ಕುಡ್ಲ: ಬಜ್ಪೆ ಶ್ರೀ ಶನೈಶ್ಚರ ದೇವಸ್ಥಾನಡ್ ವರ್ಷೊದ ಜಾತ್ರೆ ಜ.3 ಸನಿಯಾರ ನಡಪರೆ ಉಂಡು.
ಆನಿ ಬೊಲ್ಪುಗು ಶ್ರೀ ಕ್ಷೇತ್ರದ ಮಹಾಗಣಪತಿ ಬೊಕ್ಕ ಪ್ರಧಾನ ದೇವತೆಲೆಗ್ ಗಣಹೋಮ, ಶ್ರೀ ನಾಗದೇವೆರೆಗ್ ಪಂಚಾಮೃತ ಅಭಿಷೇಕ, ಸಾರ್ವಜನಿಕ ಸಗ್ರಹಮುಖ ಶನಿಶಾಂತಿ ಹೋಮ, ಮಧ್ಯಾಹ್ನ ಮಹಾಪೂಜೆ, ಅನ್ನಸಂತರ್ಪಣೆ, ಭಜನೆ, ಬಯ್ಯಗ್ ದುರ್ಗಾನಮಸ್ಕಾರ ಪೂಜೆ, ರಾತ್ರೆ ದೇವೆರೆನ ಕಲಶ ಬಲಿ, ಮಂಗಳಾರತಿ ನಡಪರೆ ಉಂಡು.
ಅಂಚೆನೆ ಮಧ್ಯಾಹ್ನ ದೈವೊದ ಭಂಡಾರ ಏರ್ ದ್, ಬಯ್ಯಗ್ ಶ್ರೀ ಮಹಿಷಂದಾಯ ಬೊಕ್ಕ ಶ್ರೀ ಧೂಮಾವತಿ ಬಂಟ ದೈವೊಲೆನ ನೇಮ ನಡಪರೆ ಉಂಡು.
ಈ ಲೇಸ್ ಡ್ ಭಕ್ತೆರ್ ಮಾತೆರ್ಲಾ ಪಾಲ್ ಪಡೆದ್ ಶ್ರೀ ದೇವೆರೆನ ಸಿರಿಮುಡಿ ಗಂಧ ಪ್ರಸಾದ ದೆತೊಂದು ಶ್ರೀ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ದೇವಸ್ಥಾನದ ಧರ್ಮದರ್ಶಿಲು ಆನಂದ ಪೂಜಾರಿ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.