ಬೆಂಗಳೂರು: ತುಳು ಬಾಸೆಗ್ ಪೊಸ ದೇಕಿದ ಸತು ದಿಂಜಿದಿ ಪದ ಕೊರ್ಯರೆ ಪಿದಾಡ್ದಿನ ಐಲೇಸಾ ದಿ ವಾಯ್ಸ್ ಆಫ್ ಓಷನ್ (ರಿ.) ಬೆಂಗಳೂರು, ಈ ಸಲ ಶಾಲಾ ಶಿಕ್ಷಕಿ ಶ್ರೀಮತಿ ವಿಜಯಾ ಶೆಟ್ಟಿ ಸಾಲೆತ್ತೂರು ಮೆರೆನ ಕಲ್ಪನೆಡ್ ಮೂಡ್ದ್ ಬೈದಿನ ನಮ್ಮ ಪ್ರಕೃತಿ, ಪರಿಸರ, ಕಾರ್ಖಾನೆದ ಕುರೆ ನೀರ್ ಕಡಲ್ ಸೇರ್ದ್ ಜೀವರಾಶಿಗ್ ಸಂಚಕಾರ ಆಪಿನ ಬಗೆಟ್ ಉಲಾರ್ತದ ಪದೊನು ಸಂಗೀತ ಸೊರೊಟು ಬುಡುಗಡೆ ಮಲ್ತೊಂದುಲ್ಲೆರ್.
ಪರಿಸರ ಸಂರಕ್ಷಣೆದ ವಿಷಯೊಡು ಯಾಪಲ ದುಂಬು ಉಂತುನಾರ್ ಕೇಮಾರು ಸಾಂಧೀಪನ ಆಶ್ರಮದ ಸ್ವಶ್ರೀ ಶ್ರೀ ಈಶವಿಠಲದಾಸ ಸ್ವಾಮಿಲು ರಾವೊಡತ್ತೆಯೆ ಪದೊನು ಎಪ್ರಿಲ್ ತಿಂಗೊಲ್ದ ಪತ್ತನೆ ತಾರೀಖ್ ಐತಾರ ಬೈಯಗ್ ೭:೩೦ ಗಂಟೆಗ್ ಬುಡುಗಡೆ ಮಲ್ತ್ ಆಶೀರ್ವಚನ ನುಡಿ ಸೇಸೆ ಕೊರ್ರೆ ಉಲ್ಲೆರ್. ಪುಗಾರ್ತೆದ ಸಂಗೀತ ನಿರ್ದೇಶಕೆ ನಾಗಭೂಷಣ ಉಡುಪ ಎನ್ ಮೆರೆನ ಸ್ವರ ಸಂಯೋಜನೆಗ್ ಕಡಲ್ದ ಉಡಲ್ ಖ್ಯಾತಿದ ಐಲೇಸಾದ ಕೆ ಸುಧಾಕರ್ ಪೊರ್ಲುದ ತುಳುವ ದೇಕಿದ ಒರುತ ಸೊರ ಕೊರ್ತೆರ್. ವಿಜಯಲಕ್ಷ್ಮೀ ಕಟೀಲು ಪದತ ಅರ್ಥ ಬುಡ್ಪ ತೆರಿಪಾವರೆ ಉಲ್ಲೆರ್.
ಕಾರ್ಯಕ್ರಮತ ಭಿನ್ನೆರಾದ್ ಅಮರ್ ನಾಥ್ ಶೆಟ್ಟಿ ಉದ್ಯಮಿ ಬೆಂಗಳೂರು. “ರಾವೊಡತ್ತೆಯೆ…” ಪದತ ಕರೋಕೆ ಬಿಡುಗಡೆ ಮಲ್ಪರೆ ಉಲ್ಲೆರ್.
ಕಾರ್ಯಕ್ರಮೊನು ಪುಗಾರ್ತೆದ ಯಕ್ಷ ನಿರೂಪಕೆ ದೀಪಕ್ ಶೆಟ್ಟಿ ಬಾರ್ಕೂರು ನಡಪ ಕೊರ್ರೆ ಉಲ್ಲೆರ್ ಪಂಡ್ ದ್ ಐಲೇಸಾದ ಸಾರಥಿ ಡಾ. ರಮೇಶ್ಚಂದ್ರ ಟೈಮ್ಸ್ ಆಫ್ ಕುಡ್ಲ ಪತ್ರಿಕೆಗ್ ತೆರಿಪಾದೆರ್. ಐಲೇಸಾದ ವೇದಿಕೆಡ್ ಈ ಪದೊನು ಗೋಪಾಲ್ ಪೂಜಾರಿ ಪಟ್ಟೆ ತನ್ನ ಅಪ್ಪೆನ ನೆನಪುಡು ತುಳುವೆರೆಗ್ ಅರ್ಪಣೆ ಮಲ್ತೊಂದುಲ್ಲೆರ್.
ಮಾತಾ ತುಳುವೆರ್ ತುಳುತ ಈ ಪ್ರಕೃತಿ ಪದತ ಬುಡುಗಡೆಗ್ ಝೂಮ್ ವರ್ಚುವಲ್ ವೇದಿಕೆಡ್ ಐಡಿ ನಂಬರ್ 86341252923 ಪಾಸ್ವರ್ಡ್ ilesa ಮಕಾಂತ್ರ ಸೇರೊಂದು ತುಳುತ ಈ ಎಡ್ಡೆ ಬೇಲೆಗ್ ಬೆರಿಸಾಯ ಆವೊಡು ಪನೊಂದು ಡಾ. ರಮೇಶ್ಚಂದ್ರ ಭಿನ್ನಪ ಮಲ್ತೊಂದೆರ್.
ವರದಿ: ಶಾಂತರಾಮ್ ಶೆಟ್ಟಿ, ಬೆಂಗಳೂರು
pallavi shetty