ಬ್ಯಾಡ್ ಮ್ಯಾನರ್ಸ್ ಪಿಕ್ಚರ್ ಬುಡುಗಡೆಗ್ ದುಂಬು ನಟೆ ಅಭಿಷೇಕ್ ಅಂಬರೀಶ್ ಕುಡ್ಲದ ಕದ್ರಿ ಮಂಜುನಾಥ ದೇವಲ್ಯಗ್ ಭೇಟಿ ಕೊರ್ದು ಇಸೇಸ ಪೂಜೆ ಸಂದಾಯೆರ್.
ಅಭಿಷೇಕ್ ನೊಟ್ಟಿಗೆ ನಿರ್ದೇಶಕೆರ್ ಮಹೇಶ್ ಕುಮಾರ್, ಬಿಗ್ ಬಾಸ್ ವಿನ್ನರ್ ರೂಪೇಶ್ ಶೆಟ್ಟಿ ದೇವೆರೆನ ದರ್ಶನ ಪಡೆಯೆರ್. ಅಭಿಷೇಕ್, ರಚಿತಾರಾಮ್ ನಟನೆದ ಬ್ಯಾಡ್ ಮ್ಯಾನರ್ಸ್ ಪಿಕ್ಚರ್ ನ್ ದುನಿಯಾ ಸೂರಿ ನಿರ್ದೇಶನ ಮಲ್ದೆರ್.
ಅಮೃತಸಂಜೀವಿನಿ (ರಿ.) ಕುಡ್ಲದ 94ನೇ ಮಾಸಿಕ ಯೋಜನೆದ ಮುಖೇನ ಬಡಪತ್ತ್ ದ ಕುಟುಂಬಗ್ ಪನವುದ ಸಕಾಯ ಮಲ್ತೆರ್.
ನೆತ್ತ ಸೆಪ್ಟೆಂಬರ್ ತಿಂಗೊಲ್ದ ಸೇವಾಯೋಜನೆಡ್ ಸಂಜೀವಿನಿರ್ದ್ ಒಟ್ಟು ಸೇರ್ಸಾಯಿನ 1,43,000.00 ರೂ. ನ್ 4 ಮಾಸಿಕ ಸೇವಾಯೋಜನೆ ಬೊಕ್ಕ 2 ತುರ್ತು ಯೋಜನೆದ ಮುಖೇನ ಒಟ್ಟು 6 ಫಲಾನುಭವಿಲೆಗ್ ಕೊರಿಯೆರ್.
ಕುಡ್ಲ: ಪ್ರತಿ ವರ್ಷ ನಡಪುನಂಚೆನೆ ಈ ವರ್ಷಲ ಸಸಿಹಿತ್ಲು ಶ್ರೀ ಭಗವತೀ ದೇವಲ್ಯಡ್ ಪೊಸರಿ (ಹೊಸಕ್ಕಿ) ನಡಾರಿ(ನಡಾವಳಿ) ಉಚ್ಚಯ ಅ.27 ಸುಕ್ರಾರ ನಡಪರೆ ಉಂಡು.
ಆನಿದ ದಿನ ಬೊಲ್ಪುಗು ಕದಿಕೆರ್ದ್ ಭಂಡಾರ ಬರಿಯೆರೆ ಉಂಡು. ಬಯ್ಯಗ್ ಉಚ್ಚಯದ ಧಾರ್ಮಿಕ ಲೇಸ್ ಸುರು ಆಪುಂಡು. ರಾತ್ರೆ ಮಹಾಪೂಜೆ, ಮೂರ್ತಿ ಬಲಿ, ದರ್ಶನ, ಪರಕೆ ಬೊಕ್ಕ ಭಂಡಾರ ನಿರ್ಗಮನ ಆಯೆರೆ ಉಂಡು.
ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆದ್, ಶ್ರೀದೇವಿನ ಪ್ರಸಾದ ದೆತೊಂದು, ಶ್ರೀ ಭಗವತೀ ಅಪ್ಪೆನ ಕೃಪೆಗ್ ಪಾತ್ರರಾವೊಡು ಪಂದ್ ಸಸಿಹಿತ್ಲು ಶ್ರೀ ಭಗವತೀ ದೇವಲ್ಯದ ಗುರ್ಕಾರೆ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಕುಡ್ಲ: ಕುದ್ರೋಳಿ ಶ್ರೀ ಭಗವತೀ ಕ್ಷೇತ್ರಡ್ ನವರಾತ್ರಿ ಉಚ್ಚಯ ಅ.15-24 ಮುಟ್ಟ ನಡಪರೆ ಉಂಡು.
ಅಂಚೆನೆ ಪ್ರತಿ ದಿನೊಲ ಬೇತೆ ಬೇತೆ ಧಾರ್ಮಿಕ, ಸಾಂಪ್ರದಾಯಿಕ ವಿಧಿ ವಿಧಾನಲು ನಡಪರೆ ಉಂಡು. ಈ ಮತ ಲೇಸ್ ಡ್ ಮಾತೆರ್ಲಾ ಕುಟುಂಬ ಸಮೇತೆರಾದ್ ಪಾಲ್ ಪಡೆದ್, ಪೂಜೆ ಸೇವೆ ಸಂದಾದ್, ಶ್ರೀ ಭಗವತೀ ಅಪ್ಪೆನ, ಬೊಕ್ಕ ಬ್ರಹ್ಮಶ್ರೀ ನಾರಾಯಣ ಗುರುಕುಲೆನ ಕೃಪೆಗ್ ಪಾತ್ರರಾವೊಡು ಪಂದ್ ಕುದ್ರೋಳಿ ಶ್ರೀ ಭಗವತೀ ಕ್ಷೇತ್ರದ ಗುರಿಕಾರೆರ್ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಕುಡ್ಲ: ಸಸಿಹಿತ್ಲು ಶ್ರೀ ಭಗವತೀ ದೇವಲ್ಯ ಬೊಕ್ಕ ಕದಿಕೆ ಭಂಡಾರ ಮಂದಿರಡ್ ಮಾರ್ನೆಮಿದ ಉಚ್ಚಯ ಅ.15-24 ಮುಟ್ಟ ನಡಪರೆ ಉಂಡು.
ಈ ಲೇಸ್ ಗ್ ಮಾತೆರ್ಲಾ ಎಚ್ಚದ ಸಂಖ್ಯೆಡ್ ಬತ್ತ್ ದ್, ಪ್ರಸಾದ ದೆತೊಂದು, ಶ್ರೀ ಭಗವತೀ ಅಪ್ಪೆನ ಕೃಪೆಗ್ ಪಾತ್ರರಾವೊಡು ಪಂದ್ ಸಸಿಹಿತ್ಲು ಶ್ರೀ ಭಗವತೀ ದೇವಲ್ಯದ ಆಡಳಿತ ಸಮಿತಿ ಬೊಕ್ಕ ಅಭಿವೃದ್ಧಿ ಸಮಿತಿದಕುಲು ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಅಯೋಧ್ಯೆಡ್ ನಿರ್ಮಾಣ ಆವೊಂದು ಇಪ್ಪುನ ಶ್ರೀರಾಮ ಮಂದಿರಗ್ ಪೋದು ಮುಟ್ಟುದುಂಡು ತುಳುನಾಡ್ಡ್ ಬುಲೆಯಿನ ನಾಗಲಿಂಗ ಪೂತ್ತ ದೈ. ಅಪರೂಪದ ಈ ಪುರ್ಪಗ್ ರಾಮ ಜನ್ಮಭೂಮಿಡ್ ಅರಳುನ ಭಾಗ್ಯ ತಿಕ್ಕ್ದುಂಡು. ದಕ್ಷಿಣ ಅಮೆರಿಕಾ ಮೂಲದ ಈ ವಿಶಿಷ್ಟ ಪೂ, ತುಳುನಾಡ್ದ ಜವನೆನ ಪ್ರಯತ್ನಡ್ ಇತ್ತೆ ರಾಮ ಮಂದಿರ ಸೇರ್ದ್ಂಡ್. ಮೇರ್ ಇಲ್ಲಲ್ ಬೆಳೆಪಾಯಿನ ನಾಗಲಿಂಗ ವೃಕ್ಷ ಪನ್ಪುನ ಪೂತ್ತ ದೈನ್ ಅಯೋದ್ಯೆಗ್ ಮುಟ್ಟಾದೆರ್.
ಕೊರಿಯರ್ ಮುಖೆನ ಪಾರ್ಸೆಲ್
ಗೂಗಲ್ ಮುಖೆನ ಅಯೋಧ್ಯೆದ ಬಗೆಟ್ ವಿವರ ಪಡೆಯಿನ ವಿನೇಶ್ ಪೂಜಾರಿ ಅಲ್ಪದ ಅಧಿಕಾರಿಲೆನ ಫೋನ್ ನಂಬರ್ ದೆತೊಂದು ಫೋನ್ ಮಲ್ತ್ ನಾಗಲಿಂಗ ವೃಕ್ಷದ ಬಗೆಟ್ ವಿವರ ಕೊರ್ತೆರ್. ಮಾಹಿತಿ ಪಡೆನ ಅಧಿಕಾರಿಲು ಅಯೋಧ್ಯೆಡ್ ಈ ಪೂತ್ತ ಗಿಡನ್ ನಡ್ಪುನ ಸಲುವಾದ್ ಕಡಪುರ್ದ್ ಕೊರಿಯೆರೆ ಪಂಡೆರ್.
ಅಂಚನೆ ವಿನೇಶ್ ಪೂಜಾರಿ ಕೊರಿಯರ್ ಮುಖೆನ ನಾಗಲಿಂಗ ವೃಕ್ಷದ 5 ದೈಕ್ ಲೆನ್ ಕಡಪಾದ್ ಕೊರ್ತೆರ್. ಐರ್ದ್ ಬೊಕ್ಕ ಕೆಲ ದಿನತ ಬೊಕ್ಕ ಅಯೋಧ್ಯೆದ ಅಧಿಕಾರಿಲು ವಿನೇಶ್ ಮೆರೆಗ್ ಕಾಲ್ ಮಲ್ತ್ ದ್, ದೈಕ್ಕುಲು ತಿಕ್ಕಿನ ಬಗೆಟ್ ಮಾಹಿತಿ ಕೊರ್ದ್, ಉಂದೆನ್ ಮೂಲ್ ನರ್ದ್ ಫೋಟೋ ಕಡಪುಡುವ ಪಂದ್ ಮಾಹಿತಿ ಕೊರ್ತೆರ್.
ಒಡಿಪು : ಕಟಪಾಡಿ ಯಶಸ್ ಪ್ರಕಾಶನ, ಒಡಿಪು ತುಳುಕೂಟ, ಕಾಪು ವಿದ್ಯಾನಿಕೇತನ ಪಬ್ಲಿಕ್ ಸ್ಕೂಲ್ ಮುತಾಲಿಕೆಡ್ ಪತ್ರಕರ್ತೆರ್ ಪ್ರಕಾಶ ಸುವರ್ಣ ಕಟಪಾಡಿ ಬರೆಯಿನ ಅಪ್ಪೆಮ್ಮೆ ತುಳು ನಾಟಕದ ಕೃತಿ ಬುಡುಗಡೆ ಬೊಕ್ಕ ಜೋಕ್ಲೆನ ತುಳು ಕಬಿ ಗೋಷ್ಠಿ ಲೇಸ್ ಸೆ.25 ದಾನಿ ಒಡಿಪುದ ಕಿದಿಯೂರು ಹೊಟೇಲ್ದ ಪವನ್ ರೂಫ್ಟಾಪ್ ಹಾಲ್ಡ್ ನಡತ್ಂಡ್.
ಲೇಸ್ನ ಬ್ರಹ್ಮಾವರ ನ್ಯೂ ಕರ್ನಾಟಕ ಬಿಲ್ಡರ್ಸ್ ಸಂಸ್ಥೆದ ಧಣಿ ಚೇತನ್ ಕುಮಾರ್ ಶೆಟ್ಟಿ ಉದಿಪನ ಮಲ್ತೆರ್. ಪುಸ್ತಕನ್ ಒಡಿಪುದ ಸಮಾಜ ಸೇವಕೆರ್ ಒಡಿಪು ವಿಶ್ವನಾಥ ಶೆಣೈ ಬೊಕ್ಕ ಪ್ರಭಾವತಿ ದಂಪತಿ ಬುಡುಗಡೆ ಮಲ್ತೆರ್. ಗುರ್ಕಾರ್ಮೆನ್ ಜಾನಪದ ವಿದ್ವಾಂಸ ಬನ್ನಂಜೆ ಬಾಬು ಅಮೀನ್ ವಹಿಸ್ದಿತ್ತೆರ್. ಉಪ್ಪುಂದ ಸರಕಾರಿ ಪದವಿ ಪೂರ್ವ ಕಾಲೇಜ್ದ ನಿವೃತ್ತ ಪ್ರಾಂಶುಪಾಲೆರ್ ಡಾ.ವಿ.ಕೆ.ಯಾದವ್ ಕೃತಿ ಪರಿಚಯ ಮಲ್ತೆರ್. ಈ ಪೊರ್ತುಡು ಸಮಾಜ ಸೇವಕೆರಾಯಿನ ಲೀಲಾಧರ್ ಶೆಟ್ಟಿ ಕರಂದಾಡಿ ಬೊಕ್ಕ ಈಶ್ವರ್ ಮಲ್ಪೆ ಮೊಕ್ಲೆನ್ ಮನಾದಿಗೆ ಮಲ್ತೆರ್.
ಒಡಿಪುದ ಉದ್ಯಮಿ ಮನೋಹರ್ ಶೆಟ್ಟಿ, ಪಾಂಗಾಳಗುಡ್ಡೆ ಗರಡಿಮನೆ ಸುಧಾಕರ್ ಡಿ.ಅಮೀನ್, ಮತ್ಸ್ಯೋದ್ಯಮಿಲಾಯಿನ ಹರೀಶ್ ಶ್ರೀಯಾನ್ ಮಲ್ಪೆ, ಒಡಿಪು ತುಳುಕೂಟದ ಪ್ರಧಾನ ಕಾರ್ಯದರ್ಶಿ ಗಂಗಾಧರ್ ಕಿದಿಯೂರ್, ಯಶಸ್ ಪ್ರಕಾಶನ ಸಂಸ್ಥೆದ ಮುಖ್ಯಸ್ಥೆ ಪ್ರೀತಿ ಪ್ರಕಾಶ ಸುವರ್ಣ ಕಟಪಾಡಿ, ಸುಂದರಿ ಸುವರ್ಣ, ಇಂದಿರಾ ವಿ.ಕಾಂಚನ್, ನಾರಾಯಣ ಸಾಲ್ಯಾನ್, ನವಮಿ ಸುವರ್ಣ ಈ ಪೊರ್ತುಡು ಇತ್ತೆರ್.
ಒಡಿಪು ತಾಲೂಕು ಕಸಾಪ ಗೌರವ ಕಾರ್ಯದರ್ಶಿ ಜನಾರ್ದನ್ ಕೊಡವೂರು ಬೊಕ್ಕ ಸಾಹಿತಿ ಪೂರ್ಣಿಮ ಜನಾರ್ದನ್ ಗುರ್ಕಾರ್ಮೆಡ್ ನಡತ್ತಿನ ಅಪ್ಪೆಮ್ಮನೊಟ್ಟುಗು ಜೋಕ್ಲೆ ತುಳು ಕಬಿ ಗೋಷ್ಠಿಡ್ ಒಡಿಪು ಜಿಲ್ಲೆದ ಬೇತೆ ಬೇತೆ ಪ್ರೌಢಶಾಲೆದ 16 ಕಲ್ಪಾರ್ಥಿಲು ಪಾಲ್ ಪಡೆದಿತ್ತೆರ್. ಕಬಿ ಗೋಷ್ಠಿಡ್ ಸುಶಾಂತ್ ಆಚಾರ್ಯ, ಶಿವಾನಿ ಅಂಬಲಪಾಡಿ, ತೃಷಾ ಅದಮಾರು, ಸಂದರ್ಶಿನಿ ಕಾರ್ಲ, ಸಾನ್ವಿ ಪೆರ್ಡೂರು, ಕಾರ್ತಿಕ ಮುದ್ರಾಡಿ, ಶಾನ್ವಿ ಕಾರ್ಲ, ಸುಪ್ರಿಯ ಕಾರ್ಲ, ಪ್ರೇಕ್ಷಾ ಆಚಾರ್ಯ ನಕ್ರೆ, ನಂದಿನಿ ಅಲೆವೂರು, ಮಹಾಲಕ್ಷ್ಮೀ ಬನ್ನಂಜೆ, ಯಶಸ್ ಪಿ.ಸುವರ್ಣ ಕಟಪಾಡಿ, ಪೂರ್ವಿ ಎಸ್.ಕೋಟ್ಯಾನ್ ಉದ್ಯಾವರ, ಮಿಶಾ ಕೋಟ್ಯಾನ್ ಪಡುಬಿದ್ರಿ, ಅಭಿಷೇಕ್ ಕುಂಜಾರುಗಿರಿ, ವೈಷ್ಣವಿ ದೇವಾಡಿಗ ಸ್ವರಚಿತ ಕವನ ವಾಚನ ಮಲ್ತೆರ್. ನಾಟಕಕಾರೆರ್ ಪ್ರಕಾಶ ಸುವರ್ಣ ಕಟಪಾಡಿ ಬಿನ್ನೆರೆನ್ ಎದ್ಕೊಂಡೆರ್. ಲೇಸ್ದ ಸಂಯೋಜಕಿ ಡಾ.ವಿದ್ಯಾ ಸರಸ್ವತಿ ಲೇಸ್ ಸುಧಾರಿಕೆ ಮಲ್ತ್. ಸಾಹಿತಿ ದಯಾನಂದ ಕೆ.ಶೆಟ್ಟಿ ದೆಂದೂರು ಸೊಲ್ಮೆ ಸಂದಾಯ ಮಲ್ತೆರ್.
ಜೈ ತುಲುನಾಡ್ ಕುಡ್ಲ ಎಗ್ಗೆಗ್ 2023-2024 ನೇ ಸಾಲ್ ದ ಪದುಕೆರೆಗ್ ಪಟ್ಟಕಟ್ಟುನ ಲೇಸ್ ಸೆ.24 ಐತಾರದಾನಿ ಕೂಳೂರು ಫಲ್ಗುಣಿ ಸಭಾಂಗಣಡ್ ನಡತ್ಂಡ್.
ಕಾರ್ಯಕಾರಿ ಸಮಿತಿದ ಗುರ್ಕಾರ್ಲು ಆದ್ ನಿರಂಜನ್ ಕರ್ಕೇರ, ಒತ್ತು ಗುರ್ಕಾರ್ಲು ಮನೀಶ್ ಕುಮಾರ್, ಕಾರ್ಯಂತೆರ್ ಚೇತನ್ ಅಂಚನ್, ಒತ್ತು ಕಾರ್ಯಂತೆರ್ ರಾಜೇಶ್ ಶೆಟ್ಟಿ, ಪನವುದ ಪಾಲವೆರ್ ಶ್ವೇತಾ ಶೆಟ್ಟಿ, ಒತ್ತು ಪನವುದ ಪಾಲವೆರ್ ಪುನೀತ್ ಬೋಳೂರು, ಸಂಘಟನಾ ಕಾರ್ಯಂತೆರ್ ದುರ್ಗಾಪ್ರಸಾದ್ ರೈ, ಒತ್ತು ಸಂಘಟನಾ ಕಾರ್ಯಂತೆರ್ ಲತಾ ಡಿಂಪಲ್, ಒತ್ತು ಸಂಘಟನಾ ಕಾರ್ಯಂತೆರ್ ಸ್ವಾತಿ ಶೆಟ್ಟಿ ಆಯ್ಕೆ ಆತೆರ್.
ಲೇಸ್ ದ ಗುರ್ಕಾರ್ಮೆನ್ ಜೈ ತುಲುನಾಡ್ (ರಿ ) ಕೇಂದ್ರ ಸಮಿತಿ ದ ಗುರ್ಕಾರ್ಲು ವಿಶು ಶ್ರೀಕೇರ ವಹಿಸೊಂಡೆರ್, ಕೇಂದ್ರ ಸಮಿತಿ ಒತ್ತು ಗುರ್ಕಾರ್ಲು ಉದಯ್ ಪೂಂಜ, ಪ್ರಧಾನ ಕಾರ್ಯಂತೆರ್ ಕಿರಣ್ ತುಲುವೆ, ಸ್ಥಾಪಕ ಸಮಿತಿ ಪದುಕೆರ್ ರಕ್ಷಿತ್ ರಾಜ್ ಬಜಾಲ್, ಒತ್ತು ಕಾರ್ಯಂತೆರ್ ರಾಜಶ್ರೀ ಚಂದ್ರಶೇಖರ, ಒತ್ತು ಸಂಘಟನಾ ಕಾರ್ಯಂತೆರ್ ರಾಜೇಶ್ ನೀರುಡೆ ಪಾಲ್ ಪಡೆದಿತ್ತೆರ್. ಒತ್ತು ಕಾರ್ಯಂತೆರ್ ಪೂರ್ಣಿಮಾ ಬಂಟ್ವಾಳ ಲೇಸ್ ಸುಧಾರಿಕೆ ಮಲ್ತೆರ್.
ಕುಡ್ಲ: ಆರೋಗ್ಯ ಬೊಕ್ಕ ಕುಟುಂಬ ಕಲ್ಯಾಣ ಸಚಿವೆರ್, ಜಿಲ್ಲಾ ಉಸ್ತುವಾರಿ ಸಚಿವೆರಾಯಿನ ದಿನೇಶ್ ಗುಂಡೂರಾವ್ ಸೆ.25 ಸೋಮವಾರ ದಾನಿ ಪೇಂಟೆದ ಕುದ್ಮುಲ್ ರಂಗರಾವ್ ಪುರಭವನಡ್ ಜನತಾ ದರ್ಶನ ಕಾರ್ಯಕ್ರಮಗ್ ಚಾಲನೆ ಕೊರಿಯೆರ್.
ಅಂಚನೆ ಸಾರ್ವಜನಿಕೆರೆರ್ದ್ ಬೇತೆ ಬೇತೆ ಬೇಡಿಕೆಲೆನ ಮನವಿ ಪತ್ರಲೆನ್ ಪಡೆಯೊಂದು ಮಾಹಿತಿಲೆನ್ ಕೊರಿಯೆರ್.
ಈ ಪೊರ್ತುಡು ವಿಧಾನ ಪರಿಷತ್ ಶಾಸಕೆರ್ ಹರೀಶ್ ಕುಮಾರ್, ಡಿಸಿ, ಸಿಇಒ, ನಗರ ಪೊಲೀಸ್ ಆಯುಕ್ತೆರು, ಎಸ್ ಪಿ ಸೇರಿನಂಚ ಅಧಿಕಾರಿಲು, ಜನಪ್ರತಿನಿಧಿಲು ಇತ್ತೆರ್.
ಕುಡ್ಲ: ಧಾರ್ಮಿಕ ಕೇಂದ್ರಲು ಇಪ್ಪುನಂಚೆನೆ ಉತ್ತಮ ಮನುಷ್ಯ ನಿರ್ಮಾಣದ ಸಂಕಲ್ಪರ್ದ್ ಬೇತೆ ಬೇತೆ ಕಡೆಟ್ ಶಿಕ್ಷಣ ಮಂದಿರದ ನಿರ್ಮಾಣಗ್ ವಿಶೇಷ ಒತ್ತು ಕೊರೊಡು. ಶಿಕ್ಷಣರ್ದ್ ಶಕ್ತಿ ಪನ್ಪುನ ಬ್ರಹ್ಮಶ್ರೀ ನಾರಾಯಣ ಗುರುಕುಲೆನ ಮಾರ್ಗದರ್ಶನ ನಮಕ್ಕ್ ಮಾತ ಮಾದರಿ ಪಂದ್ ವಿಧಾನ ಪರಿಷತ್ ಸದಸ್ಯ ಬಿ.ಕೆ. ಹರಿಪ್ರಸಾದ್ ಪಂಡೆರ್.
ಅಖಿಲ ಭಾರತ ಬಿಲ್ಲವ ಯೂನಿಯನ್ ಮುತಾಲಿಕೆಡ್ ಕುಡ್ಲದ ಕುಂಜತ್ತಬೈಲ್ಡ್ ನಿರ್ಮಾಣ ಆಯಿನ ದಿ| ದಾಮೋದರ ಆರ್. ಸುವರ್ಣ ಸ್ಮಾರಕ “ಬಿಲ್ಲವ ಹಾಸ್ಟೆಲ್’ನ್ ಕುದ್ಮಲ್ ರಂಗರಾವ್ ಪುರಭವನಡ್ ಸೆ.24 ಐತಾರ ದಾನಿ ಉದಿಪನ ಮಲ್ತ್ ಪಾತೆರಿಯೆರ್.
ಶೈಕ್ಷಣಿಕ ಕೊಡುಗೆ
ಲೇಸ್ ದ ಉದಿಪನ ಮಲ್ತಿನ ವಿಧಾನಸಭಾ ಸ್ಪೀಕರ್ ಯು.ಟಿ. ಖಾದರ್ ಪಾತೆರ್ದ್ ಅಖಿಲ ಭಾರತ ಬಿಲ್ಲವರ ಯೂನಿಯನ್ ಬಿಲ್ಲವ ಹಾಸ್ಟೆಲ್ ಮುಖೇನ ಶೈಕ್ಷಣಿಕ ಕ್ಷೇತ್ರಡ್ ಭಾರಿ ಮಲ್ಲ ಕೊಡುಗೆನ್ ಕೊರ್ತುಂಡು. ಕಲ್ಪಾರ್ಥಿ ಸಮುದಾಯ ಇಂಚಿನ ಅವಕಾಶಲೆನ್ ಸದುಪಯೋಗ ಮಲ್ತೊನೊಡು. ಉತ್ತಮ ಶಿಕ್ಷಣದ ಮುಖೇನ ಸದೃಢ ಸಮಾಜ ನಿರ್ಮಾಣ ಮಲ್ಪೊಡು ಪಂಡೆರ್.
ಸಂಸದ ನಳಿನ್ ಕುಮಾರ್ ಕಟೀಲು ಪಾತೆರ್ದ್, ನಾರಾಯಣ ಗುರುಕುಲೆನ ಅಧ್ಯಾತ್ಮ ಕ್ರಾಂತಿಪುರುಷ ಆದ್ ಅಕ್ಷರರ್ದ್ ಜ್ಞಾನ, ಜ್ಞಾನರ್ದ್ ವಿಜ್ಞಾನ, ವಿಜ್ಞಾನರ್ದ್ ತಂತ್ರಜ್ಞಾನ, ತಂತ್ರಜ್ಞಾನರ್ದ್ ತಂತ್ರಾಂಶ ಜ್ಞಾನನ್ ಈ ನಾಡ್ಗ್ ಕೊರ್ತೆರ್. ಗುರುಕುಲೆನ ಚಿಂತನೆದಂಚ ನವೀನ್ಚಂದ್ರ ಡಿ. ಸುವರ್ಣರ ಕುಟುಂಬ ಬಿಲ್ಲವ ಹಾಸ್ಟೆಲ್ ಸಮಾಜಗ್ ಅರ್ಪಣೆ ಮಲ್ತಿನ ಶ್ಲಾಘನೀಯ ಪಂಡೆರ್.
ಅಖಿಲ ಭಾರತ ಬಿಲ್ಲವರ ಯೂನಿಯನ್ ಗುರ್ಕಾರೆರ್ ನವೀನ್ಚಂದ್ರ ಡಿ. ಸುವರ್ಣ ಗುರ್ಕಾರ್ಮೆನ್ ವಹಿಸ್ದ್ ಇತ್ತೆರ್. ಉದ್ಯಮ ಕ್ಷೇತ್ರದ ಸಾಧಕೆರಾಯಿನ ಸುಶೀರ್ ಕುಮಾರ್ ಬೊಕ್ಕ ಬಾಬ ಅಲಂಕಾರ್ ಮೊಕ್ಲೆನ್ ಈ ಪೊರ್ತುಡು ಮಾನಾದಿಗೆ ಮಲ್ತೆರ್.
ಶಾಸಕೆರಾಯಿನ ಉಮಾನಾಥ ಕೋಟ್ಯಾನ್, ವೇದವ್ಯಾಸ ಕಾಮತ್, ವಿಧಾನ ಪರಿಷತ್ ಸದಸ್ಯೆರ್ ಹರೀಶ್ ಕುಮಾರ್, ಮೇಯರ್ ಸುಧೀರ್ ಶೆಟ್ಟಿ ಕಣ್ಣೂರು, ಮಾಜಿ ಸಚಿವೆರ್ ವಿನಯ ಕುಮಾರ್ ಸೊರಕೆ, ಸಣ್ಣ ಕೈಗಾರಿಕಾ ರಾಷ್ಟ್ರೀಯ ಸಮಿತಿ ಗುರ್ಕಾರ್ಲು ಉದಯಚಂದ್ರ ಡಿ. ಸುವರ್ಣ, ಮುಂಬಯಿ ಬಿಲ್ಲವ ಚೇಂಬರ್ ಆಫ್ ಕಾಮರ್ಸ್ದ ಗುರ್ಕಾರ್ಲು ಎನ್.ಟಿ. ಪೂಜಾರಿ, ಮುಂಬಯಿ ಬಿಲ್ಲವ ಅಸೋಸಿಯೇಶನ್ ಗುರ್ಕಾರ್ಲು ಹರೀಶ್ ಜೆ. ಅಮೀನ್, ಬೆಂಗಳೂರು ಬಿಲ್ಲವರ ಅಸೋಸಿಯೇಶನ್ ಗುರ್ಕಾರ್ಲು ವೇದಕುಮಾರ್, ಅಖಿಲ ಭಾರತ ಬಿಲ್ಲವರ ಮಹಿಳಾ ಸಂಘ ಗುರ್ಕಾರ್ದಿ ಸುಮಲತಾ ಎನ್. ಸುವರ್ಣ, ಕಾರ್ಪೊರೇಟರ್ ಶರತ್ ಕುಮಾರ್ ಈ ಪೊರ್ತುಡು ಇತ್ತೆರ್.
