ಕುಡ್ಲಡ್ ಇನಿ ಪುಲ್ಯ ಕಾಂಡೆನೇ ಪಿಸ್ತೂಲ್ದ ಸೊರ : ರೌಡಿ ಶೀಟರ್ ಕೆರಿನ ಆರೋಪಿಲೆನ ಮಿತ್ತ್ ಪೊಲೀಸೆರ್ನ ಫೈರಿಂಗ್

ಕುಡ್ಲಡ್ ಇನಿ ಪುಲ್ಯ ಕಾಂಡೆನೇ ಪಿಸ್ತೂಲ್ದ ಸೊರ : ರೌಡಿ ಶೀಟರ್ ಕೆರಿನ ಆರೋಪಿಲೆನ ಮಿತ್ತ್ ಪೊಲೀಸೆರ್ನ ಫೈರಿಂಗ್

ಕುಡ್ಲ : ಪೊಲೀಸ್ದಕ್ಲೆನ ಮಿತ್ತ್ ಹಲ್ಲೆ ಮಲ್ಪರೆ ಯತ್ನ ಮಲ್ತ್ ತಪ್ಪಾಯೆರೆ ತೂಯಿನ ರಡ್ಡ್ ಆರೋಪಿಲೆನ ಕಾರ್ ಗ್ ಪೋಲಿಸೆರ್ ಗುಂಡು ಪಾರಾಯಿನ ಘಟನೆ ಮೂಲ್ಕಿ ಠಾಣಾ ವ್ಯಾಪ್ತಿದ ಗ್ಲೋಬಲ್ ಹೆರಿಟೇಜ್ ಲೇಔಟ್ ದ ಕೈತಲ್ ನಡತುಂಡು.

ಕರಿನ ಸೋಮಾರದಾನಿ ರಾತ್ರಿ ಬೈಕಂಪಾಡಿ ಕೈತಲ್ ಮೀನಕಳಿ ಕೈತಲ್ ನಡತಿನ ರೌಡಿಶೀಟರ್ ರಾಜಾ ಅಲಿಯಾಸ್ ರಾಘವೇಂದ್ರ ನ್ ಕೆರಿನ ಪ್ರಕರಣದ ಆರೋಪಿಲೆನ ಬಂಧನ ಮಲ್ಪುನ ಪೊರ್ತುಡು ಪೋಲಿಸೆರ್ನ ಮಿತ್ತ್ ಹಲ್ಲೆ ಮಲ್ತ್ ತಪ್ಪಾಯೆರೆ ಯತ್ನ ಮಲ್ದೆರ್. ಅರ್ಜುನ್ ಮೂಡುಶೆಡ್ಡೆ ಬೊಕ್ಕ ಮನೋಜ್ ಯಾನೆ ಬಿಂದಾಸ್ ಮನೋಜ್ ಬಂಧಿತ ಆರೋಪಿಲು. ಮೂಲ್ಕಿ ಠಾಣಾ ವ್ಯಾಪ್ತಿಡ್ ರಾಘವೇಂದ್ರನ್ ಕೆರಿನ ಪ್ರಕರಣದ ಸಂಬಂಧ ನನಾತ್ ಆರೋಪಿಲೆನ್ ಲೆತೊಂದು ಪೋಪಿನ ಪೊರ್ತುಡು ಈ ರಡ್ಡ್ ಜನ ಆರೋಪಿಲು ಪೊಲೀಸ್ ದಕ್ಲೆನ ಮಿತ್ತ್ ಹಲ್ಲೆ ಮಲ್ತ್ ತಪ್ಪಾಯೆರೆ ಯತ್ನ ಮಲ್ದೆರ್.

ಈ ಪೊರ್ತುಡು ಸಿಸಿಬಿ ಇನ್ಸ್ ಪೆಕ್ಟರ್ ಮಹೇಶ್ ಪ್ರಸಾದ್ ಮೂಜಿ ಸುತ್ತು ಫೈರಿಂಗ್ ಮಲ್ದೆರ್ , ಗಾಳಿಡ್ ಒಂಜಿ ಸುತ್ತು ಪಾರಾದೆರ್ ಅಂಚನೆ ಆರೋಪಿಲೆನ ಕಾರ್ ಗ್  ಪಿಸ್ತೂಲ್ ದ ಗುಂಡು ಬೂರ್ದುಂಡು.
ಘಟನೆಡ್ ಮೂಜಿ ಜನ ಪೊಲೀಸೆರೆಗ್ ಗಾಯ ಆತುಂಡು. ಪಿಎಸ್‌ಐ ನಾಗೇಂದ್ರ, ಎಎಚ್‌ಸಿ ಸಂತೋಷ್ ಪೂಜಾರಿ ಬೊಕ್ಕ ಎಎಸ್‌ಐ ಡೇವಿಡ್ಗ್ ಗಾಯ ಆತುಂಡು. ಆರೋಪಿಲು ಬೊಕ್ಕ ಪೊಲೀಸ್ ದಕ್ಲೆನ್ ಪೇಂಟೆದ ಮುಕ್ಕಡ್ ಉಪ್ಪುನ ಶ್ರೀನಿವಾಸ್ ಕಾಲೇಜು ಆಸ್ಪತ್ರೆಗ್ ದಾಖಲ್ ಮಲ್ದೆರ್ ಪಂದ್ ನಗರ ಪೊಲೀಸ್ ಕಮಿಷನರ್‌ ಎನ್.‌ಶಶಿಕುಮಾರ್ ಪಂಡೆರ್ .