ಸೆ.19-20: ಬೈಲೂರು ಗಾಂಧಿ ಸ್ಮಾರಕ ಭವನಡ್ 43 ನೇ ವರ್ಷೊದ ಚೌತಿ

ಕಾರ್ಲ: ಬೈಲೂರು ಸಾರ್ವಜನಿಕ ಶ್ರೀ ಗಣೇಶೋತ್ಸವ ಸಮಿತಿದ ಮುತಾಲಿಕೆಡ್ 43 ನೇ ವರ್ಷೊದ ಚೌತಿ ಸೆ.19 ಬೊಕ್ಕ 20 ಕ್ಕ್ ಬೈಲೂರು ಗಾಂಧಿ ಸ್ಮಾರಕ ಭವನಡ್ ನಡಪರೆ ಉಂಡು.

ಸೆ.19 ಅಂಗಾರೆ ಬೊಲ್ಪುಗು ಗಣಪತಿ ಪ್ರತಿಷ್ಠೆ, ಗಣಹೋಮ, ಮಂಗಳಾರತಿ, ಮಧ್ಯಾಹ್ನ ಶಾಲೆದ ಜೋಕುಲೆಗ್ ಬೊಕ್ಕ ಪೊಂಜೋವ್ ನಕ್ಲೆಗ್ ಗೊಬ್ಬುದ ಪಂತೊಲು, ಬಯ್ಯಗ್ ಬಲ್ಲ್ ಒಯಿಪುನ ಪಂತೊ, ಭಜನೆ, ರಂಗಪೂಜೆ, ರಾತ್ರೆ ರಂಗ ತರಂಗ ಕಲಾವಿದೆರ್ ಕಾಪು ಮೊಕ್ಲೆರ್ದ್ ಬುಡೆದಿ ತುಳು ನಾಟಕ ನಡಪರೆ ಉಂಡು.

ಸೆ.20 ಬುಧಾರ ಬೊಲ್ಪುಗು ಆಂಜೋವ್ ನಕ್ಲೆಗ್ ಬೇತೆ ಬೇತೆ ಗೊಬ್ಬುದ ಪಂತೊಲು, ಮಧ್ಯಾಹ್ನ ಮಹಾಪೂಜೆ, ಮಂಗಳಾರತಿ, ನುಪ್ಪು ಪ್ರಸಾದ ಸೇವೆ ಆದ್ ಕುಡ್ಲ ಸ್ಟಾರ್ ಆರ್ಕೆಸ್ಟ್ರಾ ಬೊಕ್ಕ ತನುಶ್ರೀ ಪಿತ್ರೋಡಿ ಮೆರೆರ್ದ್ ನೃತ್ಯ, ಕುಡ್ಲ ಆರ್ಯನ್ಸ್ ಡ್ಯಾನ್ಸ್ ಸ್ಟೂಡಿಯೋ ಮೊಕ್ಲೆರ್ದ್ ನೃತ್ಯ ವೈಭವ, ಬಯ್ಯಗ್ ವಿಸರ್ಜನಾ ಮಹಾಪೂಜೆ, ಮಂಗಳಾರತಿ, ಗಣಪತಿ ವಿಸರ್ಜನಾ ಮೆರವಣಿಗೆ ನಡಪರೆ ಉಂಡು.

ಈ ಲೇಸ್ ಗ್ ಭಕ್ತಾದಿಲು ಪಾಲ್ ಪಡೆದ್, ಶ್ರೀ ದೇವೆರೆನ ಗಂಧ ಪ್ರಸಾದ ದೆತೊಂದು, ಶ್ರೀ ಮಹಾಗಣಪತಿ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಬೈಲೂರು ಸಾರ್ವಜನಿಕ ಶ್ರೀ ಗಣೇಶೋತ್ಸವ ಸಮಿತಿದ ಗುರ್ಕಾರೆ ಜಗದೀಶ್ ಪೂಜಾರಿ ಕೌಡೂರು ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್. ‌