ಜಯಶ್ರೀ ಕೃಷ್ಣ ಪರಿಸರ ಪ್ರೇಮಿ ಸಮಿತಿದ 23ನೇ ವಾರ್ಷಿಕ ಮಹಾಸಭೆ,  ಕಾರ್ಯಾಧ್ಯಕ್ಷೆರಾದ್ ಡಿ. ಆರ್. ರಾಜು ಅವಿರೋಧ ಆಯ್ಕೆ

ಬೊಂಬೈ: ತುಳುನಾಡ್ ದ ಅಭಿವೃದ್ಧಿಗಾದ್ ಕ್ರಿಯಾಶೀಲೆರಾಪ್ಪುನ ಸರಕಾರೇತರ ಸಂಘಟನೆ ಜಯಶ್ರೀ ಕೃಷ್ಣ ಪರಿಸರ ಪ್ರೇಮಿ ಸಮಿತಿದ 23ನೇ ವಾರ್ಷಿಕ ಮಹಾಸಭೆ ಸೆ.18 ಕ್ಕ್ ಬಯ್ಯಗ್ ಕುರ್ಲಾ ಪೂರ್ವ ಬಂಟರ ಸಂಘ ಬೊಂಬೈದ ಅನೆಕ್ಸ್ ಸಭಾಗೃಹಡ್ ಸಮಿತಿದ ಸಂಸ್ಥಾಪಕೆರ್ ತೋನ್ಸೆ ಜಯಕೃಷ್ಣ ಶೆಟ್ಟಿ ಮೆರೆನ ಉಪಸ್ಥಿತಿಡ್, ಗುರ್ಕಾಲು ಆಯಿನ ಎಲ್.ವಿ. ಅಮೀನ್ ಮೆರೆನ ಗುರ್ಕಾರ್ಮೆಡ್ ನಡತ್ಂಡ್.

ಸಮಿತಿದ ಪದಾಧಿಕಾರಿಲು ಬೊಕ್ಕ ಹಿರಿಯ ಸದಸ್ಯೆರ್ ತುಡರ್ ಅರ್ಲಾದ್ ಮಹಾಸಭೆತ್ತ ಉದಿಪನ ಮಲ್ತೆರ್. ಗುರ್ಕಾಲು ಆಯಿನ ಎಲ್.ವಿ. ಅಮೀನ್ ಮೇರ್ ಎದ್ಕೊನಿಯೆರ್.

ಈ ಮಹಾಸಭೆಟ್ಟ್ ತುಳುನಾಡ್ ದ ಕುಡ್ಲ ಬೊಕ್ಕ ಒಡಿಪುಡ್ ಸಮಿತಿನ್ ಸ್ಥಾಪನೆ ಮಲ್ಪರೆ ಮಂಜೂರು ಮಲ್ತೆರ್. ಜಿಲ್ಲೆಡ್ ಪುಗರ್ತೆ ಪಡೆಯಿನ ಸಂಘಟಕೆರ್ ಡಿ. ಆರ್.ರಾಜು ಮೆರೆನ್ ಜಿಲ್ಲೆದ ಪೊಸ ಸಮಿತಿದ ಕಾರ್ಯಾಧ್ಯಕ್ಷೆರಾದ್ ಸಮಿತಿ ಮಾತೆರ್ನಾ ಒಪ್ಪಿಗೆಡ್  ಆಯ್ಕೆ ಮಲ್ತೆರ್.

ಸಭಿಕೆರೆಗ್ ಸಮಿತಿದ ಮಾಜಿ ಅಧ್ಯಕ್ಷೆರ್ ಧರ್ಮಪಾಲ್ ಯು ದೇವಾಡಿಗ,  ಉಪಾಧ್ಯಕ್ಷೆರ್ ಪಿ ಧನಂಜಯ್ ಶೆಟ್ಟಿ, ನಿತ್ಯಾನಂದ ಕೋಟ್ಯಾನ್, ಸಿಎಸ್. ಗಣೇಶ್ ಶೆಟ್ಟಿ, ನ್ಯಾ. ಶಶಿಧರ ಕಾಪು, ಸಾಫಲ್ಯ ಸೇವಾ ಸಂಘದ ಗುರ್ಕಾರೆ ಶ್ರೀನಿವಾಸ ಸಾಫಲ್ಯ, ಡಾ. ಅರ್. ಕೆ ಶೆಟ್ಟಿ, ಹಿರಿಯಡ್ಕ ಮೋಹನ್ ದಾಸ್, ದಯಾಸಾಗರ ಚೌಟ ಪಾತೆರ್ದ್ ಸಮಿತಿದ ಬೇತೆ ಬೇತೆ ಯೋಜನೆದ ಬಗೆಟ್ಟ್ ಅಗತ್ಯ ಪೊಲಬುನ್ ಕೊರಿಯೆರ್.

ಸಭೆಟ್ಟ್ ಪಾಲ್ ಪಡೆದಿತ್ತಿನ ತೀಯಾ ಸಮಾಜದ ಮಾಜಿ ಗುರ್ಕಾರೆ ಚಂದ್ರಶೇಖರ ಬೆಳ್ಚಡ, ಕರ್ನಾಟಕ ವಿಶ್ವಕರ್ಮ ಅಸೋಸಿಯೇಷನ್ ದ ಮಾಜಿ ಗುರ್ಕಾರೆ ಜಿಟಿ ಆಚಾರ್ಯ, ವಿದ್ಯಾದಾಯಿನಿ ಸಭಾ ಬೊಂಬೈದ ಗೌರವ ಮಲ್ಲ ಕಾರ್ಯಂತೆರ್ ಚಿತ್ರಪು ಕೆ.ಎಂ ಕೋಟ್ಯಾನ್ ಬೊಕ್ಕ ಬೇತೆ ಬೇತೆ ಪದುಕೆರ್ ಈ ಪೊರ್ತುಡು ಅಕ್ಲೆನ ಅಭಿಪ್ರಾಯನ್ ತೆರಿಪಾಯೆರ್.

ಚಾವಡಿಡ್ ಜಯಶ್ರೀ ಕೃಷ್ಣ ಪರಿಸರ ಪ್ರೇಮಿ ಸಮಿತಿದ ಗುರ್ಕಾರ್ಲು ಎಲ್.ವಿ. ಅಮೀನ್, ಸಂಸ್ಥಾಪಕೆರ್ ತೋನ್ಸೆ ಜಯಕೃಷ್ಣ ಶೆಟ್ಟಿ, ನಿಧಿ ಸಂಗ್ರಹ ಸಮಿತಿದ ಕಾರ್ಯಾಧ್ಯಕ್ಷೆರ್ ಡಾ.ಆರ್. ಕೆ.ಶೆಟ್ಟಿ, ಗೌರವ ಕಾರ್ಯಂತೆರ್ ಸುರೇಂದ್ರ ಸಾಲ್ಯಾನ್ ಮುಂಡ್ಕೂರು, ಗೌರವ ಕೋಶಾಧಿಕಾರಿ ತುಳಸಿದಾಸ್ ಅಮೀನ್ ಪಾಲ್ ಪಡೆದಿತ್ತೆರ್.  ಸಭೆಟ್ಟ್ ಸಮಿತಿದ ಮಾಜಿ ಗುರ್ಕಾರೆರ್, ಪದಾಧಿಕಾರಿಲು ಬೊಕ್ಕ ಸದಸ್ಯೆರ್ ಇತ್ತೆರ್.

ಚಿಕ್ಕಮಗಳೂರು ಜಿಲ್ಲೆದ ಮೂಡಿಗೆರೆ ತಾಲೂಕ್ ದ ಗೋಣಿಬೀಡುಡ್ ಪುಟ್ಟಿನ ಡಿ.ಆರ್. ರಾಜು ಮೇರ್ ಸಿವಿಲ್ ಇಂಜಿನಿಯರಿಂಗ್‌ಡ್  ವೃತ್ತಿಜೀವನನ್ ಸುರು ಮಲ್ತ್ ದ್ ತನ್ನ ವೃತ್ತಿಡ್ ಎಡ್ಡೆ ಸಾಧನೆ ಮಲ್ದೆರ್. ಮಾತ್ರ ಅತ್ತಂದೆ ಬೇತೆ ಬೇತೆ ಯೋಜನೆಲೆಡ್ ಮರಪೆರೆ ಅವಂದಿನ ನೆಂಪುನ್ ಉಂಡು. ವಿದ್ಯಾರ್ಥಿ ದಿನಟ್ಟ್ ಮೆರೆನ ಸಾಮಾಜಪರ ಕಾರ್ಯದ ಬಗೆಟ್ಟ್ ಕರ್ನಾಟಕ ರಾಜ್ಯ ರೈತ ಸಂಘದಂಚಿನ ಸಂಘಟನೆದೊಟ್ಟಿಗೆ ಸಕ್ರಿಯವಾದ್ ಇತ್ತೆರ್. ಬೊಕ್ಕ ಮೇರ್ ಪ್ರಮುಖ ಸಾಮಾಜಿಕ ನಾಯಕೆಯಾದ್ ಬುಲೆಯೆರ್. ಮಾಜಿ ಮುಖ್ಯಮಂತ್ರಿ ಎಸ್. ಬಂಗಾರಪ್ಪ ಮೆರೆನೊಟ್ಟಿಗೆ ಮೆರೆನ ಒಡನಾಟ ಮೆರೆನ್ ರಾಜಕೀಯ ಕ್ಷೇತ್ರಗ್ ಲೆತೊಂದು ಪೋತ್ಂಡ್. ಮುಲ್ಪ ಮೇರ್ ರಾಜಕೀಯ ನಾಯಕೆಯಾದ್ ಬೊಕ್ಕ ಪ್ರಮುಖ ರಾಜಕೀಯ ಪಕ್ಷನ್ ಪ್ರತಿನಿಧಿಸುನ ವಿಧಾನಸಭೆ ಬೊಕ್ಕ ಲೋಕಸಭೆ ವೋಟುಡು ಅಭ್ಯರ್ಥಿಯಾದ್ ಪುಗರ್ತೆ ಪಡೆತೆರ್.

ಬೊಕ್ಕ ಕಾರ್ಲಡ್ ಇತ್ತಿನ ಮೇರ್ ಮಹಾಮಲ್ಲ ನಾಯಕೆರಾದ್ ರಾಜಕೀಯ, ಧಾರ್ಮಿಕ ಬೊಕ್ಕ ಸಮಾಜ ಸೇವೆನ್ ಮಲ್ತೊಂದು ಇತ್ತೆರ್. ಮೇರ್ ಕಾರ್ಲ ಬಿಲ್ಲವ ಸಮಾಜ ಸೇವಾ ಸಂಘದ ಗುರ್ಕಾರೆರಾದ್, ರಶ್ಮಿ ಚಾರಿಟೇಬಲ್ ಟ್ರಸ್ಟ್ ದ ಮುಖೇನ ತನ್ನ ಸೇವೆನ್ ಮಲ್ದೆರ್. ಈ ಟ್ರಸ್ಟ್ ಮುಖೇನ ಸುಮಾರ್ ಪಿರವೊರಿದಿನ ಜೋಕುಲೆಗ್ ಶಿಷ್ಯವೇತನ, ಅನುದಾನ, ಸಮವಸ್ತ್ರ, ನೋಟ್‌ಬುಕ್‌ನ್ ಕೊರ್ಪುನಲ್ಪ ಆಶಾಕಿರಣ ಆತೆರ್.

ಮೇರ್ ಶೈಕ್ಷಣಿಕ ಸೇವೆ ಮಾತ್ರ ಅತ್ತಂದೆ, ಆರೋಗ್ಯ ರಕ್ಷಣೆ, ಸ್ವಯಂ ಉದ್ಯೋಗ ನೆರವು, ವಿದ್ಯಾರ್ಥಿಲೆಗ್ ಬೊಕ್ಕ ಪೊಂಜೋವ್ ನಕ್ಲೆಗ್ ಟೈಲರಿಂಗ್ ಮಿಷನ್, ನಿರಾಶ್ರಿತೆರೆಗ್ ವಸತಿ, ಇಲ್ಲ್ ನಿರ್ವಹಣಾ ನೆರವು, ಶೌಚಾಲಯ ನಿರ್ಮಾಣ, ಸೂರು ಬೊಕ್ಕ ಬಡ ಕುಟುಂಬಗ್ ಕರೆಂಟ್ ಸ್ಥಾಪನೆನ್ ಮಲ್ದೆರ್.
ಆಟೊ ಚಾಲಕೆರೆಗ್ ಸಹಾಯಧನ ಬೊಕ್ಕ ಪಡಿತೆರೆಗ್ ನೆರವು ಕೊರ್ಪುನ ಮುಖೇನ ಜನ ಸಾಮಾನ್ಯೆರೆಗ್ ಬೆಂಬಲ ಕೊರ್ತೆರ್.

ಬೇತೆ ಬೇತೆ ಸಂಸ್ಥೆಲೆಡ್ ಸಕ್ರಿಯವಾದ್ ಇಪ್ಪುನ ಮೆರೆನ ಸಮರ್ಪಣಾ ಮನೋಭಾವಗ್ ಸಾಕ್ಷಿ ಆತ್ಂಡ್. ಇತ್ತೆದ ಬೀರೇಶ್ವರ ಸಹಕಾರಿ ಸಂಘದ ಸಲಹೆಗಾರೆರಾದ್, ನಾರಾಯಣಗುರು ಅರ್ಬನ್ ಕೋ-ಆಪರೇಟಿವ್ ಬ್ಯಾಂಕ್ ನಿರ್ದೇಶಕೆರಾದ್, ಕರ್ನಾಟಕ ರಾಜ್ಯ ಕಾಂಗ್ರೆಸ್ ಹಿಂದುಳಿದ ವರ್ಗಲೆನ ಸಮಿತಿದ ಉಪಾಧ್ಯಕ್ಷೆರಾದ್ ಸೇವೆ ಸಂದಾದೆರ್. ಮೆರೆನ ಅನುಕರಣೀಯ ನಾಯಕತ್ವ ಬೊಕ್ಕ ಪರೋಪಕಾರ ಬೇತೆ ಅಕ್ಲೆನ್ ಪ್ರೇರೇಪಿಸಾವೊಂಡು ಬೊಕ್ಕ ಪರಿವರ್ತಿಸಾವೊಂಡು. ಸುಮಾರ್ ಜನತ್ತ ಉಡಲ್ ಡ್ ಶಾಶ್ವತವಾದ್ ಪರಂಪರೆನ್ ನಿರ್ಮಾಣ ಮಲ್ಪುಂಡು. ಜಯಶ್ರೀ ಕೃಷ್ಣ ಪರಿಸರ ಪ್ರೇಮಿ ಸಮಿತಿದ ದಕ್ಷಿಣ ಕನ್ನಡ ಬೊಕ್ಕ ಒಡಿಪು ಜಿಲ್ಲೆಲೆನ ಪ್ರಾದೇಶಿಕ ಸಮಿತಿದ ಕಾರ್ಯಾಧ್ಯಕ್ಷೆರಾದ್ ಡಿ. ಆರ್. ರಾಜು ಮೇರ್ ಸಮರ್ಥ ಆಯ್ಕೆ ಪನ್ಪುನೆಟ್ಟ್ ಸಂದೇಹ ಇಜ್ಜಿ ಪಂಡ್ ದ್ ಅಭಿಪ್ರಾಯ ತೆರಿದ್ ಬೈದ್ಂಡ್.