ಕುಡ್ಲದ ಸುದ್ದಿ | Mangalore News

ಸಂತೋಷ್‌ನಗರ: ಶ್ರೀ ಮಹಾಕಾಳಿ ಅಮ್ಮನ ಸನ್ನಿಧಿಡ್ ಪ್ರತಿಷ್ಠಾ ವರ್ಧಂತಿ ಮಹೋಚ್ಚಯ

ಕುಡ್ಲ: ಸಂತೋಷ್‌ನಗರದ ಶ್ರೀ ಮಹಾಕಾಳಿ ಅಮ್ಮನ ಕಟ್ಟೆಡ್ ಮಾ.25 ತಾರೀಕ್‌ಗ್ ಶ್ರೀ ಮಹಾಕಾಳಿ ಅಮ್ಮನ ಕಟ್ಟೆಡ್ ಪ್ರತಿಷ್ಠಾ ವರ್ಧಂತಿ ಮಹೋಚ್ಚಯ ವೇದಾಂತ ವಿದ್ವಾನ್ ಸುರೇಶ್ ಬಾರಿತ್ತಾಯ ಮೆರೆನ ಮುತಾಲಿಕೆಡ್ ನಡಪರೆ ಉಂಡು.

ಕಾಂಡೆ ಗಣಹೋಮ, ಕಲಶಾಭಿಷೇಕ ಆದ್ ಮಹಾಕಾಳಿ ಸಹಸ್ರನಾಮಾವಳಿ ಹೋಮ ನಡಪರೆ ಉಂಡು. ಮಧ್ಯಾಹ್ನ ವಿಶೇಷ ಮಹಾಪೂಜೆ ಆದ್ ಪಲ್ಲಪೂಜೆ ಬೊಕ್ಕ ಪ್ರಸಾದ ಕೊರ್ಪಿನ ಲೇಸ್ ನಡಪರೆ ಉಂಡು. ರಾತ್ರೆ ಮಹಾಪೂಜೆ, ಕೋರಿಬಲಿ ಬೊಕ್ಕ ರಾತ್ರೆ 9.30 ಗಂಟೆಗ್ ಶ್ರೀ ವೀರಭದ್ರ ಸ್ವಾಮಿ ದಶಾವತಾರ ಯಕ್ಷಗಾನ ಮಂಡಳಿ, ಶ್ರೀ ಕ್ಷೇತ್ರ ಹಿರಿಯಡ್ಕ ಮೊಕುಲೆರ್ದ್ “ಮಾಯೊದ ಅಜ್ಜೆ” ಯಕ್ಷಗಾನ ನಡಪರೆ ಉಂಡು.

ಈ ಲೇಸ್‌ಗ್ ಮಾತ ಭಕ್ತೆರ್ ಬತ್ತ್‌ದ್ ಶ್ರೀ ದೇವಿನ ಸಿರಿಮುಡಿ ಗಂಧ ಪ್ರಸಾದನ್ ಸ್ವೀಕಾರ ಮಲ್ತ್‌ದ್ ದೇವಿನ ಕೃಪೆಗ್ ಪಾತ್ರರಾವೊಡು ಪಂದ್ ಶ್ರೀ ಮಹಾಕಾಳಿ ಸೇವಾ ಸಮಿತಿ (ರಿ.) ಬೊಕ್ಕ ಊರುದ ಪತ್ತ್ ಸಮಸ್ತೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಸಸಿಹಿತ್ಲು: ಕುಂದರನ್ ಕುಟುಂಬದ ನಾಗ ಮೂಲಸ್ಥಾನಡ್ ಪುನರ್ ಪ್ರತಿಷ್ಠೆ ಅಂಚನೆ ಆಶ್ಲೇಷಾ ಬಲಿ ಉಚ್ಚಯ

ಸಸಿಹಿತ್ಲು ಮಲೆಯಾಳಿ ತೋಟದ ಕುಂದರನ್ ಕುಟುಂಬ (ನೆಲ್ಲಿಕಾತೀಯ) ನಾಗಮೂಲಸ್ಥಾನ ಮುಲ್ಪದ ನಾಗಬನಟ್ಟ್ ಮಾ.19-23 ಮುಟ್ಟ ಶ್ರೀ ನಾಗದೇವೆರ್‍ನ ಪುನರ್ ಪ್ರತಿಷ್ಠೆ ಅಂಚನೆ ಆಶ್ಲೇಷಾ ಬಲಿ ಉಚ್ಚಯ ನಡಪರೆ ಉಂಡು.

ಮಾ.23 ಕ್ಕ್ ಕಾಂಡೆ 7 ಗಂಟೆರ್ದ್ ಸ್ವಸ್ತಿ ಪುಣ್ಯಾಹ, ಗಣಯಾಗ, ಪ್ರಧಾನ ಹೋಮ ಅದ್ 9.40 ತ್ತ ವೃಷಭ ಲಗ್ನ ಮೂರ್ತಡ್ ನಾಗದೇವೆರ್‍ನ ಪುನರ್ ಪ್ರತಿಷ್ಠೆ ಪಂಚಾಮೃತಾಭಿಷೇಕ, ಬ್ರಹ್ಮಕಲಶಾಭಿಷೇಕ, ಆಶ್ಲೇಷಾ ಬಲಿ, ವಟು ಆರಾಧನೆ, ಪ್ರಸನ್ನ ಪೂಜೆ ನಡತ್ತ್‌ದ್ ಅಯಿರ್ದ್ ಬೊಕ್ಕ ಪ್ರಸಾದ ಕೊರ್ಪಿನ ಲೇಸ್ ಬೊಕ್ಕ ಪಲ್ಲಪೂಜೆ ನಡಪರೆ ಉಂಡು.

Actor Chethan Ahimsa arrested for posts on Sangh Parivar ಚಿತ್ರನಟೆ ಚೇತನ್ ಅರೆಸ್ಟ್

ಹಿಂದುತ್ವದ ಬಗೆಟ್ಟ್ ಬೊಡ್ಚಾಂದಿನ ಪೋಸ್ಟ್ ಮಲ್ತಿನ ಕೇಸ್‌ಡ್ ನಟೆ ಚೇತನ್ ಮೆರೆನ್ ಬೆಂಗ್ಲೂರ್‌ದ ಶೇಷಾದ್ರಿಪುರಂ ಠಾಣೆದ ಪೊಲೀಸೆರ್ ಅರೆಸ್ಟ್ ಮಲ್ತ್‌ದೆರ್.

ಚೇತನ್ ಮೆರೆನ ಪೋಸ್ಟ್‌ದ ವಿರುದ್ಧ ಹಿಂದೂಪರ ಸಂಘಟನೆಲು ದೂರು ಕೊರ್ದಿತ್ತೆರ್. ಇಂಚಾದ್ ಪೊಲೀಸೆರ್ IPC ಸೆಕ್ಷನ್ 295(A), 505(B) ದಂಚನೆ ಎಫ್‌ಐಆರ್ ದಾಖಲ್ ಮಲ್ತ್‌ದೆರ್. ಸದ್ಯ ಚೇತನ್ ಮೆರೆನ್ ಪೊಲೀಸೆರ್ ಕೋರ್ಟ್‌ಗ್ ಹಾಜರ್ ಮಲ್ತ್‌ದೆರ್.

ಕಡಲಾಯೆರೆಡ್ ಸುರುತ್ತ ಸರ್ತಿ ಪ್ರದರ್ಶನ ಆಂಡ್ ಶಿವದೂತೆ ಗುಳಿಗೆ ನಾಟಕ

ದುಬೈ: ತುಳುನಾಡ್‌ದ ರಂಗಭೂಮಿಡ್ ದಾಖಲೆ ಬರೆತಿನ ವಿಜಯಕುಮಾರ್ ಕೊಡಿಯಾಲ್ ಬೈಲ್ ಮೆರೆನ ನಿರ್ದೇಶನದ ಶಿವದೂತೆ ಗುಳಿಗೆ ನಾಟಕ ಉಂದುವೇ ಸುರುತ್ತ ಸರ್ತಿ ಕಡಲಾಯೆರೆದ ದೇಶೊಡುಲ ಪ್ರದರ್ಶನ ಆಂಡ್.

ದುಬೈದ ಅಲ್ ನಸರ್ ಲಿಸರೆ ಲ್ಯಾಂಡ್‌ಡ್ ಕೋಡೆ ನಾಟಕದ 423 ಬೊಕ್ಕ 424ನೇ ಪ್ರದರ್ಶನ ಆಂಡ್. 2500 ದೆರ್ದ್ ಎಚ್ಚದ ಜನಕುಲು ಈ ನಾಟಕನ್ ತೂಯೆರ್. ನಿರ್ದೇಶಕೆರ್ ವಿಜಯ್ ಕುಮಾರ್ ಕೊಡಿಯಾಲ್ ಬೈಲ್ ದಂಪತಿಲೆನ್ ಸಂಘಟನೆದ ಮುತಾಲಿಕೆಡ್ ತೌಳವ ರಂಗ ಚಾಣಕ್ಯೆ ಪ್ರಶಸ್ತಿ ಕೊರ್ದು ಮಾನಾದಿಗೆ ಮಲ್ತೆರ್.

ಮಾ.23-30: ಶ್ರೀ ರಾಮ ಕ್ಷೇತ್ರಡ್ 63ನೇ ವರ್ಷದ ಶ್ರೀ ರಾಮ ತಾರಕ ಮಂತ್ರ ಸಪ್ತಾಹ ಬೊಕ್ಕ ಪ್ರತಿಷ್ಠಾ ಜಾತ್ರಾ ಉಚ್ಚಯ

ಧರ್ಮಸ್ಥಳ: ನಿತ್ಯಾನಂದ ನಗರದ ಶ್ರೀ ರಾಮಕ್ಷೇತ್ರ ಮಹಾಸಂಸ್ಥಾನಡ್ ಮಾ.23-30 ಮುಟ್ಟ 63ನೇ ವರ್ಷದ ಶ್ರೀ ರಾಮ ತಾರಕ ಮಂತ್ರದ ಸಪ್ತಾಹ ಅಂಚೆನೆ ಶ್ರೀ ರಾಮಕ್ಷೇತ್ರ ಮಹಾಸಂಸ್ಥಾನದ ಪ್ರತಿಷ್ಠಾ ಜಾತ್ರಾ ಮಹೋಚ್ಚಯ ಬೊಕ್ಕ “ಮಹಾ ಬ್ರಹ್ಮರಥ ಉಚ್ಚಯ” ಲೇಸ್ ಭಾರಿ ಗೌಜಿಡ್ ನಡಪರೆ ಉಂಡು.

ಮಾ.23 ಕ್ಕ್ ಕಾಂಡೆ 9.30 ಗಂಟೆಗ್ ಶ್ರೀ ರಾಮ ನಾಮ ಸಪ್ತಾಹ ಲೇಸ್ ಉದಿಪನ ಆಯರೆ ಉಂಡು. ಶ್ರೀ ರಾಮ ಕ್ಷೇತ್ರದ ಪೀಠಾಧೀಶೆರ್ ಸದ್ಗುರು ಶ್ರೀ ಶ್ರೀ ಬ್ರಹ್ಮಾನಂದ ಸರಸ್ವತಿ ಸ್ವಾಮಿಲು ದಿವ್ಯ ಸಾನಿಧ್ಯ ವಹಿಸೊನರೆ ಉಲ್ಲೆರ್. ಮಾ.24 ಕ್ಕ್ ಕಾಂಡೆ 8 ಗಂಟೆಗ್ ಗಣಯಾಗ, ಗುರುಕ್ಲೆಗ್ ವಿಶೇಷ ಅಲಂಕಾರ ಪೂಜೆ, ಮಧ್ಯಾಹ್ನ ಮಹಾಪೂಜೆ ನಡತ್ ದ್ ಬಯ್ಯ 7 ಗಂಟೆಗ್ ಶ್ರೀ ಗುರುದೇವೆರ್‍ನ ಉತ್ಸವ ಮೂರ್ತಿಲೆಗ್ ಬಲಿ ಉತ್ಸವ, ಉತ್ಸವ ಪೂಜೆ ನಡಪರೆ ಉಂಡು.

8 ದಿನಲ ಧಾರ್ಮಿಕ, ವೈದಿಕ ಅಂಚನೆ ಸಾಂಸ್ಕೃತಿಕ ಕಾರ್ಯಕ್ರಮದ ಒರುಟ್ಟು ಈ ಲೇಸ್ ನಡಪರೆ ಉಂಡು. ಈ ಪುಣ್ಯಕಾರ್ಯಗ್ ಮಾತ ಭಕ್ತೆರ್ ಬತ್ತ್‌ದ್ ಲೇಸ್‌ನ್ ಪೊರ್ಲು ಮಲ್ತ್ ಕೊರೊಡು ಪಂದ್ ಆಡಳಿತ ಸಮಿತಿದ ಸರ್ವ ಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಕೆಂಜಾರು ಶ್ರೀ ರಾಮಾಂಜನೇಯ ದೇವಲ್ಯಡ್ ಪುನಃ ಪ್ರತಿಷ್ಠೆ ಅಂಚನೆ ಬ್ರಹ್ಮಕಲಶಾಭಿಷೇಕ

ಕುಡ್ಲ: ಪೇಜಾವರ ಮಾಗಣೆದ ಕೆಂಜಾರು ಶ್ರೀ ರಾಮಾಂಜನೇಯ ದೇವಲ್ಯಡ್ ಶ್ರೀ ರಾಮಾಂಜನೇಯ ದೇವೆರೆನ ಪುನಃ ಪ್ರತಿಷ್ಠೆ ಅಂಚನೆ ಬ್ರಹ್ಮಕಲಶಾಭಿಷೇಕ ಮಾ.27-30 ಮುಟ್ಟ ನಡಪರೆ ಉಂಡು.

1997ನೇ ಇಸ್ವಿಡ್ ಹನುಮ ಜಯಂತಿದಾನಿ ಭಜನೆ ಸುರು ಮಲ್ತ್‌ದ್, ಶ್ರೀ ರಾಮಾಂಜನೇಯ ಮಂದಿರ ಪಂದ್ ನೋಂದಣಿ ಮಲ್ತ್‌ದ್, 2008 ತ್ತ ಜನವರಿ 27 ಕ್ಕ್ ಜೀಣೋದ್ಧಾರ ಆದ್, ಶ್ರೀ ದೇವೆರೆನ ಮೂರ್ತಿ ಪ್ರತಿಷ್ಠೆ ಮಲ್ತ್‌ದ್, ಪ್ರತಿ ದಿನ ಕಾಂಡೆ ಬೊಕ್ಕ ಬಯ್ಯಗ್ ಪೂಜೆ ನಡತೊಂದು ಉಂಡು. ಇತ್ತೆ ಶ್ರೀ ರಾಮಾಂಜನೇಯ ದೇವೆರೆನ ಪುನಃ ಪ್ರತಿಷ್ಠೆ ಅಂಚನೆ ಬ್ರಹ್ಮಕಲಶಾಭಿಷೇಕ ನಡಪರೆ ಇತ್ತ್ ದ್ ಮಾ.30 ಕ್ಕ್ ಪುಲ್ಯಕಾಂಡೆ 6.43 ತ್ತ ಮೀನ ಲಗ್ನ ಮುರ್ತಡ್ ದೇವೆರೆಗ್ ಬ್ರಹ್ಮಕಲಶಾಭಿಷೇಕ ನಡಪರೆ ಉಂಡು.

4 ದಿನಲ ಬೇತೆ ಬೇತೆ ರೀತಿದ ಧಾರ್ಮಿಕ, ವೈದಿಕ ಬೊಕ್ಕ ಸಾಂಸ್ಕೃತಿಕ ಕಾರ್ಯಕ್ರಮದ ಒರುಟ್ಟು ಈ ಲೇಸ್ ಭಾರೀ ಗೌಜಿಡ್ ನಡಪರೆ ಉಂಡು. ಈ ಲೇಸ್‌ಗ್ ಮಾತ ಭಕ್ತೆರ್ ಬತ್ತ್‌ದ್ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ದೇವಲ್ಯದ ಜೀರ್ಣೋದ್ಧಾರ ಸಮಿತಿದ ಅಧ್ಯಕ್ಷೆರ್ ಶಶಿಧರ ಶೆಟ್ಟಿ, ಮರವೂರು ಬೊಕ್ಕ ಸರ್ವ ಸದಸ್ಯೆರ್ ಅಂಚನೆ ಆಡಳಿತ ಸಮಿತಿದ ಅಧ್ಯಕ್ಷೆರ್ ಮಹಾಬಲ ಪೂಜಾರಿ ಬಂಡಸಾಲೆ ಬೊಕ್ಕ ಸರ್ವ ಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

Tulu Koota Mangalore – Ratnavarma Heggade Award 2022-23 announced ದೀಪಕ್ ಕೋಟ್ಯಾನ್, ಪರಮಾನಂದ ಸಾಲ್ಯಾನ್, ಅಕ್ಷರ ಶೆಟ್ಟಿ ಮೊಕ್ಲೆನ ನಾಟಕ ಬೂಕುಲೆಗ್ ರತ್ನವರ್ಮ ಹೆಗ್ಗಡೆ ಪ್ರಶಸ್ತಿ

ಕುಡ್ಲ: ಶ್ರೀ ಕ್ಷೇತ್ರ ಧರ್ಮಸ್ಥಳದ ಧರ್ಮಾಧಿಕಾರಿ ಡಾ| ಡಿ. ವೀರೆಂದ್ರ ಹೆಗ್ಗಡೆ ಮೆರೆನ ಮುತಾಲಿಕೆಡ್ ತುಳುಕೂಟ ಕುಡ್ಲ ಕೊರ್ಪಿನಂಚಿತ್ತಿನ 2022-23 ನೇ ವರ್ಷದ ರತ್ನವರ್ಮ ಹೆಗ್ಗಡೆ ಪ್ರಶಸ್ತಿ ಪ್ರಕಟನೆ ಮಲ್ತ್‌ದೆರ್.

ಸುರುತ್ತ ಇನಾಮುನ್ ದೀಪಕ್ ಎಸ್. ಕೋಟ್ಯಾನ್ ಕುತ್ತೆತ್ತೂರು (ಮಾಯದಪ್ಪೆ ಮಾಯಂದಾಲ್), ರಡ್ಡನೇ ಇನಾಮುನು ಪರಮಾನಂದ ಸಾಲಿಯಾನ್ ಸಸಿಹಿತ್ಲು (ಪುರ್ಸೆ ಬಿರ್ಸೆ ಶ್ರೀ ರಾಮೆ), ಮೂಜನೇ ಇನಾಮುನು ಅಕ್ಷರ ಆರ್. ಶೆಟ್ಟಿ ಪಡಂಗಡಿ (ಪೆರ್ಗ) ಮೊಕುಲು ಗೆಂದ್ ದೆರ್.

ಪೊಸ ನಾಟಕ ಕೃತಿಗ್ ಪ್ರತೀ ವರ್ಷ ಸುರುತ್ತ, ರಡ್ಡನೇ, ಮೂಜನೇ ಪ್ರಶಸ್ತಿನ್ ಡಾ| ಹೆಗ್ಗಡೆರ್ ಅರೆನ ಅಮ್ಮೆರ್ನ ನೆಂಪುಗಾದ್ ಕರಿನ 46 ವರ್ಷರ್ದ್ ಕೊರೊಂದು ಬರೊಂದುಲ್ಲೆರ್. ಪ್ರಶಸ್ತಿದ ಇನಾಮು ಕ್ರಮವಾದ್ 10 ಸಾರ ರೂಪಾಯಿ, 8 ಸಾರ ರೂಪಾಯಿ ಬೊಕ್ಕ 6 ಸಾರ ರೂಪಾಯಿ ತಿಕ್ಕುಂಡು. ಪತ್ರಕರ್ತೆರ್ ಮನೋಹರ್ ಪ್ರಸಾದ್, ತುಳು ಕನ್ನಡ ಸಾಹಿತಿ ಮುದ್ದು ಮೂಡುಬೆಳ್ಳೆ ಅಂಚನೆ ರಂಗಕರ್ಮಿ ವಿ.ಜಿ.ಪಾಲ್ ಮೊಕುಲೆನ ಸಮಿತಿ ಪ್ರಶಸ್ತಿಗ್ ಕೃತಿಲೆನ್ ಆಯ್ಕೆ ಮಲ್ತ್‌ದೆರ್.

ಎ.15 ಕ್ಕ್ ಪ್ರಶಸ್ತಿ ಪಟ್ಟುನ ಲೇಸ್: 
ಎ.15 ಕ್ಕ್ ಶ್ರೀ ಮಂಗಳಾದೇವಿ ದೇವಲ್ಯದ ಜಾಗೆಡ್ ತುಳುಕೂಟ ಆಚರಣೆ ಮಲ್ಪುನ ಬಿಸುಪರ್ಬ ಲೇಸ್‌ಡ್ ಬಿನ್ನೆರ್‍ನ ಸಮ್ಮುಖಡ್ ಪ್ರಶಸ್ತಿ ಕೊರಿಯರೆ ಉಲ್ಲೆರ್ ಪಂದ್ ಅಧ್ಯಕ್ಷೆರ್ ಬಿ.ದಾಮೋದರ ನಿಸರ್ಗ ಬೊಕ್ಕ ಪ್ರಧಾನ ಕಾರ್ಯದರ್ಶಿ ವರ್ಕಾಡಿ ರವಿ ಅಲೆವೂರು ಪ್ರಕಟನೆಡ್ ತೆರಿಪಾದೆರ್.

Tulu Koota Mangalore — Ratnavarma Heggade Award 2022-23 announced

The Ratnavarma Heggade Award is given by Tulu Koota Mangalore under the leadership of Veerendra Heggade, Dharmasthala . The award is given to new drama work written in the course of the year. The award has been given from the past 46 years.

The first prize was given to Deepak S Kotian, Kathetooru ( Mayadappe Mayandalu) ; the second prize goes to Paramananda Salian , Sasihitlu ( Purshe Birshe Sri Rame ) and the third place by Akshar R Shetty ( Perga). The award presentation will be on April 15 th.