ಕುಡ್ಲ: ಬಂಟರ ಯಾನೆ ನಾಡವರ ಮಾತೃ ಸಂಘ, ಶ್ರೀ ಸಿದ್ಧಿ ವಿನಾಯಕ ಪ್ರತಿಷ್ಠಾನ ಬೊಕ್ಕ ಸಾರ್ವಜನಿಕ ಶ್ರೀ ಗಣೇಶೋತ್ಸವ ಸಮಿತಿ ದಕ್ಷಿಣ ಕನ್ನಡ, ಒಡಿಪು ಬೊಕ್ಕ ಕಾಸ್ರೋಡು ಜಿಲ್ಲೆದ ಬಂಟರ ಸಂಘಲೆನ ಒಟ್ಟುಸೇರಿಗೆಡ್ ಸಾರ್ವಜನಿಕ ಗಣೇಶೋತ್ಸವದ ಅಂಗವಾದ್ ಬಂಟ ಕಲಾ ಸಂಭ್ರಮ, ಭಾರತ ದರ್ಶನ ಕಲ್ಪನೆದ ಪಂತೊನ್ ಬಂಟ್ಸ್ ಹಾಸ್ಟೇಲ್ ದ ಓಂಕಾರ ನಗರಡ್ ಆಯೋಜನೆ ಮಲ್ತ್ ದ್ ಇತ್ತೆರ್.
ಈ ಲೇಸ್ ಡ್ ರಾಜೇಶ್ವರಿ ಡಿ ಶೆಟ್ಟಿ ನಿರ್ದೇಶನದ ಸುರತ್ಕಲ್ ಬಂಟರ ಸಂಘ ಪ್ರದರ್ಶನದ ಭಾರತ ದರ್ಶನ ಪ್ರಹಸನ ಪನ್ಪುನ ಲೇಸ್ ಒಂಜಿ ಲಕ್ಷ ರೂ. ನಗದು ಬೊಕ್ಕ ಶಾಶ್ವತ ಫಲಕದೊಟ್ಟಿಗೆ ಸುರುತ್ತ ಪ್ರಶಸ್ತಿನ್ ಪಡೆತ್ಂಡ್.
ಬಂಟರ ಯಾನೆ ನಾಡವರ ಮಾತೃ ಸಂಘ ಬೊಕ್ಕ ಸಿದ್ದಿ ವಿನಾಯಕ ಪ್ರತಿಷ್ಠಾನದ ಟ್ರಸ್ಟಿ ಅಜಿತ್ ಕುಮಾರ್ ರೈ ಮೇರ್ ಪ್ರಶಸ್ತಿನ್ ಪಟ್ಟಿಯೆರ್. ಸುರತ್ಕಲ್ ಬಂಟರ ಸಂಘದ ಅಧ್ಯಕ್ಷೆರ್ ಲೋಕಯ್ಯ ಶೆಟ್ಟಿ ಮುಂಚೂರು, ಕಾರ್ಯದರ್ಶಿ ಲೀಲಾಧರ ಶೆಟ್ಟಿ ಬೊಕ್ಕ ನಿಕಟಪೂರ್ವ ಅಧ್ಯಕ್ಷೆರ್ ಸುಧಾಕರ ಪೂಂಜ ಬೊಕ್ಕ ಪದಾಧಿಕಾರಿಲು ಪ್ರಶಸ್ತಿನ್ ಸ್ವೀಕಾರ ಮಲ್ತೆರ್.
ಸಮಾಜದ ಸಂಘಟನೆಲೆಗ್ ಬಂಟ ಕಲಾ ಸಂಭ್ರಮದಂಚಿನ ಲೇಸ್ ಲು ಪೂರಕ ಆತ್ಂಡ್. ಅತ್ತಂದೆ ಇಂಚಿನ ಲೇಸ್ ಲು ನಡತ್ನಗ ವಲಯ ಸಂಘಲು ಸಕ್ರೀಯ ಆಪುಂಡು ಪಂದ್ ಅಜಿತ್ ಕುಮಾರ್ ರೈ ತೆರಿಪಾಯೆರ್.
ಈ ಪೊರ್ತುಡು ಮಾತೃ ಸಂಘದ ಉಪಾಧ್ಯಕ್ಷೆರ್ ಕಾವು ಹೇಮನಾಥ ಶೆಟ್ಟಿ, ಪ್ರಧಾನ ಕಾರ್ಯದರ್ಶಿ ಕೆಎಂ ಶೆಟ್ಟಿ, ಕೋಶಾಧಿಕಾರಿ ರಾಮಮೋಹನ್ ರೈ, ನಿಟ್ಟೆಗುತ್ತು ರವಿರಾಜ ಶೆಟ್ಟಿ, ಭಂಡಾರಿ ಬಿಲ್ಡರ್ಸ್ ದ ಮಾಲಕೆರ್ ಲಕ್ಷ್ಮೀಶ ಭಂಡಾರಿ, ಶ್ರೀ ಡೆವಲಪರ್ಸ್ ಸಂಸ್ಥೆದ ಮಾಲಕೆರ್ ಗಿರೀಶ್ ಶೆಟ್ಟಿ ಕಟೀಲ್, ಗಣೇಶೋತ್ಸವ ಸಮಿತಿದ ಜಿಲ್ಲಾ ಸಂಚಾಲಕೆರ್ ನಾಗರಾಜ ಶೆಟ್ಟಿ, ಮುಣಿಯಾಲ್ ಉದಯಕುಮಾರ್ ಶೆಟ್ಟಿ, ಸುಧಾಕರ ಪೂಂಜ, ಆಶಾಜ್ಯೋತಿ ರೈ ಪಾಲ್ ಪಡೆದಿತ್ತೆರ್.
ತೀರ್ಪುಗಾರೆರಾದ್ ಮೈಮ್ ರಮೇಶ್ ರಂಗಾಯಣ, ಸುರೇಂದ್ರನಾಥ ಶೆಟ್ಟಿ ಮಾರ್ನಾಡ್, ಅವಿನಾಶ್ ಕಾಮತ್ ಪಾಲ್ ಪಡೆದಿತ್ತೆರ್. ಕಿರಣ್ ಪಕ್ಕಳ, ಸತೀಶ್ ಶೆಟ್ಟಿ ಕೊಡಿಯಾಲ್ ಬೈಲ್ ಲೇಸ್ ದ ಸುಧಾರಿಕೆ ಮಲ್ತೆರ್. ಪಂತೊಡು 205 ಜನತ್ತ ಕೂಟ ಸುರತ್ಕಲ್ ಬಂಟರ ಸಂಘ ಸುರುತ್ತ, ಬೊಲ್ತೇರ್ ಬಂಟರಸಂಘ ರಡ್ಡನೇ ಬೊಕ್ಕ ಉಳ್ಳಾಲ ಬಂಟರ ಸಂಘ ಮೂಜಿನೇ ಪ್ರಶಸ್ತಿನ್ ಪಡೆತ್ಂಡ್.
Editorial