ಕಾರ್ಲದ ಸುದ್ದಿ Karkala News

ಕುಡುಂಬೂರುಗುತ್ತು ದೈವ ಚಾವಡಿಡ್‌ ಧರ್ಮನೇಮ; ಲೆಪ್ಪೋಲೆ ಪತ್ರ ಬುಡುಗಡೆ

ಕುಡ್ಲ: ಸುರತ್ಕಲ್ ಕೈತಲ್ದ ಪಣಂಬೂರು ಮಾಗಣೆ ಕುಡುಂಬೂರು ಗುತ್ತು ಶ್ರೀ ಪಿಲಿಚಾಮುಂಡಿ, ಧೂಮಾವತಿ, ಜಾರಂದಾಯ ಬಂಟ ಪಂಚಶಕ್ತಿಲೆನ ಧರ್ಮನೇಮ 2024 ಜನವರಿ 19 ದಾನಿ ಕುಡುಂಬೂರು ಗುತ್ತು ದೈವಚಾವಡಿಡ್‌ ನಡಪೆರೆ ಉಂಡು. ಧರ್ಮನೇಮದ ಲೆಪ್ಪೋಲೆ ಪತ್ರ ಲೇಸ್‌ ಐತಾರ ಪಿಲಿಚಾಮುಂಡಿ ದೈವದ ವಠಾರಡ್‌ ಕುಡುಂಬೂರು ಗುತ್ತು ಯಜಮಾನ ಅಡ್ಯಾರು ಮುದ್ದರ ಮನೆ ಈಶ್ವರ ನಾಯ್ಗ ಚಾವಡಿಡ್‌ ನಡತ್‌ಂಡ್.‌ ಗುರುಪುರ ವಜ್ರದೇಹಿ ಮಠದ ಶ್ರೀ ರಾಜಶೇಖರಾನಂದ ಸ್ವಾಮೀಜಿ ಲೆಪ್ಪೋಲೆ ಪತ್ರ ಬುಡುಗಡೆ ಮಲ್ತ್‌ದ್‌ ಆಶೀರ್ವಚನ ಕೊರಿಯೆರ್.‌ ವೇ.ಮೂ ಜ್ಯೋತಿಷಿ ಶ್ರೀರಂಗ ಐತಾಳ್‌ ಕದ್ರಿ ದೈವಾರಾಧನೆ ಕ್ಷೇತ್ರದ ಇತಿಹಾಸದ ಬಗ್ಗೆ ಭಕ್ತೆರೆಗ್‌ ವಿವರಣೆ ಕೊರಿಯೆರ್.‌

ಕುಡುಂಬೂರು ಗುತ್ತು ಕ್ಷೇತ್ರದ ಗುತ್ತಿನಾರ್‌ ಜಯರಾಮ ಶೆಟ್ಟಿ ಧರ್ಮ ನೇಮಗ್‌ ಮಾತೆರ್ನಲ ಸಹಕಾರನ್‌ ಕೇಂಡೆರ್.‌ ಚಾವಡಿಡ್‌ ಆಶಿಕ್‌ ಕುಮಾರ್‌ ಕರ್ಣಂತರ ಬಲ್ಲಾಳ್‌ ಕೂಳೂರು ಬೂಡು, ದಿವಾಕರ ಆಳ್ವ, ತೋಕೂರು ಗುತ್ತು, ಗುತ್ತಿನಾರ್‌ ಬಾಲಕೃಷ್ಣ ಶೆಟ್ಟಿ ಏಳಿಂಜೆ, ಚೆನ್ನಯ್ಯ ಮಾಡ ಕಟ್ಲಬೂಡು, ಬಾಲಕೃಷ್ಣ ಶೆಟ್ಟಿ ಹೊಸಬೆಟ್ಟು ಗುತ್ತಿನಾರ್‌, ಗುತ್ತಿನಾರು ಬಾಬು ಬಂಡ್ರಿಯಾಲ್‌ ಪಡ್ರೆ, ಶೆಡ್ಡೆಗುತ್ತು ವೇಣುಗೋಪಾಲ ಅರಸು, ಮೂಕೋಡಿ ಧೂಮ ಸುಧಾಕರ ಪೂಜಾರಿ, ಆನಂದ ಶೆಟ್ಟಿ ಸಾಂತ್ರಬೈಲು, ಭಾಗ್ಯಚಂದ್ರ ಭಟ್‌, ನೆತ್ತಿಲ ಬಾಳಿಕೆ ಮೋಹನ್‌ ದಾಸ್‌ ಭಂಡಾರಿ ಬೊಕ್ಕ ಬೇತೆ ಗುತ್ತುದ ಪ್ರಮುಖೆರ್‌, ಭಕ್ತೆರ್‌, ಸಂಘ ಸಂಸ್ಥೆದ ಪದಾಧಿಕಾರಿಲು ಇತ್ತೆರ್.‌ ಜಯಶೆಟ್ಟಿ ಪ್ರಾಸ್ತಾವಿಕವಾದ್‌ ಪಾತೆರಿಯೆರ್.‌ ನಿಡ್ಡೋಡಿ ಚಾವಡಿ  ಜಗನ್ನಾಥ ಶೆಟ್ಟಿ ಮಾತೆರೆನ್‌ ಎದ್ಕೊಂಡೆರ್.‌ ಸುಧಾಮ ಶೆಟ್ಟಿ ಬೊಕ್ಕ ನವೀನ್‌ ಶೆಟ್ಟಿ ಲೇಸ್‌ದ ಸುದಾರಿಕೆ ಮಲ್ತೆರ್.

ಕಾರ್ಲ: ಶ್ರೀ ಬ್ರಹ್ಮಬೈದರ್ಕಳ ಗರಡಿ ಬೋಳ ದೈವಸ್ಥಾನಡ್‌ ವರ್ಷಾದಿದ ನೇಮೋತ್ಸವ

ಕಾರ್ಲ: ಶ್ರೀ ಬ್ರಹ್ಮಬೈದರ್ಕಳ ಗರಡಿ, ಬೋಳ ದೈವಸ್ಥಾನಡ್‌ ನ.25 ರ್ದ್‌ 28 ಮುಟ್ಟ ವರ್ಷಾದಿದ ನೇಮೋತ್ಸವ ನಡಪೆರೆ ಉಂಡು. ಅನ್ನನೈವೇದ್ಯ ಸೇವೆ, ಸತ್ಯನಾರಾಯಣ ಪೂಜೆ, ಪ್ರಸಾದ ವಿತರಣೆ, ಅನ್ನಸಂತರ್ಪಣೆ, ಬೇತೆ ಬೇತೆ ಭಜನಾ ಮಂಡಳಿರ್ದ್‌ ಭಜನೆ ಕಾರ್ಯಕ್ರಮ, ಸೋಮವಾರ ಬ್ರಹ್ಮಬೈದರ್ಕಳ ದರ್ಶನ ನಡಪೆರೆ ಉಂಡು.

ನ.28 ದಾನಿ ಮದ್ಯಾಹ್ನ ಮಾಯಿಂದಲೆ ಮಾನಿಬಾಲೆ ನೇಮೋತ್ಸವ, ಬೊಕ್ಕ ಪಿಲಿಚಾಮುಂಡಿ ದೈವದ ನೇಮೋತ್ಸವ ನಡಪೆರೆ ಉಂಡು. ಈ ಲೇಸ್‌ಡ್‌ ಮಾತಾ ಭಕ್ತೆರ್‌ ಎಚ್ಚಿನ ಸಂಖ್ಯೆಡ್‌ ಪಾಲ್‌ ಪಡೆದ್‌ ಶ್ರೀ ಬ್ರಹ್ಮಬೈದರ್ಕಳ ದೈವದ ಶ್ರೀಮುಡಿ ಗಂಧ ಪ್ರಸಾದ್‌ ಸ್ವೀಕಾರ ಮಲ್ಪೊಡು ಪಂದ್‌ ಲೆಪ್ಪೋಲೆಡ್‌ ತೆರಿಪಾದೆರ್.

ಮೂಲ್ಕಿ ನಗರ ಪಂಚಾಯತ್‌ಗ್‌ ಅಸೋಸಿಯೇಶನ್ ಆಫ್ ಸಿವಿಲ್ ಇಂಜಿನಿಯರ್ಸ್ ಪದಾಧಿಕಾರಿಲು ಭೇಟಿ

ಮೂಲ್ಕಿ: ಅಸೋಸಿಯೇಶನ್ ಆಫ್ ಸಿವಿಲ್ ಇಂಜಿನಿಯರ್ಸ್ ಮೂಲ್ಕಿ ನೆತ್ತ ಪದಾಧಿಕಾರಿಲು ನ.21ಕ್ಕ್ ಮೂಲ್ಕಿ ನಗರ ಪಂಚಾಯತ್ ಮುಖ್ಯಾಧಿಕಾರಿ ಇಂಧೂ ಎಮ್. ಮೇರೆನ್‌ ಭೇಟಿಯಾದ್ ಮೂಲ್ಕಿ ನಗರ ಪಂಚಾಯತ್ ವ್ಯಾಪ್ತಿಡ್‌ ಬರ್ಸದ ನೀರ್ ಸಂಗ್ರಹ ಮಲ್ಪುನ ಚರಂಡಿದ ಭದ್ರತೆದ ಬಗೆಟ್ಟ್ ಬಿನ್ನಾಪು ಮಲ್ತೆರ್. ‌

ಅಂಚನೆ ಬರ್ಸದ ನೀರ್ ಡ್ ಚರಂಡಿ ಅಲ್ಪ ಅಲ್ಪ ಮುಚ್ಚಂದಿನಂಚ ತೂವೊನೊಡು, ಬರ್ಸದ ನೀರ್ ಎಡ್ಡೆ ರೀತಿಡ್‌ ಪೋಪುನ ವ್ಯವಸ್ಥೆ ಮಲ್ಪೊಡು. ಕಟ್ವಾಣ ಪರವಾನಿಗೆ ಬೊಕ್ಕ ಅಕ್ಯೂಪೆನ್ಸಿ ಪ್ರಮಾಣ ಪತ್ರ ಕೊರ್ಪುನ ಪೊರ್ತುಡು ಬರ್ಸದ ನೀರ್ ಕೊಯ್ಲು ಕಡ್ಡಾಯ ಮಲ್ಪೊಡು. ಮೂಲ್ಕಿ ನಗರ ಪಂಚಾಯತ್ ವ್ಯಾಪ್ತಿದ ಅಭಿವೃದ್ಧಿ ಕೆಲಸಡ್ ನಮ್ಮ ಸಹಕಾರ ಇಪ್ಪುಂಡು ಪಂದ್‌ ಪಂಡೆರ್. ಅಸೋಸಿಯೇಶನ್ ಆಫ್ ಸಿವಿಲ್ ಇಂಜಿನಿಯರ್ಸ್ ಮೂಲ್ಕಿದ ಸ್ಥಾಪಕಾಧ್ಯಕ್ಷೆರ್‌ ಜೀವನ್ ಕೆ. ಶೆಟ್ಟಿ, ಕಾರ್ಯದರ್ಶಿ ಸುಜಿತ್ ಸಾಲ್ಯಾನ್, ಖಜಾಂಚಿ ವರುಣ್, ನಗರ ಪಂಚಾಯತ್ ಅಭಿಯಂತರೆರ್ ಅಶ್ವಿನಿ ಈ ಪೊರ್ತುಡು ಇತ್ತೆರ್.

ಕಲ್ಪಾರ್ಥಿಲೆಗ್ ಶಿಕ್ಷಣದ ಒಟ್ಟಿಗೆ ಆಧ್ಯಾತ್ಮದ ಶಿಕ್ಷಣಲ ಅಗತ್ಯ : ಮಿಥುನ್ ರೈ

ಕಲ್ಪಾರ್ಥಿಲು ಶಿಕ್ಷಣದ ಒಟ್ಟಿಗೆ ಆಧ್ಯಾತ್ಮಿಕ ಶಿಕ್ಷಣನ್ ಪಡೆಯೊನ್ನ ಅಗತ್ಯ. ನೆತ್ತ ಒಟ್ಟಿಗೆ ಸಂಸ್ಕಾರ, ಆಚಾರ-ವಿಚಾರಲೆನ್ ದೇವಾಲಯಗ್ ಸಂಬಂಧಪಟ್ಟಿನ ವಿಭಾಗ ನಡಪಾಂಡ ಕಲ್ಪಾರ್ಥಿಲೆನ ಜೀವನಗ್ ಅನುಕೂಲ ಆಪುಂಡು. ಇಂಚಿನ ಕಾರ್ಯಕ್ರಮನ್ ಸಿಎಸ್ಐ ಜಿಲ್ಲಾ ಸಮಿತಿ ಹಳೆಯಂಗಡಿ ಸಿಎಸ್ಐ ಅಮ್ಮನ್ ಮೆಮೋರಿಯಲ್ ಚರ್ಚ್‌ದ ಮುತಾಲಿಕೆಡ್ ನಡಪಾಯಿನವು ಎಡ್ಡೆ ಬೇಲೆ ಪಂದ್ ಕರ್ನಾಟಕ ಪ್ರದೇಶ ಕಾಂಗ್ರೆಸ್ ಸಮಿತಿದ ಪ್ರಧಾನ ಕಾರ್ಯದರ್ಶಿ ಮಿಥುನ್ ರೈ ಪಂಡೆರ್.

ಮೇರ್ ಸಿಎಸ್ಐ ಕೆಎಸ್‌ಡಿ ದಕ್ಷಿಣ ಕನ್ನಡ ಪ್ರದೇಶ ಪರಿಷತ್ತು ಬೊಕ್ಕ ಸಿಎಸ್ ಐ ಅಮ್ಮನ್ ಮೆಮೋರಿಯಲ್ ಚರ್ಚ್ ಹಳೆಯಂಗಡಿ ನೆತ್ತ ಆಶ್ರಯಡ್ ನಡತ್ತಿನ ಜಾಗತಿಕ ಭಾನುವಾರ ಶಾಲಾ ದಿನಾಚರಣೆ ಜೋಕ್ಲೆನ ಪರ್ಬದ ಮುಗಿತಲದ ಲೇಸ್ ಡ್ ಕಲ್ಪಾರ್ಥಿಲೆಗ್‌ ಇನಾಮು ಪಟ್ ದ್ ಪಾತೆರಿಯೆರ್. ಗುರ್ಕಾರ್ಮೆನ್ ದಕ್ಷಿಣ ಕನ್ನಡ ಪ್ರಾದೇಶಿಕ ಪರಿಷತ್‌ದ ಗುರ್ಕಾರ್ಲು ರೆವೆ.ವಿಲಿಯಂ ಬಿ. ಕುಂದರ್ ವಹಿಸ್‌ದ್‌ ಇತ್ತೆರ್.

ಸಿಎಸ್ಐ ಕೆಎಸ್‌ಡಿ ನೆತ್ತ ಖಜಾಂಚಿ ವಿನ್ಸೆಂಟ್ ಪಾಲನ್ನ ಪಾತೆರ್ದ್ ಈ ವರ್ಷದ ಜಾಗತಿಕ ಭಾನುವಾರ ಶಾಲಾ ದಿನಾಚರಣೆನ್ ಹಳೆಯಂಗಡಿ ಅತಿ ಮೌಲ್ಯಯುತವಾದ್‌ ನಡಪಾದ್ ಡಯಾಸಿಸ್‌ನ ಪರವಾದ್‌ ಸೊಲ್ಮೆ ಸಂದಾವೆ ಪಂಡೆರ್.

ಜಾರ್ಜ್ ಎ. ಬೆರ್ನಾರ್ಡ್ ಮೆಮೋರಿಯಲ್ ಚಾರಿಟೇಬಲ್ ಟ್ರಸ್ಟ್ ನೆತ್ತ ಟ್ರಸ್ಟಿ ಜಾಯ್ಸ್ ವಿನಯ ಬಂಗೇರ, ದ.ಕ ಪ್ರದೇಶ ಪರಿಷತ್‌ದ ಉಪಾಧ್ಯಕ್ಷೆರ್ ಗ್ಯಾಬ್ರಿಯಲ್ ರೋನಿತ್, ಕಾರ್ಯದರ್ಶಿ ಜಯವಂತಿ ಪೌಲ್, ಖಜಾಂಚಿ ಕೌಶಿಕ್ ಅಮ್ಮನ್ನ, ಹಳೆಯಂಗಡಿ ಸಭಾ ಪಾಲಕೆರ್ ಅಮೃತ್ ರಾಜ್ ಖೋಡೆ, ಪಣಂಬೂರು ಸಭಾ ಪಾಲಕೆರ್ ಸಂಧ್ಯಾ ಖೋಡೆ, ಸಭಾ ಪರಿಪಾಲನೆ ಸಮಿತಿದ ಆಸ್ಟಿನ್ ಕರ್ಕಡ, ವಸಂತ್ ಬೆರ್ನಾರ್ಡ್, ಲಾವಣ್ಯ ಕೋಟ್ಯಾನ್, ಶರ್ಲಿ ಬಂಗೇರ, ಜೇಮ್ಸ್ ಕರ್ಕಡ, ಸಿಡ್ನಿ ಕರ್ಕಡ ಇತ್ತೆರ್.

ಈ ಪೊರ್ತುಡು ಪ್ರದೇಶ ಪರಿಷತ್‌ದ ಕಾರ್ಯದರ್ಶಿ ಜಯವಂತಿ ಪೌಲ್ ಮೇರೆಗ್‌ ಮಾನಾದಿಗೆ ನಡತ್‌ಂಡ್. ಶರ್ಲಿ ಬೆರ್ನಾರ್ಡ್ ಲೇಸ್‌ದ ಸುದಾರಿಕೆ ಮಲ್ತೆರ್.

ಪ್ರಿಯದರ್ಶಿನಿ ಕೋ ಆಪರೇಟಿವ್ ಸೊಸೈಟಿ ಗಿರಾಕಿಲೆನ ಕೂಡುಕಟ್ಟ್

ಹಳೆಯಂಗಡಿ: ಪ್ರಿಯದರ್ಶಿನಿ ಕೋ ಆಪರೇಟಿವ್ ಸೊಸೈಟಿದ ಗಿರಾಕಿಲೆನ ಕೂಡುಕಟ್ಟ್ (ಸಮಾವೇಶ) ಸಂಘದ ಸಭಾಭವನಡ್ ನಡತ್‌ಂಡ್.‌ ಮಲ್ಲ ಬಿನ್ನೆರಾದ್ ಕುಡ್ಲ ಓರಿಯಂಟಲ್ ಇನ್ಸೂರೆನ್ಸ್ ಕಂಪನಿದ ಪ್ರಬಂಧಕೆರ್ ಯಾದವ ದೇವಾಡಿಗ ಪಾತೆರ್ದ್ ನಾಯಕತ್ವಗ್ ಬೆಂಬಲ ಕೊರ್ಂಡ ಅಭಿವೃದ್ಧಿ ಸಾಧ್ಯ ಪಂದ್‌ ಪಂಡೆರ್.

ಸಂಘದ ಗುರ್ಕಾರ್ಲು ಎಚ್ ವಸಂತ್ ಬೆರ್ನಾಡ್ ಪಾತೆರ್ದ್ ಸಂಘದ ಸದಸ್ಯೆರ್ನ, ಗ್ರಾಹಕೆರ್ನ, ನಿರ್ದೇಶೆಕೆರ್ನ ಪ್ರೋತ್ಸಾಹರ್ದ್ ಸಂಘ ಅಭಿವೃದ್ಧಿದಂಚಿ ಪೋವೊಂದು ಉಂಡು. ನನೊಂಜಿ ಶಾಖೆನ್ ಸದ್ಯಡ್ ಸುರು ಮಲ್ಪುನ ಯೋಜನೆ ಉಂಡು ಪಂಡೆರ್.

ಚಾವಡಿಡ್‌ ಮಲ್ಲ ಬಿನ್ನೆರಾದ್ ಉದ್ಯಮಿ ಶಶೀಂದ್ರ ಎಂ ಸಾಲ್ಯಾನ್, ಹಿರಿಯ ನಿರ್ದೇಶಕೆರ್ ಉಮಾನಾಥ್ ಜೆ. ಶೆಟ್ಟಿಗಾರ್, ಉಪಾಧ್ಯಕ್ಷೆರ್ ಪ್ರತಿಭಾ ಕುಳಾಯಿ ಸ್ಟೀವನ್ ಸರ್ಮೋತ್ತಮ, ನಿರ್ದೇಶಕೆರ್ ಗಣೇಶ್ ಅಮೀನ್ ಸಂಕಮಾರ್,‌ ಧನಂಜಯ ಮಟ್ಟು, ಗೌತಮ್ ಜೈನ್, ಶರತ್ ಶೆಟ್ಟಿ ಪಂಚವಟಿ, ಜೈಕೃಷ್ಣ ಕೋಟ್ಯಾನ್, ಗಣೇಶ್ ಪ್ರಸಾದ್ ದೇವಾಡಿಗ, ಧನ್‌ರಾಜ್ ಕೋಟ್ಯಾನ್, ಮಿರ್ಜಾ ಅಹಮ್ಮದ್, ಚಿರಂಜೀವಿ ಅಂಚನ್, ಶೆರಿಲ್ ಅಯೋನ ಐಮನ್, ಹರೀಶ್ ಎನ್. ಪುತ್ರನ್, ನವೀನ್ ಸಾಲ್ಯಾನ್ ಪಂಜ, ಸಂದೀಪ್,ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ಸುದರ್ಶನ್ ಇತ್ತೆರ್. ಉಂದುವೆ ಪೊರ್ತುಡು ಗ್ರಾಹಕೆರೆಗ್ ಸಾಲದ ಅರ್ಜಿ ಕೊರಿಯೆರ್.

ದೀಪ ದೀಯೆರೆ ಪೋದು ಗುವೆಲ್‌ ಬೂರ್ನ ಜವನೆ…!!!

 ಹೆಬ್ರಿ : ಗುವೆಲ್‌ಗ್‌ ಬೂರ್ದು ತೀರ್‌ಪೋಯಿನ ಘಟನೆ ಚಾರ ಗ್ರಾಮಡ್ ನಡತ್‌ಂಡ್. ಸಚಿನ್(35) ತೀರ್‌ಪೋಯಿನ ಜವನೆ. ಸಚಿನ್, ಚಾರ ಬಸದಿ ಕೈತಲ್‌ ಇಪ್ಪುನ ಅಕ್ಲೆನ ಇಲ್ಲದ ಕೈತಲ್‌ದ ಕಟ್ಟೆ ಇಜ್ಜಂದಿನ ಗುವೆಲ್‌ಗ್ ದೀಪ ದೀಯೆರೆ ಗುವೆಲ್‌ದ ಕೈತಲ್ ಪೋನಗ ಆಕಸ್ಮಾತ ಆದ್ ಕಾರ್‌ ಜಾರ್ದ್ ಆಯತತ್ತ್‌ದ್‌ ಗುವೆಲ್‌ಗ್‌ ಬೂರ್ದು ತೀರ್‌ಪೋತೆರ್ ಪಂದ್‌ ತೆರಿದ್‌ ಬೈದ್‌ಂಡ್.