ಪವನ ಕಲಾವಿದೆರ್ ಕುಡ್ಲ ಅಭಿನಯದ ತೂಯಿಲೆಕ ಅತ್ತ್….ಮೂಲು ಬೇತೆನೆ ತುಳು ಸಾಮಾಜಿಕ ಹಾಸ್ಯಮಯ ತುಳು ನಾಟಕದ ಮೂರ್ತ ಬೊಕ್ಕ ಪೋಸ್ಟರ್ ಬುಡುಗಡೆ ಕುತ್ತಾರು ರಾಜರಾಜೇಶ್ವರೀ ದೇವಲ್ಯಡ್ ಐತಾರ ನಡತ್ಂಡ್.
ನಿತಿನ್ ಹೊಸಂಗಡಿ ರಚನೆ ಬೊಕ್ಕ ನಿರ್ದೇಶನಡ್, ಕಿಶೋರ್ ಡಿ.ಕೆ ಮೆರೆನ ಸಮಗ್ರ ನಿರ್ವಹಣೆಡ್, ಪ್ರಕಾಶ್ ಬಂಗೇರ ಮೆರೆನ ಸಲಹೆ ಸಹಕಾರಡ್ ಈ ನಾಟಕ ನಡಪರೆ ಉಂಡು.
ಸುಭಾಸ್ ನಗರ ಕೊರಗತನಿಯ ಸೇವಾ ಸಮಿತಿದ ಕಾರ್ಯದರ್ಶಿ ಗೋಪಾಲ್ ದಾಸ್ ಪೋಸ್ಟರ್ ಬುಡುಗಡೆ ಮಲ್ತೆರ್. ತೊಕ್ಕೊಟ್ಟು ಭಗತ್ ಸಿಂಗ್ ಸೇವಾ ಪ್ರತಿಷ್ಠಾನದ ಅಧ್ಯಕ್ಷೆರ್ ಜೀವನ್ ಕುಮಾರ್ ತೊಕ್ಕೊಟ್ಟು ಪಾತೆರ್ದ್, ತೂಯಿಲೆಕ ಅತ್ತ್ ನಾಟಕ ನಮ್ಮ ಕಲಾ ರಸಿಕೆರೆನ ಮನಸ್ ಗೆಂದ್ ದ್, ಪ್ರತಿಯೊರಿನ ಬಾಯಿಡ್ಲಾ ಪುದರ್ ಬರ್ಪುನ ಒಂಜಿ ಕೂಟ ಆವಡ್, ಮಾತ ಕಲಾವಿದೆರ್ ಗ್ಲಾ ಕಲಾ ಸರಸ್ವತಿ ಅನುಗ್ರಹ ಮಲ್ಪಡ್ ಪಂದ್ ಪಂಡೆರ್.
ಕಾಪಿಕಾಡು ಉಮಾಮಹೇಶ್ವರೀ ದೇವಲ್ಯದ ಪ್ರಧಾನ ಕಾರ್ಯದರ್ಶಿ ಗಣೇಶ್ ಕಾಪಿಕಾಡು ಪಾತೆರ್ದ್, ನಿಕ್ಲೆನ ಕೂಟ ತುಳುರಂಗಭೂಮಿಡ್ ಸಂಚಲನ ಮೂಡಿಸಾದ್ ತುಳು ರಂಗ ಭೂಮಿಗ್ ಪುದರ್ ಕನಪುನ ಕೂಟ ಅವಡ್ ಪಂದ್ ಎಡ್ಡೆಪ್ಪು ಬಯಕಿಯೆರ್.
ಈ ಪೊರ್ತುಡು ದುರ್ಗಾ ವಾಹಿನಿ ಮಹಿಳಾ ಮಂಡಳಿ ಕಾರ್ಯದರ್ಶಿ ಶಶಿಕಲಾ ಗಟ್ಟಿ, ಕೊರಗ ತನಿಯ ಸೇವಾ ಟ್ರಸ್ಟ್ ಸೇವಂತಿ ಗುಡ್ಡೆ ಮಾಜಿ ಅಧ್ಯಕ್ಷೆರ್ ಮೋಹನ್ ಸಾಲಿಯಾನ್, ನಾಟಕ ಬರವುಗಾರೆರ್ ಸತೀಶ್ ದೇರಳಕಟ್ಟೆ, ಟೀಮ್ ಮಂಜುಶ್ರೀ ಅಧ್ಯಕ್ಷೆರ್ ಮನೋಜ್ ಕೊಡಕಲ್, ನಾಟಕ ಕಲಾವಿದೆರ್ ನಝೀರ್ ಅಸೈಗೋಳಿ, ಸುರೇಶ ಮೆಂಡನ್ (ರಾಮಾಚಾರಿ) ಉಳ್ಳಾಲ, ಹರಿಪ್ರಸಾದ್ ಬಗಂಬಿಲ, ಮಾತೃ ಶ್ರೀ ಆರ್ಟ್ಸ್ ನಿರ್ದೇಶಕೆರ್ ದಿನೇಶ್ ಕಾಪಿಕಾಡ್, ನಾಟಕ ರಚನೆಗಾರೆ, ನಿರ್ದೇಶಕೆ ನಿತಿನ್ ಹೊಸಂಗಡಿ, ಪವನ ಕಲಾವಿದೆರ್ ಸಂಚಾಲಕೆರ್ ಕಿಶೋರ್. ಡಿ. ಕೆ ಕುಂಪಲ ಪಾಲ್ ಪಡೆದಿತ್ತೆರ್.
ಪವನ ಕಲಾವಿದೆರ್ ಕುಡ್ಲ ಕೂಟದ ಕಲಾವಿದೆ ಕಿರಣ್ ಕೊಲ್ಯ ಲೇಸ್ ದ ಸುಧಾರಿಕೆ ಮಲ್ತ್ ದ್, ಎದ್ಕೊಂದು, ಸೊಲ್ಮೆ ಸಂದಾಯೆರ್.
pallavi shetty