Uncategorized

ಪಾಂಪೈ ಕಾಲೇಜ್ ಡ್ ವತ್ಸಲಾ ಯೋಗೀಶ್ ರಾವ್, ಪದ್ಮಿನಿ ವಸಂತ್ ಮೊಕ್ಲೆಗ್ ಸನ್ಮಾನ

ಕಿನ್ನಿಗೋಳಿ : ಪಾಂಪೈ ಕಾಲೇಜ್ ಡ್ ಮಹಿಳಾ ದಿನಾಚರಣೆದ ಲೆಕ್ಕೊಡು ನಡತಿನ ಲೇಸ್ ಡ್ ವತ್ಸಲಾ ಯೋಗೀಶ್ ರಾವ್ ಬೊಕ್ಕ ಪದ್ಮಿನಿ ವಸಂತ್ ಮೊಕ್ಲೆಗ್ ಸನ್ಮಾನ ನಡತ್ಂಡ್.

ಶ್ರೀ ದೇವಿ ಯುವತಿ ಬೊಕ್ಕ ಮಹಿಳಾ ಮಂಡಲದ ಮುತಾಲಿಕೆಡ್ ಮೊಕ್ಲೆಗ್ ಉಡಲ್ ದಿಂಜಿನ ಅಭಿನಂದನೆನ್ ಸಂದಾದೆರ್.

ಕುಡ್ಲ ಪ್ರೆಸ್ ಕ್ಲಬ್ ದ ವರ್ಷದ ಪ್ರಶಸ್ತಿಗ್ ಅಪ್ಪೆ ಮಗಲ್ ಆಯ್ಕೆ

ಕುಡ್ಲ: ಗ್ರಾಮೀಣ ಪ್ರದೇಶಡ್ ಹೈನುಗಾರಿಕೆ ಮಲ್ತೊಂದು ಕ್ಷೀರಕ್ರಾಂತಿ ಮಲ್ಪುನ ಅಪೂರ್ವ ಸಾಧಕೆರಾಯಿನ ಉಳ್ಳಾಲ ತಾಲೂಕ್ ದ ಹರೇಕಳ ಗ್ರಾಮದ ಬಾವಲಿಗುರಿದ ಅಪ್ಪೆ ಮೈಮೂನ ಬೊಕ್ಕ ಮಗಲ್ ಮಝೀನಾ ರಾಜ್ ಕುಮಾಲ್ ಪುಗರ್ತೆದ ಕುಡ್ಲ ಪ್ರೆಸ್ ಕ್ಲಬ್ ದ 2023-24ನೇ ಸಾಲ್ ದ ವರ್ಷದ ಪ್ರಶಸ್ತಿಗ್ ಆಯ್ಕೆ ಆತೆರ್.

ಪ್ರೊ. ಪುಷ್ಪರಾಜ್ ಮುತಾಲಿಕೆದ ಆಯ್ಕೆ ಸಮಿತಿ ಕುಡ್ಲ ಪ್ರೆಸ್ ಕ್ಲಬ್ ದ ಪುಗರ್ತೆದ ಪ್ರಶಸ್ತಿಗ್ ಮೊಕ್ಲೆಗ್ ಆಯ್ಕೆ ಮಲ್ದ್ಂಡ್ ಪಂದ್ ತೆರಿದ್ ಬೈದ್ಂಡ್.

ಮಾ.10 ಕ್ಕ್ ನಡಪರೆ ಇಪ್ಪುನ ಪ್ರೆಸ್ ಕ್ಲಬ್ ದಿನಾಚರಣೆ ಪೊರ್ತುಡು ಮೊಕ್ಲೆಗ್ ಪ್ರಶಸ್ತಿ ಪ್ರದಾನ ಮಲ್ಪೆರೆ ಉಂಡು ಪಂದ್ ಕುಡ್ಲ ಪ್ರೆಸ್ ಕ್ಲಬ್ ದ ಪ್ರಧಾನ ಕಾರ್ಯದರ್ಶಿ ಇಬ್ರಾಹಿಂ ಅಡ್ಕಸ್ಥಳ ಪ್ರಕಟನೆಡ್ ತೆರಿಪಾದೆರ್.

5,8,9 ಬೊಕ್ಕ 11ನೇ ಕ್ಲಾಸ್ ದಕ್ಲೆಗ್ ಬೋರ್ಡ್ ಪರೀಕ್ಷೆ ಅತ್ತ್

5,8,9 ಬೊಕ್ಕ 11ನೇ ಕ್ಲಾಸ್ ದ ಬೋರ್ಡ್ ಎಕ್ಸಾಂ ಕ್ಯಾನ್ಸಲ್ ಮಲ್ಪೆರೆ ಹೈಕೋರ್ಟ್ ಆದೇಶ ಮಲ್ದ್ಂಡ್.

2023ನೇ ಡಿಸೆಂಬರ್ ಡ್ ಬೋರ್ಡ್ ಎಕ್ಸಾಂ ನಡಪಾಯೆರೆ ರಾಜ್ಯ ಸರ್ಕಾರ ಸುತ್ತೋಲೆ ಕೊರ್ದಿತ್ತ್ಂಡ್. ಆಂಡ ಸರ್ಕಾರದ ಆದೇಶನ್ ಕ್ಯಾನ್ಸಲ್ ಮಲ್ಪೆರೆ ರುಪ್ಸಾ ಸಂಘಟನೆ ಹೈಕೋರ್ಟ್ ಗ್ ಅರ್ಜಿ ಪಾಡ್ದಿತ್ತ್ಂಡ್.

ಅರ್ಜಿ ವಿಚಾರಣೆ ನಡಪಾಯಿನ ನ್ಯಾಯಮೂರ್ತಿ ರವಿ ಹೊಸಮಂಜ ಮೆರೆನ ನ್ಯಾಯ ಪೀಠ, ಸರ್ಕಾರದ ಸುತ್ತೋಲೆನ್ ಕ್ಯಾನ್ಸಲ್ ಮಲ್ಪರೆ ಆದೇಶ ಮಲ್ದ್ಂಡ್.

ಸಾಹಿತ್ಯಗ್ ಮಾತ ಸಮಾಜನ್ ಒಟ್ಟು ಸೇರಾವುನ ಶಕ್ತಿ ಉಂಡು: ಭಾಸ್ಕರ್ ಕೋಡಿಂಬಾಳ

ಪುತ್ತೂರು: ಸಾಹಿತ್ಯಗ್ ಮಾತ ಸಮಾಜನ್ ಒಟ್ಟು ಸೇರಾವುನ ಶಕ್ತಿ ಉಂಡು. ಇನಿ ಸಮಾಜನ್ ಪುಡಪುನ ಸಂದಿಗ್ಧ ಪರಿಸ್ಥಿತಿಡ್ಲಾ ನಮ ಬೇತೆ ಬೇತೆ ಧರ್ಮ, ಬೇತೆ ಬೇತೆ ಕಸುಬುದಕ್ಲ್ ಕಬಿತೆ ಬರೆದ್, ಮಂಡನೆ ಮಲ್ಪುನ ಕಜ್ಜೊಡು ಒಟ್ಟು ಸೇರುನ ಎಡ್ಡೆ ಬೇಲೆ ಸಾಹಿತ್ಯದ ಪೊರ್ಲ ಮನಸ್ಲೆರ್ದ್ ಆವೊಂದುಂಡು” ಪಂದ್ ವಕೀಲೆರ್, ಸಾಹಿತಿ ಭಾಸ್ಕರ್ ಕೋಡಿಂಬಾಳ ಮೇರ್ ತನ್ನ ಉಡಲ ದುನಿಪುನು ಪಟ್ಟೊಂಡೆರ್.

ಆರ್ ಪುತ್ತೂರು ತಾಲೂಕು ತುಳು ಕೂಟದ ಮುತಾಲಿಕೆಡ್, ಚಿಗುರೆಲೆ ಸಾಹಿತ್ಯ ಬಳಗ ಪುತ್ತೂರುದ ಅಟ್ಟಣೆಡ್ ಪುತ್ತೂರು ತಾಲೂಕು ತುಳು ಮೇಳದ ನಿಲೆಟ್ ಮಂಜಲ್ಪಡ್ಪು ಸುದಾನ ಶಾಲೆದ ಎಡ್ವರ್ಡ್ ಸಭಾಂಗಣಡ್ ಮಾ.3 ಐತಾರ ನಡತಿನ ತುಳುನಾಡ್ದ ಐಸಿರ ಕಬಿಕೂಟದ ಗುರ್ಕಾರ್ಮೆದ ನಿಲೆಟ್ ಪಾತೆರಿಯೆರ್.

ಕಬಿ ಕೂಟಡ್ ಸಹಕಾರ ರತ್ನ ಸಿರಿ ದಂಬೆಕಾನ ಸದಾಶಿವ ರೈ ಸುರುತ ಪಾತೆರ ಪಾತೆರಿಯೆರ್. ಸಿಟಿ ಆಸ್ಪತ್ರೆ ಪುತ್ತೂರ್ದ ಡಾ. ಎ. ಪಿ. ಭಟ್, ವಿವೇಕಾನಂದ ಬಿ. ಎಡ್ ಕಾಲೇಜ್ ದ ಪ್ರಾಂಶುಪಾಲೆರ್ ಡಾ. ಶೋಭಿತಾ ಸತೀಶ್ ಮಲ್ಲ ಬಿನ್ನೆರಾದ್ ಪಾಲ್ ಪಡೆದಿತ್ತೆರ್.

ಕಬಿಕೂಟಡ್ ಸುಪ್ರೀತಾ ಚರಣ್ ಪಾಲಪ್ಪೆ ಕಡಬ, ಸಿ. ಶೇ. ಕಜೆಮಾರ್, ರಶ್ಮಿತಾ ಸುರೇಶ್ ಜೋಗಿಬೆಟ್ಟು, ಚಂದ್ರಶೇಖರ ಮಾಲೆತ್ತೋಡಿ, ಸುಜಯ ಎಸ್. ಸ್ವರ್ಗ, ವಿಶ್ವನಾಥ್ ಕುಲಾಲ್ ಮಿತ್ತೂರ್, ವಿಂಧ್ಯಾ ಎಸ್ ರೈ, ಕೇಶವ ನೆಲ್ಯಾಡಿ, ಪದ್ಮಾ ಕೆ ಆರ್ ಆಚಾರ್ಯ, ಚಂದ್ರಹಾಸ ಕುಂಬಾರ ಬಂದಾರು, ಶ್ರೀಶಾ ವಾಸವಿ ತುಳುನಾಡ್, ಸಂಜೀವ ಮಿತ್ತಳಿಕೆ, ಸುನೀತಾ ಶ್ರೀರಾಮ್, ಜಯರಾಮ್ ಪಡ್ರೆ, ಪೂರ್ಣಿಮಾ ಪೆರ್ಲಂಪಾಡಿ, ಶ್ರುತಿಕಾ ಓಜಾಲ, ಅಶ್ವಿಜಾ ಶ್ರೀಧರ್, ಆನಂದ ರೈ ಅಡ್ಕಸ್ಥಳ, ಸತೀಶ್ ಬಿಳಿಯೂರು, ಪೂವಪ್ಪ ನೇರಳಕಟ್ಟೆ, ಪರಿಮಳ ಮಹೇಶ್ ರಾವ್, ಗೀತಾ ಲಕ್ಷ್ಮೀಶ್ ಮಂಗಳೂರು, ಪದ್ಮನಾಭ ಮಿಜಾರ್, ಅಪೂರ್ವ ಕಾರಂತ್ ದರ್ಬೆ, ಅಶೋಕ್ ಎನ್ ಕಡೇಶಿವಾಲಯ, ಸುಭಾಷ್ ಪೆರ್ಲ, ದೇವಿಕಾ. ಜೆ. ಜಿ. ಬನ್ನೂರು, ಇಂಚ ಜಿಲ್ಲೆದ ಬೇತೆ ಬೇತೆ ಕಡೆರ್ದ್ ಕಬಿಕ್ಲ್ ಪಾಲ್ ಪಡೆದಿತ್ತೆರ್.

ಕಬಿಕೂಟನ್ ಸುಪ್ರೀತಾ ಚರಣ್ ಪಾಲಪ್ಪೆ ಕಡಬ ಸುದಾರಿಕೆ ಮಲ್ತೆರ್. ಚಿಗುರೆಲೆ ಸಾಹಿತ್ಯ ಬಳಗ ಪುತ್ತೂರುದ ನಾರಾಯಣ ಕುಂಬ್ರ ಕೂಟನ್ ಅಟ್ಟಣೆ ಮಲ್ತೆರ್, ರಶ್ಮಿತಾ ಸುರೇಶ್ ಜೋಗಿಬೆಟ್ಟು, ಕು. ತಶ್ವಿ ಶಾಂಭವಿ ಬೆರಿ ಸಕಾಯ ಕೊರಿಯೆರ್, ತುಳುಕೂಟೊ ಪುತ್ತೂರುದ ನಿರ್ದೇಶಕೆರ್ ಬಿ. ಟಿ. ಮಹೇಶ್ಚಂದ್ರ ಸಾಲಿಯಾನ್ ಸೊಲ್ಮೆ ಸಂದಾಯೆರ್.