ಸುರತ್ಕಲ್: “ರಂಗಚಾವಡಿ” ಕುಡ್ಲ ನೆತ್ತ ಮುತಾಲಿಕೆಡ್ ಸುಭಾಷಿತನಗರ ರೆಸಿಡೆಂಟ್ಸ್ ವೆಲ್‌ ಫೇರ್‌ ಅಸೋಸಿಯೇಶನ್, ಸುರತ್ಕಲ್ ಒಟ್ಟುಸೇರಿಗೆಡ್ ರಂಗಚಾವಡಿ ವರ್ಷದ ಪರ್ಬ ಬೊಕ್ಕ ರಂಗಚಾವಡಿ ಪ್ರಶಸ್ತಿ ಕೊರ್ಪಿನ ಲೇಸ್ ಸುರತ್ಕಲ್ ಬಂಟರ ಭವನಡ್‌ ಐತಾರ ನಡತ್ಂಡ್.
ಪುಗರ್ತೆದ ರಂಗಕರ್ಮಿ, ನಾಟಕ ರಚನೆಕಾರೆರ್, ನಿರ್ದೇಶಕೆರ್ ವಿಜಯ್ ಕುಮಾರ್ ಕೊಡಿಯಾಲ್ ಬೈಲ್ ದಂಪತಿಲೆನ್ ಬಿನ್ನೆರ್‌ ಮಾನಾದಿಗೆ ಮಲ್ತೆರ್. ಅಂಚೆನೆ ಅರೆಗ್ “ರಂಗಚಾವಡಿ-2023” ಪ್ರಶಸ್ತಿ ಪ್ರದಾನ ಮಲ್ತೆರ್. ಲೇಸ್‌ದ ಉದಿಪನ ಮಲ್ತಿನ ಹೇರಂಭ ಇಂಡಸ್ಟ್ರೀಸ್ ಮುಂಬೈ ನೆತ್ತ ಆಡಳಿತ ನಿರ್ದೇಶಕೆರ್ ಕನ್ಯಾನ ಸದಾಶಿವ ಶೆಟ್ಟಿ ಪಾತೆರ್ದ್ “ರಂಗಚಾವಡಿ ಸಂಘಟನೆ ಮಲ್ಲ ಕಲಾವಿದೆರೆನ್ ಗುರುತಿಸಾದ್ ಮಾನಾದಿಗೆ ಮಲ್ಪುನ ಎಡ್ಡೆ ಬೇಲೆ. ಇನಿ ವಿಜಯ್ ಕುಮಾರ್ ಕೊಡಿಯಾಲ್ ಬೈಲ್ ಅರೆನ ಸಾಧನೆ ಬೊಕ್ಕ ಮಹಾ ವ್ಯಕ್ತಿತ್ವ ಮೆಚ್ಚುನಂಚಿನ. ರಂಗಚಾವಡಿ ಕುಡ್ಲ ಸಂಸ್ಥೆ ಬೋಡಾಯಿನಾತ್ ಎಡ್ಡೆ ಬೇಲೆ ಮಲ್ತೊಂದು ಉಂಡು. ದೇವೆರ್ ಕೊಡಿಯಾಲ್ ಬೈಲ್‌ಗ್ ಕಲೆಟ್‌ ನನಾತ್ ಆಶೀರ್ವಾದ ಮಲ್ಪಡ್‌ ಪಂದ್ ಪಂಡೆರ್.
ಮಾನಾದಿಗೆ ಪಡೆನ ವಿಜಯ ಕುಮಾರ್ ಪಾತೆರ್ದ್ “ಉಂದು ಅರ್ಜಿ ಪಾಡಂದೆ ತಿಕ್ಕೊಂದು ಇಪ್ಪುನ ಪ್ರಶಸ್ತಿ. ಒವ್ವೇ ಲಾಭ ಇಜ್ಜಾಂದೆ ಕಲಾವಿದೆರೆನ ಶ್ರಮನ್ ಗುರುತಿಸಾದ್ ರಂಗ ಚಾವಡಿ ಸಂಘಟನೆ ಪ್ರಶಸ್ತಿ ಕೊರೊಂದು ಇಪ್ಪುನ ಕಾರಣ ನೆಕ್ಕ್‌ ಬಿಲೆ ಜಾಸ್ತಿ. ಅಂಚಾದ್ ಬೇತೆ ಪ್ರಶಸ್ತಿರ್ದ್‌ ಉಂದೆನ್ ದೆತೊನ್ನಗ ಖುಷಿ ಜಾಸ್ತಿ ಪಂದ್ ಪಂಡೆರ್.
ಕೊಡಿಯಾಲ್ ಬೈಲ್ ರೆನ ಮಲ್ಲ ಸಾಧನೆ: ಐಕಳ ಹರೀಶ್ ಶೆಟ್ಟಿ ಲೇಸ್ ದ ಗುರ್ಕಾರ್ಮೆ ವಹಿಸ್ ದ್ ಪಾತೆರ್ನ ಜಾಗತಿಕ ಬಂಟರ ಸಂಘದ ಒಕ್ಕೂಟದ ಗುರ್ಕಾರೆ ಐಕಳ ಹರೀಶ್ ಶೆಟ್ಟಿ ಮೇರ್ “ತುಳುನಾಡ್‌ಡ್ ವಿಜಯ ಕುಮಾರ್ ಕೊಡಿಯಾಲ್ ಬೈಲ್ ಮಲ್ತಿನ ಸಾಧನೆ ಅಭೂತಪೂರ್ವ. ಶಿವದೂತೆ ಗುಳಿಗೆ ನಾಟಕ ಯಶಸ್ವಿ ಪ್ರದರ್ಶನನ್‌ ಕೊರೊಂದು ಉಂಡು. ಅರೆಗ್ 2023ನೇ ಸಾಲ್‌ದ ರಂಗಚಾವಡಿ ಪ್ರಶಸ್ತಿ ಕೊರ್ಪುನ ಮುಖೆನ ಪ್ರಶಸ್ತಿದ ಗೌರವಲ ಜಾಸ್ತಿ ಆತ್‌ಂಡ್. ಸಮಾಜಡ್ ಮಾತೆರ್ಲ ಶ್ರೀಮಂತೆರ್‌ ಅತ್ತ್.
ಬಡವೆರೆನ್‌ ಮೋಕೆಡ್‌ ತೂವೊಡು. ಕಾಸ್‌ನ್‌ ಕೂಡುದು ದೀಪುನ ಬದಲ್ ಯೋಗ್ಯೆರೆಗ್ ದಾನ ಮಲ್ಪೊಡು. ಅಪಗ ನಮ್ಮ ಬದ್ಕ್‌ ಸಾರ್ಥಕ ಆಪುಂಡು ಪಂದ್ ಪಂಡೆರ್. ಶ್ರೀ ಡೆವಲಪರ್ಸ್ ಕಟೀಲು ನೆತ್ತ ಆಡಳಿತ ನಿರ್ದೇಶಕೆರ್ ಗಿರೀಶ್ ಎಂ ಶೆಟ್ಟಿ ಕಟೀಲು ಪಾತೆರ್ದ್, ವಿಜಯಕುಮಾರ್ ಕೊಡಿಯಾಲ್ ಬೈಲ್ ರೆನ ನಾಟಕ ತಂಡರ್ದ್‌ ಮಸ್ತ್ ಯಶಸ್ವಿ ನಾಟಕದ ಪ್ರದರ್ಶನ ಆತ್‌ಂಡ್. ಶಿವದೂತೆ ಗುಳಿಗೆ ಚಾರಿತ್ರಿಕ ದಾಖಲೆ ನಿರ್ಮಾಣ ಮಲ್ತ್‌ದ್‌ಂಡ್. ಇತ್ತೆ ಮೈತಿದಿ ಪ್ರೇಕ್ಷಕೆರ್ನ ಉಡಲ್‌ನ್‌ ಗೆಂದೊಂದು ಉಂಡು ಪಂಡೆರ್.
ಚಾವಡಿಡ್ ಚಲನಚಿತ್ರ ನಿರ್ಮಾಪಕೆರ್ ಡಾ.ಸಂಜೀವ ದಂಡೆಕೇರಿ, ಮನಪಾ ಸದಸ್ಯೆರ್ ವರುಣ್ ಚೌಟ, ಬಂಟರ ಮಾತೃಸಂಘ ತಾಲೂಕು ಸಮಿತಿದ ಸಂಚಾಲಕೆರ್ ವಸಂತ ಶೆಟ್ಟಿ, ಯಕ್ಷಧ್ರುವ ಪಟ್ಲ ಫೌಂಡೇಶನ್ ಸುರತ್ಕಲ್ ಘಟಕದ ಗುರ್ಕಾರೆ ಸುಧಾಕರ ಎಸ್ ಪೂಂಜ, ಸುಭಾಷಿತನಗರ ರೆಸಿಡೆಂಟ್ಸ್ ವೆಲ್‌ಫೇರ್‌ ಅಸೋಸಿಯೇಶನ್ ಗುರ್ಕಾರೆ ರಮೇಶ್ ಶೆಟ್ಟಿ,ಯತಾರ್ಥ್ ಸೋಶಿಯಲ್ ಮಂಗಳೂರು ನೆತ್ತ ಸ್ಥಾಪಕೆರ್ ಈಶ್ವರ್ ಪ್ರಸಾದ್ ಶೆಟ್ಟಿ, ಸುರತ್ಕಲ್ ಬಂಟರ ಸಂಘದ ಗುರ್ಕಾರೆ ಲೋಕಯ್ಯ ಶೆಟ್ಟಿ, ರಂಗಚಾವಡಿದ ಸಂಚಾಲಕೆರ್ ಬಾಳ ಜಗನ್ನಾಥ ಶೆಟ್ಟಿ, ಚಿತ್ರಾ ಜೆ ಶೆಟ್ಟಿ ಇತ್ತೆರ್. ಯಕ್ಷಧ್ರುವ ಪಟ್ಲ ಫೌಂಡೇಶನ್ ಟ್ರಸ್ಟ್‌ದ ಪ್ರಧಾನ ಕಾರ್ಯದರ್ಶಿ ಪುರುಷೋತ್ತಮ ಭಂಡಾರಿ ಅಡ್ಯಾರ್ ಅಭಿನಂದನಾ ಭಾಷಣ ಮಲ್ತೆರ್. ನಿತೇಶ್ ಶೆಟ್ಟಿ ಎಕ್ಕಾರ್, ರಾಜೇಶ್ವರಿ ಡಿ ಶೆಟ್ಟಿ ಲೇಸ್‌ದ ಸುದಾರಿಕೆ ಮಲ್ತೆರ್.
