ಕುಡ್ಲದ ಸುದ್ದಿ | Mangalore News

ಕುಡ್ಲ ದಸರಾಗ್ ಮಹಾನಗರ ಪಾಲಿಕೆದ ವಿದ್ಯುತ್ ಬೊಲ್ಪುದ ಸಿಂಗಾರ

ಕುಡ್ಲ ನಗರ ಪಾಲಿಕೆರ್ದ್ ಕುಡ್ಲದ ಮಾರ್ನೆಮಿ ಮೆರವಣಿಗೆಗ್ ವಿದ್ಯುತ್ ದೀಪಾಲಂಕಾರೊಗು 1.39 ಕೋಟಿ ಖರ್ಚಿ ಮಲ್ತೊಂದುಂಡ್. ಕುಡ್ಲ ದಸರೊಗು ಕುದ್ರೋಳಿ ಗೋಕರ್ಣನಾಥ ದೇವಲ್ಯ, ಮಂಗಳಾದೇವಿ, ಉರ್ವ ಮಾರಿಗುಡಿ, ಭಗವತಿ, ವೆಂಕಟರಮಣ ಅಂಚೆನೆ ಪೇಂಟೆದ ಬೇತೆ ದೇವಲ್ಯೊಗು ಪೋಪಿನ ತಾದಿಲೆಡ್ ಪೂರಾ ಲೈಟಿಂಗ್ ಪಾಡುಂಡು ಪನ್ದ್ ಕುಡ್ಲದ ಮೇಯರ್ ಸುಧೀರ್ ಶೆಟ್ಟಿ ಕಣ್ಣೂರು ಪನ್ತೆರ್. ನನ ದುಂಬಗ್ ಮಾರ್ನೆಮಿದ ಪೊರ್ತು ಲೈಟಿಂಗ್ ಮಲ್ಪರೆ ಶಾಶ್ವತವಾಯಿನ ವ್ಯವಸ್ಥೆ ಮಲ್ಪುವ ಪನ್ದ್ ಪಂತೆರ್.
ಶಾಸಕೆರ್ ವೇದವ್ಯಾಸ ಕಾಮತೆರ್ ಪಾತೆರ್ದ್, ಕುಡ್ಲದ ದಸರಾ ಪಂಡ ಮೈಸೂರು ದಸರಾದಾತೇ ಪುಗಾರ್ತೆ ಉಂಡು.
ಮಾತಾ ಕಡೆರ್ದ್ ಜನಕುಲು ಇಡೆ ಬರ್ಪೆರ್. ಕರಿನ ಮೂಜಿ ವರ್ಸೊರ್ದಿಂಚಿ ಕುಡ್ಲ ಮಹಾನಗರ ಪಾಲಿಕೆ ಕುಡ್ಲ ದಸರೊಗು ಲೈಟಿಂಗ್ ವ್ಯವಸ್ಥೆ ಮಲ್ತೊಂದುಂಡು. “ಪಿಲಿ ನಲಿಕೆ”, “ಪಿಲಿ ಪರ್ಬ” ದಂಚಿನ ಲೇಸುಲು ನಡಪರೆ ಉಂಡು. ದಸರೊದ ಪೊರ್ತುಡು ತುಳುನಾಡ ಸಂಸ್ಕೃತಿ, ಕುಡ್ಲದ ಪೊಲಬು ತೆರಿಪಾವುನ ಕಜ್ಜೊಲೆನ್ ಮಲ್ಪೊಲಿ ಉಂದೆಕ್ ಸಾರ್ವಜನಿಕೆರ್ ಸಲಹೆ ಸೂಚನೆ ಕೊರೊಲಿ ಪನ್ದ್ ಪಂಡೆರ್.

ಮಂಗಳಾದೇವಿ: ಹಿಂದೂ ಸಂಘಟನೆಲೆನ ವಿರೋಧದ ನಡುಟೆ ಟೆಂಡರ್, 6 ಅಂಗಡಿ ಮುಸ್ಲಿಮೆರೆಗ್

ಕುಡ್ಲದ ಮಂಗಳಾದೇವಿ ದೇವಲ್ಯದ ಮಾರ್ನೆಮಿ ಉಚ್ಚಯೊಗು ಹಿಂದೂ ಸಂಘಟನೆಲೆನ ವಿರೋಧದ ನಡುಟೇ ಸನಿಯಾರ ಬಾಕಿ ಒರಿದಿನ ಅಂಗಡಿ ಸ್ಟಾಲ್‌ಲೆನ ಟೆಂಡರ್‌ ಲೆತ್ತ್‌ದ್ ಅಂತಿಮ ಮಲ್ದೆರ್. ಸನಿಯಾರ ನಡತಿನ ಏಲಂಡ್ 11 ಸ್ಟಾಲ್‌ಲೆಡ್ 6 ಸ್ಟಾಲ್‌ಲೆನ್ ಮುಸ್ಲಿಮೆರ್ ಟೆಂಡರ್‌ಡ್ ಗೆತೊಂದೆರ್.
ಉಂದೆರ್ದಾವರ ಈ ಸರ್ತಿ ಮಾರ್ನೆಮಿ ಉಚ್ಚಯೊಡು ಸ್ಟಾಲ್‌ ಪಾಡ್ದೇ ಸೈ ಪನ್ಪಿನ ಜಾತ್ರಾ ವ್ಯಾಪಾರಸ್ಥೆರೆ ಸಮನ್ವಯ ಸಮಿತಿದ ಬಿನ್ನಾಪು ಇಡೆಗ್ ಎತ್ತ್‌ದ್ಂಡ್. ಐನ್ ದಿನೊಕು ದುಂಬು ದೇವಲ್ಯೊದ ಆಡಳಿತ ಮಂಡಳಿ ಟೆಂಡರ್ ಲೆತ್ತ್‌ದ್ ಫೈನಲ್ ಮನ್ಪುನಗ 125 ಸ್ಟಾಲ್‌ಲೆಡ್ 92 ಸ್ಟಾಲ್‌ಲೆನ್ ಕೊರ್ದಿತ್ತೆರ್. ಆಂಡ 71 ಜನ ಮಾತ್ರ ಬಿಡ್‌ ಕಾಸ್ ಕಟ್ಟ್‌ದ್ ಸ್ಟಾಲ್‌ನ್ ಅಧಿಕೃತ ಮಲ್ತಿತ್ತೆರ್. ಟೆಂಡರ್‌‌ದ ಪೊರ್ತುಡು ದೇವಲ್ಯೊದ ಪಿದಯಿ ಪಾಲಿಕೆ ಜಾಗೆಡ್ ಸ್ಟಾಲ್‌ ಪಾಡೆರೆ ಮುಕ್ತ ಅವಕಾಶ ಇತ್ತ್‌ದ್, ಉ್ಂದೆರ್ದ್ ಮುಸ್ಲಿಮೆರೆನ್ ದೂರ ದೀತೆರ್ ಪಂದ್ ಆರೋಪಿತ್‌ದ್ ಜಾತ್ರಾ ವ್ಯಾಪಾರಸ್ಥೆರೆ ಸಮನ್ವಯ ಸಮಿತಿ ಜಿಲ್ಲಾಡಳಿತ ಬೊಕ್ಕ ಪೊಲೀಸ್‌ ಕಮಿಷನರ್‌ಗ್ ಒಯಿಲ್ ಕೊರ್ತಿನತ್ತಂದೆ, ಶುಕ್ರವಾರ ಪೊರ್ಂಬಾಟೊಲಾ ಮಲ್ತಿತ್ತ್ಂಡ್.

ಈ ದಿಸೆಟ್ ಜಿಲ್ಲಾಧಿಕಾರಿಲು ಬಿನ್ನಾಪು ಮಲ್ತ್‌ದ್, ಬಾಕಿ ಒರಿದಿನ ಸ್ಟಾಲ್‌‌ಲೆನ ಟೆಂಡರ್‌ ಲೆಪ್ಪಾದ್ ಪಟ್ಟೊಡೂಂದು ದೇವಲ್ಯೊದ ಆಡಳಿತೊಗು ಸೂಚನೆ ಕೊರ್ದಿತ್ತೆರ್. ಆ ಪ್ರಕಾರೊಡು ಸನಿಯಾರ ಮಧ್ಯಾಹ್ನ ಟೆಂಡರ್‌ ನಡತ್ಂಡ್.

ಗಣೇಶ್‌ ಕುಲಾಲ್‌ ಮೆರೆಗ್‌ ಊರುರ್ದಕ್ಲೆನ ಪೌರ ಸನ್ಮಾನ

ಕುಡ್ಲ ಮಹಾನಗರ ಪಾಲಿಕೆದ ಲೆಕ್ಕಪತ್ರ ಸ್ಥಾಯಿ ಸಮಿತಿದ ಗುರ್ಕಾರೆರಾದ್‌ ಆಯ್ಕೆ ಆಯಿನ ಸಮಾಜ ಸೇವಕೆ, ಸರಳ ಸಜ್ಜನಿಕೆದ ಜನನಾಯಕೆ ಗಣೇಶ್ ಕುಲಾಲ್ ಉರ್ವ ಮೇರೆಗ್‌ ಐತಾರ ಬಯ್ಯ 4:30 ಕ್ಕ್‌ ಸರಿಯಾದ್ ಉರ್ವದ ಗಣೇಶ ಮಂಟಪಡ್ ಉರ್ವ ಊರುದ ಮಾತ ದೈವಸ್ಥಾನ, ದೇವಸ್ಥಾನ ಅಂಚೆನೆ ಊರೆಕ್ಲೆನ ವತಿರ್ದ್‌ ಪೌರ ಸನ್ಮಾನ ಕಾರ್ಯಕ್ರಮ ನಡಪರೆ ಉಂಡು.

ಡಿಗ್ರಿ ಕಲ್ಪುನಕ್ಲೆಗ್ಲ ಮಾರ್ನೆಮಿ ರಜೆ ಕೊರ್ಲೆ: ಶಾಸಕೆರ್ ಕಾಮತ್

ಕುಡ್ಲಡ್ ಇತ್ತೆ ಶಾಲೆದ ಜೋಕ್ಲೆಗ್ ಮಾರ್ನೆಮಿದ ರಜೆ ಕೊರ್ತೆರ್. ಆಂಡ ಪದವಿ ಕಲ್ಪಾರ್ಥಿಲೆಗ್ ರಜೆ ಕೊರಂದಿನೆರ್ದಾವರ ಪರ್ಬನ್ ಆಚರಣೆ ಮಲ್ಪರೆ ಅಡ್ಡಿ ಆತ್ಂಡ್. ನಾಡ್ ದ ಮಲ್ಲ ಪರ್ಬ ದಸರಾಗ್ ಡಿಗ್ರಿ ಕಲ್ಪುನಕ್ಲೆಗ್ ಲ ರಜೆ ಕೊರ್ರೆ ಮಸ್ತ್ ಜೋಕ್ಲೆನ ಇಲ್ಲದಕುಲ್ ಮನವಿ ಮಲ್ತ್ ದೆರ್. ಸರಕಾರ ಈ ಬಗ್ಗೆ ಗಮನ ಕೊರೊಡ್ ಪಂದ್ ಶಾಸಕೆರ್ ವೇದವ್ಯಾಸ್ ಕಾಮತ್ ಆಗ್ರಹ ಮಲ್ತೆರ್.

ಮಾರ್ನೆಮಿ ನಾಡ್ ದ ಪ್ರಮುಖ ಪರ್ಬ. ಅವೆಟ್ಲಾ ಮೈಸೂರ್ ದಸರಾರ್ದ್ ಬೊಕ್ಕ ಕುಡ್ಲದ ಮಾರ್ನೆಮಿ ಜನಾಕರ್ಷಣೆ ಕೊರ್ಪಿನ ಪರ್ಬ ಆದುಂಡು. ಅಂಚಾದ್ ಮಾರ್ನೆಮಿನ್ ಕಲ್ಪಾರ್ಥಿಲು, ಶಿಕ್ಷಕೆರ್, ಪೋಷಕೆರ್, ಸೇರಿನಂಚ ಮಾತೆರ್ಲ ಸಂಭ್ರಮಡ್ ಆಚರಣೆ ಮಲ್ಪೆರೆ ರಜೆ ಕೊರ್ಪುನ ಬಗ್ಗೆ ಆದೇಶ ಕೊರೊಡ್ ಪಂದ್ ಉನ್ನತ ಶಿಕ್ಷಣ ಇಲಾಖೆದ ಅಪರ ಮುಖ್ಯ ಕಾರ್ಯದರ್ಶಿಲೆನ ಮುಖೆನ ಸರ್ಕಾರಗ್ ಆಗ್ರಹ ಮಲ್ತೆರ್.

ಬಿಜೆಪಿ ಸರ್ಕಾರದ ಅವಧಿಡ್ ಮಾರ್ನೆಮಿ ಪರ್ಬದ ರಜೆಟ್ ಆಯಿನ ವ್ಯತ್ಯಾಸನ್ ಸರ್ಕಾರದ ಮಟ್ಟಡೆ ಮಾರ್ಪಾಡ್ ಮಲ್ಪುನೆಟ್ ಶಾಸಕೆರ್ ವೇದವ್ಯಾಸ್ ಕಾಮತ್ ಯಶಸ್ವಿಯಾದಿತ್ತೆರ್.

ಕುಡ್ಲ: ಜನನ ಮರಣ ನೊಂದಣಿಗ್ ಆಧಾರ್ ಕಡ್ಡಾಯ ಇಜ್ಜಿ – ಡಿ.ಸಿ

ಕುಡ್ಲ: ಜನನ ಮರಣ ನೋಂದಣಿಡ್‌ ಒವ್ವೇ ವಿಳಂಬ ಬೊಕ್ಕ ಸಾಮಾನ್ಯ ಜನಕ್ಕುಲ್ ತೊಂದರೆ ಅನುಭವಿಸಾವುನ ಬೊಡ್ಚಿ. ಇ-ಜನ್ಮ ತಂತ್ರಾಂಶಡ್ ನೋಂದಣಿ ಆಪುನ ಮರಣದ ಕಾರಣನ್ ಸರಿಯಾದ್ ನಮೂದಿಸಾವೊಡು ಪಂದ್ ಪ್ರಭಾರ ಜಿಲ್ಲಾಧಿಕಾರಿ ಡಾ. ಆನಂದ್.ಕೆ ಪಂಡೆರ್.‌
ಮೇರ್‌ ಗುರುವಾರ ದಾನಿ ಜಿಲ್ಲಾಧಿಕಾರಿನ ಕಚೇರಿ ಸಭಾಂಗಣಡ್ ನಡತ್ತಿನ ಜನನ ಮರಣ ನೋಂದಣಿ ಜಿಲ್ಲಾ ಮಟ್ಟದ ಸಮನ್ವಯ ಸಮಿತಿದ ಗುರ್ಕಾರ್ಮೆನ್‌ ವಹಿಸ್‌ದ್‌ ಪಾತೆರಿಯೆರ್. ಜನನ ಮರಣ ನೊಂದಣಿಗ್ ಆಧಾರ್ ಕಡ್ಡಾಯ ಇಜ್ಜಿ. ಬೇತೆ ದಾಖಲಾತಿ ಆಯಿನ ಲೈಸನ್ಸ್ ಇಂಚಿನ ದಾಖಲೆನ್‌ ಬಳಕೆ ಮಲ್ಪೊಲಿ. ಗ್ರಾಮ ಒನ್ ಕಚೇರಿಡ್ ಕೂಡ ಸಾರ್ವಜನಿಕೆರ್ ಅರ್ಜಿ ಸಲ್ಲಿಸಾವೊಲಿ ಪಂದ್‌ ಪಂಡೆರ್.‌

ರಾಷ್ಟ್ರೀಯ ಓಪನ್ ರೇಟೆಡ್ ಚೆಸ್ ಪಂತೊ

ಕುಡ್ಲ: ರಾಷ್ಟ್ರೀಯ ಓಪನ್/ಕ್ಲಾಸಿಕಲ್ ರೇಟೆಡ್ ಚೆಸ್ ಪಂದ್ಯಾಟ ಅ.17 ರ್ದ್ 21ರ ಮುಟ್ಟ ಕುಡ್ಲದ ಪುರಭವನಡ್ 9 ರೌಂಡ್‌ಡ್‌ ನಡಪೆರೆ ಉಂಡು. ಸುಮಾರು 20 ವರ್ಷರ್ದ್‌ ಬೊಕ್ಕ ನಿರಂತರ 5 ದಿನತ ಪಂದ್ಯಾಟ ನಡಪೆರೆ ಉಂಡು ಪಂದ್‌ ದ.ಕ. ಜಿಲ್ಲಾ ಚೆಸ್ ಅಸೋಸಿಯೇಶನ್ ನ ಗೌರವಾಧ್ಯಕ್ಷೆರ್‌ ಸುನೀಲ್ ಆಚಾರ್ ತೆರಿಪಾಯೆರ್.

ಮೇಯರ್ ಸುಧೀರ್ ಶೆಟ್ಟಿ ಲೇಸ್‌ದ ಉದಿಪನ ಮಲ್ಪೆರೆ ಉಲ್ಲೆರ್.‌ ಮಲ್ಲ ಬಿನ್ನೆರಾದ್‌ ಶಾಸಕೆರ್ ಡಿ.ವೇದವ್ಯಾಸ್ ಕಾಮತ್, ಪೊಲೀಸ್ ಆಯುಕ್ತ ಅನುಪಮ್ ಅಗರ್ವಾಲ್, ಕೆಎಸ್ಸಿಎ ಪ್ರಧಾನ ಕಾರ್ಯದರ್ಶಿ ಅರವಿಂದ ಶಾಸ್ತ್ರ, ಎಂಆರ್ಪಿಎಲ್ ಜನರಲ್ ಮ್ಯಾನೇಜರ್ ಕೃಷ್ಣ ಹೆಗ್ಡೆ ಮಿಯಾರ್, ಕರ್ಣಾಟಕ ಬ್ಯಾಂಕ್‌ದ ಡಿಜಿಎಂ ಹೇರಳೆ ವಸಂತ ಆರ್ ಪಾಲ್‌ ಪಡೆಯೆರೆ ಉಲ್ಲೆರ್.‌ ಅ.21 ದಾನಿದ ಮುಗಿತಲದ ಲೇಸ್‌ಡ್ ವಿಧಾನಸಭೆತ ಸ್ಪೀಕರ್ ಯು.ಟಿ.ಖಾದರ್, ಕೆನರಾ ಬ್ಯಾಂಕ್ ಡಿಜಿಎಂ ಸುಧಾಕರ್ ಕೊಟ್ಟಾರಿ ಪಾಲ್‌ ಪಡೆಯೆರೆ ಉಲ್ಲೆರ್. ಪಂದ್ಯಾಟಡ್ ಆಜಿ ಲಕ್ಷ ರೂ. ನಗದು, ಬೇತೆ ಬೇತೆ ವಿಬಾಗಡ್ ಟ್ರೋಫಿದ ಒಟ್ಟಿಗೆ ಸುಮಾರ್ 200 ಇನಾಮುಲು ಉಂಡು ಪಂದ್‌ ತೆರಿಪಾದೆರ್.‌ ಈ ಪೊರ್ತುಡು ಗುರ್ಕಾರ್ಲು ರಮೇಶ್ ಕೋಟೆ, ಉಪಾಧ್ಯಕ್ಷೆರ್ ವಾಣಿ ಎಸ್. ಪಣಿಕ್ಕರ್, ಕೋಶಾಧಿಕಾರಿ ಪೂರ್ಣಿಮಾ ಎಸ್. ಆಳ್ವ, ಜತೆ ಕಾರ್ಯದರ್ಶಿ ಸತ್ಯ ಪ್ರಸಾದ್, ಸಹ ಕೋಶಾಧಿಕಾರಿ ರಮ್ಯಾ ಎಸ್. ರೈ ಇತ್ತೆರ್.

ಕುಡ್ಲ : 262 ರೌಡಿಶೀಟರ್ ನಕ್ಲೆಗ್ ಕಮಿಷನರ್ ಕ್ಲಾಸ್!

ಕುಡ್ಲ: ಕುಡ್ಲ ನಗರ ಕಮಿಷನರೇಟ್ ಸೀಮೆದ 262 ಆ್ಯಕ್ಟಿವ್ ರೌಡಿಲೆನ್ ಪೇಂಟೆದ ಪೊಲೀಸ್ ಕವಾಯತು ಮೈದಾನೊಡು ಗುರುವಾರ ಪರೇಡ್ ಮನ್ಪಾಯೆರ್. ನಡು ಕುಡ್ಲ , ಬಡೆಕಾಯಿ ಕುಡ್ಲ, ತೆನ್ಕಾಯಿ ಕುಡ್ಲ ಉಪವಿಭಾಗೊದ ಎಸಿಪಿಲು ರೌಡಿಲೆನ್ ಪೊಲೀಸ್ ಆಯುಕ್ತೆ ಅನುಪಮ್ ಅಗರ್ವಾಲ್‌ರೆನ ಎದುರು ಕನತ್ ಉಂತಾಯೆರ್.
ರೌಡಿಲೆನ ಅಪರಾಧ, ಇತ್ತೆದ ಸ್ಥಿತಿಗತಿಲೆನ ಬಗೆಟ್ ತಾನೇ ಉಂತುದು ವಿಚಾರಣೆ ಮಲ್ತಿನ ಆಯುಕ್ತೆರ್ ನನದ ದಿನೊಕ್ಲೆಡ್ ಒವ್ವೇ ಅಪರಾಧ ಚಟುವಟಿಕೆಲೆಡ್ ಪಾಲ್‌ಗೆತೊನಿಯೆರೆ ಬಲ್ಲಿ. ಕಾನೂನುಗು ಮರ್ಯಾದಿ ಕೊರ್ಪುನ ಪ್ರಜೆಕುಲಾವೊಡು. ನನ ದುಂಬಗ್ ಒವ್ವಾಂಡಲಾ ಅಪರಾಧ ಚಟುವಟಿಕೆಲೆಗ್ ಕೈ ಪಾಡ್ಂಡ ಕಠಿಣ ಕ್ರಮ ಗೆತೊನುವ ಪಂದ್ ಪೊಲೀಸ್ ಆಯುಕ್ತೆರ್ ಎಚ್ಚರ್ಗೆ ಕೊರ್ಯೆರ್. ಈ ಪೊರ್ತುಡು ಡಿಸಿಪಿಲಾಯಿನ ಸಿದ್ದಾರ್ಥ ಗೋಯಲ್, ಬಿಪಿ ದಿನೇಶ್ ಕುಮಾರ್ ಅಂಚೆನೇ ಬೇತೆ ಅಧಿಕಾರಿಲು ಇತ್ತೆರ್.