ಸುಬ್ರಹ್ಮಣ್ಯ: ಕರ್ನಾಟಕ ರಾಜ್ಯಡ್ ಕಸ್ತೂರಿರಂಗನ್ ವರದಿ ಜಾರಿ ಮಲ್ಪುನ ಬಗೆಟ್ಟ್ ಕುಡ ರಾಜ್ಯ ಸರಕಾರ ಪ್ಲಾನ್ ಮಲ್ತೊಂದು ಉಂಡು. ಪಶ್ಚಿಮ ಘಟ್ಟದ ಮುದೆಲ್ ದ ಗ್ರಾಮದ ಜನಕುಲು ಪ್ರತಿದಿನೊಲ ಪೋಡಿಗೆದ ವಾತಾವರಣಡ್ ಬದ್ಕುನ ಸ್ಥಿತಿ ನಿರ್ಮಾಣ ಆತ್ಂಡ್. ಕಸ್ತೂರಿ ರಂಗನ್ ಸಮಿತಿ ಕೊರ್ನ ವರದಿರ್ದ್ ಉಂದು ಗೊತ್ತಾತ್ತ್ಂಡ್. ಅಂಚಾದ್ ಮಲೆನಾಡು ಜನ ಹಿತ ರಕ್ಷಣಾ ವೇದಿಕೆ (ರಿ.) ಶಿರಾಡಿ, ಮುತಾಲಿಕೆಡ್ ನನ ಮಲ್ಲ ಪ್ರತಿಭಟನೆ ನಡಪಾವ ಪಂದ್ ವೇದಿಕೆ ಸಂಚಾಲಕೆರ್ ಕಿಶೋರ್ ಶಿರಾಡಿ ತೆರಿಪಾದೆರ್.
ಮೇರ್ ಅಂಗಾರೆ ನಡತಿನ ಸಮಾಲೋಚನಾ ಸಭೆಟ್ಟ್ ಪಾತೆರಿಯೆರ್. ಅತ್ತಂದೆ ಪಶ್ಚಿಮ ಘಟ್ಟಡ್ ಸೂಕ್ಷ್ಮ ವಲಯ ಪ್ರದೇಶದ ಜನಕುಲು ಕರಿನ 15 ವರ್ಷೊದಿಂಚ ಪಕ್ಷಾತೀತವಾದ್, ಜಾತ್ಯಾತೀತವಾದ್, ಗ್ರಾಮ ಗ್ರಾಮಲೆಡ್ ಪ್ರತಿಭಟನೆ ಮಲ್ತೊಂದು ಉಲ್ಲೆರ್. ಆತ್ ಮಾತ ಆಂಡಲ ಈ ವರದಿ ಬಗೆಟ್ಟ್ ಸಂಬಂಧಪಟ್ಟಿನ ಅಧಿಕಾರಿ ವರ್ಗದಕುಲು ಬರೆದ್ ಪೊಲಬು ಕೊರಿನವು ವಿಪರ್ಯಾಸ. ಈ ದಿಟ್ಟಿಡ್ ಇತ್ತೆ ಕುಡ ರಾಜ್ಯ ಸರಕಾರ ವರದಿ ಬಗೆಟ್ಟ್ ತಕರಾರು ಮಲ್ತೊಂದು ಉಂಡು. ಅಂಚೆನೆ ನೇರ್ದ್ ದುಂಬೇ ಮಾತ ಗ್ರಾಮಲೆನ ಗ್ರಾಮ ಪಂಚಾಯತ್ ಸಭೆಟ್ಟ್ ಕಸ್ತೂರಿ ರಂಗನ್ ವರದಿನ್ ಜಾರಿ ಮಲ್ಪುನೇ ಬೊರ್ಚಿ ಪನ್ಪುನ ಬಗೆಟ್ಟ್ ನಿರ್ಣಯ ದೆತೊಂದ. ಅಂಚೆನೆ ತಾಲೂಕ್ ಪಂಚಾಯತ್, ಜಿಲ್ಲಾ ಪಂಚಾಯತಿ ಸಭೆಟ್ಟ್ ವರದಿ ಜಾರಿಗ್ ವಿರೋಧ ಮಲ್ತ್ ದ್, ನಿರ್ಣಯ ದೆತೊಂದೆರ್. ಇತ್ತೆ ಮಾನಸಿಕ ಒತ್ತಡರ್ದ್ ಪಶ್ಚಿಮ ಘಟ್ಟಡ್ ವಾಸ ಮಲ್ತೊಂದು ಇಪ್ಪುನ ರೈತೆರ್ ಪೋಡಿಗೆಡ್ ಜೀವನ ನಡಪಾವೊಂದು ಉಲ್ಲೆರ್ ಪಂದ್ ಮೇರ್ ಪಂಡೆರ್.
ಸಮಾಲೋಚನಾ ಸಭೆಟ್ಟ್ ಜನಹಿತ ಮಲೆನಾಡು, ಜನಹಿತ ರಕ್ಷಣಾ ವೇದಿಕೆ ಸದಸ್ಯೆರ್ ಶೇಖರಪ್ಪ, ಹರೀಶ ಕಲ್ಲುಗುಂಡಿ, ಅಚ್ಯುತ ಗೌಡ ಸುಬ್ರಹ್ಮಣ್ಯ, ಶ್ರೀಕಾಂತ್ ಎನ್, ಜಯಪ್ರಕಾಶ್ ಕೂಜುಗೋಡು ಗಿರೀಶ ಪೈಲಾಜೆ, ಸಂತೋಷ ಎಂ, ಚಿದಾನಂದ ಗೌಡ ದೇವ್ಪಾಲು, ಡಾ. ಆದರ್ಶ ಜೋಸೆಫ್, ದಿಲೀಪ್ ಉಪ್ಪಳಿಕೆ ಇತ್ತೆರ್.
ವರದಿ: ಗೋಪಿಚಂದನ್ ಕೆ.ಎಸ್.
Editorial