ಬೇಲೆ ತಿಕ್ಕಿಜಿ ಪನ್ಪಿನ ಬೇಜಾರ್ ಡ್ ಎಂಬಿಎ ಕಲ್ತಿನ ಪೊಣ್ಣು ಆತ್ಮಹತ್ಯೆ

ಒಡಿಪು: ಎಂಬಿಎ ಕಲ್ತುದಿತ್ತ್ಂಡಲ ಸರಿಯಾಯಿನ ಬೇಲೆ ತಿಕ್ಕಿಜಿ ಪನ್ಪಿನ ಬಗೆಟ್ಟ್ ಪೊಣ್ಣು ಒರ್ತಿ ವಿಷ ಪರ್ದ್ ಆತ್ಮಹತ್ಯೆ ಮಲ್ತಿನ ಘಟನೆ ಒಡಿಪುದ ಕಾಪು ತಾಲೂಕ್ ಡ್ ನಡತ್ ದ್ಂಡ್.

ದ.ಕ.ಜಿಲ್ಲೆ ಉಬಾರ್ ದ ಸಹನಾ (23) ಆತ್ಮಹತ್ಯೆ ಮಲ್ತಿನ ಪೊಣ್ಣು. ಕುಡ್ಲದ ಖಾಸಗಿ ಕಾಲೇಜ್ ಒಂಜಾರೆ ವರ್ಷದ ಪಿರವು ಎಂಬಿಎ ಡ್ ಪದವಿ ಶಿಕ್ಷಣನ್ ಪಡೆದಿತ್ತೆರ್. ಆಂಡ ಅಲೆಗ್ ಸರಿಯಾಯಿನ ಬೇಲೆ ತಿಕ್ಕಿದಿಜಾಂಡ್.

ಏಪ್ರಿಲ್ 30 ಗ್ ಶಿರ್ವ ಕೈತಲ್ ದ ಕಟ್ಟಿಂಗೇರಿ ಗ್ರಾಮದ ಅಕ್ಕನ ಇಲ್ಲಗ್ ಬತ್ತಿನ ಸಹನಾ ಅಲ್ಪನೇ ಕತ್ತಲೆಗ್ ವಿಷ ಪರ್ದ್ ಆತ್ಮಹತ್ಯೆಗ್ ಪ್ರಯತ್ನ ಮಲ್ತ್ ದೆರ್ ಪಂದ್ ಪೊಲೀಸೆರ್ ಮಾಹಿತಿನ್ ಕೊರ್ತೆರ್.

ಮೇ 1 ಕ್ಕ್ ಕಾಂಡೆ ಸಹನಾ ಮಸ್ತ್ ಕಕ್ಕಿನೆಡ್ದಾವರ ಅಲೆನ್ ಒಡಿಪುದ ಮಿಷನ್ ಆಸ್ಪತ್ರೆಗ್ ಸೆರ್ಸಾದಿತ್ತೆರ್. ಅಲ್ಪರ್ದ್ ಎಚ್ಚದ ಚಿಕಿತ್ಸೆಗಾದ್ ಮೇ 7 ಕ್ಕ್ ಒಡಿಪುದ ಜಿಲ್ಲಾ ಸರ್ಕಾರಿ ಆಸ್ಪತ್ರೆಗ್ ಸೆರ್ಸಾದಿತ್ತೆರ್. ಅಂಡ ಚಿಕಿತ್ಸೆ ಸಮ ಆವಾಂದೆ ತೀರ್ ಪೊತೆರ್. ಶಿರ್ವ ಠಾಣೆಡ್ ಈ ಪ್ರಕರಣ ದಾಖಲಾತ್ಂಡ್.