ತೆರ್.

ಕಚೇರಿ ಉದಿಪನ
ಗಣೇಶೋತ್ಸವ ಸಮಿತಿದ ಕಚೇರಿ ಉದ್ಘಾಟನೆ ಬಂಟ್ಸ್ ಹಾಸ್ಟೇಲ್‌ದ ಮಾತೃಸಂಘದ ಕಚೇರಿದ ಕೈತಲ್ ನಡತ್ಂಡ್ .
ಉದ್ಘಾಟನೆನ್ ಶಶಿಕಲಾ ಸುಂದರ್ ಶೆಟ್ಟಿ, ಶಾಲಿನಿ ಎಸ್ ಶೆಟ್ಟಿ, ಸಂಗೀತಾ ಗಣೇಶ್ ಶೆಟ್ಟಿ, ಮಲ್ಲಿಕಾ ಪ್ರಸಾದ್ ಶೆಟ್ಟಿ, ಶಶಿ ಸುಭಾಷ್ ರೈ ನೆರವೇರಿಸಾಯೆರ್.
ಶ್ರೀ ಗಣೇಶೋತ್ಸವ ಸಮಿತಿದ ಪ್ರಧಾನ ಕಾರ್ಯದರ್ಶಿ ಪಿ ಸದಾಶಿವ ಶೆಟ್ಟಿ, ಸ್ವಾಗತ ಮಲ್ತ್‌ದ್ ಕಾರ್ಯಕ್ರಮ ನಿರೂಪಣೆ ಮಲ್ತೆರ್. ಬಂಟರ ಮಾತೃ ಸಂಘದ ಕಾರ್ಯಕಾರಿ ಸಮಿತಿ ಸದಸ್ಯೆರ್ ಬಿಜೈ ಜಗದೀಶ್ ಶೆಟ್ಟಿ ಸೊಲ್ಮೆ ಸಂದಾಯೆರ್.

ಊರ್ದ ಸುದ್ದಿ Regional News ಕುಡ್ಲದ ಸುದ್ದಿ | Mangalore News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ಫ್ಲ್ಯಾಶ್ ನ್ಯೂಸ್ / ರಪಕ್ಕ ಸುದ್ದಿ | Flash News ಮುಲ್ಕಿ ರಾಜಕೀಯ ಸುದ್ದಿ | Political News

ಮುಲ್ಕಿ- ಮೂಡಬಿದ್ರೆ ವಿಧಾನಸಭಾ ಕ್ಷೇತ್ರದ ಕಾಂಗ್ರೆಸ್ ಪ್ರಚಾರ ಸಮಿತಿ ಅಧ್ಯಕ್ಷೆರಾದ್ ಎಚ್. ವಸಂತ ಬರ್ನಾಡ್ ನೇಮಕ

Jul 16, 2026

ಕಾಂಗ್ರೆಸ್ ಪಕ್ಷದ ಪ್ರಚಾರ ಸಮಿತಿದ ಅಧ್ಯಕ್ಷೆರ್, ಮಾಜಿ ಸಚಿವೆರ್ ವಿನಯ್ ಕುಮಾರ್ ಸೊರಕೆ ಮೇರ್ ಮುಲ್ಕಿ ಮೂಡಬಿದ್ರೆ ವಿಧಾನಸಭಾ ಕ್ಷೇತ್ರದ ಪ್ರಚಾರ ಸಮಿತಿ ಅಧ್ಯಕ್ಷೆರಾದ್ ಎಚ್ ವಸಂತ ಬರ್ನಾಡ್ ಮೆರೆನ್ ನೇಮಕ ಮಲ್ತ್‌ದ್ ಆದೇಶ ಕಡಪಾದೆರ್.
ಕರ್ನಾಟಕ ಪ್ರದೇಶ ಕಾಂಗ್ರೆಸ್ ಸಮಿತಿ ಅಧ್ಯಕ್ಷೆರ್ ಬಿ ಕೆ ಹರಿಪ್ರಸಾದ್ ಮೆರೆನ ಮಾರ್ಗದರ್ಶನಂಚ ಕ್ಷೇತ್ರದ ಮಾಜಿ ಸಚಿವೆರಾಯಿನ ಕೆ. ಅಭಯ್ ಚಂದ್ರ ಜೈನ್ ಬೊಕ್ಕ ಕೆಪಿಸಿಸಿ ಪ್ರಧಾನ ಕಾರ್ಯದರ್ಶಿ ಮಿಥುನ್ ಎಂ ರೈ, ದಕ್ಷಿಣ ಕನ್ನಡ ಜಿಲ್ಲಾ ಕಾಂಗ್ರೆಸ್ ಪ್ರಚಾರ ಸಮಿತಿ ಅಧ್ಯಕ್ಷೆರಾಯಿನ ಡೆನ್ನಿಸ್ ಡಿಸಿಲ್ವಾ ಮೊಕ್ಲೆನ ಶಿಫಾರಸ್‌ದ ಮಿತ್ತ್ ನನ ಬರ್ಪಿನ ಚುನಾವಣೆದ ದೃಷ್ಟಿಡ್ ಈ ನೇಮಕ ಮಲ್ದೆರ್.
ಕಾಲೇಜ್ ಜೀವನರ್ದಿಂಚಿಲ ನಾಯಕತ್ವದ ಗುಣ ಇತ್ತಿನ, ಕಾಲೇಜಿನ ವಿದ್ಯಾರ್ಥಿ ಸಂಘದ ಅಧ್ಯಕ್ಷೆರಾದ್, ಮುಲ್ಕಿ ಬ್ಲಾಕ್ ಯುವ ಕಾಂಗ್ರೆಸ್ ಕಾಂಗ್ರೆಸ್ ಕೋಶಾಧಿಕಾರಿಯಾದ್, ಜಿಲ್ಲಾ ಯುವ ಕಾಂಗ್ರೆಸ್ ಉಪಾಧ್ಯಕ್ಷೆರಾದ್ ಸುಮಾರ್ 12 ವರ್ಷ ನಿರಂತರವಾದ್ ಮುಲ್ಕಿ ಬ್ಲಾಕ್ ಕಾಂಗ್ರೆಸ್ ಪ್ರಧಾನ ಕಾರ್ಯದರ್ಶಿಯಾದ್, ಮಂಗಳೂರು ತಾಲೂಕು ರಾಜೀವ್ ಗಾಂಧಿ ಪಂಚಾಯತ್ ಸಂಘಟನ್ ಪ್ರಧಾನ ಕಾರ್ಯದರ್ಶಿಯಾದ್, ಕೆಪಿಸಿಸಿ ಕೋ ಆರ್ಡಿನೇಟರ್ ಆದ್, ಕುಂದಾಪುರ ಕ್ಷೇತ್ರದ ಕೋಟ ಬ್ಲಾಕ್ ಕಾಂಗ್ರೆಸ್ ಉಸ್ತುವಾರಿಯಾದ್, ಪಸ್ತುತ ಕೆಪಿಸಿಸಿ ಸದಸ್ಯೆರಾದ್ ಸೇವೆ ಮಲ್ತೊಂದುಲ್ಲೆರ್. ಅಂಚೆನೆ ರಾಜ್ಯಡ್ ನಡತಿನ ಬೇತೆ ಬೇತೆ ಕಡೆತ್ತ ಉಪ ಚುನಾವಣೆಡ್ ಸಹಾಯಕ ವೀಕ್ಷಕೆರಾದ್ ಸೇವೆ ಮಲ್ದಿನ ಅನುಭವ ಮೆರೆಗ್ ಉಂಡು.
ಮುಲ್ಕಿ ಮೂಡಬಿದ್ರೆ ಕ್ಷೇತ್ರಡ್ ನಡತಿನ ಓಟುದ ಕಂಟ್ರೋಲ್ ರೂಮ್ ಜವಾಬ್ದಾರಿನ್ ಪತೊಂದು ಚುನಾವಣೆ ಪ್ರಕ್ರಿಯೆಲೆನ್ ಸುಸೂತ್ರವಾದ್ ನಡಪಾಯಿನ ಅನುಭವ ಮೆರೆಗ್ ಉಂಡು.
ಮೆರೆಗ್ ಮುಲ್ಕಿ ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷೆರ್ ಮೋಹನ್ ಕೋಟ್ಯಾನ್ ಬೆದ್ರ ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷೆರ್ ಪ್ರವೀಣ್ ಕುಮಾರ್ ಜೈನ್ ಮೊಕುಲು ಮಾತ ಅಭಿನಂದನೆ ಸಂದಾದೆರ್.

ಊರ್ದ ಸುದ್ದಿ Regional News ಕುಡ್ಲದ ಸುದ್ದಿ | Mangalore News ಗೌಜಿ ಗಮ್ಮತ್ ದ ಸುದ್ದಿ | Events & Functions ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ರಪಕ್ಕ ಸುದ್ದಿ Flash News

ಜು.19: ಕಿನ್ನಿಗೋಳಿದ ತಾರಿಪಾಡಿ ಮಂಜಲ್ ಪಾದೆಡ್ ತುಲುನಾಡ ಕೆಸರ್ ದ ಗೊಬ್ಬು

Jul 15, 2026

ತಾರಿಪಾಡಿ ಜವನೆರೆ ಕಲ, ಪೊಂಜೋವುಲೆನ ಕಲತ್ತ ಮುತಾಲಿಕೆಡ್, ಕುಡ್ಲ ಎಗ್ಗೆದ ಜೈ ತುಲುನಾಡ್ ದ ಒಟ್ಟುಸೇರಿಗೆಡ್ ತೆಲಿಕೆ ನಲಿಕೆಡ್ ತುಲುನಾಡ ಮಣ್ಣ ಕಮ್ಮೆನ ಪಸರುನ ಗೊಬ್ಬುಕೂಟ ತುಲುನಾಡ ಕೆಸರ್ ದ ಗೊಬ್ಬು ಜು.19 ಐತಾರ ಕಿನ್ನಿಗೋಳಿದ ತಾರಿಪಾಡಿ ಮಂಜಲ್ ಪಾದೆಡ್ ನಡಪರೆ ಉಂಡು.

ಅಂಚೆನೆ ಈ ಲೇಸ್ ಡ್ ವಾಲಿಬಾಲ್, ಚೆಂಡ್ ಅಡಕ್ಕುನು (ತ್ರೋಬಾಲ್), ಬಲ್ಲ್ ಒಯಿಪುನ ಕೂಟೊದ ಪಂತೊಲು, ಲಿಂಬೆ ಚಮಚ, ಪಾಲೆ ಒಯಿಪುನು, ಕೊಪ್ಪರಿಗೆ ನಾಡುನು, ಕರ ದರ್ಪುನು, ಪಾಲೆಡ್ ಒಯಿಪುನು, ಮೂಜಿ ಕಾರಡ್ ಬಲಿಪುನು, ಪಿರ ಪಿರ ಬಲಿಪುನು, ಗಿರಿಗಿಟ್ ಬಲಿಪು, ಚೆಂಡ್ ಕೈಪಗಪುನು (ಬಾಲ್ ಪಾಸಿಂಗ್), ಬಲಿಪುನ ಪಂತೊ, ರಿಲೇ ಬೊಕ್ಕ 10 ವರ್ಷೊದ ತಿರ್ತ್ ದ ಆನ್ ಜೋಕುಲು, ಪೊಂಜೋಕುಲು ಒಟ್ಟಿಗೆ ಬಲಿಪುನು, 20 ವರ್ಷೊದ ತಿರ್ತ್ ದ ಆನ್ ಜೋಕುಲು, ಪೊಂಜೋಕುಲು ಬೇತೆ ಬೇತೆ ಬಲಿಪುನು, 20 ಮಿತ್ತ್ ದ ಆನ್ ಜೋಕುಲು, ಪೊಂಜೋಕುಲೆಗ್ ಬೇತೆ ಬೇತೆ ಬಲಿಪುನ ಪಂತೊ, ಅತ್ತಂದೆ ಉಪ್ಪು ಮುಡಿ, ತಪ್ಪಂಗಾಯಿ, ಸಬಿಸವಲ್ ತಾರಿಪಾಡಿ, ಎಳತ್ತೂರ್ ಜೈ ತುಲುನಾಡ್ (ರಿ.) ಕೂಟದಕ್ಲೆಗ್ ಮಾತ್ರ ಈ ಪಂತೊ ನಡಪರೆ ಉಂಡು.

ಈ ಲೇಸ್ ನ್ ತಾರಿಪಾಡಿ ಗುತ್ತು ನಂದಿನಿದ ಟಿ.ರಾಮಚಂದ್ರ ಎನ್ ಶೆಟ್ಟಿ ಉದಿಪನ‌ ಮಲ್ಪೆರೆ ಉಲ್ಲೆರ್. ತಾರಿಪಾಡಿ ಜವನೆರೆ ಕಲತ್ತ ಮಾರ್ಗದರ್ಶಕೆರ್ ಕುಶನ್ ಪೂಜಾರಿ ಲೇಸ್ ದ ಗುರ್ಕಾರ್ಮೆನ್ ಒಯಿಸೊನುವೆರ್. ಮಣಿಪಾಲ‌ ಒಡಿಪು ಸಮೂಹ ಶಿಕ್ಷಣ ಸಂಸ್ಥೆದ ಸಹ ಪ್ರಾಧ್ಯಾಪಕೆರ್ ಅರ್ಪಿತಾ ಪ್ರಶಾಂತ್ ಶೆಟ್ಟಿ ತುಲು ಕೊಡಿ ರಾಪಾಯೆರೆ ಉಲ್ಲೆರ್.

ಮಲ್ಲ ಬಿನ್ನೆರಾದ್ ಕಿನ್ನಿಗೋಳಿ ಪಟ್ಟಣ ಪಂಚಾಯಿತಿ ಗುರ್ಕಾರ್ಲು ಗುರುರಾಜ್ ಮಲ್ಲಿಗೆಯಂಗಡಿ, ತಾರಿಪಾಡಿ ಶ್ರೀ ಧರ್ಮ ಜಾರಂದಾಯ ಜುಮಾದಿ ಬಂಟ ದೈವಸ್ಥಾನದ ಗುರ್ಕಾರ್ಲು ಸುನಿಲ್ ಭಟ್ ತಾರಿಪಾಡಿ, ಭಾಸ್ಕರ ಶೆಟ್ಟಿ ತಾರಿಪಾಡಿ ಗುತ್ತು, ತಾಳಿಪಾಡಿ ಶ್ರೀ ಕೋರ್ದಬ್ಬು ದೈವಸ್ಥಾನದ ಗುರ್ಕಾರ್ಲು ಧನಪಾಲ ಶೆಟ್ಟಿ ತಾಳಿಪಾಡಿ ಗುತ್ತು, ನಿರ್ಮಾಪಕೆರ್, ನಟೆ ಶೋಧನ್ ಶೆಟ್ಟಿ ಪೇಟೆ ಮನೆ ಪಡ್ಡೆದ್ರ, ಪೊಂಪೆ ಪದವಿ ಕಾಲೇಜ್ ದ ಪ್ರಾಂಶುಪಾಲೆರ್ ಪುರುಷೋತ್ತಮ ಕೆವಿ, ನಾರಾಯಣ ಅಂಚನ್ ತಾರಿಪಾಡಿ, ಜೈ ತುಲುನಾಡ್ ಕೇಂದ್ರ ಸಮಿತಿದ ಗುರ್ಕಾರ್ಲು ಅಶ್ವತ್ ತುಲುವೆ, ಮಾಜಿ ತಾಲೂಕ್ ಪಂಚಾಯಿತಿ ಪದುಕೆರ್ ದಿವಾಕರ ಕರ್ಕೇರ, ಕಿನ್ನಿಗೋಳಿ ಪಟ್ಟಣ ಪಂಚಾಯಿತಿ ಪದುಕೆರ್ ಪ್ರಣೀಕ್ ಕಿನ್ನಿಗೋಳಿ ಪಾಲ್ ಪಡೆಯೆರೆ ಉಲ್ಲೆರ್.

ಜೈ ತುಲುನಾಡ್ (ರಿ.) ಕುಡ್ಲ ಎಗ್ಗೆದ ಗುರ್ಕಾರ್ಲು ರಾಜಶ್ರೀ ಚಂದ್ರಶೇಖರ್ ತುಲುನಾಡ್, ತಾರಿಪಾಡಿ ಯುನೈಟೆಡ್ ಫ್ರೆಂಡ್ಸ್ ದ ರಾಕೇಶ್ ಸುವರ್ಣ, ತಾರಿಪಾಡಿ ಜವನೆರೆ ಕಲತ್ತ ಗುರ್ಕಾರ್ಲು ಉದಯ ಪೂಜಾರಿ, ತಾರಿಪಾಡಿ ಪೊಂಜೋವುಲೆನ ಕಲತ್ತ ಗುರ್ಕಾರ್ಲು ಮೀರಾ ಪೂಜಾರಿ ಒತ್ತು ಪಾಲ್ ಪಡೆಯೆರೆ ಉಲ್ಲೆರ್.

ಪಡ್ಡೆದ್ರ : ಸ್ವರ್ಣ ಸೌಹಾರ್ದ ಸಹಕಾರಿ ಸಂಘದ ವತಿರ್ದ್ ಕಣ್ಣ್ ತಪಾಸಣೆ ಶಿಬಿರ

Jul 14, 2026

ಪಡ್ಡೆದ್ರ :ಸ್ವರ್ಣ ಸೌಹಾರ್ದ ಸಹಕಾರಿ ಸಂಘ ನಿಯಮಿತ ಬೊಕ್ಕ ಘಾಟ್ಗೆ ಕರ್ಕೇರ ಪವರ್ ಇಂಡಸ್ಟ್ರೀಸ್ ಪಡ್ಡೆದ್ರ,
ಜೆ ಸಿ ಐ ಸುರತ್ಕಲ್ ಬೊಕ್ಕ ಡಾಕ್ಟರ್ ಅಗರ್‌ವಾಲ್ ಕಣ್ಣಿನ ಆಸ್ಪತ್ರೆ, ಕುಡ್ಲ ಮೊಕ್ಲೆನ ಒಟ್ಟುಸೇರಿಗೆಡ್ ಉಚಿತ ಕಣ್ಣ್ ತಪಾಸಣಾ ಶಿಬಿರ ಜು.12 ಐತಾರ ಸ್ವರ್ಣ ಸೌಹಾರ್ದ ಸಹಕಾರಿ ಸಂಘದ ಪ್ರಧಾನ ಕಚೇರಿ, ಕರ್ಕೇರ ಟವರ್ಸ್, ಕಣ್ಣಂಗಾರ್ ಬೈಪಾಸ್ ಪಡ್ಡೆದ್ರ ಮೂಲು ನಡತ್ಂಡ್.
ಕಾರ್ಯಕ್ರಮದ ಅಧ್ಯಕ್ಷತೆನ್ ಸ್ವರ್ಣ ಸೌಹಾರ್ದ ಸಹಕಾರಿ ಸಂಘದ ಅಧ್ಯಕ್ಷೆರ್ ಶೇಖರ್ ಕೆ. ಕರ್ಕೇರ ವಹಿಸ್‌ದಿತ್ತೆರ್. ಜೆಸಿಐ ಸುರತ್ಕಲ್ ಅಧ್ಯಕ್ಷೆರ್ ಅಶೋಕ್ ಎನ್., ಕಾರ್ಯದರ್ಶಿ ರಾಹುಲ್, ಡಾಕ್ಟರ್ ಅಗರ್ವಾಲ್ ಕಣ್ಣಾಸ್ಪತ್ರೆದ ಕಸ್ಟಮರ್ ರಿಲೇಶನ್ ಆಫೀಸರ್ ಆಶೀಕ್ ಸಾಲ್ಯಾನ್, ಸಹಕಾರಿ ಸದಸ್ಯೆರಾಯಿನ ಗಿರಿಧರ ಪೂಜಾರಿ, ನಿರ್ದೇಶಕಿ ಪ್ರಿಯದರ್ಶಿನಿ ಬಿನ್ನೆರಾದ್ ಪಾಲ್ ಪಡೆದಿತ್ತೆರ್.
ಲೇಸ್‌ದ ಅಧ್ಯಕ್ಷತೆ ವಹಿಸ್‌ದಿತ್ತಿನ ಶೇಖರ್ ಕೆ ಕರ್ಕೇರ ಪಾತೆರ್ದ್, ಬ್ಯಾಂಕಿಂಗ್ ಕ್ಷೇತ್ರಗ್ ಮಾತ್ರ ಸೀಮಿತ ಆವಂದೆ ಸಾಮಾಜಿಕ ಕಳಕಳಿ ದೀವೊಂದು ಆರೋಗ್ಯ ಶಿಬಿರದ ಮುಕೇನ ಜನ ಸೇವೆ ಮಲ್ಪೊಡು ಪಂಡೆರ್.
ಕಾರ್ಯಕ್ರಮೊಗು ಐ ನೀಡ್ಸ್ ಮಾಲೀಕೆರಾಯಿನ ಎಚ್. ಯೋಗೀಶ್ ನಾಯಕ್ ಭೇಟಿ ಕೊರ್ದು ಎಡ್ಡೆಪ್ಪು ಬಯಕಿಯೆರ್.
ಒಟ್ಟು 95 ಜನ ಶಿಬಿರದ ಪ್ರಯೋಜನ ದೆತೊಂಡೆರ್. 40 ಜನಕ್ಕ್ ಕನ್ನಡಕದ ಅವಶ್ಯಕತೆ ಇತ್ತ್‌ದ್ ಅಕ್ಲೆಗ್ ಉಚಿತವಾದ್ ಕನ್ನಡಕ ಕೊರ್ಪಿನ ಭರವಸೆ ಕೊರಿಯೆರ್.
ಹಿರಿಯ ಸಿಬ್ಬಂದಿಲಾಯಿನ ಅಶ್ವಿನಿ ಬೊಕ್ಕ ದೀಪ ಪ್ರಾರ್ಥನೆ ಮಲ್ತೆರ್. ಪ್ರಭಾರ ಮುಖ್ಯ ಕಾರ್ಯನಿರ್ವಹಣಾಧಿಕಾ ಭಾಸ್ಕರ್ ಅಮೀನ್ ತೋಕೂರು ಕಾರ್ಯಕ್ರಮ ನಿರೂಪಣೆ ಮಲ್ತೆರ್.

Religious & Cultural News ಮಾತ ಧರ್ಮದ ಸುದ್ದಿ ಊರ್ದ ಸುದ್ದಿ Regional News ಕುಡ್ಲದ ಸುದ್ದಿ | Mangalore News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ

“ಶ್ರೀ ವಿಠೋಬ ಕ್ಷೇಮ ನಿಧಿ” ಸ್ಥಾಪನೆ, ಹಾರ್ಮೋನಿಯಂ ಕ್ಲಾಸ್‌ಗ್ ಚಾಲನೆ

Jul 14, 2026

ಪಂಜ ಕೊಯಿಕುಡೆ : ಶ್ರೀ ವಿಠೋಬ ಭಜನಾ ಮಂದಿರಡ್ “ಶ್ರೀ ವಿಠೋಬ ಕ್ಷೇಮ ನಿಧಿ” ಉದಿಪನ ಅಂಚೆನೆ ಹಾರ್ಮೋನಿಯಂ ಕಲ್ಪಾವುನ ಕ್ಲಾಸ್‌ಗ್ ಚಾಲನೆ ಕೊರ್ಪಿನ ಲೇಸ್ ಮಂದಿರದ ಶಾಂತಾರಾಮ ಶೆಟ್ಟಿ ಸಭಾಂಗಣಡ್ ನಡತ್ಂಡ್.
ಪಂಜ ಶ್ರೀ ಮಹಾಗಣಪತಿ ಮಂದಿರದ ಅರ್ಚಕೆರ ಸುರೇಶ್ ಭಟ್ ದೀಪ ಬೆಳಗಾದ್ ಉದಿಪನ ಮಲ್ತ್‌ದ್ ಶುಭ ಹಾರೈಕೆ ಮಲ್ತೆರ್.
ಈ ಪೊರ್ತುಡು ಶ್ರೀ ವಿಠೋಬ ಭಜನಾ ಮಂದಿರದ ಗೌರವಾಧ್ಯಕ್ಷೆರಾಯಿನ ಸದಾನಂದ ಎಮ್. ಶೆಟ್ಟಿ, ಸುಧಾಕರ್ ಎಸ್. ಪೂಂಜ, ಶ್ರೀ ಚಾಮುಂಡೇಶ್ವರಿ ಸನ್ನಿಧಿ ಪಂಜದ ಸೀತಾರಾಮ ಅಮೀನ್, ಶಿವಸಂಜೀವಿನಿ ಸುರಗಿರಿ ಅಧ್ಯಕ್ಷೆರ್ ನವೀನ್ ಭಂಡಾರಿ, ಶ್ರೀ ಶನೈಶ್ಚರ ಮಂಡಳಿ ಅಧ್ಯಕ್ಷೆರ್ ಸುರೇಶ್ ಪಂಜ ಬೊಕ್ಕ ಹಾರ್ಮೋನಿಯಂ ಗುರು ದಿನೇಶ್ ಎರ್ಮಾಳ್ ಬಿನ್ನೆರಾದ್ ಪಾಲ್ ಪಡೆಯೆರ್.
ಈ ಸಂದರ್ಭಡ್ ಸಮಾಜಸೇವಕೆರ್, ಶಿವ ಸಂಜೀವಿನಿ ಅಧ್ಯಕ್ಷೆರ್ ನವೀನ್ ಭಂಡಾರಿ ಮೆರೆನ್ ಸನ್ಮಾನ ಮಲ್ತೆರ್.
ಉಂದುವೇ ಪೊರ್ತುಡು ಅಂಚೆ ಇಲಾಖೆದ ಅಧಿಕಾರಿಲು ಸಾರ್ವಜನಿಕೆರೆಗ್ ಅಗತ್ಯವಾಯಿನ ಆರೋಗ್ಯ ವಿಮೆತ್ತ ಬಗೆಟ್ ಮಾಹಿತಿ ಕೊರಿಯೆರ್.
ಶ್ರೀ ವಿಠೋಬ ಭಜನಾ ಮಂಡಳಿದ ಅಧ್ಯಕ್ಷೆರ್ ಭರತ್ ರಾಜ್ ಶೆಟ್ಟಿ ಸ್ವಾಗತ ಮಲ್ತೆರ್. ಭಜನಾ ಸಂಚಾಲಕೆರಾಯಿನ ಸತೀಶ್ ಎಂ. ಶೆಟ್ಟಿ ಬೈಲಗುತ್ತು ಲೇಸ್‌ ಸುದಾರಿಕೆ ಮಲ್ತೆರ್. ಕೋಶಾಧಿಕಾರಿ ಪದ್ಮನಾಭ ಪೂಜಾರಿ ಧನ್ಯವಾದ ಕೊರಿಯೆರ್. ಕಾರ್ಯದರ್ಶಿ ಅವಿನಾಶ್ ಶೆಟ್ಟಿ ಬೊಕ್ಕ ಸರ್ವ ಸದಸ್ಯೆರ್, ಮಹಿಳಾ ಸಮಿತಿದಕುಲು, ಹಾರ್ಮೋನಿಯಂ ಕಲ್ಪುನಕುಲು ಪಾಲ್ ಪಡೆದಿತ್ತೆರ್.

ಊರ್ದ ಸುದ್ದಿ Regional News ಕುಡ್ಲದ ಸುದ್ದಿ | Mangalore News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ಫ್ಲ್ಯಾಶ್ ನ್ಯೂಸ್ / ರಪಕ್ಕ ಸುದ್ದಿ | Flash News

“ಪರಮ‌” ಪಾದ ಸೇರಿನ ಪರಮಾನಂದ ಸಾಲ್ಯಾನ್

Jul 13, 2026

ಉಡಲ್‌ದ ಬೇನೆನ್ ದಿಂಗೊಂಡೆರ್..ಮನಸ್‌ನ್ ಕಡಲ್ ಮಲ್ತೊಂಡೆರ್…

ಅವು ಅರೆನ ಮರಣದ ಪ್ರಾಯ ಅತ್ತ್. 64 ವರ್ಷ ಪ್ರಾಯ ಕರಿನಾತೆ. ಆಂಡ ಅನಾರೋಗ್ಯ ಪನ್ಪಿನವು ಬೆರಿ ಬುಡಂದಿನ ಕಾರಣೊಗು ಇನಿಕ್ಕಾನಗ ಆರ್ ದೇವೆರೆನ ಪಾದ ಸೇರಿಯೆರ್…!
ಅಂದ್ ಹಿರಿಯ ಪತ್ರಕರ್ತೆ, ರಂಗ ನಿರ್ದೇಶಕೆರ್, ಸಾಂಸ್ಕೃತಿಕ ಲೋಕದ ರಾಯಭಾರಿ ಪರಮಾನಂದ ವಿ. ಸಾಲ್ಯಾನ್ (ಜನನ 25-1-1962) ಮೇರ್ ಜುಲೈ 13 ಸೋಮವಾರ ಜಾಮಂದ ಪೊರ್ತುಡು ದೇವೆರೆ ಪಾದ ಸೇರಿಯೆರ್. ಆರ್ ನನ ನಮಕ್ಕ್ ನೆಂಪು ಮಾತ್ರ.
ಸಾಧಾರಣ 2 ವರ್ಷರ್ದಿಂಚಿ ಅನಾರೋಗ್ಯ ಇತ್ತ್ಂಡಲ, ಅರೆನ “ವಿಲ್ ಪವರ್” ಇದಮುಟ್ಟ ಅರೆನ್ ಬದ್‌ಕಾದ್ಂಡ್ಂದೇ ಪನೊಲಿ. “ಉಡಲ್‌ದ ಬೇನೆನ್ ದಿಂಗೊಂಡೆರ್ … ಮನಸ್‌ನ್ ಕಡಲ್ ಮಲ್ತೊಂಡೆರ್…” ಪನ್ಪಿನ ಅರೆನನೇ ಒಂಜಿ ಗೀತಾ ನಾಟಕದ ಪದತ್ತ ಸಾಲ್‌ದ ಲೆಕ ಅರೆನ ಬೇನೆನ್ ಮನಸ್‌ಡೇ ದೀವೊಂದು ಗಟ್ಟಿ ಮನಸ್ ಮಲ್ದಿತ್ತೆರ್. ಬೊಡೆದಿಗ್‌, ಮಗಕ್ಕ್‌ ಬೊಕ್ಕ ಕುಟುಂಬದಕ್ಲೆಗ್ ಧೈರ್ಯ ಪನೊಂದಿತ್ತೆರ್.
ಸಸಿಹಿತ್ಲು ಶ್ರೀ ಸಾರಂತಾಯ ಗರೊಡಿ ಉಳ್ಳಾಯ ದೈವಸ್ಥಾನದ ಜೀರ್ಣೋದ್ಧಾರ ಸಮಿತಿದ ಕಾರ್ಯಾಧ್ಯಕ್ಷೆರಾದ್ ಸಕ್ರಿಯವಾದ್ ಬೇಲೆ ಮಲ್ತ್‌ದ್ ಬ್ರಹ್ಮಕಲಶೋತ್ಸವದ ಸಂದರ್ಭಡ್ ಕುಡ ಅಸೌಖ್ಯ ಇತ್ತ್ಂಡಲ ಶ್ರೀ ಉಳ್ಳಾಯ ದೇವೆರೆನೇ ಸದಾ ನೆನೆತೊಂದಿತ್ತೆರ್. ಸಸಿಬಿತ್ತ್‌ಲ್ದ ಸಿರಿ ಭಗವತಿ ಅಪ್ಪೆನ್ ದಿನಲ ಸುಗಿತೊಂದಿತ್ತೆರ್. ಅಕುಲೇ ಎನ್ನ ಶಕ್ತಿ, ಭಕ್ತಿ, ಪ್ರೀತಿ ಪಂದ್ ಎನ್ನ್‌ದಿನಾರ್ ಪರಮಾನಂದ ಸಾಲ್ಯಾನ್.
ಪತ್ರಿಕಾ ರಂಗದ ವಿಚಾರೊಡು ಬನ್ನಗ ಮುಂಗಾರು, ಹೊಸದಿಗಂತ ಪತ್ರಿಕೆಗ್ ತನ್ನ ಕ್ರೀಡಾ ವರದಿಗಾರಿಕೆಡ್ ಪುದರ್ ಕನದಿನಾರ್. “ಅಜೇಯ” ಪನ್ಪಿನ ಪತ್ರಿಕೆದ ಸಂಪಾದಕೆರಾದ್ ಅವೆನ್ ಕೆಲವು ವರ್ಷ ನಡಪಾದೆರ್. ಕಡೆ ಕಾಲ ಮುಟ್ಟಲ ಪರಮ ಸತ್ಯ ಪನ್ಪಿನ ಅಂಕಣ ಬರೆದ್ ತನ್ನ ಬರವುದ ತಾಕತ್ತ್‌ನ್ ತೊಜಪಾದಿನಾರ್.
ವಿಜಯಕುಮಾರ್ ಕೊಡಿಯಾಲ್ ಬೈಲ್‌ರೆನ “ಶಿವದೂತೆ ಗುಳಿಗೆ” ನಾಟಕದ ಸಂಭಾಷಣೆ ಅರೆಗ್ ಮಲ್ಲ ಪುದರ್‌ನ್ ಕನತ್ ಕೊರುಂಡು. ಅವೆರ್ದ್ ಪರಮ ಪದ್ಮ ಕಲಾವಿದರು ಕೂಟನ್ ಪುಟ್ಟುಪಾಡ್ದ್ ” ಶಿವ ಪುರ್ಸಾದ ಬೊಬ್ಬರ್ಯೆ” ನಾಟಕ ರಚನೆ, ನಿರ್ದೇಶನ ಮಲ್ತ್‌ದ್ ಪ್ರದರ್ಶನ ಕೊರಿಯೆರ್.
ಮಸ್ತ್ ವರ್ಷದ ಪಿರವುಡು ಸಸಿಹಿತ್ಲು ಡು ತನ್ನ ಕರಿದ್ ಪೋಯಿನ ಅರುವತ್ತೆ, ಕಲಾವಿದೆ ಸುದರ್ಶನ್‌ನ ನೆಂಪುಗಾದ್ ರಂಗ ಸುದರ್ಶನ (ರಿ) ಪನ್ಪಿನ ಕಲಾ ಕೂಟ ಕಟ್‌ದ್ ಊರುಡು ಮಾತ್ರ ಅತ್ತಾಂದೆ ಬೊಂಬೈ, ಬೆಂಗಳೂರು, ದುಬೈ, ಕುವೈತ್, ಮಸ್ಕತ್ ಇಂಚ ಪಿದಯಿ ದೇಶೊಡ್ಲ ರಂಗ ಪ್ರದರ್ಶನ ಮಲ್ತ್‌ದ್ ತುಳುನಾಡ ಮಣ್ಣ್‌ದ ಸಾಂಸ್ಕೃತಿಕ ವೈಭವೊನು ಜಗತ್ತ್‌ಗ್ ಪಸೆರ್‌ದೆರ್. ಅವೇತೋ ಯುವ ಕಲಾವಿದೆರೆನ್ ತಯಾರ್ ಮಲ್ದೆರ್. ಸಸಿಹಿತ್ಲು ಶ್ರೀ ಭಗವತೀ ದೇವಸ್ಥಾನದ ಆವರಣೊಡು ಪ್ರತಿವರ್ಷ ಅಸ್ಟೆಮಿದಾನಿ ಸಾಂಪ್ರದಾಯಿಕವಾದ್ ನಡತೊಂದಿತ್ತಿನ ಮಸುಲುಡಿಕೆಗ್ (ಮೊಸರುಕುಡಿಕೆ) ಪೊಸ ದೇಖಿದ ರೂಪಕೊಲೆನ್ ಬರೆದ್ ನಿರ್ದೇಶನ ಮಲ್ತ್‌ದ್ ಪೊಸ ರಂಗ್ ಕೊರ್ತಿನಾರ್ ಪರಮಾನಂದ ಸಾಲ್ಯಾನ್.
ಇಂಚಿತ್ತಿನ ಬಹುಮುಖ ಪ್ರತಿಭೆ, ತುಳು ಬಾಸೆದ ಪ್ರೇಮಿ ಆದಿತ್ತಿನ ಪರಮಾನಂದ ಸಾಲ್ಯಾನ್‌ರೆನ ಆತ್ಮೊಗು ಸದ್ಗತಿ ತಿಕ್ಕಡ್ ಪಂದ್ “ಟೈಮ್ಸ್ ಆಫ್ ಕುಡ್ಲ” ಪತ್ರಿಕೆದ ಪರವಾದ್ ದೇವೆರೆ‌ಡ ಪ್ರಾರ್ಥನೆ ಮಲ್ಪುವ.

ಊರ್ದ ಸುದ್ದಿ Regional News ಕುಡ್ಲದ ಸುದ್ದಿ | Mangalore News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ರಪಕ್ಕ ಸುದ್ದಿ Flash News ವಿದ್ಯೆಗ್ ಸಂಬಂದ ಪಟ್ಟಿನ ಮಾಹಿತಿ | Education Information

ಶ್ರೀ ದುರ್ಗಾದೇವಿ ಇಂಗ್ಲಿಷ್ ಮೀಡಿಯಂ ಶಾಲೆಡ್ ವನಮಹೋತ್ಸವ, ಹಸಿರು ದಿನಾಚರಣೆ

Jul 10, 2026

ನಿಡ್ಡೋಡಿದ ಜ್ಞಾನರತ್ನ ಎಜುಕೇಶನ್ ಆಂಡ್ ಚಾರಿಟೇಬಲ್ ಟ್ರಸ್ಟ್ (ರಿ.) ದ ಶ್ರೀ ದುರ್ಗಾದೇವಿ ಇಂಗ್ಲಿಷ್ ಮೀಡಿಯಂ ಶಾಲೆಡ್ ವನಮಹೋತ್ಸವ ಬೊಕ್ಕ ಹಸಿರು ದಿನಾಚರಣೆ ಗೌಜಿಡ್ ನಡತ್ಂಡ್.

ಲೇಸ್ ದ ಅಧ್ಯಕ್ಷತೆನ್ ಒಯಿಸೊನ್ನ ಟ್ರಸ್ಟ್ ಕಾರ್ಯದರ್ಶಿ ಸಂಗೀತಾ ಭಾಸ್ಕರ್ ದೇವಸ್ಯ ಮೇರ್ ದೈ ನಡ್ಪುನ ಮುಕೇನ ಚಾಲನೆ ಕೊರಿಯೆರ್. ಬೊಕ್ಕ ವಿದ್ಯಾರ್ಥಿಲೆಗ್ ದೈ ನ್ ಪಟ್ಟ್ ದ್, ಪರಿಸರ ರಕ್ಷಣೆದ ಸಂದೇಶ ಕೊರಿಯೆರ್.

ಈ ಪೊರ್ತುಡು ಶಾಲೆದ 7ನೇ ತರಗತಿದ ವಿದ್ಯಾರ್ಥಿಲು ವನಮಹೋತ್ಸವದ ಬಗೆಟ್ಟ್ ಬೇತೆ ಬೇತೆ ಸಾಂಸ್ಕೃತಿಕ ಲೇಸ್ ನ್ ಪ್ರದರ್ಶನ ಮಲ್ತೆರ್.

ಲೇಸ್ ಡ್ ಆಡಳಿತಾಧಿಕಾರಿ ಶ್ರೀ ಸಾಗರ್, ಪ್ರಾಂಶುಪಾಲೆರ್ ಅನುರಾಧಾ ಸಾಲಿಯಾನ್, ಮುಖ್ಯೋಪಾಧ್ಯಾಯಿನಿ ಸೀಮಾ ಬೊಕ್ಕ ಸಹ- ಮುಖ್ಯೋಪಾಧ್ಯಾಯಿನಿ ಕುಮಾರಿ ಜಯಶ್ರೀ ಪಾಲ್ ಪಡೆದಿತ್ತೆರ್.

ಊರ್ದ ಸುದ್ದಿ Regional News ಕುಡ್ಲದ ಸುದ್ದಿ | Mangalore News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ಮುಲ್ಕಿ

ಸಾಹಿತಿ, ಪತ್ರಕರ್ತೆರ್ ಚಿದಂಬರ ಬೈಕಂಪಾಡಿ ಮೆರೆಗ್ ಕೊ.ಅ. ಉಡುಪ ಪ್ರಶಸ್ತಿ

Jul 10, 2026

ಕಿನ್ನಿಗೋಳಿ: ಯುಗಪುರುಷ ಸಂಸ್ಥಾಪಕೆರ್ ದಿ| ಕೊ.ಅ. ಉಡುಪೆರೆನ ನೆಂಪುಗಾದ್ ಪ್ರತಿ ವರ್ಷ ಗೌರವಪೂರ್ವಕವಾದ್ ಕೊರ್ಪಿನ ಕೊ.ಅ.ಉಡುಪ ಪ್ರಶಸ್ತಿನ್ ಈ ಸರ್ತಿ ಸಾಹಿತಿ, ಪತ್ರಕರ್ತೆರ್ ಚಿದಂಬರ ಬೈಕಂಪಾಡಿ ಮೆರೆಗ್ ಕೊರಿಯೆರೆ ಉಂಡು.

ಪ್ರತಿಭಾವಂತ ಕವಿಯಾದ್, ಸಾಹಿತಿಯಾದ್, ಪತ್ರಕರ್ತೆರಾದ್ ಸಮಾಜಡ್ ಗುರುತಿಸಾಯಿನ ಚಿದಂಬರ ಬೈಕಂಪಾಡಿ ಮೇರ್ ಸುಮಾರ್ ವರ್ಷ ಪತ್ರಿಕೋದ್ಯಮ ಕ್ಷೇತ್ರಡ್ ಸೇವೆ ಸಂದಾದೆರ್. 8 ಕೃತಿನ್ ರಚನೆ ಮಲ್ತ್ ದ್, ಸಾಹಿತ್ಯ ಲೋಕಗ್ ಅರ್ಪಣೆ ಮಲ್ದೆರ್.

ದ.ಕ.ಕಾರ್ಯನಿರತ ಪತ್ರಕರ್ತೆರೆನ ಸಂಘದ ಪ್ರಧಾನ ಕಾರ್ಯದರ್ಶಿಯಾದ್, ಕರ್ನಾಟಕ ಕಾರ್ಯನಿರತ ಪತ್ರಕರ್ತೆರೆನ ಸಂಘದ ರಾಜ್ಯ ಸಮಿತಿ ಸದಸ್ಯೆರಾದ್, ದ.ಕ.ಕಾರ್ಯನಿರತ ಪತ್ರಕರ್ತೆರೆನ ಸಂಘದ ಕಟ್ವಾನ ಸಮಿತಿದ ಕಾರ್ಯದರ್ಶಿಯಾದ್, ಸರ್ಕಾರಿ ಲೇಡಿಗೋಷನ್ ಆಸ್ಪತ್ರೆದ ಸಲಹಾ ಸಮಿತಿದ ಸದಸ್ಯೆರಾದ್, ಕುಡ್ಲ ವಿಶ್ವವಿದ್ಯಾನಿಲಯದ ಸೆನೆಟ್ ಸದಸ್ಯೆರಾದ್, ಕುಡ್ಲ ವಿವಿ ಪತ್ರಿಕೋದ್ಯಮ ವಿಭಾಗದ ಸಂದರ್ಶಕೆರಾದ್, ಪ್ರಾಧ್ಯಾಪಕೆರಾದ್ ಸೇವೆ ಸಂದಾದೆರ್. ಕರ್ನಾಟಕ ಸಂಘದ ಕನ್ನಡ ಅಭಿವೃದ್ಧಿ ಸಮಿತಿದ ಬೊಕ್ಕ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಸದಸ್ಯೆರಾತೆರ್.

ಚಿದಂಬರ ಬೈಕಂಪಾಡಿ ಮೆರೆಗ್ ದ.ಕ. ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ, ಕರ್ನಾಟಕ ಪತ್ರಕರ್ತೆರೆನ ಸಂಘದ ಅತ್ಯುತ್ತಮ ತನಿಖಾ ವರದಿಗಾರೆ ಪ್ರಶಸ್ತಿ, ಅಖಿಲಭಾರತ ಆಕಾಶವಾಣಿ ವರ್ಷೊದ ಪ್ರಶಸ್ತಿ, ಬನ್ನಂಜೆ ರಾಮಾಚಾರ್ಯ ಪತ್ರಿಕೋದ್ಯಮ ಪ್ರಶಸ್ತಿ, ಇನ್‌ಲ್ಯಾಂಡ್ ಪ್ರಶಸ್ತಿ, ಕರ್ನಾಟಕ ಮಾಧ್ಯಮ ಅಕಾಡೆಮಿ ವರ್ಷೊದ ಪ್ರಶಸ್ತಿ, ಕೋಟ ಶಿವರಾಮ ಕಾರಂತ ಪ್ರಶಸ್ತಿ, ಪಟ್ಲ ಪ್ರಶಸ್ತಿ, ನಿಟ್ಟೆ ಯುನಿವರ್ಸಿಟಿ ಮಾಧ್ಯಮ ಪ್ರಶಸ್ತಿದೊಟ್ಟಿಗೆ ಸುಮಾರ್ ಪ್ರಶಸ್ತಿ ತಿಕ್ ದ್ಂಡ್.

ಕರಿನ ಸರ್ತಿದ ದ.ಕ. ಜಿಲ್ಲಾ ಕನ್ನಡ ಸಾಹಿತ್ಯ ಸಮ್ಮೇಳನದ ಅಧ್ಯಕ್ಷತೆನ್ ಒಯಿಸೊಂದಿತ್ತೆರ್. ಕೊ.ಅ. ಉಡುಪ ಪ್ರಶಸ್ತಿನ್ ಉಂದುವೇ ಜುಲೈ 24ಕ್ಕ್ ಕಿನ್ನಿಗೋಳಿ ಯುಗಪುರುಷ ಸಭಾಭವನಡ್ ನಡಪರೆ ಇಪ್ಪುನ ಲೇಸ್ ಡ್ 10,000/- ರೂ. ನಗದು, ಗೌರವ ಫಲಕ, ಪ್ರಶಸ್ತಿ ಪತ್ರದೊಟ್ಟಿಗೆ ಪ್ರಧಾನ ಮಲ್ಪೆರೆ ಉಂಡು ಪಂದ್ ಯುಗಪುರುಷದ ಪ್ರಧಾನ ಸಂಪಾದಕೆರ್ ಕೊಡೆತ್ತೂರು ಭುವನಾಭಿರಾಮ ಉಡುಪೆರ್ ತೆರಿಪಾಯೆರ್.