ಕುಡ್ಲದ ಸುದ್ದಿ | Mangalore News

ಒಡಿಪು ವಿಶ್ವ ಬಂಟರ ಸಮ್ಮೇಳನದ ಲೆಪ್ಪೋಲೆ ಬುಡುಗಡೆ

ಕುಡ್ಲ: ಜಾಗತಿಕ ಬಂಟರ ಸಂಘಲೆನ ಒಕ್ಕೂಟದ ಗುರ್ಕಾರೆ ಐಕಳ ಹರೀಶ್ ಶೆಟ್ಟಿ ಮೆರೆನ ಮುತಾಲಿಕೆಡ್ ಅ.28 ಬೊಕ್ಕ 29 ಕ್ಕ್ ಒಡಿಪುಡ್ ನಡಪರೆ ಇಪ್ಪುನ ವಿಶ್ವ ಬಂಟರ ಸಮ್ಮೇಳನ-2023 ದ ಲೆಪ್ಪೋಲೆ ಬುಡುಗಡೆ ಲೇಸ್ ಬುಧಾರ ಬಯ್ಯಗ್ ಪೇಂಟೆದ ಗೋಲ್ಡ್ ಫಿಂಚ್ ಹೋಟೆಲ್ ಡ್ ನಡತ್ಂಡ್.

ಈ ಲೇಸ್ ನ್ ಬತ್ತಿ ಬಿನ್ನೆರ್ ತುಡರ್ ಅರ್ಲಾದ್ ಉದಿಪನ ಮಲ್ತೆರ್.

ಸಂಸದೆರ್, ಬಿಜೆಪಿ ರಾಜ್ಯಾಧ್ಯಕ್ಷೆರ್ ನಳಿನ್ ಕುಮಾರ್ ಕಟೀಲ್ ಪಾತೆರ್ದ್, ಐಕಳ ಹರೀಶ್ ಶೆಟ್ಟಿ ಮೇರ್ ಬಂಟ ಸಮಾಜದ ಅತ್ಯದ್ಭುತ ನಾಯಕೆ. ಅರೆನ ಸಂಘಟನಾ ಶಕ್ತಿ ಬೇತೆಕ್ಲೆಗ್ ಮಾದರಿ. ಇನಿ ವಿಶ್ವ ಬಂಟರ ಸಮ್ಮೇಳನದ ಲೆಪ್ಪೋಲೆನ್ ಬುಡುಗಡೆ ಮಲ್ದ. ಉಂದು ಬಂಟ ಸಮಾಜದ ಇಲ್ಲ ಇಲ್ಲಗ್ ಎತ್ತೊಡು. ಆ ಮುಖೇನ ಒಂಜೇ ಚಾವಡಿಡ್ ಸಮಾಜದ ಮಾತೆರ್ಲಾ ಪಾಲ್ ಪಡೆಪುಲೆಕ್ಕ ಅವಡ್, ಸಮ್ಮೇಳನರ್ದ್ ಸಮಾಜಗ್ ಪ್ರಯೋಜನ ಅವಡ್ ಪಂದ್ ಎಡ್ಡೆಪ್ಪು ಬಯಕಿಯೆರ್.

ಬಂಟರ ಯಾನೆ ನಾಡವರ ಮಾತೃಸಂಘದ ಗುರ್ಕಾರೆ ಅಜಿತ್ ಕುಮಾರ್ ರೈ ಮಾಲಾಡಿ ಪಾತೆರ್ದ್, ಲೇಸ್ ಖಂಡಿತಾ ಯಶಸ್ವಿ ಆಪುಂಡು. ಆಂಡ ಮಲ್ಲ ಸಂಖ್ಯೆಡ್ ನಮ್ಮ ಸಮುದಾಯದ ಜನಕ್ಲೆನ್ ಸೇರಿಸಾವುನ ಮುಖೇನ ನಮ್ಮ ಶಕ್ತಿನ್ ಈ ಮುಖೇನ ತೂಪಾವೊಡು ಪಂದ್ ಪಂಡೆರ್.

ಜಾಗತಿಕ ಬಂಟರ ಸಂಘಲೆನ ಒಕ್ಕೂಟದ ಗುರ್ಕಾರೆ ಐಕಳ ಹರೀಶ್ ಶೆಟ್ಟಿ ಪಾತೆರ್ದ್, ಜಾಗತಿಕ ಬಂಟರ ಸಂಘಲೆನ ಒಕ್ಕೂಟದ ಮುಖೇನ ಸಮಾಜದ ಜನಕ್ಲೆನ ಹಿತದೃಷ್ಟಿಗಾದ್ ಸಂಘಟನೆ ಮುಖೇನ ಸುಮಾರ್ ಲೇಸ್ ನ್ ಆಯೋಜನೆ ಮಲ್ದ. ಸಮುದಾಯದ ಮಾತೆರೆನ್ಲಾ ಒಂಜೇ ಚಾವಡಿಗ್ ಕನಪುನ ಉದ್ದೇಶರ್ದ್ ವಿಶ್ವ ಬಂಟರ ಸಮ್ಮೇಳನ ಆಯೋಜನೆ ಮಲ್ದ. ಮಾತೆರ್ಲಾ ಒಗ್ಗಟ್ಟಾದ್ ರಡ್ಡ್ ದಿನ ಮುಟ್ಟ ಲೇಸ್ ದ ಯಶಸ್ಸಿಗಾದ್ ಕೆಲಸ ಮಲ್ಪೊಡು ಪಂದ್ ಪಂಡೆರ್.

ಬಂಟ್ಸ್ ವೆಲ್ ಫೇರ್ ಟ್ರಸ್ಟ್ ದ ಗುರ್ಕಾರೆ ಎ. ಸದಾನಂದ ಶೆಟ್ಟಿ ಮೇರ್ ಪಾತೆರ್ದ್, ಜಾಗತಿಕ ಬಂಟರ ಸಂಘಲೆನ ಒಕ್ಕೂಟಗ್ ಪೊಸ ದಿಕ್ಕ್ ತೋಜಿಪಾಯಿನಕುಲು ಐಕಳ ಹರೀಶ್ ಶೆಟ್ಟಿ ಮೇರ್. ಮೆರೆರ್ದ್ ಇನಿ ಬಂಟರ ಸಂಘಲು ಒಗ್ಗಟ್ಟಾದ್ ಕೆಲಸ ಸುರು ಮಲ್ತೊಂದುಂಡು. ಬಲಿಷ್ಟ ಸಮಾಜದ ನಿರ್ಮಾಣಗ್ ಬಂಟರ ಸಮ್ಮೇಳನದ ಯಶಸ್ಸಿಗ್ ನಮ ಮಾತ ಒಟ್ಟಾದ್ ಬೇಲೆ ಮಲ್ಪುಗ ಪಂಡೆರ್.

ಮಾಜಿ ಸಚಿವೆರ್ ಬಿ. ರಮಾನಾಥ್ ರೈ ಮೇರ್ ಪಾತೆರ್ದ್, ಒಂಜಿ ಪುಗರ್ತೆದ ಲೇಸ್ ಗ್ ನಮ ಮಾತೆರ್ಲಾ ದಿನಗಣನೆ ಮಲ್ತೊಂದು ಉಲ್ಲ. ಒಡಿಪುಡ್ ನಡಪರೆ ಇಪ್ಪುನ ಈ ಲೇಸ್ ಗ್ ಕುಡೊಂಜಿ ಇತಿಹಾಸ ನಿರ್ಮಾಣ ಮಲ್ದ್ಂಡ್. ನಮ್ಮ ಸಂಘಟನೆ ಶಕ್ತಿ ಈ ಮುಖೇನ ತೋಜಿಪಾವೊಡಾಪುಂಡು. ಲೇಸ್ ದ ಯಶಸ್ಸಿಗ್ ನಮ ಮಾತ ಬೆನೊಡು ಪಂದ್ ಪಂಡೆರ್.

ಈ ಪೊರ್ತುಡು ಬಂಟರ ಮಾತೃ ಸಂಘದ ಉಪಾಧ್ಯಕ್ಷೆರ್ ಕಾವು ಹೇಮನಾಥ್ ಶೆಟ್ಟಿ, ಒಕ್ಕೂಟದ ಉಪಾಧ್ಯಕ್ಷೆರ್ ಕರ್ನಿರೆ ವಿಶ್ವನಾಥ್ ಶೆಟ್ಟಿ, ಪ್ರಧಾನ ಕಾರ್ಯದರ್ಶಿ ಜಯಕರ ಶೆಟ್ಟಿ ಇಂದ್ರಾಳಿ, ಜತೆ ಕಾರ್ಯದರ್ಶಿ ಚಂದ್ರಹಾಸ ಶೆಟ್ಟಿ ರಂಗೋಲಿ, ಕೋಶಾಧಿಕಾರಿ ಉಳ್ತೂರು ಮೋಹನ್ ದಾಸ್ ಶೆಟ್ಟಿ, ಸುಧಾಕರ ಎಸ್. ಪೂಂಜ, ಎ.ಜಗನ್ನಾಥ ಚೌಟ, ಲೋಕೇಶ್ ಶೆಟ್ಟಿ ಕೊಳ, ಸುರೇಶ್ ರೈ ಮಕರಜ್ಯೋತಿ ಪಾಲ್ ಪಡೆದಿತ್ತೆರ್. ಕರ್ನಿರೆ ವಿಶ್ವನಾಥ್ ಶೆಟ್ಟಿ ಬಿನ್ನೆರೆನ್ ಎದ್ಕೊನಿಯೆರ್. ನಿತೇಶ್ ಶೆಟ್ಟಿ ಎಕ್ಕಾರ್ ಲೇಸ್ ದ ಸುಧಾರಿಕೆ ಮಲ್ತೆರ್. ಪ್ರಖ್ಯಾತ್ ಶೆಟ್ಟಿ ಪ್ರಾರ್ತನೆ ಮಲ್ತೆರ್.

ಅ.15-24: ತೋಡ್ಲಮಜಲು ಶ್ರೀ ದುರ್ಗಾಚಾಮುಂಡೇಶ್ವರೀ ಕ್ಷೇತ್ರಡ್ ದಸರಾ ಉಚ್ಚಯ

ಕುಡ್ಲ: ತೋಡ್ಲಮಜಲು ಶ್ರೀ ದುರ್ಗಾಚಾಮುಂಡೇಶ್ವರೀ ಕ್ಷೇತ್ರಡ್ ದಸರಾ ಉಚ್ಚಯ ಅ.15-24 ಮುಟ್ಟ ನಡಪರೆ ಉಂಡು.

ಅ.15 ಐತಾರ ಬೊಲ್ಪುಗು ದೇವೆರೆನ ದರ್ಶನ, ತೋರಣ ಮೂರ್ತ, ರಾತ್ರೆ ಕುಂಕುಮಾರ್ಚನೆ ಪೂಜೆ, ಅ.17 ಅಂಗಾರೆ ಬೊಲ್ಪುಗು ಬೊಂಡದ ಅಭಿಷೇಕ, ನಿತ್ಯಪೂಜೆ, ರಾತ್ರೆ ರಂಗಪೂಜೆ, ಸತ್ಯನಾರಾಯಣ ಕಥೆ, ಅ.18 ಬುಧಾರ ಬೊಲ್ಪುಗು ಗಣಯಾಗ, ಚಂಡಿಕಾಯಾಗ, ಮಹಾಪೂಜೆ ನಡಪರೆ ಉಂಡು.

ಅ.19 ಗುರುವಾರ ಬೊಲ್ಪುಗು ನಾಗತಂಬಿಲ, ಪಂಚಾಮೃತ ಅಭಿಷೇಕ ಸೇವೆ, ಸತ್ಯನಾರಾಯಣ ಪೂಜೆ, ಮಧ್ಯಾಹ್ನ ಮಹಾಪೂಜೆ, ಲಲಿತ ಪಂಚಮಿ, ಅ.20 ಸುಕ್ರಾರ ಬೊಲ್ಪುಗು ದೈವೊಲೆನ ದರ್ಶನ ಸೇವೆ, ಅ.21 ಸನಿಯಾರ ಮಧ್ಯಾಹ್ನ ಮಹಾಪೂಜೆ, ರಾತ್ರೆ ಗುಸು ಗುಸು ಉಂಡುಗೆ ತುಳು ನಾಟಕ ನಡಪರೆ ಉಂಡು.

ಅ.22 ಐತಾರ ಮಧ್ಯಾಹ್ನ ಶ್ರೀ ಶಾರದಾ ಪೂಜೆ, ರಾತ್ರೆ ಕುಂಕುಮಾರ್ಚನೆ, ನೃತ್ಯರೂಪಕ, ಅ.23 ಸೋಮಾರ ಬೊಲ್ಪುಗು ನಿತ್ಯಪೂಜೆ, ಆಯುಧ ಪೂಜೆ, ಅ.24 ಬೊಲ್ಪುಗು ನಿತ್ಯ ಪೂಜೆ, ಮಧ್ಯಾಹ ವಿಜಯದಶಮಿ ಮಹಾಪೂಜೆ ಬೊಕ್ಕ ಶೋಭಾಯಾತ್ರೆ, ಸರ್ವಾಲಂಕಾರ ಪೂಜೆ ನಡಪರೆ ಉಂಡು ಪಂದ್ ತೋಡ್ಲಮಜಲು ಆಡಳಿತ ಮಂಡಳಿ, ಧರ್ಮದರ್ಶಿಲು ನಾಗೇಶ್ ಲೆಪ್ಪೋಲೆಡ್ ತೆರಿಪಾದೆರ್.

ಅ.15-24: ಅಡುಮರೊಳಿ ಶ್ರೀ ಮಾರಿಕಾಂಬಾ ದೇವಲ್ಯಡ್ ಮಾರ್ನೆಮಿ ಉಚ್ಚಯ

ಕುಡ್ಲ: ಅಡುಮರೋಳಿ ಶ್ರೀ ಮಾರಿಕಾಂಬಾ ದೇವಲ್ಯಡ್ ಮಾರ್ನೆಮಿ ಉಚ್ಚಯ ಅ.15-24 ಮುಟ್ಟ ನಡಪರೆ ಉಂಡು.

ಪ್ರತಿದಿನೊಲ ಬೇತೆ ಬೇತೆ ಧಾರ್ಮಿಕ, ವೈದಿಕ ವಿಧಿ ವಿಧಾನಲು ನಡಪರೆ ಉಂಡು. ಈ ಲೇಸ್ ಗ್ ಮಾತೆರ್ಲ ಕುಟುಂಬ ಸಮೇತೆರಾದ್ ಬತ್ತ್ ದ್, ಪ್ರಸಾದ ದೆತೊಂದು ಶ್ರೀ ದೇವಿನ ಕೃಪೆಗ್ ಪಾತ್ರರಾವೊಡು ಪಂದ್ ಅಡುಮರೋಳಿ ಶ್ರೀ ಮಾರಿಕಾಂಬಾ ದೇವಲ್ಯದ ಅನುವಂಶಿಕ ಆಡಳಿತ ಮೊಕ್ತೇಸರೆರ್ ಚಂದ್ರಹಾಸ್ ಬಿ ಪಾಂಪುಮನೆ, ಯಂ ಕಮಲಾಕ್ಷ ಸುವರ್ಣ ನಟ್ಟಿಮನೆ, ಯಂ ಜಗನ್ನಾಥ್ ಡೊಡ್ಡಮನೆ, ಆಡಳಿತ ಗುರ್ಕಾರೆ ಯಂ. ನಾಗೇಶ್ ಸುವರ್ಣ ನಟ್ಟಿಮನೆ ಕಾರ್ಯದರ್ಶಿ ಶೇಖರ್ ಅಮೀನ್ ಪಾಂಪುಮನೆ ಬೊಕ್ಕ ಮರೋಳಿ ಗ್ರಾಮದ ಪತ್ತ್ ಸಮಸ್ತೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಅ.15-23: ಚಿತ್ರಾಪುರ ಶ್ರೀ ದುರ್ಗಾಪರಮೇಶ್ವರೀ ದೇವಲ್ಯಡ್ ಮಾರ್ನೆಮಿ ಉಚ್ಚಯ, ಚಂಡಿಕಾಯಾಗ

ಕುಡ್ಲ: ಕುಳಾಯಿದ ಚಿತ್ರಾಪುರ ಶ್ರೀ ದುರ್ಗಾಪರಮೇಶ್ವರೀ ದೇವಲ್ಯಡ್ ಶರನ್ನವರಾತ್ರಿ ಪೂಜೆ, ಸಾರ್ವಜನಿಕ ಚಂಡಿಕಾಯಾಗ ಬೊಕ್ಕ ಶ್ರೀ ರಾಮತಾರಕ ಯಜ್ಞ ಅ.15-23 ಮುಟ್ಟ ನಡಪರೆ ಉಂಡು.

ಪ್ರತಿದಿನೊಲ ಬಯ್ಯಗ್ ಭಜನೆ ಆದ್ ಮಹಾಪೂಜೆ, ಇಸೇಸ ಪೂತ್ತ ಪೂಜೆ ನಡಪರೆ ಉಂಡು. ಈ ಲೇಸ್ ಗ್ ಮಾತೆರ್ಲಾ ಬತ್ತ್ ದ್ ಶ್ರೀ ದೇವಿನ ಕೃಪೆಗ್ ಪಾತ್ರರಾವೊಡು ಪಂದ್ ಚಿತ್ರಾಪುರ ಶ್ರೀ ದುರ್ಗಾಪರಮೇಶ್ವರೀ ದೇವಲ್ಯದ ಬೊಕ್ಕ ಮಠತ್ತ ಅನುವಂಶಿಕ ಆಡಳಿತ ಮೊಕ್ತೇಸರೆರ್ ಶ್ರೀ ವಿದ್ಯೇಂದ್ರತೀರ್ಥ ಸ್ವಾಮೀಜಿ ಲೆಪ್ಪೋಲೆಡ್ ತೆರಿಪಾದೆರ್.

ಪಿಲಿಪರ್ಬದ ಲೆಪ್ಪೋಲೆ ಬುಡುಗಡೆ

ಕುಡ್ಲ: ತುಳುನಾಡ್ ದ ಕಲೆ, ಸಂಸ್ಕೃತಿನ್ ಒರಿಪಾವುನ ದಿಟ್ಟಿಡ್ ಸುರು ಆಯಿನ ಕುಡ್ಲ ಸಾಂಸ್ಕೃತಿಕ ಪ್ರತಿಷ್ಠಾನದ ರಡ್ಡನೇ ವರ್ಷೊದ ಪಿಲಿಪರ್ಬದ ಲೆಪ್ಪೋಲೆನ್ ಪ್ರತಿಷ್ಠಾನದ ಮಾರ್ಗದರ್ಶಕೆರ್, ಸಂಸದೆರ್, ಬಿಜೆಪಿ ರಾಜ್ಯಾಧ್ಯಕ್ಷೆರ್ ನಳಿನ್ ಕುಮಾರ್ ಕಟೀಲ್ ಕುಡ್ಲಡ್ ಬುಡುಗಡೆ ಮಲ್ತೆರ್.

ಬೊಕ್ಕ ಮೇರ್ ಪಾತೆರ್ದ್, ಕುಡ್ಲದ ಕೇಂದ್ರ ಮೈದಾನಡ್ ಅ.21 ಕ್ಕ್ ನಡಪುನ ಪಿಲಿಪರ್ಬ ಈ ವರ್ಷ ಗೌಜಿಡ್ ನಡಪರೆ ಉಂಡು. ಒಟ್ಟು 15 ಕೂಟಲು ಪಾಲ್ ಪಡೆಯೆರೆ ಉಂಡು ಪಂದ್ ಪಂಡೆರ್.

ಪಿಲಿಪರ್ಬದ ಗುರ್ಕಾರ್ಮೆನ್ ಒಯಿಸೊನ್ನ ಶಾಸಕೆರ್ ವೇದವ್ಯಾಸ ಕಾಮತ್ ಪಾತೆರ್ದ್, ತುಳುನಾಡ್ ದ ಸಂಸ್ಕೃತಿ ಪಿಲಿಏಸನ್ ರಾಜ್ಯ, ದೇಶ, ಅಂತಾರಾಷ್ಟ್ರೀಯ ಮಟ್ಟಡ್ ಪ್ರಚಾರ ಮಲ್ಪರೆ ನಮ್ಮ ಪ್ರತಿಷ್ಠಾನ ತಯಾರ್ ಆತ್ಂಡ್. ಪಿಲಿಏಸ ಪಾಡಿನಕ್ಲೆನ್ ಪ್ರೋತ್ಸಾಹ ಮಲ್ಪುನ ದಿಟ್ಟಿಡ್ ಈ ವೇದಿಕೆನ್ ನಿರ್ಮಾಣ ಮಲ್ದ್ಂಡ್. ನೆಕ್ಕ್ ಮಸ್ತ್ ಕಾಸ್ ಖರ್ಚಾಪುಂಡು. ಎಂಕ್ಲೆನ್ ಬೆಂಬಲಿಸಾಯೆರೆ ದುಂಬು ಬತ್ತಿನ ಮಾತ ಸಂಘ, ಸಂಸ್ಥೆಲೆಗ್ ಅಭಿನಂದನೆ ಸಂದಾವೆ ಪಂದ್ ಪಂಡೆರ್.

ಈ ಪೊರ್ತುಡು ಪ್ರತಿಷ್ಠಾನದ ಮಾನಾದಿಗೆದ ಗುರ್ಕಾರೆ ಗಿರಿಧರ್ ಶೆಟ್ಟಿ, ಗುರ್ಕಾರೆ ದಿವಾಕರ ಪಾಂಡೇಶ್ವರ, ಪ್ರಮುಖೆರ್ ಮಂಗಲ್ಪಾಡಿ ನರೇಶ್ ಶೆಣೈ, ಜಗದೀಶ್ ಕದ್ರಿ, ಚೇತನ್ ಕಾಮತ್, ಲಲಿತ್ ಮೆಂಡನ್, ಶಾನ್ ಪಾಲ್ ಪಡೆದಿತ್ತೆರ್.

ದೈವೊಲ್ಯಡ್ ಬಲ್ಲ್ ಪಾಡೊಂದು ತೀರ್ ಪೋಯಿನ ಮಡಿಕೇರಿದ ಜನ

ಪಣಂಬೂರು: ಮಡಿಕೇರಿದ ಒಂಜಿ ಜನ ಪಣಂಬೂರು ಪೊಲೀಸ್ ಠಾಣೆ ವ್ಯಾಪ್ತಿದ ಬಬ್ಬು ಸ್ವಾಮಿ ದೈವೊಲ್ಯಡ್ ಬಲ್ಲ್ ಪಾಡೊಂದು ತೀರ್ ಪೋಯಿನ ಘಟನೆ ನಡತ್ ದ್ಂಡ್.

ತೀರ್ ಪೋಯಿನಾರ್ ಕೊಡಗು ಜಿಲ್ಲೆ ಮಡಿಕೇರಿ ತಾಲೂಕ್ ದ ಗೋಪಾಲ (64) ಪಂದ್ ತೆರಿದ್ ಬೈದ್ಂಡ್. ಮೆರೆನ ಸಾವುಗ್ ನಿಜವಾಯಿನ ಕಾರಣ ತೆರಿದ್ ಬೈದಿಜಿ. ಈ ಘಟನೆಗ್ ಸಂಬಂಧ ಪಟ್ಟಿನಂಚೆನೆ ಪಣಂಬೂರು ಪೊಲೀಸೆರ್ ಜಾಗೆ ಪರಿಶೀಲನೆ ನಡಪಾದ್ ಕೇಸ್ ದಾಖಲ್ ಮಲ್ದೆರ್.