ಬಸ್ಸ್ ಡ್ ನನ ಮೂಜಿ ವರ್ಷದ ಜೋಕುಲೆಗ್ಲಾ ಹಾಫ್ ಟಿಕೆಟ್‌! ರಾಜ್ಯ ಸಾರಿಗೆ ನಿಗಮರ್ದ್ ಪೊಸ ನಿಯಮ ಜಾರಿ

ಬೆಂಗ್ಳೂರ್: ಆಜಿ ವರ್ಷ ಆಂಡ ಮಾತ್ರ ಅತ್ತ್, ಕೆಎಸ್‌ಆರ್‌ಟಿಸಿ ಬಸ್ ಲೆಡ್ ಮೂಜಿ ವರ್ಷದ ಜೋಕುಲೆಗ್ಲಾ ನನ ಅರ್ಧ ಟಿಕೆಟ್‌ ಉಂಡು.

ಅಂದ್, ಈ ಪಿರವು ಬಸ್ ಲೆಡ್ ಆಜಿ ವರ್ಷದ ಉಲಾಯಿದ ಜೋಕುಲೆಗ್ ಉಚಿತವಾದ್ ಪ್ರಯಾಣ ಮಲ್ಪರೆ ವ್ಯವಸ್ಥೆ ಇತ್ತ್ಂಡ್. 6-12 ವರ್ಷದ ಜೋಕುಲೆಗ್ ಮಾತ್ರ ಅರ್ಧ ಟಿಕೆಟ್‌ ಮಲ್ತೊಂದಿತ್ತೆರ್. ಇತ್ತೆ ಪ್ರಾಯನ್ ಆಧರಿಸಾದ್ ಟಿಕೆಟ್‌ ಕೊರ್ಪುಜೆರ್. ಬದಲ್ ಗ್ ಬಾಲೆದ ಎತ್ತರ ಆಧರಿಸಾದ್ ಟಿಕೆಟ್‌ ಕೊರ್ಪೆರ್. ಬಾಲೆ ಮೂಜಿ ಅಡಿ ಎತ್ತರ ಇತ್ತ್ ದ್, ಪ್ರಾಯ ನನಲ ರಡ್ಡ್ ಅತ್ತ್ಂಡ ಮೂಜಿ ವರ್ಷನೆ ಆದಿಪ್ಪಡ್, ಅಂಚಿನ ಜೋಕುಲೆಗ್ ನ ಇಲ್ಲದಕಲೆಡ್ದ್ ಅರ್ಧ ಟಿಕೆಟ್ ನ್ ಮಲ್ಪುವೆರ್. ಇಂಚಿನ ಒಂಜಿ ವ್ಯವಸ್ಥೆ ಕರ್ನಾಟಕ ರಾಜ್ಯ ರಸ್ತೆ ಸಾರಿಗೆ ಸಂಸ್ಥೆ (ಕೆಎಸ್‌ಆರ್‌ಟಿಸಿ)ಡ್ ಜಾರಿಗೆ ಬೈದ್ಂಡ್.

ಜೋಕ್ಲೆನ ಎತ್ತರನ್ ತೂಯರೇ ಬಸ್ ದ ಮಧ್ಯಡ್ ಇಪ್ಪುನ ಸರಳ್ ದ ಮಿತ್ತ್ ರಡ್ಡ್ ಕಡೆಟ್ಟ್ ಲ (3 ಅಡಿ, 4 ಅಡಿ) ಬಣ್ಣಡ್ ಗುರುತು ಮಲ್ತ್ ದೆರ್. ಯೇರ್ ಟಿಕೆಟ್ ದೆತೊನುಜೆರಾ ಅಂಚಿನ ಜೋಕುಲೆನ್ ಸರಳ್ ದ ಕೈತಲ್ ಉಂತಾದ್, ಎತ್ತರ ತೂದ್, ಟಿಕೆಟ್‌ ಕೊರ್ಪೆರ್.

ಕೈತಲ್ ದ ಊರುಗ್ ಪ್ರಯಾಣ ಮಲ್ಪುನಾಂಡ ಜೋಕುಲೆಗ್ ಟಿಕೆಟ್ ದೆತೊಂಡಲ ದಾಲ ವಿಷಯ ಆಪುಜಿ. ಆಂಡ ಬೆಂಗಳೂರ್ದ್ ಮೈಸೂರು, ಹುಬ್ಬಳ್ಳಿ, ಧಾರವಾಡ, ಚಿಕ್ಕಮಗಳೂರು, ಮಡಿಕೇರಿ, ಹಾಸನ ಇಂಚ ದೂರದ ಊರುಲೆಗ್ ಪೋಪುನಾಂಡ ಪ್ರಾಯದ ಪ್ರಯಾಣಿಕೆರೆಗ್ 150-300 ರೂ ಮುಟ್ಟ ಟಿಕೆಟ್‌ ಇಪ್ಪುಂಡು. ಆಯಿಟ್ಟ್ ಲ ಸ್ಲೀಪರ್‌ ಕೋಚ್‌ ಲೆಡ್ ಟಿಕೆಟ್‌ ದ ಬಿಲೆ ಮಸ್ತ್ ಇಪ್ಪುಂಡು. ಇಂಚಿನ ಪೊರ್ತುಡ್ ಜೋಕುಲೆಗ್ ಅರ್ಧ ಟಿಕೆಟ್‌ ದೆತ್ತಿಜಿಂಡ ಬಂಗ ಆಪುಂಡು.