ಬೊಂಬಾಯಿ: ಸೋಮಾರ ರಾತ್ರೆ ಬೊಂಬಾಯಿದ ಕುರ್ಲಾ ನಾಯಕ್ ನಗರಡ್ ನಾಲ್ ಮಾಳಿಗೆದ ಕಟ್ವಾನ ಮಗ್ರ್ದ್ ಇರ್ವೆರ್ ಸೈದೆರ್. ಅಂಚನೆ 12 ಜನಕ್ ಪೆಟ್ಟಾತ್ಂಡ್. 20ಡ್ದ್ 22 ಜನ ಮಣ್ಣ್ದಡಿಟ್ ತಿಕಲ್ದ್ ಇಪ್ಪೊಡು ಪನ್ಪಿ ಅಂಸನಿ ಉಂಡು.
ಪೆಟ್ಟಾಯಿನಕ್ಲೆನ್ ಘಾಟ್ಕೋಪರ್ ಬೊಕ್ಕ ಸಿಯಾನ್ ನಾಗರಿಕ ಆಸ್ಪತ್ರೆಲೆಗ್ ದಾಖಲ್ ಮಲ್ದೆರ್. ಅವೆಟ್ ಘಾಟ್ಕೋಪರ್ದ ರಾಜವಾಡಿ ಅಸ್ಪತ್ರೆಗ್ ಕೊನೊಯಿನೆಡ್ 28 ಬೊಕ್ಕ 30 ಒರ್ಸೊದ ಆಂಜೋವುಲು ತೀರ್ದೆರ್.
ಬ್ರಹನ್ಮುಂಬೈ ಮುನ್ಸಿಪಲ್ ಕಾರ್ಪೊರೇಷನ್(ಬಿಎಂಸಿ) ಪರತ್ತ್ ಕಟ್ವಾನಲೆನ್ ದೆಪ್ಪೆರೆ ಅಂಚನೆ ಅವೆಟ್ ನಿಲೆ ಉಂತೆರೆ ಬಲ್ಲಿ ಪಂದ್ ಆದೇಶ ಮಲ್ತ್ಂಡಲಾ ಕೇನಂದೆ ಬೊಕ್ಕಲಾ ಅಲ್ಪನೆ ಉಂತೊಂದುಲ್ಲೆರ್. ದನಿನಕ್ಲ್ ಕಟ್ವನದ ರಿಪೇರಿದ ಬೇಲೆಲಾ ಮಲ್ತೊಂದು ಇಜ್ಜೆರ್. ಉಂದು ಈ ತಿಂಗೊಳುಡು ಬೊಂಬಾಯಿಡ್ ಮೂಜಿನೆ ಅಟ್ರ್ಗಣಿ. ಜೂನ್ 23ಗ್ ಚೆಂಬೂರ್ಡ್ ರಡ್ಡ್ ಮಾಳಿಗೆದ ಕೈಗಾರಿಕಾ ಕಟ್ವನದ ಸ್ಲ್ಯಾಬ್ ಬೂರ್ದ್ 23 ಒರ್ಸೊದ ಒರಿ ತೀರ್ದ್, 10 ಜನಕ್ ಪೆಟ್ಟ್ ಆದಿತ್ತ್ಂಡ್. ಜೂನ್ 9ಗ್ ಬಾಂದ್ರಾ ಉಪನಗರಡ್ ಮೂಜಿ ಮಾಳಿಗೆದ ಫ್ಲ್ಯಾಟ್ ಬೂರ್ದ್ 55 ಒರ್ಸೊದ ಒರಿ ತೀರ್ದ್ 18 ಜನಕ್ ಪೆಟ್ಟ್ ಆದ್ ಇತ್ತ್ಂಡ್.
ಬಿಎಂಸಿಡ್ದ್ ಗಡಿ ಗಡಿ ರಿಪೇರಿ ಬೊಕ್ಕ ಮಗ್ರ್ಪೆರೆ ಆದೇಶ ಕೊರ್ಂಡಲಾ ಜನ ಮಂಡೆ ಕೊರಂದೆ ಇಪ್ಪುನೆಡ್ ಇಂಚ ಮಾತ ಆವೊಂದು ಉಂಡು ಪಂದ್ ಮುನ್ಸಿಪಲ್ ಕಮಿಷನರ್ ಅಶ್ವಿನಿ ಭಿಡೆ ಮಾಧ್ಯಮಗ್ ತೆರಿಪಾದೆರ್.
pallavi shetty