ಬೆಂಗ್ಳೂರು : ರಾಜಧಾನಿ ಬೆಂಗ್ಳೂರುದ ಪ್ರಮುಖ ಸಾoಸ್ಕೃತಿಕ ಸಂಘಟನೆ ತುಳುವೆರೆಂಕುಲು ಬೆಂಗ್ಳೂರು (ರಿ.) ಕರಿನ 30 ವರ್ಷರ್ದ್ ತುಲುಭಾಷೆ, ಸಂಸ್ಕೃತಿ, ಆಚಾರವಿಚಾರ, ಕಲೆ-ಕ್ರೀಡೆ-ಸಾಹಿತ್ಯದ ಉನ್ನತಿಗಾದ್ , ಕನ್ನಡದ ಒಟ್ಟುಗು ಅವ್ವೆತೋ ಸೃಜನಾತ್ಮಕ ಲೇಸ್ ನಡಪಾವೊಂದು ಬೈದುಂಡು. ತುಳು ಭಾಷೆನ್ ಸಂವಿಧಾನದ 8ನೇ ಪರಿಭೇದಗ್ ಸೇರಾಯೆರೆ , ರಾಜ್ಯದ ಅಧಿಕೃತ ಭಾಷೆ ಸ್ಥಾನಮಾನಗಾದ್ , ಕಂಬುಲ ಇಂಚ ಅವ್ವೆತೋ ಹಕ್ಕೊತ್ತಾಯಡ್ ಪಾಲ್ ಪಡೆಯೊಂದು ಬೈದುಂಡು. ತುಳುಲಿಪಿ ಪ್ರಚಾರಾಭಿಯಾನ,ತುಳುಲಿಪಿ ಕಲ್ಪುನ ಕಜ್ಜ ಕೊಟ್ಯನ್ ನಡಪಾವೊಂದು ಬೈದುಂಡು ಪ್ರತಿ ವರ್ಷ ಬಿಸು ಪರ್ಬ , ಬಲಿಯೇಂದ್ರ ಪರ್ಬ, ಬಲಿಯೇಂದ್ರ ಪುರಸ್ಕಾರ, ಆಟಿದ ಕೂಟ, ಗ್ರಾಮೀಣ ಕ್ರೀಡಾ ಪಂಥನ್ ಅಟ್ಟನೆ ಮಲ್ತ್ ಒವ್ವೆ ಜಾತಿ,ಮತ, ಪ್ರಾದೇಶಿಕತೆದ ತಾರತಮ್ಯ ದಾಂತೆ ರಾಜಧಾನಿಡ್ ತುಳುವೆರೆನ್ ಒಟ್ಟು ಮಲ್ತ್ , ಸಾಂಸ್ಕೃತಿಕ ಜಾಗೃತಿ ಮೂಡಾವೊಂದು ಅವ್ವೆತೋ ಜನಕ್ಲೆನ ಪುಗಾರ್ತೆ ಪಡೆದ್ ಕರಿನ ವರ್ಷಾ ” ಕರ್ನಾಟಕ ಸಾಹಿತ್ಯ ಅಕಾಡೆಮಿ’ ರ್ದ್ ಸಂಘ ಪ್ರತಿಷ್ಟಿತ ಸಂಘಟನಾ ಪ್ರಶಸ್ತಿ ಪಡೆತುಂಡು.
ಉಂದುವೇ ಬರ್ಪಿನ ತಾರೀಖ್ 15-05-2022 ನೇ ಐತಾರ ಕಾಂಡೆ 10.00 ಗಂಟೆರ್ದ್ ರಾತ್ರಿ 8 ಗಂಟೆ ಮುಟ ಬೆಂಗ್ಳೂರುದ ರವೀಂದ್ರ ಕಲಾಕ್ಷೇತ್ರಡ್ ತುಳುವೆರೆಂಕುಲು ಬೆಂಗ್ಳೂರು(ರಿ.)ಸಂಘದ 30ನೇ ವರ್ಷಾಚರಣೆದ ಪರವಾದ್ ಗೌಜಿಡ್ ನಡಪುನ ‘ಬೆಂಗ್ಳೂರು ತುಳುಪರ್ಬ-2022′ ನ್ ಅಟ್ಟನೆ ಮಲ್ದೆರ್ . ನಾಡ್ದ ಸಂಸ್ಕೃತಿನ್ ತೋಜಾವುನಾ ವೈವಿಧ್ಯಮಯ ಲೇಸ್ ದ ಒಟ್ಟುಗು , ನಮ್ಮ ನಾಡ್ ದ ಭಾಷೆ ಸಂಸ್ಕೃತಿಗಾದ್ ದೇಶ ವಿದೇಶಡ್ ಬೆನ್ನಿ ಬೆನೊಂದು ಉಪ್ಪುನ ಅವ್ವೆತೋ ಮಲ್ಲ ಸಾಧಕೆರೆನ್ ಗುರ್ತಿಸಾದ್ ವಾರ್ಷಿಕ ಬಲಿಯೇಂದ್ರ ಪುರಸ್ಕಾರ’ ನ್ ಬೊಕ್ಕ ಗಣ್ಯ ಸಾಧಕೆರೆಗ್ ವಿಶೇಷ ಮಾನದಿಗೆದ ಲೇಸ್ ನಡಪರೆ ಉಂಡು ಈ ಪೊರ್ಲ ಕಜ್ಜಡ್ ಮಾತಾ ತುಳುವಪ್ಪೆ ಜೋಕುಲು ಪಾಲ್ ಪಡೆದ್ ಲೇಸ್ ಪೊರ್ಲು ಮಲ್ತ್ ಕೊರೊಡು ಪಂದ್ ಸಂಘದ ಗುರ್ಕಾರ್ಲಾಯಿನ ವೈ. ಜಯಂತ್ ರಾವ್, ಕಾರ್ಯಂತೆರಾಯಿನ ಪಳ್ಳಿ ವಿಶ್ವನಾಥ ಶೆಟ್ಟಿ, ಅಂಚನೆ ಸರ್ವ ಸದಸ್ಯೆರ್ ಬಿನ್ನಾಪು ಮಲ್ದೆರ್.
pallavi shetty