Sun. Nov 22nd, 2026

ಕಾಸ್ರೋಡ್ ಸುದ್ದಿ | Kasargod News

ಸೆ.18: ಜಿಲ್ಲಾ ಕಂಬುಲ ಸಮಿತಿ ಸಭೆ

ಬೆದ್ರ: ದಕ್ಷಿಣ ಕನ್ನಡ, ಒಡಿಪು ಬೊಕ್ಕ ಕಾಸರಗೋಡು ಜಿಲ್ಲಾ ವ್ಯಾಪ್ತಿದ ಜಿಲ್ಲಾ ಕಂಬಳ ಸಮಿತಿದ ಪೊಸ ಪದಾಧಿಕಾರಿಲೆನ ಪದಗ್ರಹಣ ಬೊಕ್ಕ ಕಂಬಳ ಸಮಿತಿದ ಸುರುತ ಸಭೆನ್ ಸೆ. 18 ಮದ್ಯಾಹ್ನ 3 ಗಂಟೆಗ್ ಬೆದ್ರದ ಕೋಟಿ ಚೆನ್ನಯ ಕಂಬುಲ ಕರೆತ ಕೈತಲ್ ಸೃಷ್ಟಿ ಗಾರ್ಡನ್ ಡ್ ಕಂಬುಲ ಸಮಿತಿದ ಪೊಸ ಗುರ್ಕಾರೆರ್ ಐಕಳಬಾವ ದೇವಿಪ್ರಸಾದ್ ಶೆಟ್ಟಿ ಬೆಳಪು ಮೆರ್ ನ ಗುರ್ಕಾಮೆಡ್ ನಡಪೆರೆ ಉಂಡು ಪಂದ್ ಸಮಿತಿ ಪ್ರಕಟನೆಡ್ ತೆರಿಪಾದೆರ್.

ಸಭೆಟ್ ಕಂಬುಲದ ದಿನನ್ ಪಟ್ಟಿ ಮಲ್ತ್ ದ್ ಕಡೆಕ್ ಬೆಂಗಳೂರ್ ಡ್ ನಡಪುನ ಕಂಬಳದ ಬಗೆಟ್ ಚರ್ಚೆ ಮಲ್ಪೆರೆ ಉಂಡು. ಕಂಬಳದ ವ್ಯವಸ್ಥಾಪಕರ್ , ಎರುಕ್ಲೆನ ಧಣಿಕುಲು, ಪೋಷಕೆರ್, ಕಂಬಳದ ತೀರ್ಪುಗಾರೆರ್, ಎರು ಗಿಡಪುನಕುಲು, ಎರುಕುಲೆನ ಚಾಕಿರಿ ಮಲ್ಪುನಕುಲು, ಜನಪ್ರತಿನಿಧಿಲು, ಅಭಿಮಾನಿಲು ಈ ಸಭೆಟ್ ಪಾಲ್ ಪಡೆದ್ ಸಲಹೆ ಕೊರೊಡು ಪಂದ್ ಸಮಿತಿ ಪತ್ರಿಕಾ ಪ್ರಕಟನೆಡ್ ತೆರಿಪಾದೆರ್.

ಅಸ್ಟೆಮಿ, ಮೊಸರುಕುಡಿಕೆ ಉಚ್ಚಯೊಗು ರೂಲ್ಸ್‌

ಸೆ.6 ದಾನಿ ರಾಜ್ಯದಾದ್ಯಂತ ಶ್ರೀ ಕೃಷ್ಣ ಜನ್ಮಾಷ್ಟಮಿ ಆಚರಣೆದ ನಿಲೆಟ್ಟ್ ಸರಕಾರ ಕೆಲವೊಂಜಿ ರೂಲ್ಸ್ ನ್ ಕನದ್ಂಡ್.

  1. ಶ್ರೀ ಕೃಷ್ಣ ಜನ್ಮಾಷ್ಟಮಿ ಬೊಕ್ಕ ಮೊಸರು ಕುಡಿಕೆ ಲೇಸ್ ಆಯೋಜನೆ ಮಲ್ಪುನಕುಲು ಕಡ್ಡಾಯವಾದ್ ಪೊಲೀಸ್ ಇಲಾಖೆರ್ದ್ ದುಂಬೆ ಅನುಮತಿ ಪಡೆಯೊನೊಡು.
  2. ಕೊಜಪುದ ಕರನ್ 14 ಅಡಿ ಎತ್ತರ ಮುಟ್ಟ ಕಟ್ಟೊಡು, ಕರನ ಬುಡ್ದು ಬೇತೆ ವಸ್ತುಲೆನ್ ಕಟ್ಟೆರೆ ಇಜ್ಜಿ.
  3. ಕೊಜಪುದ ಕರನ್ ಕಟ್ಟ್ ನಗ ಗಾಡಿಲೆನ ಸಂಚಾರಗ್ ಅಡ್ಡಿ ಆವಂದಿನಂಚ ತೂವೊಡು.
    4.ಕರ ದರ್ಪುನ ಸ್ವಯಂ ಸೇವೆಕೆರ್ನ ಮಿತ್ತ್ ನೀರ್ ತೇಪರೆ ಬಲ್ಲಿ.
  4. ಪೊಲೀಸ್ ಇಲಾಖೆರ್ದ್ ಫೈನಲ್ ಮಲ್ತಿನ ರೂಟ್ ಡ್ ಮಾತ್ರ ಮೆರವಣಿಗೆ ಮಲ್ಪೊಡು.
  5. ಕರ ಕಟ್ಟ್ ನಗ ಟ್ಯಾಬ್ಲೊ ತಯಾರ್ ಮಲ್ಪುನಗ ಜಾಗೆಡ್ ಇಪ್ಪುನ ಕರೆಂಟ್ ದ ವಯರ್ ದ ಬಗ್ಗೆ ಎಚ್ಚರ ವಹಿಸೊನೊಡು.
  6. ಮೊಸರು ಕುಡಿಕೆ ಮೆರವಣಿಗೆ ಪೋಪಿನ ಮಾರ್ಗೊಡು ಬೋಡಾಯಿನಾತ್ ಬೊಲ್ಪುದ ವ್ಯವಸ್ಥೆ ಇಪ್ಪೊಡು.
  7. ತುರ್ತು ಸಂದರ್ಭಡ್ ಅನುಕೂಲ ಆಪುನಂಚ ಆಂಬ್ಯುಲೆನ್ಸ್ ವ್ಯವಸ್ಥೆ ಮಲ್ಪೊಡು.
  8. ಮೈಕ್ ಪಾಡರೆ ಬಗ್ಗೆ ಪೊಲೀಸ್ ಇಲಾಖೆರ್ದ್ ಅನುಮತಿ ದೆತೊನೊಡು.
    ಸರ್ವೋಚ್ಚ ನ್ಯಾಯಾಲಯದ ಆದೇಶದಂಚ ರಾತ್ರೆ 10 ಗಂಟೆ ಮುಟ್ಟ ಮಾತ್ರ ಮೈಕ್ ಗ್ ಅವಕಾಶ
  9. ಒವ್ವೆ ಕಾರಣಗ್ ಮೆರವಣಿಗೆಡ್ ಡಿ.ಜೆ ಪಾಡರೆ ಬಲ್ಲಿ
    11.ಫಿಟ್‌ನೆಸ್ ಸರ್ಟಿಫಿಕೆಟ್, ಇನ್ಷೂರೆನ್ಸ್ ಸರ್ಟಿಫಿಕೆಟ್ ಇಪ್ಪುನ ಗಾಡಿಡ್ ಮಾತ್ರ ಟ್ಯಾಬ್ಲೊ ಮಲ್ಪೊಡು.
  10. ಸ್ವಯಂಸೇವಕೆರೆನ್ ಗುಂಪಾದ್ ವಿಂಗಡನೆ ಮಲ್ತ್ ದ್ ಮೆರವಣಿಗೆ ಪೋನಗ ಮಾರ್ಗಡ್ ಅಕ್ಲೆನ್ ನಿಯೋಜನೆ ಮಲ್ತ್ ಸಲೀಸಾದ್ ಸಾಗುನಂಚ ಮಲ್ಪೊಡು.
  11. ಒವ್ವೆ ಧರ್ಮ/ಸಮುದಾಯದ ಭಾವನೆಗ್ ಧಕ್ಕೆ ಆಪಿಲೆಕ ಟ್ಯಾಬ್ಲೋ ನೃತ್ಯ/ ರೂಪಕ ಇಪ್ಪೆರೆ ಬಲ್ಲಿ.
  12. ಪಟಾಕಿ ಬುಡ್ ನಗ ಆಸ್ಪತ್ರೆದ ಕಯಿತಲ್, ಜನ ಸಂದಣಿದ ನಡುಟ್ಟು ಪಟಾಕಿ ಬುಡಿಯೆರೆ ಬಲ್ಲಿ . ರಾತ್ರೆ 10 ಗಂಟೆರ್ದ್ ಬೊಕ್ಕ ಪಟಾಕಿ ಬುಡರೆ ಇಜ್ಜಿ.
  13. ಲೇಸ್ ಗ್ ಸಂಬಂಧಿಸಿನಂಚ ಸಾರ್ವಜನಿಕ ಜಾಗೆಡ್ ಫ್ಲೆಕ್ಸ್ ಬೊಕ್ಕ ಬ್ಯಾನರ್ ನ್ ಪಾಡುನೆರ್ದ್ ದುಂಬು ಸ್ಥಳೀಯ ಪ್ರಾಧಿಕಾರರ್ದ್ ಕಡ್ಡಾಯವಾದ್ ಅನುಮತಿ ದೆತೊನೊಡು.
  14. ಕಾರ‍್ಯಕ್ರಮಕ್ಕ್ ಸಂಬಂಧಿಸಾದ್ ಪಾಡುನ ಪ್ಲೆಕ್ಸ್, ಬ್ಯಾನರ್‌ಡ್ ಒವ್ವೆ ಪ್ರಚೋದನಾತ್ಮಕ ಬರವು/ಫೊಟೊ ಬಳಕೆ ಮಲ್ಪೆರೆ ಇಜ್ಜಿ.
  15. ಕಾರ‍್ಯಕ್ರಮಕ್ ಸಂಬಂಧಿಸಾದ್ ಪಾಡುನ ಮಾತಾ ಪ್ಲೆಕ್ಸ್, ಬ್ಯಾನರ್ ಬೊಕ್ಕ ಬಂಟಿಂಗ್ಸ್ ಲೆನ್ ಕಾರ್ಯಕ್ರಮ ಮುಗಿನ ಕೂಡ್ಲೆ ಕಡ್ಡಾಯವಾದ್ ದೆಪ್ಪೊಡು.
  16. ಕಾರ್ಯಕ್ರಮಕ್ ಬರ್ಪುನ ಜನಕ್ಲೆನ ಗಾಡಿಗ್ ಪಾರ್ಕಿಂಗ್ ಜಾಗೆ ಮಲ್ಪೊಡು. ಮೆರವಣಿಗೆ ಪೋಪುನ ಜಾಗೆಡ್ ಗಾಡಿನ್ ಉಂತಾವದಿಲಕ ಸ್ವಯಂಸೇವಕೆರೆನ್ ನಿಯೋಜನೆ ಮಲ್ಪೊಡು.
  17. ಸ್ಥಳೀಯ ಪರಿಸ್ಥಿತಿಗ್ ಅನುಗುಣವಾದ್ ಬಂದೋಬಸ್ತ್ ಕರ್ತವ್ಯಡ್ ಇಪ್ಪುನ ಪೊಲೀಸ್ ಅಧಿಕಾರಿಲೆನ ಸೂಚನೆನ್ ಪಾಲನೆ ಮಲ್ಪೊಡು ಬೊಕ್ಕ ಪೊಲೀಸೆರ್ ನ ಒಟ್ಟಿಗೆ ಸಂಘಟಕೆರ್ ಸಹಕಾರ ಮಲ್ಪೊಡು.

ತೆಂಕುತಿಟ್ಟು ಚಿಕ್ಕ ಮೇಳದ ಒಕ್ಕೂಟ ಉದಿಪನ; ಜು.27 ಕ್ಕ್ ಸಭೆ

ತುಳುನಾಡ್ ದ ದೇವ ಕಲೆ ಆಯಿನ ಯಕ್ಷಗಾನದ ಚಿಕ್ಕ ಮೇಳಗ್ ಒಂಜಿ ಶಿಸ್ತ್ ದ ಚೌಕಟ್ಟ್ ಪಾಡುನ ನಿಲೆಟ್ಟ್ ಇಂಚೊಗು ಬಂಟ್ವಾಳ ನಡತಿನ ತುರ್ತು ಸಭೆಟ್ಟ್
ತೆಂಕುತಿಟ್ಟು ಚಿಕ್ಕ ಮೇಳದ ಒಕ್ಕೂಟ ರಚನೆ ಆತ್ಂಡ್.

ಉಂದೆತ್ತ ಸಂಚಾಲಕೆರಾದ್ ಸರಪಾಡಿ ಅಶೋಕ್ ಶೆಟ್ರ್, ಗೌರವ ಸಲಹೆಗಾರೆರಾದ್ ದಿವಾಕರ ದಾಸ್ ಕಾವಳಕಟ್ಟೆ ಬೊಕ್ಕ ಕುಮಾರ್ ಮಾಲೇಮಾರ್ ಅಂಚನೆ ಕಾರ್ಯದರ್ಶಿಲಾ ದ್ ಕಡಬ ದಿನೇಶ್ ರೈ ಅಜತ್ ಬೈದೆರ್.

ಯಕ್ಷಗಾನದ ಪುದರ್‌ಡ್ ಮರಿಯಲಡ್ ಪಿದಡುನಂಚಿತ್ತಿನ ಚಿಕ್ಕಮೇಳಲು ತುಳುನಾಡ್‌ಡ್ ಮಸ್ತ್ ಉಲ್ಲ. ಆಂಡ ಕೆಲವು ಕಲಾವಿದೆರ್ ಅತ್ತಂದಿನಕುಲು ಚಿಕ್ಕಮೇಳ ಮಲ್ತ್‌ದ್ ಕಲೆಕ್ಕ್ ಅಪಚಾರ ಆಪಿಲೆಕ್ಕ ಯಕ್ಷಗಾನ ಪ್ರದರ್ಶನ ಮಲ್ತಿನವು ಹಿಂದೂ ಸಂಘಟನೆದ ಮುಖಂಡೆರೆಗ್ ಬೊಕ್ಕ ಯಕ್ಷಗಾನದ ಅಭಿಮಾನಿಲೆಗ್ ಬೇಜಾರ್ ಆದ್ ಆಕ್ರೋಶಗ್ ಕಾರಣ ಆದಿತ್ತ್ಂಡ್. ಈ ನಿಲೆಟ್ ಚಿಕ್ಕಮೇಳಲೆನ್ ನಿಷೇಧ ಮಲ್ಪೊಡೆ ಪನ್ಪಿನ ವ್ಯವಸ್ಥೆಗ್ ಕೆಲವೆರ್ ಪ್ರಯತ್ನ ಮಲ್ತೊಂದಿಪ್ಪುನ ಪೊರ್ತುಡು, ಚಿಕ್ಕಮೇಳ ಅಗತ್ಯ ಬೋಡು. ಅವು ಒಂಜಾತ್ ಕಲಾವಿದೆರೆಗ್ ನುಪ್ಪುದ ಪಡಿ ಕೊರ್ಪುಂಡು. ಚಿಕ್ಕಮೇಳನ್ ನಂಬುದು ಮಸ್ತ್ ಕಲಾವಿದೆರ್ ಜೀವನ ಮಲ್ತೊಂದುಲ್ಲೆರ್ ಪನ್ಪಿನ ನಿಲೆಟ್ ಅವೆನ್ ಒರಿಪಾವುನಂಚಿನ ಪ್ರಯತ್ನಗ್ ತುರ್ತು ಸಭೆನ್ ಸರಪಾಡಿ ಅಶೋಕ್ ಶೆಟ್ಟಿ ಮೆರೆನ ಮುತಾಲಿಕೆಡ್ ಬೊಕ್ಕ ತೆಂಕುತಿಟ್ಟು ಚಿಕ್ಕಮೇಳದ ಮಾತ ಸಂಚಾಲೆಕೆರ್ ಪಾಲ್ ದೆತೊಂದು ಅಯಿತ್ತ ಬಗೆಟ್ ಒಂಜಿ ಚರ್ಚೆ ಮಲ್ಪೊಡು.

ಈ ಸಮಾಲೋಚನೆ ಮಲ್ತ್‌ದ್ ಚಿಕ್ಕಮೇಳಗ್‌ಲ ರೂಪುರೇಷೆ ತಯಾರ್ ಮಲ್ಪೊಡು. ಅಯಿಕ್ಕ್ ಒಂಜಾತ್ ನಿಬಂಧನೆಲೆನ್ ಮಲ್ತ್‌ದ್ ಗೌರವಯುತವಾದ್ ಚಿಕ್ಕಮೇಳಲು ತಿರ್ಗಾಟ ಮಲ್ಪೊಡು ಪನ್ಪಿನ ನಿಲೆಟ್ ಜುಲೈ 19 ಗ್ ಬಿ.ಸಿ ರೋಡ್‌ದ ಸ್ಪರ್ಶ ಕಲಾ ಮಂದಿರಡ್ ಸಭೆ ನಡತ್ಂಡ್. ಈ ಸಭೆಟ್ ಸುಮಾರ್ 25 ನೆರ್ದ್ ಎಚ್ಚದ ತೆಂಕುತಿಟ್ಟು ಚಿಕ್ಕಮೇಳದ ಸಂಚಾಲೆಕೆರ್ ಬೊಕ್ಕ ಕಲಾವಿದೆರ್ ಪಾಲ್ ಪಡೆದ್ ಇತ್ತೆರ್.

ಈ ಸಭೆಟ್ಟ್ ಚಿಕ್ಕಮೇಳ ಮಲ್ಪುನಗ ಎಂಚ ಇಪ್ಪೊಡು, ವಾ ವ್ಯಾಪ್ತಿಡ್ ತಿರ್ಗಾಟ ಮಲ್ಪುನಗ ಕಲಾವಿದೆರೆಡ ದಾದ ಪೂರ ಇಪ್ಪೊಡು ಪನ್ಪಿನ ವಿಷಯಡ್ ಚರ್ಚೆ ಆಂಡ್. ಉಂದು ತುರ್ತು ಸಭೆ ಆತಿನೆಡ್ದಾವರ ಎಚ್ಚದ ಚಿಕ್ಕಮೇಳದ ಯಜಮಾನೆರೆಗ್ ಬೊಕ್ಕ ಕಲಾವಿದೆರೆಗ್ ಬರಿಯರೆ ಆಯಿಜಿ. ಉಂದೆತ್ತ ಬಗೆಟ್ ನನಾತ್ ಚರ್ಚೆ ಮಲ್ಪರೆ ಜುಲೈ 27 ಕ್ಕ್ ಗುರುವಾರ ಬಿ.ಸಿ ರೋಡ್‌ದ ಸ್ಪರ್ಶ ಕಲಾಮಂದಿರಡ್ ಸಭೆ ಲೆತ್ತ್‌ದ್ಂಡ್. ಈ ಸಭೆಕ್ಕ್ ತೆಂಕುತಿಟ್ಟು ಚಿಕ್ಕಮೇಳದ ಮಾತ ವ್ಯವಸ್ಥಾಪಕೆರ್, ಸಂಚಾಲಕೆರ್ ಬೊಕ್ಕ ಪ್ರತಿನಿಧಿಕುಲು ಕಡ್ಡಾಯವಾದ್ ಪಾಲ್ ಪಡೆಯೊಡು ಪಂದ್ ಕಾರ್ಯದರ್ಶಿ ಯಕ್ಷಬೊಳ್ಳಿ ಕಡಬ ದಿನೇಶ್ ರೈ ತೆರಿಪಾದೆರ್.

ಚಿಕ್ಕಮೇಳ ತಿರ್ಗಾಟದ ನಿಯಮಲು:

# ಚಿಕ್ಕಮೇಳಲು ವಾ ದೇವಲ್ಯರ್ದ್ ಪಿದಡುಂಡ ಆ ದೇವಲ್ಯದ ಅನುಮತಿ ಬೋಡು.
# ಚಿಕ್ಕಮೇಳಡ್ ತಿರ್ಗಾಟ ಮಲ್ಪುನ ಕಲಾವಿದೆರ್ ವಾ ಮೇಳದಕುಲ, ಆ ಮೇಳದ ಅನುಮತಿ ಪತ್ರ
# ವಾ ಊರುಗು ತಿರ್ಗಾಟ ಮಲ್ಪುವೆರಾ ಆ ಊರುಗ್ ಸಂಬಂಧಪಟ್ಟಿನ ಗ್ರಾಮ ಪಂಚಾಯತ್‌ದ ಅನುಮತಿ ಪತ್ರ
# ಆಯಾ ಊರುದ ಪೊಲೀಸ್ ಠಾಣೆದ ಅನುಮತಿ ಪತ್ರನ್ ದೆತೊಂದು ತಿರ್ಗಾಟ ಮಲ್ಪೊಡು.

Women availing free ride in government buses can show a xerox of their Identification card details- Government specifies ಫ್ರೀ ಬಸ್‌ಟ್ ಪೋಯರೆ ಪೊಂಜೊವುಲು ಐಡಿ ಜೆರಾಕ್ಸ್, ಸಾಫ್ಟ್ ಕಾಪಿ ತೋಜಾಂಡಲ ಯಾವು: ಸರ್ಕಾರ ಸ್ಪಷ್ಟನೆ

ಬೆಂಗ್ಲೂರ್: ರಾಜ್ಯ ಸರ್ಕಾರದ ಶಕ್ತಿ ಯೋಜನೆಡ್ ರಾಜ್ಯದ ಮಾತ ಪೊಂಜೊವುಲೆಗ್ ಫ್ರೀ ಆದ್ ಬಸ್‌ಟ್ಟ್ ಪ್ರಯಾಣ ಮಲ್ಪರೆ ಕರ್ನಾಟಕ ಸರ್ಕಾರದ ಒವ್ವೇ ಐಡಿದ ಜೆರಾಕ್ಸ್ ತೋಜ್ಪಾಂಡ ಯಾವು ಪಂದ್ ಅಧಿಕಾರಿಲು ಸ್ಪಷ್ಟನೆ ಕೊರ್ತೆರ್.

ರಾಜ್ಯದ ಮಸ್ತ್ ಕಡೆಟ್ಟ್ ಐಡಿ ಪ್ರೂಫ್ ವಿಚಾರಗ್ ಸಂಬಂಧಿಸಾದ್ ಕಂಡಕ್ಟರ್ ಬೊಕ್ಕ ಪೊಂಜೊವುಲೆನ ನಡುಟ್ಟ್ ಗಲಾಟೆ ಆದಿತ್ತ್ಂಡ್. ಉಂದೆನ್ ತೂದು ಸಾರಿಗೆ ಇಲಾಖೆ ಕರ್ನಾಟಕ ಸರ್ಕಾರಗ್ ಸಂಬಂಧ ಪಟ್ಟಿನ ಐಡಿದ ಜೆರಾಕ್ಸ್‌ನ್ ತೋಜ್ಪಾಂಡ ಯಾವು ಪಂದ್ ತೆರಿಪಾದೆರ್.

ಎಪ್ರಿಲ್ 14 ಕ್ಕ್ ತುಳುನಾಡ್‌ಡ್ ಬುಡುಗಡೆ ಆಯರೆ ಉಂಡು “ಗೌಜಿ ಗಮ್ಮತ್” ತುಳು ಪಿಚ್ಚರ್

ಮೋವಿನ್ ಫಿಲಂಮ್ಸ್ ಲಾಂಭನಡ್ ಮೋಹನ್ ಭಟ್ಕಳ್, ವಿನಾಯಕ ತೀರ್ಥಹಳ್ಳಿ ನಿರ್ಮಾಣಡ್, ಮಣಿ ಎಜೆ ಕಾತೀಕೇಯನ್ ನಿರ್ದೇಶನಡ್ ತಯಾರ್ ಆಯಿನ “ಗೌಜಿ ಗಮ್ಮತ್” ತುಳು ಪಿಚ್ಚರ್ ಎಪ್ರಿಲ್ 14 ಕ್ಕ್ ತುಳುನಾಡ್‌ಡ್ ಬುಡುಗಡೆ ಆಯರೆ ಉಂಡು.

ಈ ಬಗೆಟ್ ನಡತಿನ ಪತ್ರಿಕಾಗೋಷ್ಠಿಡ್ ತೆಲಿಕೆದ ಬೊಳ್ಳಿ ದೇವದಾಸ್ ಕಾಪಿಕಾಡ್ ಪಾತೆರ್ದ್, ಕುಡ್ಲದ ರೂಪವಾಣಿ, ಬಿಗ್ ಸಿನಿಮಾಸ್, ಪಿವಿಆರ್, ಸಿನಿಪೊಲಿಸ್, ಒಡಿಪುಡ್ ಕಲ್ಪನ, ಮಣಿಪಾಲದ ಭಾರತ್ ಸಿನಿಮಾ, ಐನಾಕ್ಸ್, ಪಡುಬಿದ್ರೆದ ಭಾರತ್ ಸಿನಿಮಾ, ಸುರತ್ಕಲ್‌ದ ನಟರಾಜ್, ಸಿನಿ ಗ್ಯಾಲಕ್ಸಿ, ಪುತ್ತೂರ್‌ದ ಅರುಣಾ, ಭಾರತ್ ಸಿನಿಮಾ, ಬೆದ್ರದ ಅಮರಶ್ರೀ, ಕಾರ್ಲದ ರಾಧಿಕಾ ಇಂಚಿನ ಕಡೆಟ್ಟ್ ಈ ಪಿಚ್ಚರ್ ಬುಡುಗಡೆ ಆಯರೆ ಉಂಡು. ತುಳುನಾಡ್‌ದ ಪೊಸ ಕಲಾವಿದೆರ್ ಈ ಪಿಚ್ಚರ್‌ಡ್ ನಟನೆ ಮಲ್ತ್‌ದೆರ್. ಈ ಪಿಚ್ಚರ್ ಒಂಜೇ ಪಂತೆಡ್ 19 ದಿನತ್ತ ಕಾಲ ಚಿತ್ರೀಕರಣ ಆದಿತ್ತ್ಂಡ್ ಪಂದ್ ಪಂಡೆರ್.

ತುಳುನಾಡ ಮಾಣಿಕ್ಯ ಅರವಿಂದ ಬೋಳಾರ್ ಪಾತೆರ್ದ್, ಈ ಪಿಚ್ಚರ್‌ಗ್ ಯು ಎ ಸರ್ಟಿಫಿಕೇಟ್ ತಿಕ್ಕ್‌ದ್ಂಡ್. ಗೌಜಿ ಗಮ್ಮತ್ ಪಿಚ್ಚರ್ ಮಸ್ತ್ ಹಾಸ್ಯಮಯವಾದ್ ಉಂಡು. ಇತ್ತೆದ ಪೀಳಿಗೆದ ಜನಕುಲು ಇಷ್ಟ ಪಡುನ ಕತೆನ್ ಹಾಸ್ಯಭರಿತವಾದ್ ನಿರ್ದೇಶನ ಮಲ್ತ್‌ದೆರ್. ಸಮಾಜಗ್ ಎಡ್ಡೆ ಸಂದೇಶನ್ ಈ ಪಿಚ್ಚರ್ ಕೊರ್ಪುಂಡು ಪಂದ್ ಪಂಡೆರ್.

ಕುಸಲ್ದರಸೆ ನವೀನ್ ಡಿ ಪಡೀಲ್, ನಾಯಕ ನಟೆಯಾದ್ ಕರ್ಣ ಉದ್ಯಾವರ್, ನಾಯಕಿಯಾದ್ ಸ್ವಾತಿ ಪ್ರಕಾಶ್ ಶೆಟ್ಟಿ ಅಭಿನಯ ಮಲ್ತ್‌ದೆರ್. ಪ್ರಸನ್ನ ಶೆಟ್ಟಿ ಬೈಲೂರ್, ಉಮೇಶ್ ಮಿಜಾರ್, ಜಯಶೀಲಾ ಮರೋಳಿ, ಪ್ರಭಾಕರ್ ಬ್ರಹ್ಮಾವರ, ಚಂದ್ರಹಾಸ ಶೆಟ್ಟಿ ಮಾಣಿ, ಸುಜಾತ ಶಕ್ತಿನಗರ, ಕಿಶೋರ್ ಶೆಟ್ಟಿ ಪಿಲಾರ್, ಹರೀಶ್ ಪೂಜಾರಿ ಕಡ್ತಲ, ಹರೀಶ್ಚಂದ್ರ ಪೆರಾಡಿ ಪ್ರಭಾಕರ್ ಆಚಾರ್ಯ ಮೂಡುಬೆಳ್ಳೆ, ಅಶ್ವತ್ ಶೆಟ್ಟಿ, ವಿಕ್ಕಿ ರಾವ್, ಮಿರ್ಚಿ ಸಂದೇಶ್ ದೇವಾಡಿಗ, ಅಶ್ವತ್ಥಪುರ, ಶಿವರಾಮ್ ವಿಟ್ಲ, ರಾಧಿಕಾ ಭಟ್, ವನಿತಾ ಸುವರ್ಣ, ನರಸಿಂಹ ನಾಯಕ್, ರಶ್ಮಿತಾ ಸಾಲಿಯಾನ್ ಪಿಲಾರ್, ಸುರಕ್ಷಾ ಕೋಟ್ಯಾನ್ ಪಿಲಾರ್ , ಲೊಕೇಶ್ ಮಾಣಿಲ, ಅನುಷಾ ಶೆಟ್ಟಿ,
ಬೇಬಿ ಚಿತ್ರಿತಾ ದೇವಾಡಿಗ ಹಳೆಯಂಗಡಿ, ಲೊಕೇಶ್ ಶೆಟ್ಟಿ, ಜ್ಞಾನೇಶ್ ಆಚಾರ್ಯ, ಶಶಿರಾಜ್ ಆಚಾರ್ಯ, ಮಧು ಪೂಜಾರಿ ವಿಷ್ಣುನಗರ, ನಿಲೇಶ್ ಶೆಟ್ಟಿ ಇನ್ನ, ಈ ಪಿಚ್ಚರ್‌ಡ್ ನಟನೆ ಮಲ್ತ್‌ದೆರ್.

ಪತ್ರಿಕಾಗೋಷ್ಠಿಡ್ ಪಿಚ್ಚರ್‌ದ ನಟಿ ಸ್ವಾತಿ ಪ್ರಕಾಶ್, ಕರುಣಾಕರ್ ಉಡುಪಿ, ನಿರ್ಮಾಪಕೆರ್ ವಿನಾಯಕ ತೀರ್ಥಹಳ್ಳಿ, ಮೋಹನ್ ಭಟ್ಕಳ್, ಸಂದೀಪ್, ಪ್ರಭಾಕರ ಬ್ರಹ್ಮಾವg, ಜಯಶೀಲ ಮರೋಳಿ, ಛಾಯಾಗ್ರಹಕೆರ್ ರಾಮಾಂಜನೇಯ ಇತ್ತೆರ್.

ಮುಲ್ಕಿ -ಬೆದ್ರಗ್ ಉಮಾನಾಥ್, ಉತ್ತರೊಗು ಡಾ.ಭರತ್ ಶೆಟ್ಟಿ

ಕುಡ್ಲ : ಭಾರಿ ಚರ್ಚೆಗ್ ಕಾರಣ ಆಯಿನ ಮುಲ್ಕಿ- ಬೆದ್ರ ವಿಧಾನಸಭೆ ಕ್ಷೇತ್ರಗ್ ಕಡೆಕ್ಕ್ ಲ ಬಿಜೆಪಿ ಅಭ್ಯರ್ಥಿಯಾದ್ ಉಮಾನಾಥ ಕೋಟ್ಯಾನ್ ಕುಡೊರ ಆಯ್ಕೆ ಆತೆರ್ ಪಂದ್ ತೆರಿದ್ ಬೈದ್ಂಡ್.

ಬಿಜೆಪಿದ ಅಭ್ಯರ್ತಿಲೆನ ಪಟ್ಟಿದ ಪ್ರಕಾರ, ಕುಡ್ಲ ಕ್ಷೇತ್ರ, ಪುತ್ತೂರು, ಸುಳ್ಯಗ್ ಪೊಸ ಅಬ್ಯರ್ತಿಲೆಗ್ ಅವಕಾಶ ಕೊರ್ತೆರ್.

ಬೊಲ್ತೇರ್ ಗ್ ಹರೀಶ್ ಪೂಂಜ, ಮುಲ್ಕಿ ಬೆದ್ರಗ್ ಉಮಾನಾಥ ಕೋಟ್ಯಾನ್, ಕುಡ್ಲ ( ಉಳ್ಳಾಲ) ಕ್ಷೇತ್ರಗ್ ಸತೀಶ್ ಕುಂಪಲ ಕುಡ್ಲ ದಕ್ಷಿಣ ವೇದವ್ಯಾಸ ಕಾಮತ್, ಕುಡ್ಲ ಉತ್ತರ ಡಾ.ಭರತ್ ಶೆಟ್ಟಿ, ಬಂಟ್ವಾಳ ಗ್ ರಾಜೇಶ್ ನಾಯ್ಕ್, ಪುತ್ತೂರುಗು ಆಶಾ ತಿಮ್ಮಪ್ಪ, ಸುಳ್ಯ ಗ್ ಭಾಗೀರಥಿ ಅಭ್ಯರ್ತಿಯಾದ್ ಆಯ್ಕೆ ಆತೆರ್ .

ಬಂಟ್ವಾಳ ಕ್ಷೇತ್ರದ ಸಾಲೆತ್ತೂರ್‌ಡ್ ಮಾಜಿ ಸಚಿವೆರ್ ಬಿ.ರಮಾನಾಥ ರೈ ಮೆರೆನ ಮುತಾಲಿಕೆಡ್ ಪ್ರಜಾಧ್ವನಿ ಯಾತ್ರೆ

ಬಂಟ್ವಾಳ ಕ್ಷೇತ್ರದ ಸಾಲೆತ್ತೂರ್‌ಡ್ ಮಾಜಿ ಸಚಿವೆರ್ ಬಿ.ರಮಾನಾಥ ರೈ ಮುತಾಲಿಕೆಡ್ ನಡತೊಂದು ಇಪ್ಪುನ ಪ್ರಜಾಧ್ವನಿ ಯಾತ್ರೆ ಸಾಲೆತ್ತೂರು ಗ್ರಾಮರ್ದ್ ಸುರು ಆದ್ ಕರೋಪಾಡಿ ಗ್ರಾಮಡ್ ಪೋದು ಅಯಿರ್ದ್ ಬೊಕ್ಕ ಬಯ್ಯ ಕನ್ಯಾನ ಸಾರ್ವಜನಿಕ ಸಭೆತ್ತ ಮುಕೇನ ಮುಗಿತಲದ ಚುಕ್ಕಿನ್ ದೀಂಡ್.

 

ಎಲ್ಲೆ ಕಾಂಡೆ ವಿಟ್ಲದ ಪಡ್ನೂರು ಮುಕೇನ ಈ ಯಾತ್ರೆ ಪೋಯರೆ ಇತ್ತ್‌ದ್ ಕೊಳ್ನಾಡು ಗ್ರಾಮದ ಸಾಲೆತ್ತೂರುಡು ಸಭೆ ನಡಪರೆ ಉಂಡು.

ಕಾಸ್ರೋಡು: ಕೋಡಿ ಶ್ರೀ ರಕ್ತೇಶ್ವರೀ ಅಂಚನೆ ಪರಿವಾರ ದೈವಲೆನ ಕ್ಷೇತ್ರಡ್ ಎ.2 ಬೊಕ್ಕ 3 ಕ್ಕ್ ನೇಮೋಚ್ಚಯ

ಕಾಸ್ರೋಡು: ಮಂಜೇಶ್ವರ ತಾಲೂಕ್‌ದ ಕೋಡಿ ಶ್ರೀ ರಕ್ತೇಶ್ವರೀ ಅಂಚನೆ ಪರಿವಾರ ದೈವಲೆನ ಕ್ಷೇತ್ರಡ್ ಎ.2 ಬೊಕ್ಕ 3 ಕ್ಕ್ ನೇಮೋಚ್ಚಯ ನಡಪರೆ ಉಂಡು.

ಅಂಚಾದ್ ಮಾ.26 ಕ್ಕ್ ಬಯ್ಯ 4 ಗಂಟೆಗ್ ಕೋರಿಗುಂಟ ಆಯರೆ ಉಂಡು. ಎ.2 ಕ್ಕ್ ಮಧ್ಯಾಹ್ನ 2 ಗಂಟೆಗ್ ಶ್ರೀ ದೈವಲೆಗ್ ತಂಬಿಲ ಸೇವೆ ಆದ್ ಬಯ್ಯ 4 ಗಂಟೆಗ್ ಪೊಸತ್ತಾದ್ ನಿರ್ಮಾಣ ಆಯಿನ ಮಹಾದ್ವಾರದ ಉದಿಪನ ಆಯರೆ ಉಂಡು. ರಾತ್ರೆ 11 ಗಂಟೆಗ್ ಮಲರಾಯ ಬೊಕ್ಕ ಬಂಟ ದೈವದ ನೇಮ ಆದ್ ಪ್ರಸಾದ ಕೊರ್ಪಿನ ಲೇಸ್ ನಡಪರೆ ಉಂಡು.

ಎ.3 ಕ್ಕ್ ಸಭೆ ಅಂಚನೆ ಮಾನಾದಿಗೆದ ಲೇಸ್ ನಡತ್ತ್‌ದ್ ರಾತ್ರೆ 9 ಗಂಟೆಗ್ ತುಳುನಾಡ ಸಿರಿ ಪನ್ಪಿನ ಯಕ್ಷಗಾನ ನಡಪರೆ ಉಂಡು. ರಾತ್ರೆ 2 ಗಂಟೆಗ್ ಶ್ರೀ ರಕ್ತೇಶ್ವರೀ ದೈವದ ನೇಮ, ಕೆಂಡಸೇವೆ ನಡಪರೆ ಉಂಡು. ಈ ಲೇಸ್‌ಗ್ ಮಾತ ಭಕ್ತೆರ್ ಬತ್ತ್‌ದ್ ಶ್ರೀ ದೈವದ ಗಂಧ ಪ್ರಸಾದನ್ ದೆತೊಂದು, ದೈವದ ಕೃಪೆಗ್ ಪಾತ್ರರಾವೊಡು ಪಂದ್ ಕ್ಷೇತ್ರದ ಆಡಳಿತ ಸಮಿತಿದ ಗೌರವಾಧ್ಯಕ್ಷೆರ್ ಶಂಕರ್ ಭಟ್ ಕೋಡಿ, ಅಧ್ಯಕ್ಷೆರ್ ವಾಸುದೇವ ಶೆಟ್ಟಿ ಪಳ್ಳತ್ತಡ್ಕ, ಸಂಚಾಲಕೆರ್ ದಿನಕರ್ ಭಟ್ ಕೋಡಿ, ಕಾರ್ಯಾಧ್ಯಕ್ಷೆರ್ ರಾಜಾನಂದ ಶೆಟ್ಟಿ ಪಳ್ಳತ್ತಡ್ಕ, ಕಾರ್ಯದರ್ಶಿ ಯೋಗೀಶ್ ಶೆಟ್ಟಿ ದರ್ಬೆ, ಕೋಶಾಧಿಕಾರಿ ನಿಶಾನ್ ರೈ ಪಳ್ಳತ್ತಡ್ಕ ಅಂಚನೆ ಮಾತ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

Zomato delivery boy killed in a collusion between a car and scooter ಸ್ಕೂಟರ್ ಬೊಕ್ಕ ಕಾರ್ ಗುದ್ದುದು ತೀರ್ ಪೋಯೆರ್ ಫುಡ್ ಡೆಲಿವರಿ ಬಾಯ್

ಕುಡ್ಲ: ಸ್ಕೂಟರ್ ಬೊಕ್ಕ ಕಾರ್ ಗುದ್ದುದು ಝೊಮ್ಯಾಟೋ ಡೆಲಿವರಿ ಬಾಯ್ ತೀರ್ ಪೋಯಿನ ಘಟನೆ ಉಳ್ಳಾಲ ಕೈತಲ್‌ದ ಮಂಜನಾಡಿ ಗ್ರಾಮದ ಕಲ್ಕಟ್ಟ ಪನ್ಪಿನಲ್ಪ ನಡತ್ಂಡ್.

ಕುತ್ತಾರ್‌ದ ಸಂತೋಷ ನಗರದ ನಿವಾಸಿ ಅನಿಲ್ ಕುಮಾರ್ (41) ತೀರ್ ಪೋಯಿನಾರ್. ಮಂಜನಾಡಿದ ಕಲ್ಕಟ್ಟ ಮಾರ್ಗ ಆದ್ ಫುಡ್ ಪತೊಂದು ಪೋನಗ ಎದುರುರ್ದ್ ಕೇರಳ ರಿಜಿಸ್ಟ್ರೇಶನ್ ದ ಕಾರ್ ಸ್ಕೂಟರ್‌ಗ್ ಗುದ್ದ್‌ದ್ಂಡ್.

Zomato delivery boy killed in a collusion between a car and scooter

Anil Kumar (41) a Zomato delivery boy was killed in an accident while on food delivery order near Uallal.

Mangaluru: Tulu film ‘Pili’ to release on Feb 10 ಫೆ.10 ಕ್ಕ್ ತುಳುನಾಡ್‌ಡ್ ಬುಡುಗಡೆ ಆಯರೆ ಉಂಡು ಪಿಲಿ ತುಳು ಪಿಚ್ಚರ್

ಎನ್.ಎನ್.ಎಮ್ ಪ್ರೊಡಕ್ಷನ್ ಲಾಂಛನಡ್ ಆತ್ಮಾನಂದ ರೈ ನಿರ್ಮಾಣಡ್ ತಯಾರ್ ಆಯಿನ ತುಳು ಪಿಚ್ಚರ್ “ಪಿಲಿ” ಫೆ.10 ಕ್ಕ್ ತುಳುನಾಡ್‌ಡ್ ಬುಡುಗಡೆ ಆಯರೆ ಉಂಡು ಪಂದ್ ನಿರ್ದೇಶಕೆರ್ ಮಯೂರ್ ಆರ್ ಶೆಟ್ಟಿ ಪಂಡೆರ್.

ಈ ಬಗೆಟ್ ಕುಡ್ಲಡ್ ನಡತಿನ ಪತ್ರಿಕಾಗೋಷ್ಠಿಡ್ ಪಾತೆರಿನ ಆರ್, ದುಬೈಡ್ ಇತ್ತೆ ಪಿಚ್ಚರ್‌ದ ಪ್ರೀಮಿಯರ್ ಶೋ ನಡತ್ತ್‌ದಿತ್ತ್‌ದ್ ಜನಕ್ಲೆನ ಪುಗರ್ತೆ ಪಡೆತ್ಂಡ್. ಈ ಪಿಚ್ಚರ್‌ಡ್ ಯುವ ನಟೆ ಭರತ್ ಭಂಡಾರಿ ಕಥೆ ಬರೆದ್ ಸುರುತ್ತ ಸರ್ತಿ ನಾಯಕೆ ನಟೆಯಾದ್ ಅಂಚನೆ ಸ್ವಾತಿ ಶೆಟ್ಟಿ ನಾಯಕಿ ನಟಿಯಾದ್ ನಟನೆ ಮಲ್ತ್‌ದೆರ್ ಪಂದ್ ಪಂಡೆರ್.

ವಿಜಯ್‌ಕುಮಾರ್ ಕೊಡಿಯಾಲ್‌ಬೈಲ್ ಪಾತೆರ್ದ್, ತುಳುನಾಡ್‌ದ ಸಂಸ್ಕೃತಿ, ಆಚರಣೆ ಬೊಕ್ಕ ನಂಬಿಕೆಡ್ ಒಂಜಾಯಿನ ಪಿಲಿ ನಲಿಕೆದ ಕಥೆ ಇಪ್ಪುನ ಪಿಚ್ಚರ್ “ಪಿಲಿ”. ತುಳುನಾಡ್‌ಡ್ ಪಿಲಿನಲಿಕೆಗ್ ಅಯ್ತನೆ ಆಯಿನ ಗೌರವ ಅಂಚನೆ ಪರಪೋಕು ಉಂಡು. ಆ ಗೌರವಗ್ ಧಕ್ಕೆ ಬನ್ನಗ ಆಚರಣೆಡ್ ಆಪುನ ಲೋಪ-ದೋಷ ಅಂಚನೆ ಪರಿಣಾಮನ್ ಎದುರಿಸಾವೊಡು ಪನ್ಪಿನವು ಈ ಪಿಚ್ಚರ್‌ದ ಕಥೆ ಆತ್ಂಡ್. ಈ ಪಿಚ್ಚರ್‌ಡ್ ಯಾನ್ ಮುಖ್ಯ ಪಾತ್ರಡ್ ನಟನೆ ಮಲ್ತ್‌ದೆ ಪಂದ್ ಪಂಡೆರ್.

ಈ ಪಿಚ್ಚರ್‌ಡ್ ತುಳುನಾಡ್‌ದ ಪುಗರ್ತೆದ ಕಲಾವಿದೆರ್ ಆಯಿನ ನವೀನ್ ಡಿ.ಪಡೀಲ್, ಅರವಿಂದ ಬೋಳಾರ್, ಭೋಜರಾಜ ವಾಮಂಜೂರು, ತ್ರಿಷಾ ಶೆಟ್ಟಿ, ಕೃತಿ ಶೆಟ್ಟಿ, ವಿಸ್ಮಯ ವಿನಾಯಕ್, ಸ್ವರಾಜ್ ಶೆಟ್ಟಿ, ಸಂತೋಷ್ ಶೆಟ್ಟಿ, ರೂಪ ಡಿ ಶೆಟ್ಟಿ, ಉಮೇಶ್ ಮಿಜಾರ್, ಪ್ರಸನ್ನ ಶೆಟ್ಟಿ ಬೈಲೂರು, ಸಂದೀಪ್ ಶೆಟ್ಟಿ ಮಾಣಿಬೆಟ್ಟು, ದೀಪಕ್ ರೈ ಪಾಣಾಜೆ, ಚೇತನ್ ರೈ ಮಾಣಿ ಸೇರಿನಂಚನೆ ಮಸ್ತ್ ಕಲಾವಿದೆರ್ ಬೇತೆ ಬೇತೆ ರೀತಿದ ಪಾತ್ರಡ್ ನಟನೆ ಮಲ್ತ್‌ದೆರ್.

ಪಿಚ್ಚರ್‌ದ ನಾಯಕೆ ನಟೆ ಭರತ್ ಭಂಡಾರಿ, ನಾಯಕಿ ಸ್ವಾತಿ ಶೆಟ್ಟಿ, ಸಹ ನಿರ್ದೇಶಕೆರ್ ಸತೀಶ್ ಪತ್ರಿಕಾಗೋಷ್ಠಿಡ್ ಇತ್ತೆರ್.

You Missed