ಕಾಸ್ರೋಡು : ತುಲುವೆರೆ ಜಾಲ್ ಕಣ್ವತೀರ್ಥ, ಜೋಕ್ಲೆನ ಸಾಂಸ್ಕೃತಿಕ ಬೊಕ ಸಾಹಿತ್ಯ ಸೇವಾ ಕೂಟ ಬೊಕ ಶ್ರೀ ಮಾತಾ ಕಲಾ ಮಂದಿರ ವೈಶಾಲಿ ಕುಂಜತ್ತೂರು ಮುಕ್ಲೆನ ಒತ್ತು ಸೇರಿಗೆಡ್ 22-02-2026 ತಾನಿ ಶ್ರೀ ಮಾತಾ ಕಲಾ ಮಂದಿರಡ್ 16 ವರ್ಷದ ಉಲಯಿದ ಜೋಕ್ಲೆನ ಬಹುಭಾಷಾ ಕವಿಗೋಷ್ಠಿ ಬೊಕ “ಕಬಿತೆ ಪುಟ್ಟುನ ಗುಟ್ಟೆಂಚಾ” ಕಜ್ಜಕೊಟ್ಯ ನಡತ್ಂಡ್.
ಈ ಲೇಸ್ ನ್ ರಡ್ಡ್ ವರ್ಷದ ಪುಟ್ಟು ಪರ್ಬ ಆಚರಿತೊಂದುಪ್ಪುನ ಕಣ್ವತೀರ್ಥ ದೀರಜ್ ಬೊಕ ನಿಶಿತಾ ಮುಕ್ಲೆನ ಬಾಲೆ ಮೈನವಿ ತುಡರ್ ಅರ್ಲಾದ್ ಉದಿಪನ ಮಂತೆರ್. ಲೇಸ್ ದ ಗುರ್ಕಾರ್ಮೆಡ್ ಜಿಲ್ಲಾ ಮಟ್ಟೊಡು ಗೊಬ್ಬು ಬೊಕ ಕಲೆಟ್ ಚಾತುರ್ಪು ತೋಜಾಯಿನ ಕುಮಾರಿ ರಶ್ಮಿತಾ ಕುಲಾಲ್ ತೂಮಿನಾಡ್ ವಹಿಸೊಂಡೆರ್.ಪೆರಿಯ ಸಾಹಿತಿ,ಪತ್ರಕರ್ತೆರಾಯಿನ ಶ್ರೀಯುತ ರಾಧಾಕೃಷ್ಣ ಉಳಿಯತಡ್ಕ ಕಬಿತೆ ಪುಟ್ಟುನ ಗುಟ್ಟೆಂಚಾ ಕಜ್ಜಕೊಟ್ಯ ನಡಪಾದ್,ಜೋಕುಲೆ ಮನಸ್ ಡ್ ಕಬಿತೆ ಪುಟ್ಟುನ ಸಾದಿ,ವಿಷಯ,ಆ ವಿಷಯೊಡು ತನನ್ ತಾನ್ ಒಡ್ಡೊಂದು ಪದ ಮುಡೆಪುನ ಕುಸೆಲೆಂಚ ಪನ್ಪುನೆನ್ ಬಾರೀ ಪೊರ್ಲುಡೆ ತೆರಿಪಾದ್ ಕೊರ್ಯೆರ್.ಮಲ್ಲ ಬಿನ್ನೆರಾದ್ ತುಲುವೆರೆ ಚಾವಡಿ ಬೆಂಗಳೂರುದ ಜೋಕುಲೆ ಉಜ್ಜಾಲ್ ಕೃತಿ ಸಂಪೊಲಿಗೆ ಕೂಟದ ಶ್ರೀಮತಿ ಸುಧಾ ನಾಗೇಶ್, ತುಲುವೆರೆ ಜಾಲ್ ಕಣ್ವತೀರ್ಥ ಜೋಕ್ಲೆಡ್ ಸಾಹಿತ್ಯ ಬೊಕ ಸಾಂಸ್ಕೃತಿಕ ಬುಲೆಚ್ಚಿಲ್ಗಾದ್ ಕೊರ್ಪುನ ಉಮೇದ್ಗ್ ಬೆರಿಬೊಟ್ಟುನ ಪಾತೆರ ಪಂಡೆರ್.
ಬಿನ್ನೆರೆ ನಿಲೆಟ್ ಇತ್ತೊಂದು ಶ್ರೀ ಮಾತಾ ಕಲಾ ಮಂದಿರದ ಮುಖ್ಯಸ್ಥೆರಾಯಿನ ನಿವೃತ್ತ ಕಲ್ಪಾದಿ ಶ್ರೀಮತಿ ಚಂದ್ರಿಕಾ ಟೀಚರ್ ಜೋಕುಲು ಇಂಚಿನ ಅವಕಾಶೊಲೆನ್ ಗಲಸೊನೊಡು ಬೊಕ ಜೋಕ್ಲೆನ ಇಲ್ಲದಕುಲು ಜೋಕ್ಲೆಗ್ ಬೆರಿತಾಂಗ್ ಕೊರ್ದು ಬರವುದ ಬೆನ್ನಿಡ್ಲಾ ಸಾಧನೆ ಮನ್ಪೆರೇಪುಂಡೂಂದು ತೆರಿಪಾವೊಡು ಪಂಡೆರ್. ತುಲುವೆರೆ ಜಾಲ್ ಮಂತಿನ,ತುಲುವೆರೆ ಚಾವಡಿ ಬೆಂಗಳೂರು ಮುಕುಲು ಬೊಲಿಕೆಗ್ ಕನತಿನ ಜೋಕುಲೆ ಉಜ್ಜಾಲ್ ಕೃತಿತ ಮಿತ್ತ್ ಅಂಗನವಾಡಿ ಜೋಕ್ಲೆಗಾದ್
ನಡತಿನ ತುಲು ಪದೊ ಪಂತೊ ಡು ಗೆಂದಿನ ಜೋಕ್ಲೆಗ್ ಇನಾಮು ಪಟ್ಯೆರ್.
ಈ ಲೇಸ್ದ ಸುರೂಕು ಶ್ರೀ ಮಾತಾ ಕಲಾ ಮಂದಿರದ ಸಂಗೀತ ಕಲ್ಪಾರ್ಥಿಲೆನ ಸುಗಿಪುದೊಟ್ಟಿಗೆ ಸುರುವಾಂಡ್, ಶ್ರೀಮತಿ ನಳಿನಿ ಬೆಂಗಳೂರು ಇಂಬೆರ್ ಬತ್ತಿ ಬಿನ್ನೆರೆನ್ ಎದ್ಕೊಂಡೆರ್, ಶ್ರೀಮತಿ ಕುಶಲಾಕ್ಷಿ ವಿ ಕುಲಾಲ್ ಕಣ್ವತೀರ್ಥ ಪೊಲಬುದ ಪಾತೆರ ಪಂಡೆರ್, ಶ್ರೀಯುತ ನಿಶ್ಚಿತ್ ಕಡಬ ಸೊಲ್ಮೆ ಸಂದೈತ ಮಂತೆರ್,
ಜೈ ತುಲುನಾಡ್ ಕಾಸರಗೋಡು ಎಗ್ಗೆದ ಕಾರ್ಯುಂತೆರಾಯಿನ ಹರಿಕಾಂತ್ ಕಾಸರಗೋಡು, ರಾಮಾಂಜನೇಯ ಸೇವಾ ಸಮಿತಿ ಕಣ್ವತೀರ್ಥದ ಗುರ್ಕಾರ್ಲು ಶ್ರೀಮತಿ ಪ್ರೇಮಾ ಎಂ ಪೊಣ್ಣೆ, ಶ್ರೀಯುತ ಸುನೀಲ್ ರಾಮಾಡಿ,ಚಿತ್ರಕಲಾ ಮಾಡೂರು,ಶೋಭಿತಾ ಕಣ್ವತೀರ್ಥ ಮುಕುಲು ಸಾಹಾಕಾರ ಮಂತೆರ್, ಲೇಸ್ಡ್ ಪತ್ತ್ ಕಿನ್ಯ ಕಬಿಕುಲು ಅಕುಲೇ ಬರೆತಿನ ಕಬಿತೆ ಪಂಡೆರ್ ಕುಮಾರಿ ಸ್ಪೂರ್ತಿ ಕುಂಜತ್ತೂರು ಲೇಸ್ ಸುಧಾರಿಕೆ ಮಂತೆರ್.
(ವರದಿ : ಕುವಿಕು ಕಣ್ವ ತೀರ್ಥ)
