Uncategorized

ಬ್ಯಾಂಕ್ ಆಫ್ ಬರೋಡಾ ಜಿಎಮ್ ಗಾಯತ್ರಿ ಆರ್. ವರ್ಗಾವಣೆ; ಆಟ ಕೂಟ ಟ್ರಸ್ಟ್ ರ್ದ್ ಬೀಳ್ಕೊಡುಗೆ

ಕುಡ್ಲದ ಬ್ಯಾಂಕ್ ಆಫ್ ಬರೋಡಡ್ ಜನರಲ್ ಮ್ಯಾನೆಜರಾದ್ ಬೊಕ್ಕ ಝೋನಲ್ ಹೆಡ್ ಆದ್ ಕೆಲಸ ಮಲ್ತಿನ ಗಾಯತ್ರಿ ಆರ್ ಮೇರ್ ಬೊಂಬೈಗ್ ವರ್ಗಾವಣೆ ಆತೆರ್.

ಕರಿನ ಮೂಜರೆ ವರ್ಷೊದಿಂಚ ಕುಡ್ಲಡ್ ವಾಸ ಇತ್ತಿನ ಗಾಯತ್ರಿ ಆರ್ ಮೇರ್ ಕುಡ್ಲಡ್ ಧಾರ್ಮಿಕ ಬೊಕ್ಕ ಸಾಂಸ್ಕೃತಿಕ ಚಟುವಟಿಕೆಡ್ ಇತ್ತ್ ದ್ ಕುಡ್ಲದ ಜನಕ್ಲೆನ ಪ್ರೀತಿ ಪಡೆತೆರ್.

ಕೈತಲ್ ಡೇ ನಡತೊಂದು ಇತ್ತಿನ ಸಾಂಸ್ಕೃತಿಕ ಲೇಸ್ ಲೆಗ್ ಪ್ರೋತ್ಸಾಹ ಕೊರೊಂದು ಲೇಸ್ ಡ್ ಪಾಲ್ ಪಡೆವೊಂದಿತ್ತಿನ ಗಾಯತ್ರಿ ಆರ್ ಮೇರ್ ಕೈತಲ್ ದಾರೇ ಆದ್ ಪೋತೆರ್. ಇಂಚಾದ್ ಸುಮಾರ್ ಅಭಿಮಾನಿಲೆನ್ ಪಡೆವೊಂದು ಉತ್ತಮ ಸ್ನೇಹ ಜೀವಿಯಾದ್ ಅವ್ವೆ ರೀತಿ ಬ್ಯಾಂಕ್‌ ದ ಉತ್ತಮ ಅಧಿಕಾರಿಯಾದ್ ಗಮನ ಸೆಳೆತೆರ್.

ಅಂಚಾದ್ ಮೇರ್ ವರ್ಗಾವಣೆ ಆದ್ ಪೋನಗ ಮೆರೆಗ್ ಅಭಿಮಾನಿ ಬಳಗ ಬೀಳ್ಕೊಡುಗೆ ಮಲ್ದೆರ್. ಅತ್ತಂದೆ ನಮ್ಮೂರ ಆಟ ಕೂಟ ಟ್ರಸ್ಟ್ ದ ಮುತಾಲಿಕೆಡ್ ಮೆರೆಗ್ ಬೀಳ್ಕೊಡುಗೆ ಸಮಾರಂಭ ಮಲ್ತ್ ದ್ ನೆಂಪುದ ಕಾಣಿಕೆ ಕೊರ್ದು ಮಾನಾದಿಗೆ ಮಲ್ತೆರ್.

ನವನೀತ ಶೆಟ್ಟಿ ಪಾತೆರ್ದ್, ಗಾಯತ್ರಿ ಆರ್ ಮೇರ್ ಬೊಂಬೈಗ್ ವರ್ಗಾವಣೆಯಾದ್ ಪೋವೊಂದು ಇತ್ತ್ಂಡಲ ಆರ್ ಏಪಲ ಎಕ್ಲೆನೊಟ್ಟಿಗೆ ಉಲ್ಲೆರ್ ಪಂದ್ ಪಂಡೆರ್. ಗಾಯತ್ರಿ ಮೇರ್ ಪ್ರಮೋಷನ್ ಪಡೆದ್ ಕುಡ ಕುಡ್ಲಗ್ ಬರ್ಪುಲೆಕ್ಕ ಆವಡ್ ಪಂದ್ ಎಡ್ಡೆಪ್ಪು ಬಯಕಿಯೆರ್.

ಈ ಪೊರ್ತುಡು ನಮ್ಮೂರ ಆಟ ಕೂಟ ಟ್ರಸ್ಟ್‌ ದ ಪ್ರಮುಖೆರ್ ಎಂ ಗಣೇಶ್ ಮಲ್ಲಿ, ರಾಜ್ ಗೋಪಾಲ್ ರೈ, ಬೋಳಾರ ತಾರನಾಥ ಶೆಟ್ಟಿ, ಮುಲ್ಕಿ ಕರುಣಾಕರ ಶೆಟ್ಟಿ ಬೊಕ್ಕ ವಿಜಯಲಕ್ಷ್ಮಿ ಬಿ. ಶೆಟ್ಟಿ ಪಾಲ್ ಪಡೆದಿತ್ತೆರ್.

ಪುತ್ತೂರು ಶ್ರೀ‌ ಮಹಾಲಿಂಗೇಶ್ವರ ದೇವಸ್ಥಾನಡ್ ಕೊಡಿ ಏರ್ಂಡ್

ಪುತ್ತೂರು: ಪುಗರ್ತೆದ ಮಹತೋಭಾರ ಶ್ರೀ‌ ಮಹಾಲಿಂಗೇಶ್ವರ ದೇವಸ್ಥಾನಡ್ ವರ್ಷಾವಧಿ ಜಾತ್ರೆದ ಲೆಕ್ಕೊಡು (ಎ‌.10) ಇನಿ ಕೊಡಿ ಏರ್ಂಡ್.

ಈ ಪೊರ್ತುಡು ದೇವಸ್ಥಾನದಕುಲು ಬೊಕ್ಕ ಭಕ್ತೆರ್ ಪಾಲ್ ಪಡೆದಿತ್ತೆರ್.

ಕಣಂಜಾರು ಶ್ರೀ ಬ್ರಹ್ಮಲಿಂಗೇಶ್ವರ ದೇವಸ್ಥಾನದ ಬ್ರಹ್ಮಕಲಶ ಉಚ್ಚಯದ ಲೆಪ್ಪೋಲೆ ಬುಡುಗಡೆ

ಕಾರ್ಲ: ಕಣಂಜಾರು ಶ್ರೀ ಬ್ರಹ್ಮಲಿಂಗೇಶ್ವರ ದೇವಸ್ಥಾನಡ್ ಎ.28 ರ್ದ್ ಮೇ8 ಮುಟ್ಟ ನಡಪರೆ ಇಪ್ಪುನ ಬ್ರಹ್ಮಕಲಶ ಉಚ್ಚಯದ ಲೆಪ್ಪೋಲೆ ಬುಡುಗಡೆ ಆಂಡ್‌.

ಈ ಪೊರ್ತುಡು ದೇವಸ್ಥಾನದ ಅರ್ಚಕೆರ್, ಆಡಳಿತ ಮಂಡಳಿದ ಮೊಕ್ತೇಸರೆರ್ ಬೊಕ್ಕ ಸಮಿತಿದ ಸರ್ವಸದಸ್ಯೆರ್ ಪಾಲ್ ಪಡೆದಿತ್ತೆರ್.

ಕ್ಯಾಪ್ಟನ್ ಬ್ರಿಜೇಶ್ ಚೌಟೆರೆರ್ದ್ ನಾಮಪತ್ರ ಸಲ್ಲಿಕೆ

ದಕ್ಷಿಣ ಕನ್ನಡ ಕ್ಷೇತ್ರದ ಬಿಜೆಪಿ ಅಭ್ಯರ್ಥಿ ಕ್ಯಾಪ್ಟನ್ ಬ್ರಿಜೇಶ್ ಚೌಟ ಮೇರ್ ಇನಿ ನಾಮಪತ್ರ ಸಂದಾಯೆರ್.

ಮೇರ್ ನಾಮಪತ್ರ ಸಂದಾಯೆರೆ ಬಂಟ್ಸ್ ಹಾಸ್ಟೆಲ್‌ ಕೈತಲ್ದ ಬಿಜೆಪಿ ಚುನಾವಣಾ ಪ್ರಚಾರ ಸಮಿತಿ ಕಚೇರಿರ್ದ್ ಮೆರವಣಿಗೆಡ್ ದ.ಕ. ಜಿಲ್ಲಾಧಿಕಾರಿ ಕಚೇರಿಗ್ ಬತ್ತೆರ್.

ನಾಮಪತ್ರನ್ ಸ್ವೀಕಾರ ಮಲ್ಪೆರೆ ಜಿಲ್ಲಾಧಿಕಾರಿ ಬೊಕ್ಕ ಚುನಾವಣಾಧಿಕಾರಿ ಮಲ್ಲೈಮುಗಿಲನ್‌ ಇತ್ತೆರ್.

ಈ ಪೊರ್ತುಡು ಹಾಲಿ ಸಂಸದೆರ್ ನಳಿನ್ ಕುಮಾರ್ ಕಟೀಲ್, ಬಿಜೆಪಿ ಜಿಲ್ಲಾಧ್ಯಕ್ಷೆರ್ ಸತೀಶ್ ಕುಂಪಲ, ಶಾಸಕಿ ಭಾಗೀರಥಿ ಮುರುಳ್ಯ, ಜೆಡಿಎಸ್ ಜಿಲ್ಲಾಧ್ಯಕ್ಷೆರ್ ಜಾಕೇ ಮಾಧವ ಗೌಡ ಪಾಲ್ ಪಡೆದಿತ್ತೆರ್.

ಕಾಂಗ್ರೆಸ್ ಅಭ್ಯರ್ಥಿ ಪದ್ಮರಾಜ್ ಆರ್. ನಾಮಪತ್ರ ಸಲ್ಲಿಕೆ

ಕುಡ್ಲ: ದಕ್ಷಿಣ ಕನ್ನಡ ಲೋಕಸಭಾ ಕ್ಷೇತ್ರದ ಅಭ್ಯರ್ಥಿ ಪದ್ಮರಾಜ್ ಅರ್.ಪೂಜಾರಿ ಮೇರ್ ದ.ಕ ಜಿಲ್ಲಾಧಿಕಾರಿ ಕಚೇರಿಡ್ ನಾಮಪತ್ರ ಸಂದಾಯೆರ್.

ನಾಮಪತ್ರ ಸಂದಾವುನ ದುಂಬು ಕುದ್ರೋಳಿ ಶ್ರೀ ಗೋಕರ್ಣನಾಥ ಕ್ಷೇತ್ರದ ಎದುರುರ್ದ್ ಎ.ಬಿ.ಶೆಟ್ಟಿ ಸರ್ಕಲ್ ಮುಟ್ಟ ಆಯೋಜನೆ ಮಲ್ತಿನ ಮೆರವಣಿಗೆಗ್ ಕೇಂದ್ರದ ಮಾಜಿ ಸಚಿವೆರ್ ಜನಾರ್ದನ ಪೂಜಾರಿ ಚಾಲನೆ ಕೊರಿಯೆರ್. ಸಾರ ಸಾರ ಸಂಖ್ಯೆ ಡ್ ಜನಕುಲು ಮೆರವಣಿಗೆಡ್ ಪಾಲ್ ಪಡೆದಿತ್ತೆರ್.

ಜಿಲ್ಲಾಧಿಕಾರಿ ಬೊಕ್ಕ ಜಿಲ್ಲಾ ಚುನಾವಣಾಧಿಕಾರಿ ಮುಲೈ ಮುಗಿಲನ್ ಮೇರ್ ನಾಮಪತ್ರ ಸ್ವೀಕಾರ ಮಲ್ತೆರ್.

ಈ ಪೊರ್ತುಡು ದ.ಕ ಜಿಲ್ಲಾ ಉಸ್ತುವಾರಿ ಸಚಿವೆರ್ ದಿನೇಶ್ ಗುಂಡೂರಾವ್, ಕಾಂಗ್ರೆಸ್ ಜಿಲ್ಲಾ ಉಸ್ತುವಾರಿ ಬಿ.ರಮಾನಾಥ ರೈ, ಜಿಲ್ಲಾ ಕಾಂಗ್ರೆಸ್ ಅಧ್ಯಕ್ಷೆರ್ ಹರೀಶ್ ಕುಮಾರ್, ವಿಧಾನ ಪರಿಷತ್ ಸದಸ್ಯೆರ್ ಬಿ.ಕೆ.ಹರಿಪ್ರಸಾದ್, ಮಂಜುನಾಥ ಭಂಡಾರಿ, ಮಾಜಿ ಶಾಸಕೆರ್ ಅಭಯಚಂದ್ರ ಜೈನ್, ಜೆ.ಆರ್.ಲೋಬೋ, ಇನಾಯತ್ ಅಲಿ ಪಾಲ್ ಪಡೆದಿತ್ತೆರ್.

ಮಾ.31-ಎ.4: ನಾವರ ಶ್ರೀ ಮಹಾಲಿಂಗೇಶ್ವರ ದೇವಸ್ಥಾನಡ್ ಅಷ್ಟಬಂಧ ಬ್ರಹ್ಮಕಲಶ ಉಚ್ಚಯ

ಬೊಲ್ತೇರ್: ನಾವರ ಶ್ರೀ ಮಹಾಲಿಂಗೇಶ್ವರ ದೇವಸ್ಥಾನಡ್ ಅಷ್ಟಬಂಧ ಬ್ರಹ್ಮಕಲಶ ಉಚ್ಚಯ ಮಾ.31-ಎ.4 ಮುಟ್ಟ ನಡಪರೆ ಉಂಡು.

ಈ ಲೇಸ್ ಡಾ| ಡಿ ವೀರೇಂದ್ರ ಹೆಗ್ಗಡೆರೆನ ಆಶೀರ್ವಾದಡ್, ಬ್ರಹ್ಮಶ್ರೀ ನಡ್ವಂತಾಯ ಬಾಲಕೃಷ್ಣ ಪಾಂಗಾಣ್ಣಾಯ ಮೆರೆನ ಮುತಾಲಿಕೆಡ್ ನಡಪರೆ ಉಂಡು.

ಮಾ.31 ಐತಾರ ಬೊಲ್ಪುಗು ತೋರಣ ಮೂರ್ತ, ಉಗ್ರಾಣ ಮೂರ್ತ, ಬಯ್ಯಗ್ ಅಳದಂಗಡಿ ಶ್ರೀ ಸೋಮನಾಥೇಶ್ವರೀ ದೇವಸ್ಥಾನಡ್ ಸಾಮೂಹಿಕ ಪ್ರಾರ್ತನೆ, ನಲಿಕೆ ಭಜನೆ, ಕೀಲ್ ಕುದುರೆ, ಚೆಂಡೆ ವಾದ್ಯ, ಪುದೆಕಾಣಿಕೆ ಮೆರವಣಿಗೆ, ವಾಸ್ತುಪೂಜೆ, ವಾಸ್ತು ಹೋಮ, ಅನ್ನ ಪ್ರಸಾದ ಸೇವೆ, ರಾತ್ರೆ ಸಾಂಸ್ಕೃತಿಕ ವೈಭವ, ನೃತ್ಯ ವೈವಿಧ್ಯ ನಡತ್ಂಡ್.

ಎ.1 ಸೋಮಾರ ಬೊಲ್ಪುಗು ಬಿಂಬ ಶುದ್ಧಿ, ಪದಗ್ರಹಣ ಲೇಸ್, ಭಜನೆ, ಮಧ್ಯಾಹ್ನ ಕೊಳಲು ವಾದನ, ಬಯ್ಯಗ್ ಬಲಿ, ದೇವತೆಲೆನ ಪ್ರತಿಷ್ಠೆ, ಕಲಶಾಭಿಷೇಕ, ಅನ್ನ ಪ್ರಸಾದ ಸೇವೆ, ಧಾರ್ಮಿಕ ಸಭಾ ಲೇಸ್ ರಾತ್ರೆ ಮನ್ಮಥ ಸುಂದರಿ ಆಟ ನಡತ್ಂಡ್.

ಎ.2 ಅಂಗಾರೆ (ಇನಿ) ಬೊಲ್ಪುಗು ಶಾಂತಿ ಹೋಮ, ನವಗ್ರಹ ಯಾಗ, ಪ್ರಸನ್ನ ಪೂಜೆ, ದೈವ ಪ್ರತಿಷ್ಠೆ, ಪರ್ವಸೇವೆ, ಭಜನೆ ನಡತ್ಂಡ್. ಬಯ್ಯಗ್ ಅನ್ನ ಪ್ರಸಾದ ಸೇವೆ, ಧಾರ್ಮಿಕ ಸಭಾ ಲೇಸ್, ರಾತ್ರೆ ಶಾಂಭವಿ ತುಳು ನಾಟಕ ನಡಪರೆ ಉಂಡು.

ಎ.3 ಬುದಾರ ಬೊಲ್ಪುಗು ದೇವೆರೆನ ಕಲಶಾಭಿಷೇಕ, ಆಶ್ಲೇಷಾ ಬಲಿ, ಪ್ರಸನ್ನ ಪೂಜೆ, ಭಜನೆ, ಜೋಕ್ಲೆನ ಕಲರವ ಸಾಂಸ್ಕೃತಿಕ ಲೇಸ್, ಬಯ್ಯಗ್ ಅಧಿವಾಸ ಹೋಮಲು, ಅನ್ನ ಪ್ರಸಾದ ಸೇವೆ, ಧಾರ್ಮಿಕ ಸಭಾ ಲೇಸ್, ರಾತ್ರೆ ನೃತ್ಯ ಸಂಕಲ್ಪಂ ಸಾಂಸ್ಕೃತಿಕ ಲೇಸ್ ನಡಪರೆ ಉಂಡು.

ಎ.4 ಗುರುವಾರ ಬೊಲ್ಪುಗು ಬ್ರಹ್ಮಕಲಶಾಭಿಷೇಕ, ಮಹಾಪೂಜೆ, ಭಜನೆ, ಅನ್ನ ಪ್ರಸಾದ ಸೇವೆ, ಧಾರ್ಮಿಕ ಸಭಾ ಲೇಸ್, ಬಯ್ಯಗ್ ಮಲ್ಲ ರಂಗಪೂಜೆ, ದೇವೆರೆನ ಉಚ್ಚಯ ಬಲಿ, ವಸಂತಕಟ್ಟೆ ಪೂಜೆ, ದೈವೊಲೆನ ಗಗ್ಗರ ಸೇವೆ, ರಾತ್ರೆ ಕಥೆ ಎಡ್ಡೆಂಡು ತುಳು ನಾಟಕ ನಡಪರೆ ಉಂಡು.

ಈ ಲೇಸ್ ಡ್ ಮಾತೆರ್ಲಾ ಕುಟುಂಬ ಸಮೇತೆರಾದ್ ಪಾಲ್ ಪಡೆದ್ ಸಿರಿಮುಡಿ ಗಂಧ ಪ್ರಸಾದ ದೆತೊಂದು ಶ್ರೀ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ವ್ಯವಸ್ಥಾಪನಾ ಸಮಿತಿ, ಜೀರ್ಣೋದ್ಧಾರ ಸಮಿತಿ, ಬ್ರಹ್ಮಕಲಶ ಉಚ್ಚಯ ಸಮಿತಿದ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಮಾ.29-31: ಉಬಾರ್ ಕಂಬುಲ ಉಚ್ಚಯ

ಉಬಾರ್ ವಿಜಯ ವಿಕ್ರಮ ಜೋಡುಕರೆ ಬಯಲು ಕಂಬುಲ ಸಮಿತಿದ ಮುತಾಲಿಕೆಡ್ ಉಬಾರ್ ಕಂಬುಲ ಉಚ್ಚಯ ಮಾ.29-31 ಮುಟ್ಟ ಉಬಾರ್ ಕಂಬುಲ ಕರೆತ್ತ ಕೈತಲ್ದ ನೇತ್ರಾವತಿ ತುದೆತ್ತ ಬರಿಟ್ಟ್ ನಡಪರೆ ಉಂಡು.

ನಮ್ಮ ಪೆರ್ಮೆದ ಸಾಂಸ್ಕೃತಿಕ ಕ್ರೀಡೆ ಕಂಬುಲದೊಟ್ಟಿಗೆ ಸಮಾಜಡ್ ಸಾಮರಸ್ಯದೊಟ್ಟಿಗೆ ಕುಸಿ ಪಡೆಯೆರೆ, ಸುರುತ್ತ ಸರ್ತಿ ಉಬಾರ್ ಡ್ ಇಸೇಸವಾದ್ ನೇತ್ರಾವತಿ ತುದೆತ್ತ ಬರಿಟ್ಟ್ ಆಯೋಜನೆ ಮಲ್ತಿನ ಉಬಾರ್ ಕಂಬುಲ ಉಚ್ಚಯಡ್ ಪಾಲ್ ಪಡೆಯೆರೆ ಸಮಾಜದ ಸರ್ವಸದಸ್ಯೆರೆಡ ಉಬಾರ್ ಕಂಬುಲ ಉಚ್ಚಯ ಲೇಸ್ ದ ಸಂಯೋಜಕೆರ್ ಲೆಪ್ಪೋಲೆಡ್ ತೆರಿಪಾದೆರ್.