Uncategorized

ಚಾರ್ಮಾಡಿ ಭೂಕುಸಿತ : ರಾತ್ರಿ ಸಂಚಾರ ಮಲ್ಪರೆ ಅವಕಾಶ ನಿಷೇಧ

ಚಾರ್ಮಾಡಿ : ಭಾರೀ ಬರ್ಸ ಬತ್ತಿನ ನೆಲೆಟ್ಟ್ ಚಾರ್ಮಾಡಿ ಘಾಟ್ ಮಾರ್ಗದ ಸಂಚಾರ ನಿಯಮಡ್ ಮಹತ್ವದ ಬದಲಾವಣೆನ್ ಮಲ್ದೆರ್ ರಾತ್ರಿ ಸಂಚಾರಗ್ ಅವಕಾಶ ನಿಷೇಧ ಮಲ್ದೆರ್ .

ಚಾರ್ಮಾಡಿ ಘಾಟ್ ಮಾರ್ಗಡ್ ಶುಕ್ರವಾರ ಕಾಂಡೆ ಭೂ ಕುಸಿತವಾತುಂಡು . ಈ ನೆಲೆಟ್ಟ್ ಪರಿಶೀಲನೆ ನಡಪಾಯಿನ ಅಧಿಕಾರಿಲು ಇತ್ತೆ ಪೊಸ ಮಾರ್ಗಸೂಚಿನ್ ಕೊರ್ತೆರ್, ಚಿಕ್ಕಮಗಳೂರು ಜಿಲ್ಲಾಧಿಕಾರಿ ಪೊಸ ಆದೇಶ ಕೊರ್ತೆರ್ .

ಚಾರ್ಮಾಡಿ ಘಾಟ್ ಮಾರ್ಗ ಇನಿರ್ದ್ ಕಾಂಡೆ 6 ಗಂಟೆರ್ದ್ ಮುಟ ರಾತ್ರಿ 7 ಗಂಟೆ ಮುಟ ಲಘು ವಾಹನಗ್ ಮಾತ್ರ ಸಂಚಾರಗ್ ಅನುಮತಿ ಕೊರ್ತೆರ್ . ಅಂಚನೇ ರಾತ್ರಿದ ಪೊರ್ತು ಮಾತಾ ಗಾಡಿ ಸಂಚಾರ ಮಲ್ಪುನೆನ್ ಸಂಪೂರ್ಣ ಬಂದ್ ಮಲ್ದೆರ್ . ಘನ ಗಾಡಿಲೆಗ್ ಘಾಟಿಡ್ ಸಂಚಾರನ್ ದುಂಬೇ ಈ ಉoತಾದ್ ಇತ್ತೆರ್ . ಇತ್ತೆ ಚಿಕ್ಕಮಗಳೂರು ಜಿಲ್ಲಾಧಿಕಾರಿ ಪೊಸ ಆದೇಶ ಕೊರ್ತೆರ್.

ಜೂನ್ 14 ಮುಟ ಲಾಕ್ಡೌನ್ ದುಂಬರಿಯುoಡು : ಯಡಿಯೂರಪ್ಪ

ಬೆಂಗ್ಳೂರು, ಜೂನ್ 3 : ಕೋವಿಡ್ ಸಾಂಕ್ರಾಮಿಕ ಸೋಂಕುನು ಸಂಪೂರ್ಣ ಉಂತಾಯರೇ ಕಟ್ಟ್ ನಿಟ್ಟ್ ದ ಕ್ರಮ ದೆತೊನುನ ಸೂಕ್ತ ಪಂದ್ ಗೇನಡ್ ದೀದ್ ಈ ದುಂಬು ಜೂನ್ 7 ಮುಟ ಜಾರಿ ಲಾಕ್ಡೌನ್ ಮಲ್ತಿತ್ತೆರ್ . ಪ್ರಸ್ತುತ ಕೋವಿಡ್ ಸೋಂಕುದ ಪ್ರಮಾಣ ಕಮ್ಮಿ ಆದ್ ಇತ್ತುಂಡಲ, ವೈರಾಣು ಪಸರುನ ಅಂಚನೇ ಉಂಡು . ಆರೋಗ್ಯ ಪರಿಣಿತೆರ್ನ ಸಲಹೆದ ಮಿತ್ತ್ ದುಂಬರಿಪಾವುನ ಸೂಕ್ತ ಪಂದ್ ಪರಿಗಣಿಸಾದ್ 14-06-2021ಮುಟ ಒಂಜಿ ವಾರ ಕಾಲ ಜಾಸ್ತಿ ಮಲ್ಪರೆ ತೀರ್ಮಾನ ದೈದ ಪಂದ್ ಸಿಎಂ ಯಡಿಯೂರಪ್ಪ ಪಂಡೆರ್ .

ಈ ಬಗ್ಗೆ ಸುದ್ದಿಗೋಷ್ಠಿ ನಡಪಾದ್ ಪಾತೆರಿನ ಆರ್, 500 ಕೋಟಿ ವಿಶೇಷ ರಡ್ಡನೇ ಪ್ಯಾಕೇಜ್ ಇನಿ ಘೋಷಣೆ ಮಲ್ಪುವ ಪಂದ್ ಪಂಡೆರ್.

ತುಳು ಭಾಷೆ, ಸಂಸ್ಕೃತಿದ ಪೊಲಬು ಪಟ್ಟೊಂದು ಉಪ್ಪುನ “ದ ಮಿಲೇನಿಯಲ್ ತುಳುವಾಸ್”

ನೀರ್ ಡ್ ಮುರ್ಕೊಂದು ಉಪ್ಪುನ ಜೀವಗ್ ಒಂಜಿ ಎಲ್ಯ ಕಡ್ಡಿ ತಿಕ್ಕ್oಡಲಾ ಯಾವು ಎಂಚಲಾ ನೀoದೊಂದು ಮಿತ್ತ್ ಬರ್ಪುಂಡು. ಒಂಜಿ ಎಲ್ಯ ಅವಕಾಶ ತಿಕ್ಕ್oಡಲಾ ತಾನ್ ದಾಲ ಸಾಧನೆ ಮಲ್ಪೊಡು ಪನ್ಪಿ ಛಲ ಐಕ್ ಉಪ್ಪುಂಡು ಇಂಚಿನ ಹಠ, ಛಲ ನಮ್ಮ ಜೀವನಡ್ ಇತ್ತ್oಡಲಾ ನಮ ಎಂಚಿನ ಸಾಧನೆಲಾ ಮಲ್ಪೊಲಿ ಪನ್ಪಿನೆಕ್ಕ್ ಉದಾರ್ಮೆ ಆಯಿನ “ದ ಮಿಲೇನಿಯಲ್ ತುಳುವಾಸ್” ಪನ್ಪಿ ಜವಣ್ಯೆರ್ನ ಕೂಟ.

ಸಾಧಿಸಾವುನ ಛಲಗಾರಗ್ ಮತ್ತರ್ಮೆನೆ ಬೋಡು ಪಂದ್ ಇಜ್ಜಿ. ತಾನ್ ಉಂತಿನ ನೆಲೆನೇ ಮತ್ತರ್ಮೆ ಮಲ್ತೊಂದು ದಾಲ ಸಾಧನೆ ಮಲ್ಪುನ ತಾದಿ ನಾಡುವೆ.ಅಂಚನೇ ಸಾಧನೆ ಪನ್ಪಿನವು ನೆತ್ತೆರ್ ಡೇ ಇತ್ತುಂಡ ಐಕ್ ಪ್ರಾಯ ಪನ್ಪಿನ ಅಡ್ಡಿ ಬರ್ಪುಜಿ ಪನ್ಪಿನೆಕ್ಕ್ ಈ ಕೂಟ ಉದಾರ್ಮೆ ಆದುಂಡು.ಒಡಿಪುದ ಪೂರ್ಣ ಪ್ರಜ್ಞಾ ಕಾಲೇಜ್ ಡ್ ತನ್ನ ವಿದ್ಯಾಭ್ಯಾಸ ಮಲ್ತೊಂದು ಉಪ್ಪುನ ಸೂರಜ್ ಆರ್ ಪೂಜಾರಿ ಬೊಕ್ಕ ಮನೋಹರ್ ಸುವರ್ಣ , ಎಸ್. ಡಿ. ಎಂ ಆಯುರ್ವೇದ ಕಾಲೇಜ್ ಡ್ ಕಲ್ತೊಂದು ಉಪ್ಪುನ ಸುರಕ್ಷಾ. ಆರ್. ಪೂಜಾರಿ ಬೊಕ್ಕ ನಿಟ್ಟೆ ಇಂಜಿನಿಯರ್ ಕಾಲೇಜ್ ದ ರಮಿತ್. ಆರ್. ಶೆಟ್ಟಿ ಈ ಪೊರ್ಲ ಪೊಲಬುದ ಕೂಟ ಡ್ ಬೆನ್ನಿ ಬೆನೊಂದು ಉಪ್ಪುನ ಸದಸ್ಯೆರ್. ಕಿನ್ಯ ಪ್ರಯೋಡೆ ಅಪ್ಪೆ ಭಾಷೆನ್ ಯುವ ಪೀಳಿಗೆಗ್ ಬಾರಿ ಪೊರ್ಲುಡೆ ಎತ್ತಾವುನ ಕಜ್ಜ ಮಲ್ತೊಂದು ಉಲ್ಲೆರ್. ಕಾಯಕಡ್ ಇಂಜಿನಿಯರ್,ಡಾಕ್ಟರ್ ಅಂಚನೇ ತನ್ನ ಸ್ವಂತ ಉದ್ಯೋಗ ಮಲ್ತೊಂದು ಆಸಕ್ತಿಡ್ ತುಳುವಪ್ಪೆನ ಬೇಲೆ ಮಲ್ತೊಂದು ಉಪ್ಪುನ ಈ ಯುವ ಉತ್ಸಾಹೀ ಒಡಿಪುದ ಜೋಕುಲು.

ಪ್ರಸ್ತುತ ಜಗತ್ತಿಗ್ ಬೈದಿನ ಕೊರೊನ ಪನ್ಪಿ ಮಹಮಾರಿ ಸೀಕ್ ರ್ದ್ ಇಡೀ ಮಾನವ ಸಂಕುಲದ ಜೀವನನೇ ಅಲ್ಲೋಲ ಕಲ್ಲೋಲ ಆತಿನವು ನಂಕ್ ತೆರಿನ ಇಚಾರ. ಇಡೀ ದೇಶ ಬಾಕಿಲ್ ಪಾರ್ದ್ ಇಲ್ಲದ ಉಲಯಿ ಕುಲ್ಲುಲಕ ಮಲ್ತಿನ ಈ ಕೊರನದ ಕೇಕೇ ನನಲ ಕಮ್ಮಿ ಆವಂದಿನವು ಬಾರಿ ಶೊಚನೀಯ ಸಂಗತಿ. ಆಂಡ ಇಂಚಿನ ಪೊರ್ತುನು ವ್ಯರ್ಥ ಮಲ್ಪಂದೆ ಈ ಉತ್ಸಾಹೀ ಜವಣ್ಯೆರ್ನ ಕೂಟ ತಾನ್ ಏಪೊಗ್ಲ ಸೋಪೆರೆ ಬಲ್ಲಿ ಪನ್ಪಿನ ಪೊಸ ಉದ್ದೇಶಡ್ ಹೊಸ ಪ್ರಯತ್ನಗ್ ಕೈ ಪಾಡುವೆರ್ ಅವ್ವೆ ” ದ ಮಿಲೇನಿಯಲ್ ತುಳುವಾಸ್ ಚಾನೆಲ್ “.

ಆಧುನೀಕತೆಗ್ ತಕ್ಕ ಬದಲಾವೊಂದು ಪೋಪಿನ ಈ ಕಾಲೋಡು ತುಳುನಾಡ್, ತುಳುಭಾಷೆ, ಸಂಸ್ಕೃತಿದ ಮಿತ್ತ್ ಬಾರಿ ಮೋಕೆ ದೀಯೊಂದು ಅಪ್ಪೆ ಬಾಸೆದ ಸಂಸ್ಕೃತಿ, ಸಂಪ್ರದಾಯ, ಆಚಾರ -ಇಚಾರಲೆನ್ ಲೋಕೊರ್ಮೆ ಪಟ್ಟುನ ಕಜ್ಜನ್ ಒಡಿಪುದ ಜವಣ್ಯೆರ್ನ ಕೂಟ “ದ ಮಿಲೇನಿಯಲ್ ತುಳುವಾಸ್” ಪನ್ಪಿನ ಪುದರ್ ಡ್ ಲೋಕೊರ್ಮೆ ಪಟ್ಟುನ ಬೇಲೆ ಮಲ್ತೊಂದು ಉಲ್ಲೆರ್.

ಆಟಿ ತಿಂಗೊಲು, ಅಳಿಯಕಟ್ಟ್, ಕೆಡ್ದಸ, ಕಂಬಳ, ತಡ್ದೆದ ಅಜ್ಜಿ, ಕಂಚಿಲ್, ಬಿಸು ಪರ್ಬ, ಪತ್ತನಾಜೆ ಇಂಚ ನನಾತ್ ತುಳು ಸಂಸ್ಕೃತಿಗ್ ಸಂಭಂದ ಪಟ್ಟಿನ ವಿಷಯನ್ ಸೋಶಿಯಲ್ ಮೀಡಿಯಾ ಡ್ ಲೋಕೊರ್ಮೆ ಪಟ್ಟೊಂದು ಉಲ್ಲೆರ್.ತುಳುನಾಡ್ ದ ಪ್ರಾಚೀನ ಕಲೆ,ಸಂಸ್ಕೃತಿಲೆನ್ ಅನ್ವೇಷನೆ ಮಲ್ಪರೆ ಬೊಕ್ಕ ಜನಕ್ಲೆಗ್ ಗೊತ್ತು ಮಲ್ಪರೆ ಒಂಜಿ ಎಡ್ಡೆ ಮತ್ತರ್ಮೆನ್ ಆಯ್ಕೆ ಮಲ್ತೊಂದು ಯುವ ತುಳು ಮನಸ್ ನ್ ಮುಟ್ಟುನ ಪ್ರಾಮಾಣಿಕ ಪ್ರಯತ್ನ ಮೆಕ್ಲೆನವು .ಆಧುನಿಕತೆಗ್ ಒಗ್ಗುದು ಪೋತಿನ ಇತ್ತೆದ ಯುವಪೀಳಿಗೆಗ್ ಅರ್ಥ ಆಪಿನ, ಅರ್ಥ ಮಲ್ಪಾವುನ ನೆಲೆಟ್ಟ್ ಆದುನಿಕತೆಗ್ ತಕ್ಕ ಇಚಾರನ್ ಪಟ್ಟುನ ಅಂಚನೇ ಆನಿ ಕಾಲೊಡು ನಡತೊಂದು ಇತ್ತಿನ ಕಟ್ಟ್ ಕಟ್ಟಲೆನ್ ಅರ್ಥಬದ್ದವಾದ್ ಇತ್ತೆದ ಪೀಳಿಗೆದ ಜನಕ್ಲೆನ ಮನಸ್ ಡ್ ನೆಲೆ ಉಂತಿನ ಮೂಢನಂಬಿಕೆ ಪನ್ಪಿ ಪದೊನು ಬಾರಿ ಪೊರ್ಲುಡೆ ಅಕ್ಲೆಗ್ ಬೋಡಾಯಿನ ಲೆಕ್ಕ ಆಧುನಿಕತೆಗ್ ತಕ್ಕ ಭಾಷಾ ಬದಲಾವಣೆ ಮಲ್ತೊಂದುಮೂಢನಂಬಿಕೆ ಪನ್ಪಿ ಪದೊನು ಕಿನ್ಕ್ ದ್ ದೆತ್ದ್ ನಮ್ಮ ಕಟ್ಟ್ ಕಟ್ಟಲೆದ ಪೊಲಬು ಪಟ್ಟೊಂದು ಉಲ್ಲೆರ್.

ಒವ್ವೆ ರೀತಿದ ಅಂಗಲ್ಪು ದಾಂತೆ ಅಪ್ಪೆ ಭಾಷೆ, ಸಂಸ್ಕೃತಿ, ಆಚಾರ -ಇಚಾರ ನ್ ಯುವ ಪೀಳಿಗೆಗ್ ಎತ್ತಾವುನ ಕಜ್ಜ ಮಲ್ತೊಂದು ಉಪ್ಪುನ ಈ ಕೂಟಗ್ ತುಳುವಪ್ಪೆ ಜೋಕುಲಾಯಿನ ನಮ್ಮ ಸಾಕಾರ ಮಸ್ತ್ ಅಗತ್ಯ ಉಂಡು. ಮಾಜೊಂದು ಉಪ್ಪುನ ತುಳುವ ಸಂಸ್ಕೃತಿನ್ ಒರಿಪಾವುನoಚಿನ ಕಜ್ಜ ಮಲ್ತೊಂದು ಉಪ್ಪುನ ಈ ಕೂಟಗ್ ನಮ ಬೆರಿಬಲ ಆಕ. ತುಳುವಪ್ಪೆನ ಸೇವೆ ಮಲ್ಪರೆ, ತುಳು ಬಾಸೆ, ಸಂಸ್ಕೃತಿಗ್ ಸಂಭಂದ ಪಟ್ಟಿನ ಇಚಾರನ್ ನನಾತ್ ಲೋಕೋಗು ತೆರಿಪಾವುನ ಬೇಲೆ ನಿಕ್ಲೆನೆರ್ದ್ ಆವಡ್ ನೆಕ್ಕ್ ಬೆರಿಬಲ ಅಪ್ಪೆ ಮೆಕ್ಲೆಗ್ ಕೊರಡ್ ನಿಕುಲು ಮಲ್ಪುನ ಈ ಕಜ್ಜ ಲೋಕೊರ್ಮೆ ಪುಗಾರ್ತೆ ಪಡೆಯಡ್ ಪನ್ಪಿನವು ಟೈಮ್ಸ್ ಆಫ್ ಕುಡ್ಲ ಪತ್ರಿಕೆದ ಆಶಯ.

✍🏻ಶ್ರೀನಿಧಿ ಶೆಟ್ಟಿ