ಬಿತ್ತ್ ಲ್ ದ ಭಗವತಿ ಅಪ್ಪೆನ ಸಾನಿದ್ಯೊಡು ವರ್ಷದ ಪರ್ವ ” ನಡರಿ’

ಸಸಿಬಿತ್ತ್ ಲ್ದ ಶ್ರೀ ಭಗವತಿ ಅಪ್ಪೆನ ಸಾನಿದ್ಯೊಡು ವರ್ಷದ ಪರ್ವ, ನಡರಿ ಬಾರಿ ವಿಶೇಷವಾಯಿನ ಜಾತ್ರೆ

ಸಸಿಬಿತ್ತಿಲ್ ದ ಊರುದಕಲೆಗ್ ಉಂದು ಗ್ರಾಮದ ಜಾತ್ರೆ. ಜಾತಿ ಬಾಂಧವೆರೆಗ್ ಕುಲದೇವಿನ ಜಾತ್ರೆ. ಭಗವತಿನ್ ನಂಬಿಂಚಿತ್ತಿನ ಭಕ್ತೆರೆಗ್ ಭಗವತಿನ ನಡರಿದ ಜಾತ್ರೆ. ಬಪ್ಪನಾಡ್ ಜಾತ್ರೆದ ಕೊಡಿ ಜಾಯಿನೆ ರಡ್ಡನೇ ದಿನತಾನಿ ನಡಪುಂಡು ಸಸಿಬಿತ್ತ್‌ಲ್ ದ ಅಪ್ಪೆನ ನಡರಿದ ಪರ್ವ.

ಬಪ್ಪನಾಡ್ ದ ಅಪ್ಪೆ ಜಲದುರ್ಗೆ ಮೆಗ್ದಿಗ್ ಕೊರ್ತಿನ ಭಾಷೆದ ಪ್ರಕಾರ ಪಲ್ದಿ ಭಗವತಿ, ಮೆಗ್ದಿನ ಬಪ್ಪನಾಡ್ ದ ಸಾನಿದ್ಯೊಗು ಪೋಪೆರ್. ಆನಿಡ್ದ್ ಇನಿಕ್ ಲಾ ಈ ಮೆಗ್ದಿ ಪಲ್ದಿನ ಭಾವನಾತ್ಮಕ ಭೇಟಿದ ಐತಿಹಾಸಿಕ ಕ್ಷಣತ ಪೊರ್ಲುನು ತೂವರೆಗ್ ಪಂಡ್ ದೆ ಭಕ್ತೆರ್ ಲಕ್ಷಗಟ್ಟಳೆ ಸಂಖ್ಯೆಡ್ ಒಟ್ಟು ಸೇರುವೆರ್. ಬಪ್ಪನಾಡ್ ದ ಅಪ್ಪೆ ಜಲದುರ್ಗೆನ ವರ್ಷದ ಪರ್ವೊಗು ಹಳೆಯಂಗಡಿ ಕದಿಕೆದ ಭಂಡಾರದ ಇಲ್ಲಡ್ದ್ ಪಲ್ದಿ ಭಗವತೀ ಪರಿವಾರ ಸಮೇತ ಸುಮಾರ್ 8 ಮೈಲ್ ನಡತೊಂದು ಪೋದು ಮೆಗ್ದಿನ ವರ್ಷದ ಪರ್ವೊಡು ಜೊತೆಯಾಪಿನ ಆ ಪೊರ್ಲುನು ತೂಪಿನನೆ ಒಂಜಿ ಭಾಗ್ಯ.

ಮೆಗ್ದಿ ಪಲ್ದಿನ ಭೇಟಿದ ಪೊರ್ತುಡು ಮೆಗ್ದಿ ಜಲದುರ್ಗೆ ಕೈ ಸನ್ನೆ ಕಣ್ಣ್ ಸನ್ನೆದ ಭಾಷೆಡ್ ಅಪ್ಪೆ ಭಗವತೀ ಮಲಯಾಳಿ ಬಾಷೆಡ್ ಪಾತೆರುನ ಮೆಗ್ದಿ ಪಲ್ದಿನ ಮೋಕೆನ್ ತೂಪಿನನೆ ಒಂಜಿ ಸೌಭಾಗ್ಯ. ಮೆಗ್ದಿನ ಜಾತ್ರೆನ್ ಕರಿತೊಂದು ಬಪ್ಪನಾಡ್ ದ ಕೊಡಿ ಜಾಯಿನೆಗೆ ಅಪ್ಪೆ ಭಗವತೀ ಪರಿವಾರ ಸಮೇತ ಪಿರ ಕದಿಕೆದ ಭಂಡಾರದ ಇಲ್ಲಗ್ ಬತ್ತ್ ಸೇರೊನುವೆರ್. ಕುಡ ಬಯ್ಯಗ್ ತನ್ನ ವರ್ಷದ ಪರ್ವ ಕರಿತೊನರೆ ಭಂಡಾರದ ಇಲ್ಲಡ್ದ್ ತುದೆತ ಆಪೆದ ಮೈಟ್ ಉಪ್ಪುನ ತನ್ನ ಆದಿಸ್ಥಳ ಸಸಿಬಿತ್ತ್ ಲ್ ಗ್ ಆವೇಶೊಡು ಪರಿವಾರ ಸಮೇತ ಭಂಡಾರ ಏರೊಂದು ಪಲ್ಲೆಂಕಿಡ್ ಕುಲ್ಲೊಂದು ಅಪ್ಪೆ ಭಗವತೀ ತನ್ನ ಮೂಲ ಜಾಗೆನ್ ಸೇರೊನುವೆರ್.

ಮನದಾನಿ ಸಾನಿದ್ಯದ ನಾಗಗ್ ನಾಗ ತಂಬಿಲದೊಟ್ಟುಗು ಪೂಜೆ ಕರಿತೊಂದು ಬಯ್ಯಡ್ ರಾಶಿ ರಾಶಿ ಮಲ್ಲಿಗೆಡ್ ಸಿರಿ ಸಿಂಗಾರ ಆವೊಂದು ಬತ್ತಿನ ಭಕ್ತರೆಗ್ ಅನ್ನ ಪ್ರಸಾದೊನು ಕೊರೊಂದು ರಾತ್ರೆ 12 ಗಂಟೆಗ್ ಮಹಾಪೂಜೆದ ಒಟ್ಟುಗು ಅಪ್ಪೆ ಭಗವತೀ ಮಲ್ಲಿಗೆಡ್ ಐತ ಆತಿನ ದಂಡಿಗೆನ್ ಏರೊಂದು 64 ಸುತ್ತುದ ಸುತ್ತ ಬಲಿಕ್ ಪಿದಾಡುವೆರ್. ಅಂಚೆನೆ ಅಂಗನೊಡು ನಾಲ್ ಸುತ್ತಲಾ ಕಂಚಿಲ್ ದ ಜೋಕುಲು. ಈ ಕಂಚಿಲ್ ದ ಪರಕೆ ಅಪ್ಪೆಗ್ ಬಾರಿ ಪ್ರೀತಿದ ಸಿರಿ ಪರಕೆ. ಜೋಕುಲು ಬಾಲೆಲೆಗ್ ಸೀಕ್ ಸಂಕಡ ಬನ್ನಗ ಅಪ್ಪೆನ್ ನೆನತೊಂದು “ಜೋಕುಲೆಗ್ ಬೈದಿಂಚಿತ್ತಿನ ದುರಿತೊಲೆನ್ ದೂರ ಮಲ್ಪುಲೆ ಅಪ್ಪೆ ಭಗವತೀ.. ಇರೆಗ್ ಕಂಚಿಲ್ ದ ಪರಕೆ ಸಂದೈತ ಮಲ್ಪುವ” ಪಂದ್ ಕೈ ಮುಗಿದ್ ನಟೊನುವೆರ್. ಸೀಕ್ ಗುಣ ಆಯಿನೆಗೆ ಅಪ್ಪೆ ಭಗವತಿನ ಸನ್ನಿದಾನೊಡು ನಡರಿದ ಪರ್ವದಾನಿ ಜೋಕುಲೆನ್ ಮದ್ಮಯೆ ಮದಿಮಾಲ್ ಐತ ಮಲ್ಪಾವೊಂದು, ಅಪ್ಪೆನ ಮೋಕೆದ ಪರಕೆ ಕಂಚಿಲ್ ಸೇವೆನ್ ಸಂದಾವೆರ್.

ಸುರುತ ಸಾಲ್ ಸುತ್ತುದ ಬಲಿಕಲ್ಲ್ ಸೇವೆ, ದಾರಿಗಾಸುರನ್ ಸಂಹಾರ ಮಲ್ದಿನ ಸಂಕೇತವಾದ್ ಅಸುರ ಕ್ರಿಯೆಡ್ ಬೊಕ್ಕದ ದೇವತಾ ಕ್ರಿಯೆಡ್ ಬಲಿಕಲ್ಲ್ ಗ್ ಚರ್ವದೊಟ್ಟುಗು ಬಲಿ ಸೇವೆ ನಡಪುಂಡು. ಪುಲ್ಯ ಕಾಂಡೆ ನಡಪುನಂಚಿನ ಮೂರ್ತಿ ದರ್ಶನದ ಪೊರ್ತು. ಈ ಘಳಿಗೆಗೋಸ್ಕರನೇ ಇಡೀ ಊರುಗು ಊರೇ ಸೇರೊಂದು ಅಪ್ಪೆನ ಮೂರ್ತಿ ದರ್ಶನೊಡು ತೋಜಿದ್ ಬರ್ಪೆರ್ . ಬ್ರಾಹ್ಮೀ ಮುರ್ತೊಡು ಅಪ್ಪೆನ ಪ್ರಧಾನ ಅರ್ಚಕೆರಾದುಪ್ಪುನ ಕಾರ್ನವೆರ್ ಪಟ್ಟೆ ಸೀರೆ ತುತ್ತೊಂದು ಸಿರಿ ಸಿಂಗಾರ ಆತಿನ ಭಗವತೀ ಅಪ್ಪೆನ ಮೂರ್ತಿನ್ ಮಂಡೆಡ್ ಏರಾವೊಂದು, ಅಂಗನ ಜಪ್ಪುಂಚಿತ್ತಿನ ಪೊರ್ತು. ಅಂಗನದ ನಾಲ್ ಮೈಟ್ ಲಾ ಕಂಚಿಲ್ದ ಬಾಲೆಲೆನ್ ಪುಗ್ಗೆಲ್ ಡ್ ತುಂಬೊಂದು ಮಡಸ್ತಾನಾದೊಟ್ಟುಗು ಬಾರಿ ಗೌಜಿಡ್ ನಡಪುಂಡು ಮೂರ್ತಿ ದರ್ಶನ ಬಲಿ. ಸೇರ್ದಿಂಚಿತ್ತಿನ ಭಕ್ತೆರ್ ಅಪ್ಪೆನ ಮೂರ್ತಿ ದರ್ಶನದ ಪೊರ್ಲುನು ತೂವರೆಗ್ ಪಂಡ್ ದೆ ಭಕ್ತಿ ಪರವಶೊಡು ಕೈಮುಗಿದು ಅಪ್ಪೆನ್ ಸುಗಿಪುವೆರು. ಮೂರ್ತಿ ದರ್ಶನೊಡ್ದು ಬೊಕ್ಕ ತುಲಾಭಾರ ಸೇವೆ, ಅಪ್ಪೆ ಭಗವತೀ ಪರ್ವತೊಡು ಕುಲ್ಲೊಂದು ಬತ್ತಿನ ಭಕ್ತೆರೆಗ್ ನಂಬೊಲಿಗೆದ ಪ್ರಸಾದೊನು ಕೊರ್ಪೆರ್. ಆನಿ ಮಧ್ಯಾಹ್ನ ಅಪ್ಪೆ ಭಗವತೀ ತನ್ನ ಪರಿವಾರ ಸಮೇತವಾದ್ ಭಂಡಾರ ಏರೊಂದು ಪಿರ ತನ್ನ ಕದಿಕೆದ ಭಂಡಾರದ ಇಲ್ಲ್ ಸೇರೊನುವೆರ್.

🖋 ಸರಸ್ವತಿ ಅಮಿತ್ ಬಜ್ಪೆ