ಕಾರ್ಲದ ಸುದ್ದಿ Karkala News

ಬಡಪತ್ತ್ ದಕ್ಲೆಗ್ ಗ್ ಸಹಾಯ ಮಲ್ಪುನ ಮೆಚ್ಚೊಡಾಯಿ: ನಳಿನ್ ಕುಮಾರ್ ಕಟೀಲ್

ಮುಲ್ಕಿ: ಅಂಗರಗುಡ್ಡೆ ಶ್ರೀರಾಮ್ ಫ್ರೆಂಡ್ಸ್ ವತಿರ್ದ್ ದಿ. ಸುಖಾನಂದ ಶೆಟ್ಟಿ ಸ್ಮರಣಾರ್ಥ ಸುಮಾರು ನೂದೆರ್ದ್ ಎಚ್ಚ ಅಶಕ್ತ ಕುಟುಂಬಲೆಗ್ ಪನವುಸ ಸಹಾಯ ಹಸ್ತ ಕೊರ್ಪಿನ ಲೇಸ್ ಅಂಚೆನೆ ಬಲ್ಲ್ ಒಯಿಪುನ ಪಂತೊ ಅಂಗರಗುಡ್ಡೆ ಶ್ರೀರಾಮ ಭಜನಾ ಮಂದಿರ ನಡತ್ಂಡ್. ಲೇಸ್ ದ ಗುರ್ಕಾರ್ಮೆನ್ ಬೆದ್ರ ಶಾಸಕೆರ್ ಉಮಾನಾಥ ಕೋಟ್ಯಾನ್ ವಹಿಸ್ ದ್ ಇತ್ತೆರ್ .

ಮಲ್ಲ ಬಿನ್ನೆರಾದ್ ಸಂಸದೆರ್ ನಳಿನ್ ಕುಮಾರ್ ಕಟೀಲು ಪಾತೆರ್ದ್ ಹಿಂದೂ ಸಮಾಜದ ರಕ್ಷಣೆಗ್ ಹೋರಾಟ ಮಲ್ತಿನ ದಿ. ಸುಖಾನಂದ ಶೆಟ್ಟಿ ಮೇರೆನ ಆದರ್ಶ ನಮಕ್ಕ್ ಮಾತ ಮಾದರಿ. ಅರೆನ ನೆಂಪುಡ್ ಅಸಹಾಯಕೆರೆಗ್ ಸಹಾಯ ಹಸ್ತ ಅಭಿನಂದನೀಯ ಪಂದ್ ಪಂಡೆರ್.

ಒಡಿಪು ಶಾಸಕೆರ್ ಯಶ್ಪಾಲ್ ಸುವರ್ಣ, ಜಿಲ್ಲಾ ಬಿಜೆಪಿ ಗುರ್ಕಾರ್ಲು ಪಿ ಸುದರ್ಶನ್,ಮಂಡಲಾಧ್ಯಕ್ಷೆರ್ ಸುನಿಲ್ ಆಳ್ವ, ಬಿಜೆಪಿ ನಾಯಕೆರ್ ಈಶ್ವರ ಕಟೀಲು, ಕಸ್ತೂರಿ ಪಂಜ, ಭುವನಾಭಿರಾಮ ಉಡುಪ , ಕೇಶವ ಕರ್ಕೇರಾ, ಜಯಾನಂದ್ ಮುಲ್ಕಿ , ವಿನೋದ್ ಸಾಲ್ಯಾನ್ ಬೆಳ್ಳಾಯರು, ಅತಿಕಾರಿಬೆಟ್ಟು ಗ್ರಾ.ಪಂ. ಗುರ್ಕಾರ್ಲು ಮನೋಹರ ಕೋಟ್ಯಾನ್ , ಸದಸ್ಯೆರ್ ಕೃಷ್ಣ ಶೆಟ್ಟಿಗಾರ್, ಮುಲ್ಕಿ ನ.ಪಂ. ಸದಸ್ಯೆರ್ ಸುಭಾಷ್ ಶೆಟ್ಟಿ, ಸತೀಶ್ ಅಂಚನ್, ಶೈಲೇಶ್, ಉದ್ಯಮಿ ಸ್ಟ್ಯಾನಿ ಪಿಂಟೋ ಕಟೀಲು, ಪ್ರವೀಣ್ ಆರ್ ಶೆಟ್ಟಿ, ಮುಂಬೈ, ಕಾರ್ಯಕ್ರಮ ಸಂಘಟಕೆರ್ ಜೀವನ್ ಶೆಟ್ಟಿ, ಸುಧೀರ್ ಶೆಟ್ಟಿ ಅಂಗರಗುಡ್ಡೆ ಇತ್ತೆರ್. ನಿತೇಶ್ ಶೆಟ್ಟಿ ಎಕ್ಕಾರು ಲೇಸ್ ದ ಸುದಾರಿಕೆ ಮಲ್ತೆರ್. ಬೊಕ್ಕ ಹಗ್ಗ ಜಗ್ಗಾಟ ಪಂತೊ ನಡತ್ಂಡ್.

ಐಕಳಡ್ ಗ್ರಾಮೀಣ ಮಟ್ಟದ ವಾಲಿಬಾಲ್ ಪಂತೊ

ಮುಲ್ಕಿ: ಕಿನ್ನಿಗೋಳಿ ಐಕಳದ ಕಾಂತಾ ಬಾರೆ-ಬೂದಾಬಾರೆ ಫ್ರೆಂಡ್ಸ್ ಕ್ಲಬ್ ಆಶ್ರಯಡ್ ಸಾಮಾಜಿಕ ಸೇವಾ ಚಟುವಟಿಕೆದ ಸಹಾಯಾರ್ಥವಾದ್ ಗ್ರಾಮೀಣ ಮಟ್ಟದ ವಾಲಿಬಾಲ್ ಪಂದ್ಯಾಟ 2023 ಕಾರ್ಯಕ್ರಮ ಐಕಳ ಕಂಬುಲದ ಮಂಜೊಟ್ಟಿ ಕಂಡದ ಕೈತಲ್ ದ ಗ್ರೌಂಡ್ ಡ್ ನಡತ್ಂಡ್.

ಮುಲ್ಕಿ ಬಂಟರ ಸಂಘದ ಗುರ್ಕಾರ್ಲು ಅಶೋಕ್ ಕುಮಾರ್ ಶೆಟ್ಟಿ ಲೇಸ್ ದ ಉದಿಪನ ಮಲ್ತ್ ಪಾತೆರ್ನ ಆರ್ ಗ್ರಾಮೀಣ ಪ್ರದೇಶಡ್ ಕ್ರೀಡೆಗ್ ಪ್ರೋತ್ಸಾಹ ಕೊರ್ಪುನ ಒಟ್ಟಿಗೆ ಸಾಮಾಜಿಕ ಚಟುವಟಿಕೆದ ಮೂಲಕ ಸಮಾಜದ ಕಟ್ಟ ಕಡೆತ ವ್ಯಕ್ತಿಗ್ ಸಹಾಯ ಹಸ್ತ ಕೊರೊಂದು ಇಪ್ಪುನ ಸೇವಾ ಸಂಸ್ಥೆದ ಬೇಲೆ ಬಾರಿ ಎಡ್ಡೆ ಪಂದ್ ಪಂಡೆರ್.

ಕಾರ್ಯಕ್ರಮದ ಗುರ್ಕಾರ್ಮೆನ್ ಉದ್ಯಮಿ ಪುರುಷೋತ್ತಮ ಶೆಟ್ಟಿ ಕಿನ್ನಿಗೋಳಿ ವಹಿಸ್ ದ್ ಇತ್ತೆರ್. ಕಾರ್ಯಕ್ರಮಡ್ ಶ್ರೀ ಕ್ಷೇತ್ರ ಏಳಿಂಜೆದ ಪ್ರಧಾನ ಅರ್ಚಕೆರ್ ಗಣೇಶ್ ಭಟ್ ಆಶಿರ್ವಚನ ಕೊರಿಯೆರ್. ಚಾವಡಿಡ್ ಮಲ್ಲ ಬಿನ್ನೆರಾದ್ ಉಪನ್ಯಾಸಕೆರ್ ಸಾಯಿನಾಥ ಶೆಟ್ಟಿ , ಐಕಳ ಗ್ರಾ. ಪಂ.ಮಾಜಿ ಅಧ್ಯಕ್ಷೆ ಸುಗುಣ ಪೂಜಾರಿ, ಕಿನ್ನಿಗೋಳಿ ಲಯನ್ಸ್ ಕ್ಲಬ್ ಅಧ್ಯಕ್ಷೆ ಹಿಲ್ಡಾ ಡಿಸೋಜ, ನಿಡ್ಡೋಡಿ ಬಂಟರ ಸಂಘದ ಗುರ್ಕಾರ್ಲು ಬಿ. ಆರ್. ಪ್ರಸಾದ್, ದಯಾನಂದ ಶೆಟ್ಟಿ, ಐಕಳಬಾವ ಹೊಸಮನೆ, ಕೃಷ್ಣ ಮಾರ್ಲ, ಹರೀಶ್ ಶೆಟ್ಟಿ ತಾಮಣಿಗುತ್ತು, ದೇವಿಪ್ರಸಾದ್ ಶೆಟ್ಟಿ ಏಳಿಂಜೆ ,ಫ್ರೆಂಡ್ಸ್ ಕ್ಲಬ್ ದ ಗುರ್ಕಾರ್ಲು ತಾರಾನಾಥ ಶೆಟ್ಟಿ ಇತ್ತೆರ್. ದೇವಿದಾಸ ಶೆಟ್ಟಿ ಬಿನ್ನೆರೆನ್ ಎದ್ಕೊಂದು, ಶ್ರೀಶ ಐಕಳ ಲೇಸ್ ದ ಸುದಾರಿಕೆ ಮಲ್ತೆರ್. ಅವೆರ್ದ್ ಬೊಕ್ಕ ವಾಲಿಬಾಲ್ ಗೊಬ್ಬು ನಡತ್ಂಡ್.

ಕಿನ್ನಿಗೋಳಿ ದ ದಾಮಸ್ ಕಟ್ಟೆ ಕಿರೆಂ ಚರ್ಚ್ ಡ್ ವರ್ಸದ ಉಚ್ಚಯ ; ಮೂಜಿ ಗುತ್ತು ದ ಇಲ್ಲಗ್ ಗೌರವ ಸಂದೈತ ಮಾನಾದಿಗೆ

ಮುಲ್ಕಿ : ಕಿನ್ನಿಗೋಳಿ ಕೈತಲ್ ದಾಮಸ್ ಕಟ್ಟೆದ ಕಿರೆಂ ಚರ್ಚ್‌ದ ವಾರ್ಷಿಕ ಪರ್ಬದ ಮಸ್ತ್ ವರ್ಷದ ದುಂಬು ಚರ್ಚ್ ದ ಮಿತ್ತ್ ಟಿಪ್ಪು ಸುಲ್ತಾನ್ ದಾಳಿನ್ ತಪ್ಪಾಯಿನ ನೆಂಪುಗಾದ್ ಪ್ರತಿಷ್ಠಿತ ಮನೆತನದ ಮೂಜಿ ಹಿಂದೂ ಕುಟುಂಬಿಕೆರೆಗ್ ನೆಂಪುಗೋಸ್ಕರ ಕೈಸ್ತ ಬಾಂಧವೆರ್ ಮಾನಾದಿಗೆ ಮಲ್ತೆರ್.

ತಾಳಿಪಾಡಿ ಗುತ್ತು, ಏಳಿಂಜೆ ಅಂಗಡಿಗುತ್ತು, ಐಕಳ ಬಾವ ಮೂಜಿ ಗುತ್ತು ಮನೆತನದಕ್ಲೆಗ್ ಪ್ರತೀ ವರ್ಷದಂಚ ಈ ಸರ್ತಿಲ ಬಾರೆದ ಕೈಲ್, ಬಚ್ಚಿರೆ ಕೊರ್ದು ವಿಶೇಷ ಗೌರವ ಸಲ್ಲಿಸಾಯೆರ್.‌ ತಾಳಿಪಾಡಿ ಗುತ್ತು ದಿನೇಶ್ ಭಂಡ್ರಿಯಾಲ್, ಸುಕುಮಾರ್ ಶೆಟ್ಟಿ ತಾಳಿಪಾಡಿ ಗುತ್ತು, ಜಗದೀಶ್ ಶೆಟ್ಟಿ ತಾಳಿಪಾಡಿ ಗುತ್ತು, ಏಳಿಂಜೆ ಅಂಗಡಿಗುತ್ತು ಗುತ್ತಿನಾರ್ ಬಾಲಕೃಷ್ಣ ಶೆಟ್ಟಿ, ಶಂಭು ಶೆಟ್ಟಿ, , ರಿಶಿತ್ ಶೆಟ್ಟಿ, ಐಕಳ ಬಾವ ಸುಕುಮಾರ್ ಭಂಡಾರಿ, ಜಯಪಾಲ ಶೆಟ್ಟಿ, ಭಾಸ್ಕರ್ ಶೆಟ್ಟಿ, ಅಭಿಷೇಕ್ ಶೆಟ್ಟಿ, ಮಾನಾದಿಗೆನ್ ಪಡೆಯೊಂಡೆರ್. ಪಣಿರ್ ಚರ್ಚ್ ಪ್ರಧಾನ ಧರ್ಮಗುರು ವಿಕ್ಟೆರ್ ಡಿಮೆಲೋ, ಕಿರೆಂ ಚರ್ಚ್ ಪ್ರದಾನ ಧರ್ಮಗುರು ಓಸ್ವಾಲ್ಡ್ ಮಾಂತೆರೋ, ಸಹಾಯಕ ಧರ್ಮಗುರು ಸುನೀಲ್ ಡಿಸೋಜ, ಪಾದರ್ ಮ್ಯಾಕ್ಸಿಮ್ ನೊರೋಹ್ನ, ಎಸ್.ವಿ.ಡಿ ಧರ್ಮಗುರು, ಕಿನ್ನಿಗೋಳಿ ವಲಯ ಧರ್ಮಗುರು, ಕಿರೆಂ ಚರ್ಚ್ ದ ಪಲನಾ ಮಂಡಳಿ ಉಪಾಧ್ಯಕ್ಷೆರ್ ಸ್ಟೀವನ್ ಡಿಕುನ್ನ, ಕಾರ್ಯದರ್ಶಿ ಮ್ಯಾಕ್ಸಿಮ್ ಪಿಂಟೋ, ಸರ್ವ ಸಮಿತಿ ಚಾಲಕೆರ್ ಸಂತಾನ್ ಡಿಸೋಜ ಈ ಪೊರ್ತುಡು ಇತ್ತೆರ್.

ಮೀರಾ ಭಯಂದರ್ ದ ಹೋಟೆಲ್ ಕ್ರೌನ್ ಸಭಾಂಗಣಡ್ ಶ್ರೀ ದೇವಿ ಮಹಾತ್ಮೆ ಆಟದ ಸೇವಕೆರೆಗ್ ಸೊಲ್ಮೆ ಸಂದಾವುನ ಧನ್ಯೋಸ್ಮಿ ಲೇಸ್

ಯುವ ಬ್ರಿಗೇಡ್ ಮೀರಾ ಭಯಂದರ್ ಮುತಾಲಿಕೆಡ್, ತ್ರಿರಂಗ ಸಂಗಮದ ಒಟ್ಟುಸೇರಿಗೆಡ್, ಪಟ್ಲ ಸತೀಶ್ ಶೆಟ್ಟಿ ಮೆರೆನ ಸಾರಥ್ಯಡ್, ಪಾವಂಜೆ ಜ್ಞಾನ ಶಕ್ತಿ ಸುಬ್ರಮಣ್ಯ ಸ್ವಾಮಿ ಕೃಪಾಪೋಷಿತ ಯಕ್ಷಗಾನ ಮಂಡಳಿದ ಕಲಾವಿದೆರೆರ್ದ್ ಶ್ರೀ ದೇವಿ ಮಹಾತ್ಮೆ ಆಟದ ಯಶಸ್ಸಿಗ್ ಸೇವೆ ಮಲ್ತಿನ ಮತ ಸೇವಕೆರೆಗ್ ಸೊಲ್ಮೆ ಸಂದಾವುನ ಧನ್ಯೋಸ್ಮಿ ಲೇಸ್ ಮೀರಾ ಭಯಂದರ್ ದ ಹೋಟೆಲ್ ಕ್ರೌನ್ ಸಭಾಂಗಣಡ್ ನಡತ್ಂಡ್.

ಈ ಪೊರ್ತುಡು ಅರುಣ್ ಶೆಟ್ಟಿ ಪಣಿಯೂರು, ಸಚ್ಚಿದಾನಂದ ಶೆಟ್ಟಿ ಮುನ್ನಲಾಯಿ ಗುತ್ತು, ಭಾಸ್ಕರ್ ಶೆಟ್ಟಿ, ಉದಯ್ ಶೆಟ್ಟಿ ಪೆಲತ್ತೂರು, ಅರುಣೋದಯ ರೈ, ರಮೇಶ್ ಶೆಟ್ಟಿ ಸಿದ್ದಕಟ್ಟೆ, ಶಿವರಾಮ್ ಶೆಟ್ಟಿ ಡೆಲ್ಟ, ದಿನೇಶ್ ಶೆಟ್ಟಿ, ಸುರೇಶ್ ಶೆಟ್ಟಿ ಗಂಧರ್ವ ಪಾಲ್ ಪಡೆದಿತ್ತೆರ್.

ಮೂಲ್ಕಿ ಅರಸು ಕಂಬುಲಗ್ ಮೈಸೂರು ಒಡೆಯರ್ ಬಿನ್ನೆರ್

ಮೂಲ್ಕಿ: ಮೂಲ್ಕಿ ಸೀಮೆದ ಅರಸು ಕಂಬುಲ ಡಿ.24 ದಾನಿ ನಡಪೆರೆ ಉಂಡು. ಉಂದುವೇ ಸುರೂತ್ತ ಸರ್ತಿ ಮೈಸೂರು ರಾಜವಂಶಸ್ಥೆರ್ ಯದುವೀರ್ ಕೃಷ್ಣ ದತ್ತ ಚಾಮರಾಜ ಒಡೆಯರ್‌ ಅರಸು ಕಂಬುಲ ಡ್ ಪಾಲ್ ಪಡೆಯೆರೆ ಉಲ್ಲೆರ್. ಆನಿ ಕಾಂಡೆ ಮೂಲ್ಕಿ ಅರಮನೆಕ್ಕ್ ಭವ್ಯ ಮೆರವಣಿಗೆದ ಮೂಲಕ ಎದ್ಕೊನಿಯೆರೆ ಉಲ್ಲೆರ್.

ಬೊಕ್ಕ ಮೂಲ್ಕಿ ಸೀಮೆದ ಒರ್ಂಬ ಮಾಗಣೆದ ವತಿರ್ದ್ ಮಾನಾದಿಗೆ ನಡಪೆರೆ ಉಂಡು. ಮೂಲ್ಕಿ ಸೀಮೆ ಇತಿಹಾಸ ಪ್ರಸಿದ್ಧ ಅರಸು ಕಂಬುಲನ್ ವೀಕ್ಷಣೆ ಮಲ್ಪೆರೆ ಉಲ್ಲೆರ್. ಬೊಕ್ಕ ಮೂಲ್ಕಿ ಅರಮನೆ ವೆಲ್ಫೇರ್ ಟ್ರಸ್ಟ್ ದ ವತಿರ್ದ್ ನಡಪುನ ಸಾಧಕೆರೆಗ್ ಮಾನಾದಿಗೆದ ಲೇಸ್ ಡ್ ಪಾಲ್ ಪಡೆಯೆರೆ ಉಲ್ಲೆರ್ ಪಂದ್ ಮೂಲ್ಕಿ ಸೀಮೆದ ಅರಸೆರ್ ದುಗ್ಗಣ್ಣ ಸಾವಂತೆರ್, ಮೂಲ್ಕಿ ಅರಮನೆ ವೆಲ್ಫೇರ್ ಟ್ರಸ್ಟ್ ದ ನಿರ್ದೇಶಕೆರ್ ಎಂ ಗೌತಮ್ ತೆರಿಪಾದೆರ್.

ಭಜನೆ ಕ್ಷೇತ್ರದ ಸಾಧಕೆರ್ ಗಿರಿಧರ ಅಮೀನ್ ರೆಗ್ ಹೊಸ ಅಂಗಣ ಪ್ರಶಸ್ತಿ

ಮೂಲ್ಕಿ: ಒವುಲಾ ಪ್ರತಿಫಲಾಪೇಕ್ಷೆ ಉಪ್ಪಂದೆ ನಿಸ್ವಾರ್ಥ ಸಮಾಜ ಸೇವೆನ್ ಮಲ್ತ್ಂಡ ದೇವೆರ್ನ ಅನುಗ್ರಹ ತಿಕ್ಕುಂಡು ಪಂದ್ ಕನ್ನಡ ಸಾಹಿತ್ಯ ಪರಿಷತ್ತ್ ದ ಮಾಜಿ ರಾಜ್ಯಾಧ್ಯಕ್ಷೆರ್ ಧರ್ಮದರ್ಶಿ ಹರಿಕೃಷ್ಣ ಪುನರೂರು ಪಂಡೆರ್.

ಆರ್ ಮೂಲ್ಕಿದ ಪುನರೂರು ಟೂರಿಸ್ಟ್ ಹೋಂ ನ ಸಭಾಂಗಣಡ್ ಜ.26 ಕ್ಕ್ ನಡತಿನ ಹೊಸ ಅಂಗಣ ಪತ್ರಿಕೆದ ತಿಂಗಳ ಬೆಳಕು ಕಾರ್ಯಕ್ರಮದ ಗುರ್ಕಾರ್ಮೆ ಒಯಿಸ್ ದ್ ಪಾತೆರಿಯೆರ್.

ಕಾರ್ಯಕ್ರಮಡ್ ಭಜನಾ ಕ್ಷೇತ್ರದ ಸಾಧಕೆರ್ ಗಿರಿಧರ್‌ ಅಮೀನ್‌ ಕೊಕ್ಕರ್‌ ಕಲ್‌ ಮೆರೆನ್ ಬೊಡೆದಿ ಶ್ವೇತಾ ಸಮೇತ ಹೊಸ ಅಂಗಣ ಪ್ರಶಸ್ತಿ ಕೊರ್ದು ಸನ್ಮಾನ ಮಲ್ತೆರ್.

ಚಿತ್ರಾಪು ಶ್ರೀ ಮೂಕಾಂಬಿಕಾ ಮಂದಿರದ ಶ್ರೀ ಕೇಶವಾನಂದ ಸ್ವಾಮೀಜಿ,ಜೇಸಿಸ್‌ ನ ಮಾಜಿ ವಲಯ ಉಪಾಧ್ಯಕ್ಷೆರ್ ದಿನೇಶ್‌ ಶೆಟ್ಟಿ,ಮೂಲ್ಕಿ ನಗರ ಪಂಚಾಯತ್‌ ದ ಮಾಜಿ ನಾಮ ನಿರ್ದೇಶಿತ ಸದಸ್ಯೆರ್ ನರಸಿಂಹ ಪೂಜಾರಿ,ಹಳೆಯಂಗಡಿ ಬಂಕಿ ನಾಯ್ಗೆರ್,ಉದ್ಯಮಿ ಜಾನ್‌ ಕ್ವಾಡ್ರಸ್‌,ನಿವೃತ್ತ ಪೊಲೀಸ್‌ ಅಧಿಕಾರಿ ಕೆ ಎನ್‌ ಕೋಟ್ಯಾನ್‌,ಅತಿಕಾರಿಬೆಟ್ಟು ಪಂಚಾಯತ್‌ ಉಪಾಧ್ಯಕ್ಷ ಮನೋಹರ್‌ ಕೋಟ್ಯಾನ್‌, ಉದ್ಯಮಿ ವಾಸು ಪೂಜಾರಿ ಚಿತ್ರಾಪು ಮೊಕುಲು ಮಾತ ಇತ್ತೆರ್.

ಹೊಸ ಅಂಗಣ ಸಂಪಾದಕೆರ್ ಡಾ|ಹರೀಶ್ವಂದ್ರ ಪಿ ಸಾಲ್ಯಾನ್‌ ಸ್ವಾಗತ ಮಲ್ತೆರ್. ನಿವೃತ್ತ ಪ್ರಾಚಾರ್ಯ ವೈ ಎನ್‌ ಸಾಲ್ಯಾನ್‌ ನಿರೂಪಣೆ ಮಲ್ತೆರ್.

ತುಳು ಸಾಧಕೆರ್ ನವೀನ್ ಶೆಟ್ಟಿ ಎಡ್ಮೆಮಾರ್ ಸೇರ್ದ್ 5 ಜನಕ್ಕ್ ಅರಸು ಪ್ರಶಸ್ತಿ

ಹಳೆಯಂಗಡಿ: ಮುಲ್ಕಿ ಅರಮನೆ ವೆಲ್ಫೇರ್ ಬೊಕ್ಕ ಚಾರಿಟೇಬಲ್ ಟ್ರಸ್ಟ್ (ರಿ) ಪಡುಪಣಂಬೂರು ಬೊಕ್ಕ ಪ್ರಿಯದರ್ಶಿನಿ ಕೋ ಆಪರೇಟಿವ್ ಸೊಸೈಟಿ ಹಳೆಯಂಗಡಿ ಮೊಕ್ಲೆನ ಒಟ್ಟು ಸೇರಿಗೆಡ್ ಉಂದುವೇ ಸುರೂತ್ತ ಸರ್ತಿ ಕೊರ್ಪಿನ ಅರಸು ಪ್ರಶಸ್ತಿ ಪ್ರದಾನ ಲೇಸ್ ಡಿ.24 ದಾನಿ ಮುಲ್ಕಿ ಅರಮನೆ ಧರ್ಮಚಾವಡಿಡ್ ನಡಪೆರೆ ಉಂಡು.

ತುಳು ಸಾಂಸ್ಕೃತಿಕ ಕ್ಷೇತ್ರದ ಸಾಧಕೆರ್ ನವೀನ್ ಶೆಟ್ಟಿ ಎಡ್ಮೆಮಾರ್, ಸಾಮಾಜಿಕ ಕ್ಷೇತ್ರದ ಸಾಧಕೆರ್ ಭುಜಂಗ ಎಮ್ ಶೆಟ್ಟಿ ಉತೃಂಜೆ, ಕಂಬುಲ ಕ್ಷೇತ್ರದ ಮರಣೋತ್ತರ ಪ್ರಶಸ್ತಿ ದಿ|ಪೈಯೊಟ್ಟು ಸದಾಶಿವ ಸಾಲ್ಯಾನ್, ಕೃಷಿ ಕ್ಷೇತ್ರ ಗಂಗಾಧರ ದೇವಾಡಿಗ ಬೆಳ್ಳಾಯರು, ಕ್ರೀಡಾ ಕ್ಷೇತ್ರ ಸುಷ್ಮಾ ತಾರಾನಾಥ ಅಮೀನ್ ಮೊಕುಲು 2023 ನೇ ವರ್ಷದ ಅರಸು ಪ್ರಶಸ್ತಿ ಗ್ ಆಯ್ಕೆಯಾತೆರ್.