Sat. Nov 21st, 2026

October 6, 2026

ಅ.11-21: ಬೆಳ್ಮಣ್ಣು ಶ್ರೀ ದುರ್ಗಾಪರಮೇಶ್ವರಿ ದೇವಸ್ಥಾನಡ್ ಮಾರ್ನೆಮಿದ ಉಚ್ಚಯ

ಕಾರ್ಲ : ಇತಿಹಾಸ ಪ್ರಸಿದ್ಧ ಬೆಳ್ಮಣ್ಣು ಶ್ರೀ ದುರ್ಗಾಪರಮೇಶ್ವರಿ ದೇವಸ್ಥಾನಡ್ ಮಾರ್ನೆಮಿ ಉಚ್ಚಯ (ನವರಾತ್ರಿ ಉತ್ಸವ) ಅಕ್ಟೋಬರ್ 11 ತಾರೀಕ್‌ರ್ದ್ 21 ತಾರೀಕ್ ಮುಟ್ಟ ನಡಪರೆ ಉಂಡು.
​ಅ.11 ಐತಾರಬಯ್ಯಡ್
​ 6 ಗಂಟೆಗ್ ನವರಾತ್ರಿ ಸಾಂಸ್ಕೃತಿಕ ಕಾರ್ಯಕ್ರಮದ ಉದ್ಘಾಟನೆ, ಬೊಕ್ಕ ಉಡುಪಿ ದರ್ಪಣ ನೃತ್ಯ ಸಂಸ್ಥೆದ ವಿದುಷಿ ರಕ್ಷಾ ಬೊಕ್ಕ ರಮ್ಯಾ ಬಳಗಡ್ದ್ “ನೃತ್ಯ ಕಲರವ”. 6:30 ಗಂಟೆಗ್ ಬೆಳ್ಮಣ್ಣು ಪುನಾರು ಶ್ರೀ ಶಾಸ್ತಾವು ಬ್ರಹ್ಮಲಿಂಗೇಶ್ವರ ಭಜನಾ ಮಂಡಳಿ ಬೊಕ್ಕ ಬೆಳ್ಮಣ್ಣು ಭಜನಾ ಮಂಡಳಿಡ್ದ್ ಭಜನೋತ್ಸವ.
​ಅ.12 ಸೋಮಾರ ಬಯ್ಯಡ್ 6 ಕ್ಕ್ ಡಾ. ಪ್ರಖ್ಯಾತ್ ಶೆಟ್ಟಿ ಅಳಿಕೆ ಸಂಯೋಜನೆಡ್ ಸುಪ್ರಸಿದ್ಧ ಅತಿಥಿ ಕಲಾವಿದೆರೆಡ್ದ್ “ಪುಣ್ಯಕೋಟಿ” ಯಕ್ಷಗಾನ. 6:30ಕ್ಕ್ ಶ್ರೀ ವನದುರ್ಗ ಭಜನಾ ಮಂಡಳಿ, ಹಳೆ ವಿದ್ಯಾರ್ಥಿ ಸಂಘ ಹೊಸಮಾರು ಬೆಳ್ಮಣ್ಣು ಬೊಕ್ಕ ಮಹಿಳಾ ಭಜನಾ ಮಂಡಳಿ ಬೆಳ್ಮಣ್ಣು ಮೊಕಲೆರ್ದ್ ಭಜನೋತ್ಸವ ನಡಪರೆ ಉಂಡು.
​ಅ.13 ಬಯ್ಯಡ್ ಅಂಗಾರೆ
​ವಿದುಷಿ ಭಾರತಿ ಸುರೇಶ್ (ಶ್ರೀ ಶಾರದ ನಾಟ್ಯಾಲಯ ಕುಳಾಯಿ ಹೊಸಬೆಟ್ಟು) ಶಿಷ್ಯೆರೆಡ್ದ್ “ನೃತ್ಯ ಸಂಭ್ರಮ” ಬೊಕ್ಕ ಬೆಳ್ಮಣ್ಣು ಪುನಾರು ಶ್ರೀ ಶಾಸ್ತಾವು ಬ್ರಹ್ಮಲಿಂಗೇಶ್ವರ ಮಹಿಳಾ ಭಜನಾ ಮಂಡಳಿಡ್ದ್ ಭಜನೋತ್ಸವ.
​ಅ. 14 ಬಯ್ಯಡ್
​ಸಂಗೀತ ವಿದುಷಿ ವಿಜಯ ಭಟ್ ನಿರ್ದೇಶನದ “ನಾದ ಸುಧಿ ಸಂಗೀತ ಕಲಾ ಮಂದಿರ ಬೆಂಗಳೂರು” ಮೊಕಲೆಡ್ದ್ “ಶಾಸ್ತ್ರೀಯ ಗಾನ ಸಂಗೀತ”.
​ಪಡುಬೆಳ್ಮಣ್ಣು ಶ್ರೀ ಮಹಾಲಿಂಗೇಶ್ವರ ಮಹಾಗಣಪತಿ ಭಜನಾ ಮಂಡಳಿಡ್ದ್ ಭಜನೋತ್ಸವ.
​ಅ.15 ಬಯ್ಯಡ್​ಮಂಗಳೂರು ಗಾನ ನೃತ್ಯ ಅಕಾಡೆಮಿದ ವಿದುಷಿ ವಿದ್ಯಾಶ್ರೀ ರಾಧಾಕೃಷ್ಣ ಮೆರೆನ ಶಿಷ್ಯೆರಾಯಿನ ಕುಮಾರಿ ಶ್ರಾವಣಿ ಕೆ. ಭಟ್ ಬೊಕ್ಕ ದ್ವಿತಿ ಶೆಟ್ಟಿ ಮೊಕಲೆಡ್ದ್ “ನೃತ್ಯಾರ್ಪಣಂ”.
​ಬೋಳ ಶ್ರೀ ಮೃತ್ಯುಂಜಯ ರುದ್ರ ಸೋಮನಾಥೇಶ್ವರ ಭಜನಾ ಮಂಡಳಿಡ್ದ್ ಭಜನೋತ್ಸವ.
​ಅ.16 ಬಯ್ಯಡ್ ಬೋಳ ನಮಿತಾ ಬೊಕ್ಕ ಬಳಗಡ್ದ್ “ಭಕ್ತಿ ರಸಮಂಜರಿ”. ​ಮುಲ್ಲಡ್ಕ ನಾನಿಲ್ತಾರು ಶ್ರೀ ದುರ್ಗಾ ಭಜನಾ ಮಂಡಳಿಡ್ದ್ ಭಜನೋತ್ಸವ.
​ಅ.17 ಸನಿವಾರ
​ವಿದ್ವಾನ್ ರಾಜೇಶ್ ರಾವ್ ಬಾಗಲೋಡಿ ಶಿಷ್ಯವೃಂದಡ್ದ್ “ಕೊಳಲು ವಾದನ” ಕಾರ್ಯಕ್ರಮ. ಅವೆರ್ದ್ ಬೊಕ್ಕ
​ಬೋಳ ಮಲ್ಲಿಗೆ ಶ್ರೀ ಬ್ರಹ್ಮ ಬೈದರ್ಕಳ ಭಜನಾ ಮಂಡಳಿಡ್ದ್ ಭಜನೋತ್ಸವ.​ಅ. 18 ಐತಾರ ಬಯ್ಯಡ್ ​ಬೆಳ್ಮಣ್ಣು ಶ್ರೀ ದುರ್ಗಾಪರಮೇಶ್ವರಿ ಶೋಭಾನೆ ಬಳಗಡ್ದ್ ಪೌರಾಣಿಕ ನಾಟಕ “ಚೂಡಾಮಣಿ” (ಲಂಕಾ ದಹನ). ​ನಂದಳಿಕೆ ಅಬ್ಬನಡ್ಕ ಶ್ರೀ ದುರ್ಗಾಪರಮೇಶ್ವರಿ ಭಜನಾ ಮಂಡಳಿಡ್ದ್ ಭಜನೋತ್ಸವ.
​ಅ.19 ​ನಂದಳಿಕೆ ವಿಶಾಲ ಯಕ್ಷಗಾನ ಬಳಗಡ್ದ್ “ವಿದುರಾತಿಥ್ಯ” ತಾಳಮದ್ದಲೆ. ಬೊಕ್ಕ
​ಬೋಳ ಪೊಸರ್ಮ ಶ್ರೀ ಧೂಮಾವತಿ ಭಜನಾ ಮಂಡಳಿಡ್ದ್ ಭಜನೋತ್ಸವ.
​ಅ. 20 ಬಯ್ಯಡ್
​ಊರುದ ಪ್ರತಿಭೆಲೆಡ್ದ್ ಬೇತೆ ಬೇತೆ ಲೇಸ್ ಬೊಕ್ಕ ಪ್ರತಿಭಾ ಪುರಸ್ಕಾರ ಪಟ್ಟುನ ಲೇಸ್. ಅವೆರ್ದ್ ಬೊಕ್ಕ
​ಪಡುಬಿದ್ರಿ ಮಧ್ವ ನಗರದ ತರಂಗಿಣಿ ಮಿತ್ರವೃಂದಡ್ದ್ ಭಜನೋತ್ಸವ ನಡಪರೆ ಉಂಡು.
​ಪ್ರತಿ ದಿನ ರಾತ್ರಿ 8 ಗಂಟೆಗ್ ಮಹಾಪೂಜೆ ಆಯಿ ಬೊಕ್ಕ ಅನ್ನಸಂತರ್ಪಣೆ ಉಪ್ಪುಂಡು. ​ಅ.21 ಬುಧಾರ – ವಿಜಯ ದಶಮಿದಾನಿ ಮಧ್ಯಾಹ್ನ 12 ಗಂಟೆಗ್ ಮಹಾಪೂಜೆ ಆಯಿ ಬೊಕ್ಕ ಅನ್ನಸಂತರ್ಪಣೆ ಉಪ್ಪುಂಡು ಪಂದ್ ಕ್ಷೇತ್ರದ ಆಡಳಿತ ಮುಕ್ತೇಸರರಾಯಿನ ವೇದಮೂರ್ತಿ ಬಿ.ಕೆ. ವಿಘ್ನೇಶ್ ಭಟ್ ತೆರಿಪಾದೆರ್.

ಕಷ್ಟೊಡಿತ್ತಿನ ಕುಟುಂಬೊಗು ಇಲ್ಲ್ ಕಟ್‌ದ್ ಕೊರಿಯೆರೆ ದುಂಬಾತಿನ ಸಿದ್ದಕಟ್ಟೆ ಕುಲಾಲ ಸಂಘ

ಬಂಟ್ವಾಳ : ಕುಕ್ಕಿಪಾಡಿ ಗ್ರಾಮದ ಪೆಲತ್ತಬೆಟ್ಟುಡು ಇಲ್ಲ್ ಮಗ್‌ರ್ದ್ ಸಂಕಷ್ಟೊಡು ಇತ್ತಿನ ಅಪ್ಪೆ ಬೊಕ್ಕ ಮಗಲ್‌‌ಗ್ ಬೋಡಾದ್ ಪೊಸ ಇಲ್ಲನ್ ಕಟ್‌ದ್ ಕೊರಿಯರೆ ಸಿದ್ದಕಟ್ಟೆ ಕುಲಾಲ ಸುಧಾರಕ ಸಂಘದಕುಲು ಮಾನವೀಯ ನೆಲೆಟ್ಟ್ ದುಂಬಾತೆರ್.
​ದುಡ್ಡುದ ಅಭಾವ ಇತ್ತ್ಂಡಲಾ ದಾನಿನಕ್ಲೆನ ಸಕಾಯೊಡು ಇಲ್ಲದ ಬೇಲೆನ್ ಸುರು ಮಲ್ದಿನ ಸಂಘದ ಸದಸ್ಯೆರ್, ಕರಿನ ಆಜಿ ವಾರೊಡ್ದು ಸ್ವತಃ ಶ್ರಮದಾನ ಮಲ್ತ್‌ದ್ ಪಾಯೊಡ್ದು ಗೋಡೆ ಕಟ್ಟೆರೆ ಮುಟ್ಟದ ಬೇಲೆನ್ ಪೂರ್ಣ ಮಲ್ತ್‌ದೆರ್.
ಇತ್ತೆ ಇಲ್ಲಗ್ ಒಡಿಲ್ ಪಾಡುನ ಬೇಲೆ ನಡತೊಂದು ಇತ್ತ್‌ದ್, ಅಕ್ಟೋಬರ್ 4ಕ್ಕ್ ಕುಲಾಲ ಸೇವಾದಳೊದ ಸದಸ್ಯೆರ್ ಮಾಡ್‌ಗ್ ಒಡಿಲ್ ಪಾಡ್ದ್, ರಂಗ್ ಕೊರ್ದು ಜೋಡಿಸಾವುನೆಟ್ಟ್ ಸಕ್ರಿಯವಾದ್ ಪಾಲ್ ಪಡೆದೆರ್.
​ಸೇವಾದಳದ ದಳಪತಿ ಚಂದ್ರಶೇಖರ ಶಿವಾಜಿನಗರ, ಪ್ರಮುಖರಾಯಿನ ಪುರುಷೋತ್ತಮ ಸೌತೆಬಳ್ಳಿ, ಯಾದವ ಅಗ್ರಬೈಲು, ಕವಿತಾ ಯಾದವ್ ಬೊಕ್ಕ ಸದಸ್ಯೆರ್ ಶ್ರಮದಾನೊಡು ಪಾಲ್ ಪಡೆದ್ ಬೇಲೆನ್ ಪೊರ್ಲು ಮಲ್ತ್ ಕೊರಿಯೆರ್. ಸಂಘದ ನಿಸ್ವಾರ್ಥ ಸೇವೆನ್ ಸಾರ್ವಜನಿಕೆರ್ ಮೆಚ್ಚಿದ್ ಪುಗರಿಯೆರ್.

ತುಳು ಭಾಷೆಗ್ ಕರ್ನಾಟಕ ರಾಜ್ಯದ ಅಧಿಕೃತ ಭಾಷೆಯಾದ್ ಮಾನ್ಯತೆ; ಒಡಿಪುಡು ಗೌಜಿದ ತುಳುವೆರೆ ದಿಬ್ಬಣ

ತುಳು ಭಾಷೆಗ್ ಕರ್ನಾಟಕ ರಾಜ್ಯದ ಅಧಿಕೃತ ಭಾಷೆಯಾದ್ ಮಾನ್ಯತೆ ತಿಕಿನ ಲೆಕ್ಕೊಡು ತುಳುಕೂಟ ಒಡಿಪು ಮುತಾಲಿಕೆಡ್ ಐತಾರ ನಗರಡ್ ಇಸೇಸ ತುಳುವೆರೆ ದಿಬ್ಬಣ ಬೊಕ್ಕ ಗೌಜಿ ಮಿನದನ ಲೇಸ್ ಗೌಜಿಡ್ ನಡತ್ಂಡ್.

ತುಳುಕೂಟದ ಅಧ್ಯಕ್ಷೆರ್ ಬಿ.ಜಯಕರ ಶೆಟ್ಟಿ ಇಂದ್ರಾಳಿ ಮೆರೆನ ಅಧ್ಯಕ್ಷತೆಡ್ ನಡತಿನ ತುಳುವೆರೆ ದಿಬ್ಬಣಗ್ ಕುಂಜಿಬೆಟ್ಟು ರಿಕ್ಷಾ ನಿಲ್ದಾಣರ್ದ್ ಚಾಲನೆ ಕೊರಿಯೆರ್. ತುಳುಕೂಟದ ಸದಸ್ಯೆರ್ ಬೊಕ್ಕ ಬೇತೆ ಬೇತೆ ತುಳು ಸಂಘಟನೆಲೆನ ಪದುಕೆರ್ ಪಾಲ್ ಪಡೆಯಿನ ಮೆರವಣಿಗೆಡ್ ಬಿನ್ನೆರೆನ್ ಅಲಂಕೃತ ಗಾಡಿಡ್ ಯಕ್ಷಗಾನ ಕಲಾರಂಗದ ಐವೈಸಿ ಸಭಾಂಗಣಡ್ ಲೆತೊಂದು ಬತ್ತೆರ್.

ಕಾಪು ಶಾಸಕೆರ್ ಗುರ್ಮೆ ಸುರೇಶ್ ಶೆಟ್ಟಿ, ಮಾಜಿ ಸಚಿವೆರ್ ವಿನಯಕುಮಾರ್ ಸೊರಕೆ, ಮಾಜಿ ಶಾಸಕೆರ್ ಕೆ. ರಘಪತಿ ಭಟ್, ಉದ್ಯಮಿ ಪ್ರಸಾದ್ ರಾಜ್ ಕಾಂಚನ್ ಸೇರಿನಂಚನೆ ಬಿನ್ನೆರ್ ಮೆರವಣಿಗೆಡ್ ಪಾಲ್ ಪಡೆದಿತ್ತೆರ್.

ಬೊಕ್ಕ ಐವೈಸಿ ಸಭಾಂಗಣಡ್ ತುಳು ಭಾಷೆಗ್ ಮಾನ್ಯತೆ ಲೇಸ್, “ತುಳು ಮಿನದನ” ಬೊಕ್ಕ ವಿಶ್ವಪ್ರಭಾ ಮುತಾಲಿಕೆಡ್ ಎಸ್.ಯು ಪಣಿಯಾಡಿ ನೆಂಪುದ ತುಳು ಕಾದಂಬರಿ ಪ್ರಶಸ್ತಿ ಪ್ರದಾನ ಲೇಸ್ ನಡತ್ಂಡ್.

ಲೇಸ್ ಡ್ ಶಾಸಕೆರ್ ಯಶಪಾಲ್ ಸುವರ್ಣ ಪಾತೆರ್ದ್, ತುಳು ಸಂಘಟನೆಲು ಒಟ್ಟಾದ್ ಎಪೊಲ ತುಳು ಭಾಷೆದ ಲೇಸ್ ಡ್ ನಡಪಾವುನೆರ್ದ್ ತುಳುನ್ ಸಂವಿಧಾನದ ಏಳ್ಮನೇ ಪರಿಚ್ಛೇದಗ್ ಸೇರ್ಸಾಯಿನವು ಪೊರ್ಂಬಾಟಗ್ ನನಾತ್ ಬಲ ತಿಕಿಯೆರೆ ಉಂಡು ಪಂದ್ ಪಂಡೆರ್.

ತುಳು ಭಾಷೆಗ್ ಏಳ್ಮನೇ ಪರಿಚ್ಛೇದದ ಮಾನ್ಯತೆ ತಿಕ್ಂಡ‌ ಸುಮಾರ್ ಪ್ರಯೋಜನಲು ತಿಕಿಯೆರೆ ಉಂಡು. ತುಳುವೆರೆಗ್ ಮೀಸಲಾತಿ ಸೇರಿನಂಚೆನೆ ಬೇತೆ ಬೇತೆ ಬೇಡಿಕೆಲೆನ್ ದುಂಬು ಕೊನೊಯೆರೆ ಅವಕಾಶ ತಿಕಿಯೆರೆ ಉಂಡು. ಈ ದಿಟ್ಟಿಡ್ ಕೇಂದ್ರ ಬೊಕ್ಕ ರಾಜ್ಯ ಸರಕಾರಲೆನ ದುಂಬು ಒಗ್ಗಟ್ಟ್ ರ್ದ್ ಬೇಡಿಕೆಲೆನ್ ಮಂಡಿಸಾಂಡ ಅವು ನೇರವೇರುನ ವಿಶ್ವಾಸ ಉಂಡು ಪಂದ್ ಪಂಡೆರ್.

ತುಳು ಚಳುವಳಿದ ನೇತಾರ ದಿ.ಎಸ್.ಯು ಪಣಿಯಾಡಿ ಮೆರೆನ ನೆಂಪುಗಾದ್ ಕೊರ್ಪಿನ 31ನೇ ವರ್ಷೊದ ಕಾದಂಬರಿ ಪ್ರಶಸ್ತಿನ್ ಪುತ್ತೂರುದ ಉಪತಹಶೀಲ್ದಾರ್ ಸುಲೋಚನಾ ಪಿ.ಕೆ ಮೆರೆನ ‘ದಧೂಟಿಬನ’ ಕಾದಂಬರಿಗ್ ಪ್ರಧಾನ ಮಲ್ದೆರ್. ಕೃತಿಗ್ ಪಲ್ಲಕ್ಕಿಡ್ ಕನತ್ ದ್ ಇಸೇಸವಾದ್ ಬುಡುಗಡೆ ಮಲ್ದೆರ್.

ತುಳು ಭಾಷೆಗ್ ಅಧಿಕೃತ ಮಾನ್ಯತೆ ಕೊರ್ಪಿನ ಪೊರ್ಂಬಾಟಡ್ ಪ್ರಮುಖ ಪಾತ್ರ ಒಯಿಸೊನ್ನ ಕುಡ್ಲ ಅಖಿಲ ಭಾರತ ತುಳು ಒಕ್ಕೂಟದ ಅಧ್ಯಕ್ಷೆರ್ ಎ.ಸಿ ಭಂಡಾರಿ ಮೆರೆಗ್ ಸನ್ಮಾನ ಮಲ್ತೆರ್. ಎಸ್ಎಲ್ ಸಿ ಪರೀಕ್ಷೆಡ್ ತುಳು ಇಸಯಡ್ ಶೇ.100% ಮಾರ್ಕ್ ಪಡೆಯಿನ ವಿದ್ಯಾರ್ಥಿಲೆಗ್ ಈ ಪೊರ್ತುಡು ಮಾನಾದಿಗೆ ಮಲ್ತೆರ್.

ಉದ್ಯಮಿ ಪ್ರಸಾದ್ ರಾಜ್ ಕಾಂಚನ್ ಪಾತೆರ್ದ್, ಅವಿಭಜಿತ ದಕ್ಷಿಣ ಕನ್ನಡ ಜಿಲ್ಲೆಡ್ ತುಳು ಭಾಷೆದ ಬೆಳವಣಿಗೆಗ್ ತುಳು ಸಮ್ಮೇಳನ ಆಯೋಜನೆ ಮಲ್ಪುನ ಅಗತ್ಯ ಉಂಡು. ಅಧಿಕೃತ ಮಾನ್ಯತೆ ತಿಕಿನ ಲೆಕ್ಕೊಡು ಶಾಲೆಡ್ ತುಳು ಭಾಷೆನ್ ತುಳು ಲಿಪಿಟ್ಟ್ ಕಲ್ಪುನ ವ್ಯವಸ್ಥೆ ಮಲ್ಪೊಡು. ತುಳು ಕಲಿಕೆನ್ ಕಡ್ಡಾಯ ಮಲ್ಪುನ ಮುಕೇನ ಭಾಷೆಗ್ ನನಾತ್ ಮಾನ್ಯತೆ ತಿಕುಲೆಕ್ಕ ಮಲ್ಪೊಡು ಪಂದ್ ಪಂಡೆರ್.

ಅಖಿಲ ಭಾರತ ತುಳು ಒಕ್ಕೂಟದ ಗೌರವಾಧ್ಯಕ್ಷೆರ್ ಬರೋಡಾ ಶಶಿಧರ ಶೆಟ್ಟಿ ಪಾತೆರ್ದ್, ತುಳು ರಾಜ್ಯದ ರಡ್ಡನೇ ಅಧಿಕೃತ ಭಾಷೆಯಾದ್ ಘೋಷಣೆ ಆಯಿರ್ನೆದಾವೆರ ಭಾಷೆದ ಅಭಿವೃದ್ಧಿಗ್ ಎಚ್ಚದ ಅನುದಾನ ತಿಕುನ ನಿರೀಕ್ಷೆ ಉಂಡು.‌ ನನದ ಗುರಿಯಾದ್ ತುಳು ಭಾಷೆನ್ ಸಂವಿಧಾನದ ಏಳ್ಮನೇ ಪರಿಚ್ಛೇದಗ್ ಸೇರ್ಸಾವುನ ಪ್ರಯತ್ನ ಮಲ್ಪೊಡು ಪಂದ್ ಪಂಡೆರ್.

ಅಧ್ಯಕ್ಷತೆನ್ ಒಯಿಸೊನ್ನ ತುಳುಕೂಟದ ಅಧ್ಯಕ್ಷೆರ್ ಬಿ. ಜಯಕರ ಶೆಟ್ಟಿ ಇಂದ್ರಾಳಿ ಪಾತೆರ್ದ್, ತುಳು ಭಾಷೆಡೇ ನಮ್ಮ ಸಂಸ್ಕೃತಿ ಬೊಕ್ಕ ಸಂಸ್ಕಾರ ಉಂಡು. ಉದ್ಯೋಗ ಬೊಕ್ಕ ಉದ್ಯಮದ ಲೆಕ್ಕೊಡು ಪರವೂರುಗು ಪೋಡಲ ಇಲ್ಲಲ್ ತುಳುನ್ ಪಾತೆರುನ ಮುಕೇನ ನನದ ಪೀಳಿಗೆಗ್ ಭಾಷೆನ್ ಪರಿಚಯ ಮಲ್ಪೊಡು.‌ ನಮ್ಮ ದೈವ- ದೇವೆರ್, ಆಚರಣೆ ಬೊಕ್ಕ ಸಂಪ್ರದಾಯಲೆನ ಬಗ್ಗೆ ಜೋಕ್ಲೆಗ್ ತೆರಿಪಾವೊಡು ಪಂದ್ ಪಂಡೆರ್.

ಅಖಿಲ ಭಾರತ ತುಳು ಒಕ್ಕೂಟದ ಗೌರವಾಧ್ಯಕ್ಷೆರ್ ಬರೋಡಾ ಶಶಿಧರ ಶೆಟ್ಟಿ, ಮಾಜಿ ಶಾಸಕೆರ್ ಕೆ.ರಘಪತಿ ಭಟ್, ತುಳು ಸಂಘ ಬರೋಡಾದ ಗೌರವಾಧ್ಯಕ್ಷೆರ್ ದಯಾನಂದ ಬೋಂಟ್ರ, ಉದ್ಯಮಿ ಪ್ರಸಾದ್ ರಾಜ್ ಕಾಂಚನ್, ಯುವ ಉದ್ಯಮಿ ಸುಭಾಷ್ ಸಾಲ್ಯಾನ್ ನೆಲ್ಲಿಕಟ್ಟಿ, ಸಾಂಗ್ಲಿ ದಿವಾಕರ್, ಯಕ್ಷಗಾನ ಅಕಾಡೆಮಿದ ಮಾಜಿ ಅಧ್ಯಕ್ಷೆರ್ ಪ್ರೊ. ಎಂ.ಎಲ್ ಸಾಮಗ, ಬಹ್ರೈನ್ ರಾಜಕುಮಾರ್, ತುಳುಕೂಟದ ಉಪಾಧ್ಯಕ್ಷೆರ್ ಭುವನ ಪ್ರಸಾದ್ ಹೆಗ್ಡೆ, ಡಾ.ವಿ.ಕೆ ಯಾದವ್, ಕಾರ್ಯದರ್ಶಿ ಗಂಗಾಧರ್ ಕಿದಿಯೂರು, ತುಳುವೆರೆ ದಿಬ್ಬಣ ಸಂಚಾಲಕೆರ್ ದಿವಾಕರ್ ಸನಿಲ್, ಹೃದಯಂ ಫೌಂಡೇಶನ್ ದ ಪ್ರವರ್ತಕೆರ್ ಸುಭಾಷ್ ಸಾಲ್ಯಾನ್ ನೆಲ್ಲಿಕಟ್ಟೆ, ಶೋಭಾ ಪಾಲ್ ಪಡೆದಿತ್ತೆರ್.

ವಾಸಂತಿ ಅಂಬಲಪಾಡಿ ಕೃತಿ ಪರಿಚಯ ಮಲ್ತೆರ್. ಪಣಿಯಾಡಿ ಕಾದಂಬರಿ ಪ್ರಶಸ್ತಿ ಸಂಚಾಲಕೆರ್ ಪ್ರಕಾಶ್ ಸುವರ್ಣ ಕಟಪಾಡಿ ಸೊಲ್ಮೆ ಸಂದಾಯೆರ್. ನಿವೃತ್ತ ಉಪನ್ಯಾಸಕೆರ್ ದಯಾನಂದ ಡಿ. ಕಿದಿಯೂರು ಲೇಸ್ ನ್ ಸುಧಾರಿಕೆ ಮಲ್ತೆರ್.

ನಂದಳಿಕೆ ಅಬ್ಬನಡ್ಕ ಶ್ರೀ ದುರ್ಗಾಪರಮೇಶ್ವರಿ ಫ್ರೆಂಡ್ಸ್ ಕ್ಲಬ್ : 27ನೇ ವರ್ಷದ ನೂತನ ಪದಾಧಿಕಾರಿಲೆನ ಆಯ್ಕೆ

ನಂದೊಲ್ಗೆ : ರಾಜ್ಯ ಪ್ರಶಸ್ತಿ ವಿಜೇತ ಸಂಸ್ಥೆ ನಂದಳಿಕೆ ಅಬ್ಬನಡ್ಕ ಶ್ರೀ ದುರ್ಗಾಪರಮೇಶ್ವರಿ ಫ್ರೆಂಡ್ಸ್ ಕ್ಲಬ್‌ ‌ದ 27ನೇ ವರ್ಷದ ಪೊಸ ಪದಾಧಿಕಾರಿಗಳ ಆಯ್ಕೆ ಐತಾರ ನಡತಿನ ವಾರ್ಷಿಕ ಮಹಾಸಭೆಟ್ಟ್ ನಡತ್ಂಡ್.
ಸಮಿತಿದ ಅಧ್ಯಕ್ಷೆರಾದ್ ಸುರೇಶ್ ಪೂಜಾರಿ
ಸಂಚಾಲಕೆರಾದ್ ಸಂದೀಪ್ ವಿ. ಪೂಜಾರಿ ಅಬ್ಬನಡ್ಕ ,
ಗೌರವಾಧ್ಯಕ್ಷೆರಾದ್ ರಾಜು ಶೆಟ್ಟಿ ,
ನಿಕಟ ಪೂರ್ವಧ್ಯಕ್ಷೆರಾದ್ ದಿನೇಶ್ ಪೂಜಾರಿ ಬಿರೋಟ್ಟು
ಉಪಾಧ್ಯಕ್ಷೆರಾದ್ ಹರಿಣಿ ಪೂಜಾರಿ
ಕಾರ್ಯದರ್ಶಿಯಾದ್ ಸುಭಾಷ್ ಕುಮಾರ್
ಜೊತೆ ಕಾರ್ಯದರ್ಶಿ ಯಾದ್ ಪದ್ಮಶ್ರೀ ಪೂಜಾರಿ
ಕೋಶಾಧಿಕಾರಿ – ಶ್ರೀಕಾಂತ್ ಆಚಾರ್ಯ
ಮಹಿಳಾ ಸಂಘಟನಾ ಕಾರ್ಯದರ್ಶಿ – ವೀಣಾ ಆಚಾರ್ಯ ಮೊಕುಲು ಆಯ್ಕೆ ಆತೆರ್

ಕುಡ್ಲಡ್ 5ನೇ ವರ್ಷದ “ಪಿಲಿ ಅಜನೆ”: ಲೆಪ್ಪೋಲೆ ಬಿಡುಗಡೆ

ಕುಡ್ಲ : 5ನೇ ವರ್ಷದ “ಪಿಲಿ ಅಜನೆ” ಹುಲಿ ಕುಣಿತ ಕಾರ್ಯಕ್ರಮದ ಲೆಪ್ಪೋಲೆನ್ ಕುದ್ರೋಳಿ ಶ್ರೀ ಭಗವತಿ ದೇವಸ್ಥಾನ ಡ್ ಬಿಡುಗಡೆ ಮಲ್ತೆರ್.
ಮಂಗಳೂರು ನಗರದ ದೀಪಾ ಕಂಫರ್ಟ್ಸ್ ಸಮೀಪ ಶ್ರೀ ಪ್ರಮೋದ್ ಕರ್ಕೇರ ಬೊಕ್ಕ ಪಿಲಿ ಅಜನೆ ತಂಡದ ನೇತೃತ್ವಡ್ ಯಶಸ್ವಿಯಾದ್ ಆಯೋಜನೆ ಮಲ್ತೊಂದು ಬರ್ಪಿನ “ಪಿಲಿ ಅಜನೆ” ವಿನೂತನ ಕಾರ್ಯಕ್ರಮ ಇತ್ತೆ 5ನೇ ವರ್ಷಗ್ ಪಜ್ಜೆ ಪಾಡ್ದ್ಂಡ್.
ಕರಿನ ನಾಲ್ ವರ್ಷರ್ದ್ ಕುಡ್ಲಡ್ ಕೆಲವು ಪುಗರ್ತೆದ ಪಿಲಿ ಕುಣಿತ ತಂಡದ ಭರ್ಜರಿ ಪ್ರದರ್ಶನದ ಮೂಲಕ ಜನಮನ ಗೆಂದ್‌ದಿನ “ಪಿಲಿ ಅಜನೆ” ಕಾರ್ಯಕ್ರಮವ ಈ ಸರ್ತಿಲ ಅದ್ಧೂರಿಯಾದ್ ನಡಪರೆ ಉಂಡು.
ಪುಗರ್ತೆದ ಪಿಲಿ ಕುಣಿತ ಕೂಟದಕ್ಲೆರ್ದ್ ಆಕರ್ಷಕ ಬೊಕ್ಕ ರೋಮಾಂಚನಕಾರಿ ಪ್ರದರ್ಶನ ನಡಪರೆ ಉಂಡು.
ಅಕ್ಟೋಬರ್ 21ಕ್ಕ್ ಬುಧವಾರ “ಪಿಲಿ ಅಜನೆ” ಕಾರ್ಯಕ್ರಮ ನಡಪರೆ ಇತ್ತ್‌ದ್, ಪಿಲಿ ಕುಣಿತ ಪ್ರದರ್ಶನರ್ದ್ ದುಂಬು ಬೇತೆ ಬೇತೆ ಸಾಂಸ್ಕೃತಿಕ ಕಾರ್ಯಕ್ರಮಲೆನ್ ಆಯೋಜನೆ ಮಲ್ತ್ದ ಪಂದ್ ಆಯೋಜಕೆರ್ ತೆರಿಪಾಯೆರ್. ಆಮಂತ್ರಣ ಪತ್ರಿಕೆ ಬಿಡುಗಡೆರ್ದ್ ದುಂಬು ಕುದ್ರೋಳಿ ಶ್ರೀ ಭಗವತಿ ದೇವಾಲಯಡ್ ವಿಶೇಷ ಪೂಜೆ ಸಂದಾಯೆರ್.
ಈ ಪೊರ್ತುಡು ಕಾರ್ಯಕ್ರಮದ ನೇತೃತ್ವ ವಹಿಸ್‌ದಿತ್ತಿನ ಪ್ರಮೋದ್ ಕರ್ಕೇರ, ಪ್ರೇಮ್ ಸಾಲ್ಯಾನ್, ಹಿತೇಶ್ ಬೇಕಲ್, ಕಾರ್ತಿಕ್, ರಕ್ಷಿತ್ ಆರ್. ಪೂಜಾರಿ, ಯಶ್ಪಾಲ್ ಸಾಲ್ಯಾನ್, ರಂಜಿತ್, ಹರ್ಷಿತ್, ಆಶೀಶ್, ಅನುಷ್, ಶಾರುಲ್, ಪ್ರದೀಪ್ ಸೇರ್ದ್ ಬೊಕ್ಕ ಪಿಲಿ ಅಜನೆ ತಂಡದ ಸದಸ್ಯೆರ್ ಮಾತ ಇತ್ತೆರ್.

You Missed