ಕುಡ್ಲ : ಪಂಚದ್ರಾವಿಡ ಬಾಸೆಲೆಡ್ ಒಂಜಾಯಿನ ತುಳು ಬಾಸೆಗ್ ರಾಜ್ಯ ಬಾಸೆದ ಮಾನಾದಿಗೆ ತಿಕ್ಕಂದಿನವು ಬಾರೀ ಬೇಜಾರ್ದ ಸಂಗತಿ. ಪ್ರತೀ ಸರ್ತಿಲಾ “ತಾಂತ್ರಿಕ ದೋಷ ಪಂದ್ ತುಳುವೆರೆನ್ ಮಂಗೆ ಮಲ್ತೊಂದೆ ಉಲ್ಲೆರ್ ವಾ ರೀತಿದ ಪೊರ್ಂಬಾಟ ಮಲ್ತುಂಡಲಾ ತುಲುಬಾಸೆಗ್ ಮಾನಾದಿಗೆ ತಿಕ್ಕಿನೇ ಇಜ್ಜಿ.ಅಂಚಾದ್ ಮಾತಾ ರೀತಿದ ಪೊರಂಬಾಟ ಮುಗಿತ್ ದ್ ಇತ್ತೆ ತುಲುವೆರ್ ತಾನ್ ನಂಬಿನಂಚಿನ ದೈವ-ದೇವೆರೆಡನೇ ಸುಗಿತೊಂದುಲ್ಲೆರ್.
ಕರ್ನಾಟಕ ತುಲುಸಾಹಿತ್ಯ ಅಕಾಡೆಮಿ,ಜೈ ತುಲುನಾಡ್ ಸಂಘಟನೆ (ರಿ) ಬೇತೆ ಬೇತೆ ತುಲುಸಂಘಟಕೆರ್ ಐತಾರ ತುಲುನಾಡೊರ್ಮೆ ದೈವ ದೇವಸ್ಥಾನೊಲೆಡ್ ಸೇರ್ದ್ ಸುಗಿತೆರ್.
ತುಳು ನಾಡ್ ದ ರಾಜಧಾನಿ ಬಾರ್ಕೂರುದ ಶ್ರೀ ಪಂಚಲಿಂಗೇಶ್ವರ ದೇವಸ್ಥಾನಡ್ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಪದುಕೆರಾಯಿನ ಆಳುಪ ರಾಜವಂಶಸ್ಥೆ ಶ್ರೀ ಆಕಾಶ್ ರಾಜ್ ಜೈನ್ ಮೆರೆನೊಟ್ಟುಗ್ ಜೈ ತುಲುನಾಡ್ ಸಂಘಟನೆದ ಪದುಕೆರ್ ಸೇರ್ದ್ ಭಕ್ತಿಡ್ ಸುಗಿತೆರ್.
ತುಳುವೆರೆ ಪಕ್ಷದ ಗುರ್ಕಾರ್ಲು ಶೈಲೇಶ್ ಆರ್.ಜೆ. ಕುಟುಂಬದೊಟ್ಟುಡು ಗುಳಿಗ ದೈವಡ ಅಂಚೆನೇ ಶ್ರೀ ಲೋಕನಾಥೇಶ್ವರ ದೇವಸ್ಥಾನ ಬದ್ಯಾರ್, ಶಿರ್ಲಾಲ್ ಮುಲ್ಪ ಭಕ್ತಿದ ಸುಗಿಪು ಮಲ್ಲೆರ್.
ಪುಂಡರೀಕ ಶ್ರೀ ವಿಷ್ಣುಮೂರ್ತಿ ದೇವಸ್ಥಾನ ಬೇಲಾಡಿಡ್ ಜೈ ತುಲುನಾಡ್ ಸಂಘಟನೆದ ಜವನೆರ್ ಭಕ್ತಿಡ್ ಸುಗಿತೆರ್.
ಶ್ರೀ ಬ್ರಹ್ಮಮುಗೇರ ದೈವಸ್ಥಾನ,ಅಲಿಮಾರು ಗುಡ್ಡೆ,ಈದು, ಒಡಿಪುದ ಎಮ್.ಜಿ.ಎಮ್.ದಲ್ಪ ಕೊರಗಜ್ಜನ ಸನ್ನಿಧಿ ಅಂಚನೆ ಕಟೀಲು ಶ್ರೀ ದುರ್ಗಾ ಪರಮೇಶ್ವರಿ ದೇವಲ್ಯೊಡು ಭಕ್ತಿಡ್ ಸುಗಿತೆರ್.
pallavi shetty