Uncategorized

ರಾಜ್ಯ ಸರಕಾರರ್ದ್ ತುಳುನಾಡ್ ಗ್ ಮಾನಾದಿಗೆ: ದಿನೇಶ್ ಕುಂಪಲ

ಉಳ್ಳಾಲ: ಕೇರಳ ಮಾದರಿಡ್ ಜಿಲ್ಲೆದ ದೈವೊಲ್ಯದ ದೈವ ಚಾಕರಿ ವರ್ಗದಕ್ಲೆಗ್ ಧಾರ್ಮಿಕ, ದತ್ತಿ ಇಲಾಖೆಗ್ ಸೇರಿನ ದೈವೊಲ್ಯಡ್ ಅರ್ಚಕೆರೆಗ್ ತಿಕ್ಕುನ ಸೌಲಭ್ಯ ಮಾತ ನನದ ದಿನಟ್ಟ್ ತಿಕಿಯೆರೆ ಉಂಡು. ಬಜೆಟ್ ದ ಪೊರ್ತುಡು ನಡತಿನ ಅಧಿವೇಶನಡ್ ಸ್ವೀಕರ್ ಖಾದರ್ ಮೆರೆನ ಮುತುವರ್ಜಿದಂಚೆನೆ ಸುಮಾರ್ ವರ್ಷಲೆನ ಬೇಡಿಕೆ ಕಾರ್ಯಗತ ಆತ್ಂಡ್, ಉಂದು ತುಳುನಾಡ್ ದ ಜನಕ್ಲೆಗ್ ಸಂದಿನ ಮಾನಾದಿಗೆ ಪಂದ್ ದಕ್ಷಿಣ ಕನ್ನಡ ಜಿಲ್ಲಾ ಕಾಂಗ್ರೆಸ್ ವಕ್ತಾರೆರ್ ದಿನೇಶ್ ಕುಂಪಲ ಪಂಡೆರ್.

ತೊಕ್ಕೊಟ್ಟು ಬ್ಲಾಕ್ ಕಾಂಗ್ರೆಸ್ ಕಚೇರಿಡ್ ಆಯೋಜನೆ ಮಲ್ತಿನ ಪತ್ರಿಕಾಗೋಷ್ಠಿಡ್ ಪೊಲಬು ಕೊರ್ನ ಮೇರ್ ಕೇರಳ ಮಾದರಿಡ್ ದೈವ ಚಾಕರಿ ಮಲ್ಪುನಕ್ಲೆಗ್ ಸರಕಾರ ಸವಲತ್ತುಲೆನ್ ಕೊರೊಡು ಪಂದ್ ಶಾಸಕೆರ್ ಆಯಿನ ಯು.ಟಿ. ಖಾದರ್ ಅಪಗದ ಸರಕಾರಗ್ ಮನವಿ ಕೊರ್ದಿತ್ತೆರ್. ಈ ಸರ್ತಿ ಸರಕಾರ ತುಳುನಾಡ್ ದ ದೈವ ಚಾಕರಿದಕ್ಲೆಗ್ ಮಾನ್ಯತೆ ಕೊರ್ನವು ಕುಸಿತ್ತ ಇಚಾರ ಆತ್ಂಡ್.

ಇಲಾಖೆ ವ್ಯಾಪ್ತಿದ ಎ ಗ್ರೇಡ್ ದೇವಲ್ಯಲೆಡ್ ಸಹಾಯಕ ಆಯುಕ್ತೆರೆಗ್ 25 ಲಕ್ಷ ರೂ. ನಿಗಂಟ್ ಆಯಿನ ಕರ್ಚ್ ನ್ 1 ಕೋಟಿ ರೂ. ಮುಟ್ಟ ಬುಡುಗಡೆ ಮಲ್ಪುನ ಅವಕಾಶ, ಜಿಲ್ಲಾಧಿಕಾರಿಲೆಗ್ ಆಯಾಯ ದೇವಲ್ಯ, ದೈವೊಲ್ಯಲೆನ ಅಭಿವೃದ್ಧಿಗ್ 1 ಕೋಟಿ ರೂ. ಮುಟ್ಟ ಕರ್ಚಿ ಮಲ್ಪುನ ಅವಕಾಶನ್ ತಿದ್ದುಪಡಿ ಮಲ್ದ್ಂಡ್. ಅರ್ಚಕೆರೆನ ಜೋಕ್ಲೆಗ್ ವಿದ್ಯಾರ್ಥಿ ವೇತನ, ಅರ್ಚಕೆರೆಗ್ ಆರೋಗ್ಯ ವಿಮೆ, ಮಾತ ಧಾರ್ಮಿಕ ದತ್ತಿಗ್ ಸೇರಿನ ಮಾತ ಆಡಳಿತ ಸಮಿತಿಡ್ ಸಮಾಜದ ಒರಿಯಗ್ ಮೀಸಲಾತಿ, ಎಲ್ಯ ಎಲ್ಯ ಸಮುದಾಯನ್ ಗುರುತಿಸಾಯಿನೆನ್ ಮೆಚ್ಚೊಡಾಯಿನವು. ಬಿಜೆಪಿ ಆಡಳಿತ ನಡಪಾಂಡಲ ಹಿಂದೂ ಧರ್ಮಗಾದ್ ಒವ್ವೇ ಕೆಲಸನ್ ಮಲ್ತಿಜಿ ಪಂದ್ ಪಂಡೆರ್.

ಈ ಪೊರ್ತುಡು ಡಿಸಿಸಿ ಸದಸ್ಯೆರ್ ಸುರೇಶ್ ಭಟ್ನಗರ, ಉಳ್ಳಾಲ ಬ್ಲಾಕ್ ಒತ್ತು ಗುರ್ಕಾರೆ ರಮೇಶ್ ಶೆಟ್ಟಿ ಬೋಳಿಯಾರು, ಇಂಟಕ್ ಗುರ್ಕಾರೆ ವಿಶಾಲ್ ಕೊಲ್ಯ ಪಾಲ್ ಪಡೆದಿತ್ತೆರ್.

ನಮ್ಮ ತುಳುನಾಡ್ ಟ್ರಸ್ಟ್ (ರಿ.) ಮುತಾಲಿಕೆಡ್ ತುಳು ಬಾಷೆನ್ ರಾಜ್ಯದ 2ನೇ ಅಧಿಕೃತ ಬಾಷೆ ಮಲ್ಪುನ ಬಗೆಟ್ಟ್ ಚರ್ಚೆ

ನಮ್ಮ ತುಳುನಾಡ್ ಟ್ರಸ್ಟ್ (ರಿ.) ದ ಮುತಾಲಿಕೆಡ್ ತುಳುಬಾಷೆನ್ ಕರ್ನಾಟಕ ರಾಜ್ಯದ ರಡ್ಡನೇ ಅಧಿಕೃತ ಭಾಷೆ ಮಲ್ಪೆರೆ ವಿಧಾನ ಪರಿಷತ್‌ಡ್ ಸರ್ಕಾರಗ್ ತೆರಿಪಾಯೆರೆ ‌ಫೆ.18 ಕ್ಕ್ ವಿಧಾನ ಪರಿಷತ್ ಸದಸ್ಯೆರ್ ಬಿ ಎಂ ಫಾರೂಕ್ ಮೆರೆನ ರೆಸಾರ್ಟ್‌ಡ್ ಚರ್ಚೆ ನಡತ್ಂಡ್.

ಈ ಪೊರ್ತುಡು ಟ್ರಸ್ಟ್‌ದ ಸ್ಥಾಪಕಾಧ್ಯಕ್ಷೆರ್ ಜಿ.ವಿ.ಎಸ್ ಉಳ್ಳಾಲ್, ರಾಜೇಶ್ ಯು, ರೋಹಿತಾಶ್ವ, ದಯಾನಂದ ಶೆಟ್ಟಿ ಪಾಲ್ ಪಡೆದಿತ್ತೆರ್.

ಮಾ.7-9: ಪಜಿರಡ್ಕ ಶ್ರೀ ಸದಾಶಿವೇಶ್ವರ ದೇವಲ್ಯಡ್ ಸಾರ್ವಜನಿಕ ಶ್ರೀ ಶನೈಶ್ಚರ ಪೂಜೆ, ಏಕಾಹ ಭಜನೆ

ಬೊಲ್ತೇರ್: ಸಂಗಮ ಕ್ಷೇತ್ರ ಪಜಿರಡ್ಕ ಶ್ರೀ ಸದಾಶಿವೇಶ್ವರ ದೇವಲ್ಯಡ್ ಸಾರ್ವಜನಿಕ ಶ್ರೀ ಶನೈಶ್ಚರ ಪೂಜೆ ಬೊಕ್ಕ ಮಹಾಶಿವರಾತ್ರಿದ ಲೆಕ್ಕೊಡು ಏಕಾಹ ಭಜನೆ ಮಾ.7-9 ಮುಟ್ಟ ನಡಪರೆ ಉಂಡು.

ಮಾ‌.7 ಗುರುವಾರ ಬಯ್ಯಗ್ ಶ್ರೀ ಶನೈಶ್ಚರ ಪೂಜೆ ಸುರು, ರಾತ್ರೆ ಮಂಗಳಾರತಿ, ಪ್ರಸಾದ ವಿತರಣೆ, ಅನ್ನ ಪ್ರಸಾದ ಸೇವೆ ನಡಪರೆ ಉಂಡು.

ಮಾ.8 ಸುಕ್ರಾರ ಬೊಲ್ಪುಗು ಏಕಾಹ ಭಜನೆ ಸುರು, ಮಧ್ಯಾಹ್ನ ಮಹಾ ಮಂಗಳಾರತಿ, ರಾತ್ರೆ ಲಘು ರುದ್ರಾಭಿಷೇಕ, ಮಂಗಳಾರತಿ ನಡಪರೆ ಉಂಡು.

ಮಾ.9 ಸನಿಯಾರ ಬೊಲ್ಪುಗು ಭಜನೆ ಮಂಗಳ, ಅವಭೃತ ಸ್ನಾನ, ಮಹಾಪೂಜೆ ನಡಪರೆ ಉಂಡು.

ಈ ಮಾತ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆದ್, ಶ್ರೀ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಅರ್ಚಕೆರ್ ರಾಜೇಶ್ ಹೊಳ್ಳ, ಜಾತ್ರಾ ಸಮಿತಿದ ಗುರ್ಕಾರೆ, ಸರ್ವಸದಸ್ಯೆರ್, ಆಡಳಿತಾಧಿಕಾರಿ ನಾಗಶಯನ ರಾವ್ ಲೆಪ್ಪೋಲೆಡ್ ತೆರಿಪಾದೆರ್.

ಮಿಜಾರ್ ತುಳುನಾಡ ಪೊರ್ಲು ಚಾರಿಟೇಬಲ್ ಟ್ರಸ್ಟ್ ರ್ದ್ ಬಡಪತ್ತ್ ದ ಕುಟುಂಬಗ್ ಪನವುದ ಸಕಾಯ

ಮಿಜಾರ್ ತುಳುನಾಡ ಪೊರ್ಲು ಚಾರಿಟೇಬಲ್ ಟ್ರಸ್ಟ್ (ರಿ.) ದಕುಲು 38ನೇ ಮಾಸಿಕ ಸೇವಾ ಯೋಜನೆದ ಮುಕೇನ ಒಂಜಿ ಬಡಪತ್ತ್ ದ ಕುಟುಂಬಗ್ ಪನವುದ ಸಕಾಯ ಮಲ್ತೆರ್.

ಕುಡ್ಲ ತಾಲೂಕ್ ದ ಸೂರಿಂಜೆ ಗ್ರಾಮದ ನಾಯರ್ ಕೊಡಿ ಅನಿತ ಮೆರೆನ ಮರ್ಮಾಲ್ 5 ವರ್ಷದ ಯಶಿಕಾ ಕ್ಯಾನ್ಸರ್ ಸೀಕ್ ರ್ದ್ ಉಲ್ಲೆರ್ ಪಂದ್ 2 ತಿಂಗೊಲ್ದ ಪಿರವು ಡಾಕ್ಟರ್ ತೆರಿಪಾದೆರ್.

ಈ ಬಾಲೆನ್ ಕುಡ್ಲ ಅತ್ತಾವರ ಆಸ್ಪತ್ರೆಗ್ ದಾಖಲ್ ಮಲ್ದೆರ್. ಈ ಬಾಲೆದ ಚಿಕಿತ್ಸೆಗ್ 13 ಲಕ್ಷ ರೂ. ಮುಟ್ಟ ಕರ್ಚಿ ಆಪುಂಡು ಪಂದ್ ಡಾಕ್ಟರ್ ಪಂತೆರ್. ಇತ್ತೆನೇ ಈ ಕುಟುಂಬ ಸುಮಾರ್ ಕಾಸ್ ಕರ್ಚ್ ಮಲ್ದ್ಂಡ್. ನನದ ಕರ್ಚ್ ನ್ ಮಲ್ಪೆರೆ ಭಂಗ ಆದ್ ಮಿಜಾರ್ ತುಳುನಾಡ ಪೊರ್ಲು ಚಾರಿಟೇಬಲ್ ಕೂಟಗ್ ಪನವುದ ಸಕಾಯ ಬೋಡು ಪಂದ್ ಬಿನ್ನಾಪು ಸಂದಾದೆರ್.

ಈ ಬಿನ್ನಾಪುಗು ಸ್ವಂದಿಸಾಯಿನ ಕೂಟ 20,000/- ರೂಪಾಯಿದ ಚೆಕ್ ನ್ ಬಾಲೆದ ಕುಟುಂಬಗ್ ಕೂಟದ ಗುರ್ಕಾರೆ ಸಂದೀಪ್ ಮಿಜಾರ್ ಮುಕೇನ ಶ್ರೀ ರಾಮ ಮಂದಿರ ಎಡಪದವುಡ್ ಕೊರಿಯೆರ್.

ಈ ಪೊರ್ತುಡು ಕೂಟದ ಕಾರ್ಯದರ್ಶಿ ದಯಾನಂದ ಉರ್ಕಿ ಬೊಕ್ಕ ಸಂತೋಷ್ ಪೂಜಾರಿ ಹೊಕ್ಕಾಡಿಗೋಳಿ ಬೊಕ್ಕ ಅಶೋಕ್ ಎಡಪದವು ಪಾಲ್ ಪಡೆದಿತ್ತೆರ್.

ಪಂಚರತ್ನ ಗೆಳೆಯರ ಬಳಗ (ರಿ.) ಆಕಾಶ್ ಭವನ ಕಾಫಿಗುಡ್ಡೆದ 26ನೇ ವರ್ಷದ ಸಾಮೂಹಿಕ ಶ್ರೀ ಶನೈಶ್ವರ ಪೂಜೆ

ಪಂಚರತ್ನ ಗೆಳೆಯರ ಬಳಗ (ರಿ.) ಆಕಾಶ್ ಭವನ ಕಾಫಿಗುಡ್ಡೆದ 26ನೇ ವರ್ಷದ ಸಾಮೂಹಿಕ ಶ್ರೀ ಶನೈಶ್ವರ ಪೂಜೆ ಬೊಕ್ಕ ಅನ್ನ ಪ್ರಸಾದ ಸೇವೆ ಶ್ರೀ ಮಂದಾರ ಬೈಲ್ ಶ್ರೀ ಹರಿ ಬಟ್ಟ ಮೆರೆನ ಮುತಾಲಿಕೆಡ್ ಗೌಜಿಡ್ ನಡತ್ಂಡ್.

ಕಾವೂರು 18ನೇ ವಾರ್ಡ್ ದ ಕೊರ್ಪರೇಟರ್ ಗಾಯತ್ರಿ ಎ ರಾವ್ ಬೊಕ್ಕ ಮಾಜಿ ಕೊರ್ಪರೇಟರ್ ದೀಪಕ್ ಕೆ ಪೂಜಾರಿ ಸರೋಜ ವಸಂತ ಕಾಪಿಗುಡ್ಡೆ ಬೊಕ್ಕ ಸಂಘದ ಸದಸ್ಯೆರೆನ ಉಪಸ್ಥಿತಿಡ್ ಮಾಲಾಡಿ ಶ್ರೀ ಜಾರಂದಾಯ ಬಂಟ ದೈವೊಲ್ಯಡ್ ಪ್ರಾರ್ತನೆದೊಟ್ಟಿಗೆ ತುಡರ್ ಅರ್ಲಾದ್ ಸುರು ಆಂಡ್.

ಕೈತಲ್ದ ಕಮಲಾಕ್ಷ ಶೆಟ್ಟಿ ಆನಂದನಗರ ಲೇಸ್ ದ ಸುಧಾರಿಕೆ ಮಲ್ತೆರ್. ಅಂಚೆನೆ ಶ್ರೀ ಬ್ರಹ್ಮಲಿಂಗೇಶ್ವರ ಭಜನಾ ಮಂಡಳಿದಕ್ಲೆರ್ದ್ ಭಜನೆ ನಡತ್ಂಡ್.

ಫೆ.24: ಮೀರಾರೋಡ್ ಶ್ರೀ ಬಾಲಾಜಿ ಸನ್ನಿಧಿ, ಶ್ರೀ ಪಲಿಮಾರು ಮಠಟ್ಟ್ ಶ್ರೀ ಶ್ರೀನಿವಾಸ ದೇವೆರೆನ ವರ್ಷದ ತೇರ್ ಉಚ್ಚಯ

ಬೊಂಬೈ: ಮೀರಾರೋಡ್ ಶ್ರೀ ಬಾಲಾಜಿ ಸನ್ನಿಧಿ, ಶ್ರೀ ಪಲಿಮಾರು ಮಠಟ್ಟ್ ಫೆ.24 ಕ್ಕ್ ಶ್ರೀ ಶ್ರೀನಿವಾಸ ದೇವೆರೆನ ವರ್ಷದ ತೇರ್ ಉಚ್ಚಯ ನಡಪರೆ ಉಂಡು.

ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆವೊಡು ಪಂದ್ ಶ್ರೀ ಬಾಲಾಜಿ ಮಂದಿರದ ಆಡಳಿತ ಮಂಡಳಿ, ಶ್ರೀ ಬಾಲಾಜಿ ಪ್ರತಿಷ್ಠಾನ ಸಮಿತಿದ ಮಾನಾದಿಗೆದ ಗುರ್ಕಾರೆ, ಗುರ್ಕಾರೆ, ಕಾರ್ಯದರ್ಶಿ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಉಚ್ಚು ತುಚ್ಚಿಂಡ ನನ ಅಧಿಸೂಚಿತ ಸೀಕ್

ರಾಜ್ಯ ಸರ್ಕಾರ ಉಚ್ಚು ತುಚ್ಚುನೆನ್ ನನ ಅಧಿಸೂಚಿತ ಸೀಕ್ ಪಂದ್ ಘೋಷಣೆ ಮಲ್ದ್ಂಡ್.

ರಾಜ್ಯದ ಮಾತ ಸರ್ಕಾರಿ ಆಸ್ಪತ್ರೆ, ಖಾಸಗಿ ಆಸ್ಪತ್ರೆಲು ಬೊಕ್ಕ ರಾಜ್ಯದ ಮಾತ ವೈದ್ಯಕೀಯ ವಿಜ್ಞಾನ ಸಂಸ್ಥೆಲು ಕಡ್ಡಾಯವಾದ್ ಉಚ್ಚು ತುಚ್ಚಿನ‌ ಮಾತ ಕೇಸ್ ಲು ಪಂಡ, ಒಳರೋಗಿ, ಹೊರರೋಗಿ ಬೊಕ್ಕ ಸಾವುದ ಕೇಸೇ ಆವಡ್ ಅವೆನ್ ಇಂಟಿಗ್ರೇಟೆಡ್ ಹೆಲ್ತ್ ಇನ್ಫೋರ್ಮೆಷನ್ ಪ್ಲಾಟ್ ಫಾರಂಡ್ ದಾಖಲ್ ಮಲ್ಪೆರೆ ತೆರಿಪಾದ್ಂಡ್. ಕರ್ನಾಟಕಡ್ ಉಚ್ಚು ತುಚ್ಚುನ ಘಟನೆಲು ಎಚ್ಚಾಪುರ್ನೆದಾವೆರ ಸರಕಾರ ಈ ಕ್ರಮ ದೆತೊಂದುಂಡು.

ಮಹಾಮಾರಿ ಕ್ಯಾನ್ಸರ್ ತಡೆಗಟ್ಟೆರೆ ಗ್ರಾಮಸ್ಥೆರೆನ ಸಹಕಾರ ಅಗತ್ಯ

ಮುಲ್ಕಿ: ಮಹಾಮಾರಿ ಕ್ಯಾನ್ಸರ್ ತಡೆಗಟ್ಟೆರೆ ಗ್ರಾಮಸ್ಥೆರೆನ ಸಹಕಾರ ಅಗತ್ಯ ಉಂಡು. ಈ ಬಗೆಟ್ಟ್ ಧರ್ಮೊಗು ತಪಾಸಣೆ ಮಲ್ತ್ ದ್ ಸರಿಯಾಯಿನ ಚಿಕಿತ್ಸೆ ಕೊರಿಯೆರೆ ಉಂಡು ಪಂದ್ ದಾಮಸ್ ಕಟ್ಟೆ ರೆಮೆದಿ ಮಾತೆ ದೇವಲ್ಯದ ಪ್ರಧಾನ ಧರ್ಮಗುರು ಫಾ. ಒಸ್ವಾಲ್ಡ್ ಮೊಂತೆರೂ ಪಂಡೆರ್.

ಮೇರ್ ಕಿನ್ನಿಗೋಳಿ ಕೈತಲ್ದ ಕಿರೆಂ ದಾಮಸ್ಕಟ್ಟೆ ರೆಮ್ಮೆದಿ ಅಮ್ಮನ ದೇವಲ್ಯದ ಮುತಾಲಿಕೆಡ್ ಬೇತೆ ಬೇತೆ ಸೇವಾ ಸಂಸ್ಥೆಲೆನ ಸಹಕಾರಡ್ ಇಂಡಿಯನ್ ಕ್ಯಾನ್ಸರ್ ಸೊಸೈಟಿದ ಒಟ್ಟುಸೇರಿಗೆಡ್ ಕಂಕನಾಡಿ ಫಾದರ್ ಮುಲ್ಲರ್ಸ್ ಮೆಡಿಕಲ್ ಕಾಲೇಜ್ ಆಸ್ಪತ್ರೆ ವೈದ್ಯೆರೆರ್ದ್ ಧರ್ಮೊಗು ಆರೋಗ್ಯ ಬೊಕ್ಕ ಕ್ಯಾನ್ಸರ್ ಪೊಲಬು ಬೊಕ್ಕ ತಪಾಸಣೆ ಶಿಬಿರ ಚರ್ಚ್ ಸಭಾಭವನಡ್ ಉದಿಪನ ಮಲ್ತ್ ದ್ ಪಾತೆರಿಯೆರ್.

ಫೆ.24: ಮೈಸೂರ್ ಅಸೋಸಿಯೇಷನ್ ದ ಸಭಾಗೃಹಡ್ ಗೋಪಾಲ ತ್ರಾಸಿ ಬೂಕು ಬುಡುಗಡೆ, ಕಬಿಗೋಷ್ಠಿ ಲೇಸ್

ಬೊಂಬೈ: ಬೊಂಬೈ ಚುಕ್ಕಿ ಸಂಕುಲ ಬೊಕ್ಕ ಕರ್ನಾಟಕ ಸಂಘ ಅಧೇರಿ (ರಿ‌.) ಸಂಸ್ಥೆಲೆನ ಒಟ್ಟುಸೇರಿಗೆಡ್ ಕವಿ, ಕತೆಗಾರೆ ಗೋಪಾಲ ತ್ರಾಸಿ ಮೆರೆನ ಚಿತ್ರ ಚೌಕಟ್ಟಿನಾಚೆ ಬೊಕ್ಕ ಓದುನ ಖುಷಿ ಬೂಕುಲೆನ ಬುಡುಗಡೆ ಬೊಕ್ಕ ಕವಿಗೋಷ್ಠಿ ಲೇಸ್ ಫೆ.24 ಸನಿಯಾರ ಬಯ್ಯಗ್ ಮಾಟುಂಗಾ ಪೂರ್ವದ ಭಾವುದಾಜಿ ಮಾರ್ಗಡ್ ಇಪ್ಪುನ ಮೈಸೂರು ಅಸೋಸಿಯೇಷನ್ ದ ಎಲ್ಯ ಸಭಾಗೃಹಡ್ ನಡಪರೆ ಉಂಡು.

ಹಿರಿಯ ಸಂಘಟಕೆರ್, ವಿಮರ್ಶಕೆರ್ ಬೊಮ್ಮರ ಬೆಟ್ಟು ಎ ನರಸಿಂಹ ಮೆರೆನ ಸರ್ವಾಧ್ಯಕ್ಷತೆಡ್ ನಡಪುನ ಲೇಸ್ ಡ್ ಚುಕ್ಕಿ ಸಂಕುಲ ಬೊಂಬೈ ಪ್ರಕಾಶಕತ್ವದ ಬೂಕುಲಾಯಿನ ಚಿತ್ರ ಚೌಕಟ್ಟಿನಾಚೆ ಬೊಕ್ಕ ಓದುನಖುಷಿ ಬೂಕುನ್ ಹಿರಿಯ ಲೇಖಕಿ, ಸಂಘಟಕಿ ಶಕುಂತಲಾ ಆರ್ ಪ್ರಭು ಬುಡುಗಡೆ ಮಲ್ತೆರ್.

ಲೇಖಕಿ ಹವ್ಯಕ ಸಂಪಾದಕಿ, ನ್ಯಾಯವಾದಿ ಅಮಿತಾ ಎಸ್ ಭಾಗವತ್ ಬೊಕ್ಕ ಲೇಖಕಿ ಕಲಾ ಭಾಗವತ್ ಕ್ರಮವಾದ್ ಬೂಕುದ ಪರಿಚಯ ಮಲ್ತೆರ್.

ಸವಿತಾ ಅರುಣಾ ಶೆಟ್ಟಿ, ಡಾ/ ಸುರೇಖಾ ನಾಯಕ್, ಅಶೋಕ ವಳದೂರು, ಸತೀಶ್ ಕೆ.ಎನ್, ಡಾ |ವೈಶಾಲಿ ನಾಯಕ್, ವಾಣಿ ರಘುನಾಥ್, ಕೃಷ್ಣ ಬಿ ಶೆಟ್ಟಿ, ಸಾ ದಯಾ ಗೋಪಾಲ ತ್ರಾಸಿ ಕವಿಗೋಷ್ಠಿಡ್ ಕಬಿತೆ ಓದಿಯೆರೆ ಉಲ್ಲೆರ್.

ಈ ಲೇಸ್ ಡ್ ಮಹಾನಗರದ ಸಾಹಿತ್ಯ ಆಸಕ್ತೆರ್, ಹಿತೈಷಿಲು ಪಾಲ್ ಪಡೆವೊಡು ಪಂದ್ ಕರ್ನಾಟಕ ಸಂಘ ಅಂಧೇರಿದ ಪದುಕೆರ್, ಬೊಂಬೈ ಚುಕ್ಕಿ ಸಂಕುಲದ ಸಂಚಾಲಕೆರ್ ತೆರಿಪಾದೆರ್.