ಪಡ್ಡೆದ್ರ: ದ.ಕ, ಒಡಿಪು ಬೊಕ್ಕ ಕಾಸ್ರೋಡು ಜಿಲ್ಲಾ ಕಂಬುಲ ಸಮಿತಿದ ಸರ್ವಸದಸ್ಯೆರೆನ ಸಭೆಟ್ಟ್ ನನದ ರಡ್ಡ್ ನೇ ಅವಧಿಗ್ ಸಮಿತಿದ ಅಧ್ಯಕ್ಷೆರಾದ್ ಐಕಳಬಾವ ಡಾ/ ದೇವಿಪ್ರಸಾದ್ ಶೆಟ್ಟಿ ಬೆಳಪು ಮೇರ್ ಆಯ್ಕೆ ಆತೆರ್.
ಪೊಸ ಅಧ್ಯಕ್ಷೆರೆಗ್ ನಿಕಟಪೂರ್ವ ಅಧ್ಯಕ್ಷೆರ್ ಎರ್ಮಾಳು ರೋಹಿತ್ ಹೆಗ್ಡೆ ಮೇರ್ ಅಧಿಕಾರನ್ ಹಸ್ತಾಂತರ ಮಲ್ತೆರ್. ಕಂಬುಲ ಸಮಿತಿದ ಪೊಸ ಕಾರ್ಯಾಧ್ಯಕ್ಷೆರ್ ಪ್ರೊ. ಗುಣಪಾಲ ಕಡಂಬ, ಪ್ರಧಾನ ಕಾರ್ಯದರ್ಶಿ ಲೋಕೇಶ್ ಶೆಟ್ಟಿ ಮುಚ್ಚೂರ್ ಬೊಕ್ಕ ಕೋಶಾಧಿಕಾರಿಯಾದ್ ಚಂದ್ರಹಾಸ ಸಾಧು ಸನಿಲ್, ತೀರ್ಪುಗಾರೆರೆನ ಸಂಚಾಲಕೆರಾದ್ ವಿಜಯ ಕುಮಾರ್ ಕಂಗಿನಮನೆ ಆಯ್ಕೆ ಆತೆರ್.
ನವೆಂಬರ್ ತಿಂಗೊಲ್ಡ್ ಬೆಂಗ್ಲೂರ್ ಡ್ ನಡಪರೆ ಇಪ್ಪುನ ಕಂಬುಲದ ಪೂರ್ವ ತಯಾರಿದ ಬಗೆಟ್ಟ್ ಶಾಸಕೆರ್ ಅಶೋಕ್ ಕುಮಾರ್ ರೈ ಪೊಲಬು ಕೊರಿಯೆರ್.
ನವೆಂಬರ್ ಡ್ ಸುರು ಆಪಿನ ಕಂಬುಲ ಋತುನ್ ಶಿಸ್ತುಬದ್ಧವಾದ್ ನಡಪಾವೊಡು. 24 ಗಂಟೆದೊಲಯಿ ಕಂಬುಲನ್ ಮುಗಿಪೊಡು. ಈ ಬಗೆಟ್ಟ್ ಸರಕಾರದ ಆದೇಶನ್ ಮಾತೆರ್ಲಾ ಪಾಲಿಸಾವೊಡು ಪಂದ್ ಶಿಸ್ತು ಸಮಿತಿದ ಅಧ್ಯಕ್ಷೆರ್ ಇರ್ವತ್ತೂರು ಭಾಸ್ಕರ ಕೋಟ್ಯಾನ್ ಸಭೆಟ್ಟ್ ತೆರಿಪಾಯೆರ್.
ಸೆ.18 ಕ್ಕ್ ಕಂಬುಲದ ತಾರೀಕ್ ಘೋಷಣೆ
ಕಂಬುಲದ ವ್ಯವಸ್ಥಾಪಕೆರೆಗ್ ಕಂಬುಲ ನಡಪಾವೊನ ಮಾರ್ಗಸೂಚಿನ್ ಕೊರಿಯೆರೆ ಸೆ.18 ಕ್ಕ್ ಬಯ್ಯಗ್ ಬೆದ್ರಡ್ ಕಂಬುಲ ಸಮಿತಿದ ಸಭೆ ಲೈದೆರ್. ಆ ದಿನನೇ ಬೇತೆ ಬೇತೆ ಕಂಬುಲದ ತಾರೀಕ್ ನ್ ಘೋಷಣೆ ಮಲ್ಪೆರೆ ಆಪುಂಡು ಪಂದ್ ಭಾಸ್ಕರ ಕೋಟ್ಯಾನ್ ಪಂಡೆರ್.
ಸಭೆಟ್ಟ್ ಮುಲ್ಕಿ ಅರಸು ಕಂಬುಲದ ದುಗ್ಗಣ್ಣ ಸಾವಂತರ್ ಪೊಸ ಪದಾಧಿಕಾರಿಲೆಗ್ ಎಡ್ಡೆಪ್ಪು ಬಯಕಿಯೆರ್. ಬಾರ್ಕೂರ್ ಶಾಂತಾರಾಮ ಶೆಟ್ಟಿ, ಕೊಳಚೂರು ಕೊಂಡೆಟ್ಟು ಸುಕುಮಾರ ಶೆಟ್ಟಿ, ನಂದಳಿಕೆ ಶ್ರೀಕಾಂತ ಭಟ್ ಪಿ ಆರ್ ಶೆಟ್ಟಿ, ನವೀನ್ ಚಂದ್ರ ಆಳ್ವ, ಅನಿಲ್ ಶೆಟ್ಟಿ, ಸತೀಶ್ಚಂದ್ರ ಸಾಲ್ಯಾನ್, ಚಂದ್ರಹಾಸ್ ಶೆಟ್ಟಿ ಪುತ್ತೂರ್, ರಕ್ಷಿತ್ ಶೆಟ್ಟಿ, ಐಕಳಬಾವ ಚಿತ್ತರಂಜನ್ ಭಂಡಾರಿ, ರವೀಂದ್ರ ಕುಮಾರ್ ಮಾಳ, ದಿನೇಶ್ ಶೆಟ್ಟಿ ಬೊಕ್ಕ ರಾಜೇಶ್ ಶೆಟ್ಟಿ ತನ್ನ ಅಭಿಪ್ರಾಯನ್ ತೆರಿಪಾಯೆರ್.
ಕಂಬುಲ ಸಮಿತಿದ ಸದಸ್ಯೆರ್, ವ್ಯವಸ್ಥಾಪಕೆರ್, ಎರ್ಲೆನ ಯಜಮಾನೆರ್, ಗಿಡಪುನಕುಲು, ಬೊಕ್ಕ ಕಂಬುಲಾಭಿಮಾನಿಲು ಸಭೆಟ್ಟ್ ಇತ್ತೆರ್. ರಕ್ಷಿತ್ ಜೈನ್ ಎದ್ಕೊಂದು, ಲೇಸ್ ದ ಸುಧಾರಿಕೆ ಮಲ್ತೆರ್.
Editorial