ಬೆಂಗಳೂರುಡು “ತುಳು ಸಿನೆಮಾದ ಸುವರ್ಣ ಪಯಣ” ಲೇಸ್

ಬೆಂಗಳೂರುದ “ಕರ್ನಾಟಕ ಚಲನಚಿತ್ರ ಕಲಾವಿದೆರೆನ ಸಂಘ” ದ ಮುತಾಲಿಕೆಡ್ “ತುಳು ಸಿನೆಮಾದ ಸುವರ್ಣ ಪಯಣ” ವಿಶೇಷ ಲೇಸ್ ಸೆ.3 ಐತಾರ “ರಾಜ್ ಕುಮಾರ್ ಭವನಡ್ ನಡತ್ಂಡ್.

ತುಳು ಚಿತ್ರರಂಗದ ಸವ್ಯಸಾಚಿ, ಹಿರಿಯ ರಂಗಕರ್ಮಿ ‘ತಮ್ಮಲಕ್ಷ್ಮಣ’ ಮೆರೆನ ಮುತಾಲಿಕೆಡ್, ದೃಶ್ಯಾಲಯ ಮಂಗಳೂರು ಬೊಕ್ಕ ಸ್ವಯಂಪ್ರಭ ಟಾಕೀಸ್ ಯಾಪ್ ಬೆಂಗಳೂರು ಮೊಕ್ಲೆನ ಒಟ್ಟುಸೇರಿಗೆಡ್ 50 ವರ್ಸೊದ ತುಳು ಸಿನೆಮಾದ ಚರಿತ್ರೆನ್ ಬೊಲ್ಪುಗು ಕನಪಿನ, ಬೊಕ್ಕ ಪೊಸ ಪೀಳಿಗೆಗ್ ಮುಟ್ಟಾವುನ ಮಹಾತ್ವಾಕಾಂಕ್ಷೆದ ಕಾರ್ಯಕ್ರಮ ನಡತ್ಂಡ್.

ಸಿನೆಮಾ ಬೊಕ್ಕ ಸಾಹಿತ್ಯ ಕ್ಷೇತ್ರದ ದಿಗ್ಗಜೆರಾಯಿನ ಡಾ. ಗಿರೀಶ್ ಕಾಸರವಳ್ಳಿ, ಡಾ. ಜಯಮಾಲ, ಡಾ. ಸತೀಶ್ ಕುಮಾರ್ ಎಸ್. ಹೊಸಮನಿ, ಭಾ.ಮಾ. ಹರೀಶ್, ವಿ. ಮನೋಹರ್ ಮಲ್ಲ ಬಿನ್ನೆರಾದ್ ಪಾಲ್ ಪಡೆದಿತ್ತೆರ್. ಅತ್ತಂದೆ ತುಳುಕೂಟ, ತುಳುವೆರೆಂಕುಲು, ತುಳುವೆರೆ ಚಾವಡಿ, ಐ-ಲೇಸಾ, ತುಳುನಾಡ ಜವನೆರ್, ಜೈ ತುಳುನಾಡ್ ಸಂಘಟನೆದ ಪ್ರಮುಖೆರ್ ಬೊಕ್ಕ ಸುಮಾರ್ ಚಲನಚಿತ್ರ ರಂಗದ ಕಲಾವಿದೆರ್, ತಾಂತ್ರಿಕೆರ್ ಈ ಪೊರ್ತುಡು ಪಾಲ್ ಪಡೆದಿತ್ತೆರ್.

ಬೆಂಗಳೂರುದ ಸಂಘಟಕೆ ಪಳ್ಳಿ ವಿಶ್ವನಾಥ್ ಶೆಟ್ಟಿ ಮಾತೆರೆನ್ಲಾ ಮೋಕೆಡ್ ಮಾನಾದಿಗೆಡ್ ಎದ್ಕೊನಿಯೆರ್. ಪ್ರಾಸ್ತಾವಿಕವಾದ್ ಪಾತೆರ್ನ ತಮ್ಮಲಕ್ಷ್ಮಣ ಮೇರ್, 50 ವರ್ಸೊದ ತುಳು ಸಿನೆಮಾ ರಂಗದ ಚರಿತ್ರೆನ್ ಮಹಾತ್ವಾಕಾಂಕ್ಷೆಡ್ ಪೊಸ ಪೀಳಿಗೆಗ್ ತೆರಿಪಾವುನ ಪ್ರಯತ್ನ ಮಲ್ದ್ಂಡ್ ಪಂದ್ ಪಂಡೆರ್. ಈ ಪೊರ್ತುಡು ತಮ್ಮಲಕ್ಷ್ಮಣ ಮೇರ್ ಬರೆತಿನ “ತುಳು ಬೆಳ್ಳಿ ತೆರೆಯ ಸುವರ್ಣಯಾನ” ಬುಕುನ್ ಮಲ್ಲ ಬಿನ್ನೆರ್ ಬುಡುಗಡೆ ಮಲ್ತೆರ್.

ಬೊಕ್ಕ ಕರಿನ 50 ವರ್ಸೊಲೆಡ್ ಬೊಳ್ಳಿ ಪರ್ದೆಗ್ ಬತ್ತಿನ ಜನ ಮೆಚ್ಚಿನ ತುಳು ಸಿನೆಮಾಲೆನ ಬಗೆಟ್ಟ್, ಹಿರಿಯ ನಟೆ ನಟಿ, ಕಲಾವಿದೆರ್, ತಾಂತ್ರಿಕೆರೆನ ಬಗೆಟ್ಟ್ ಪೊಲಬು ಇಪ್ಪುನ ವಿಶೇಷ ಕೃತಿನ್ ಪುಗರಿಯೆರ್. ತುಳು ರಂಗಭೂಮಿಗಾದ್, ಚಿತ್ರ ರಂಗೋಗಾದ್ ಸುಮಾರ್ 50 ವರ್ಸೊ ಸೇವೆ ಮಲ್ತಿನ ‘ತಮ್ಮ ಲಕ್ಷ್ಮಣ’ ಮೇರ್ ಪೊಸ ಪೀಳಿಗೆಗ್ ಆದರ್ಶ ಪಂದ್ ಪಂಡೆರ್.

ಕರಿನ 50 ವರ್ಸೊದಿಂಚ ಬೊಳ್ಳಿ ಪರ್ದೆಗ್ ಬಯ್ಯಿದಿನ ತುಳು ಸಿನೆಮಾಲೆನ ಕಿರು ಸಾಕ್ಷ್ಯ ಚಿತ್ರ “ಸುವರ್ಣ ತುಳು ಚಿತ್ರಮಾಲಾ” ಸಿನೆಮಾ ಪ್ರದರ್ಶನ ಯಶಸ್ವಿಡ್ ನಡತ್ಂಡ್. ಮಾನಾದಿಗೆದ ಬಿನ್ನೆರೆನ ಒಟ್ಟುಗು ಸುಮಾರ್ ಅಭಿಮಾನಿಲು, ತುಳು ಬಂಧುಲು ಚಿತ್ರಮಾಲಾ ಪ್ರದರ್ಶನ ತೂದು ಮೆಚ್ಚಿಯೆರ್. ಪಳ್ಳಿ ವಿಶ್ವನಾಥ್ ಶೆಟ್ಟಿ ಬೊಕ್ಕ ಶ್ರೀತಿಕಾ ಶೆಟ್ಟಿ ಲೇಸ್ ದ ಸುಧಾರಿಕೆ ಮಲ್ತೆರ್. ಗೋಪಾಲ್ ಪೂಜಾರಿ ಪಟ್ಟೆ, ನಿಧಿಶ್ ಶೆಟ್ಟಿ, ಸದಾನಂದ ಕಾರ್ಲ ಲೇಸ್ ಸುಧಾರಿಕೆಗ್ ಸಕಾಯ ಮಲ್ತೆರ್. ತಮ್ಮಲಕ್ಷ್ಮಣ ಮಾತೆರೆಗ್ಲಾ ಸೊಲ್ಮೆ ಸಂದಾಯೆರ್.

ವರದಿ: ಪಳ್ಳಿ ವಿಶ್ವನಾಥ್ ಶೆಟ್ಟಿ, ಬೆಂಗಳೂರು