ಬದಿಯಡ್ಕ (ಕಾಸ್ರೋಡು): ಪುಗರ್ತೆದ ತುಳು ಸಂಘಟನೆ “ತುಳುವೆರೆ ಆಯನೊ ಕೂಟೊ” ಗು 20ನೇ ವರ್ಷೊದ ಸಂಬ್ರಮೊದ ಹಿನ್ನೆಲೆಡ್ ಮಲ್ಲ ಲೇಸ್ ಮಲ್ಪೆರೆ ಅಟ್ಟಣೆ ಸುರುವಾತ್ಂಡ್.
ನೆತ್ತ ಬಗೆಟ್ ಬದಿಯಡ್ಕದ ಸಂಸ್ಕೃತಿ ಭವನೊಡು ನಡತಿನ ತುಳುವೆರೆ ಆಯನೋ ಕೂಟೊದ ಸಭೆಟ್ 2027 ನೇ ಜನವರಿ 30 ಬೊಕ್ಕ 31ಕ್ಕ್ ಬೇತೆ ಬೇತೆ ಲೇಸ್ ಮಲ್ಪೆರೆ ತೀರ್ಮಾನ ಮಲ್ತೆರ್. ನೆತ್ತ ದುಂಬುದ ತಯಾರಿಗ್ ಬೋಡಾದ್ ಸ್ವಾಗತ ಸಭೆ ನವೆಂಬರ್ 8 ತಾರೀಕ್‌ಗ್ ಬದಿಯಡ್ಕಡ್ ಮಲ್ಪೆರೆ ಉಂಡು. ಕಾಸ್ರೋಡು ಜಿಲ್ಲೆದ ಪ್ರತಿಯೊಂಜಿ ಪಂಚಾಯತ್ ಮಟ್ಟೊದ ತುಳುವೆರೆನ್ ಸೇರಾವೊಂದು ಮಲ್ಲ ಸ್ವಾಗತ ಸಮಿತಿನ್ ಮಲ್ಪೆರೆ ಸಭೆಟ್ ತೀರ್ಮಾನ ಮಲ್ತೆರ್. ಈ ಸಭೆಟ್ ತುಳುವೆರೆ ಆಯನೋ ಕೂಟೊದ ಗುರ್ಕಾರ್ಲು ಗೋಪಾಲಕೃಷ್ಣ ಕುಲಾಲ್ ವಾಂತಿಚ್ಚಾಲ್ ಸಭೆತ್ತ ಗುರ್ಕಾರ್ಮೆ ವಹಿಸ್‌ದಿತ್ತೆರ್.
ತುಳುವೆರೆ ಆಯನೋ ಕೂಟೊದ ಸ್ಥಾಪಕ ಕಾರ್ಯದರ್ಶಿ ಡಾ. ರಾಜೇಶ್ ಆಳ್ವ ಕೂಟೊ ನಡತ್ ಬತ್ತಿನ ಸಾದಿ ಬೊಕ್ಕ ಬೇತೆ ಬೇತೆ ಬೇಲೆದ ಬಗೆಟ್ ಪಾತೆರಿಯೆರ್.
ಜಿ.ಪಂ. ಸದಸ್ಯೆರ್ ರಾಮಪ್ಪ ಮಂಜೇಶ್ವರ, ಬದಿಯಡ್ಕ ಪಂ. ಸದಸ್ಯೆರ್ ಶ್ಯಾಮ್ ಪ್ರಸಾದ್ ಮಾನ್ಯ, ಮಾಹಿನ್ ಕೇಳೋಟ್, ಗಂಗಾಧರ ಗೋಳಿಯಡ್ಕ, ಶ್ಯಾಮ್ ಪ್ರಸಾದ್ ಸರಳಿ, ಪುತ್ತಿಗೆ ಪಂಚಾಯತ್‌ದ್ ಪಿರಾಕ್ದ ಗುರ್ಕಾರ್ಲು, ನ್ಯಾಯವಾದಿ ಥೋಮಸ್ ಡಿಸೋಜ, ಕುಂಬ್ಡಾಜೆ ಪಂ. ಪಿರಾಕ್ದ ಗುರ್ಕಾರ್ಲು ಆನಂದ ಮೌವ್ವಾರು, ಮಹಾಲಿಂಗ ಕೆ. ಕುಮಾರ ಮಂಗಲ, ಸಂತೋಷ್ ರೈ ಗಾಡಿಗುಡ್ಡೆ, ಸುಂದರ ಕಟ್ನಡ್ಕ, ಶ್ರೀನಿವಾಸ ಆಳ್ವ ಕಳತ್ತೂರು, ರವೀಂದ್ರ ರೈ ಮಲ್ಲಾವರ, ಹರ್ಷ ರೈ ಪುತ್ರಕಳ, ಸುಧೀರ್ ಕುಮಾರ್ ರೈ ಮುಳ್ಳೇರಿಯ, ರಾಮ ಪಟ್ಟಾಜೆ, ರವಿ ನಾರಂಪಾಡಿ, ಶ್ಯಾಮ ಆಳ್ವ ಕಡಾರು, ಜಯರಾಮ ಪಾಟಾಳಿ ಪಡುಮಲೆ, ರವಿ ನಾಯ್ಕಾಪು, ಅಖಿಲೇಷ್ ನಗುಮುಗಂ ಮೊಕುಲು ಮಾತ ಪಾತೆರಿಯೆರ್.
ಜೈ ತುಲುನಾಡ್ ಸಂಘಟನೆದ ಜಗನ್ನಾಥ ಕುಲಾಲ್, ಉಪ್ಲೇರಿ ಮಂತ್ರಮೂರ್ತಿ ಗುಳಿಗ ಸನ್ನಿಧಿದ ಸೇವಾ ಸಮಿತಿ ಕಾರ್ಯದರ್ಶಿ ರಮೇಶ್ ಕುಲಾಲ್, ಡಾ. ಶ್ರೀನಿಧಿ ಸರಳಾಯ, ಸುಂದರ ಬಾರಡ್ಕ, ಉದಯ ಬಾಂಜತ್ತಡ್ಕ, ಲಕ್ಷ್ಮಣ ಬದಿಯಡ್ಕ ಮೊಕುಲು ಮಾತ ಇತ್ತೆರ್.
ತುಳುನ್ ಕರ್ನಾಟಕೊದ ರಡ್ಡನೇ ಬಾಸೆಯಾದ್ ಮಲ್ತಿನ ಸರಕಾರೊಗು ಬೊಕ್ಕ ನೆಕ್ಕ್ ಬೇಲೆ ಮಲ್ತಿನಕ್ಲೆಗ್ ಸೊಲ್ಮೆ ಸಂದಾಯೆರ್.
ತುಳುವೆರೆ ಆಯನೊ ಕೂಟೊಡಿತ್ತ್‌‌ದ್ ತೀರ್ದ್ ಪೋಯಿನ ರವಿಕಾಂತ ಕೇಸರಿ ಕಡಾರು, ಪದ್ಮನಾಭ ಶೆಟ್ಟಿ ವಳಮಲೆ, ಜಗನ್ನಾಥ ಆಳ್ವ ಮೂಕಂಪಾರೆ ಅಕ್ಲೆನ್ ನೆಂಪು ಮಲ್ತೆರ್. 20 ವರ್ಷೊದ ಸಿಂಗಾರೊದ ಪ್ರೋಗ್ರಾಮ್‌ದ ದುಂಬುದ ತಯಾರಿಗ್ ಗುರು ಪ್ರಸಾದ್ ರೈ ಮೆರೆನ್ ಸಂಚಾಲಕೆರಾದ್ ಆಯ್ಕೆ ಮಲ್ತೆರ್. ಲೇಸ್ ಯಶಸ್ವಿ ಆವರೆ ತುಳು ಪರ ಸಂಘ ಸಂಸ್ಥೆದ ಬೊಕ್ಕ ಮಲ್ಲ ಅಕ್ಲೆನ ಸಹಯೋಗ ದೆತೊನೆರೆ ತೀರ್ಮಾನ ಮಲ್ತೆರ್. ತುಳುವೆರೆ ಆಯನೊ ಕೂಟೊದ ಕಾರ್ಯದರ್ಶಿ ಜಯ ಮಣಿಯಂಪಾರೆ ಮಾತೆರೆನ್ಲ ಎದುಕೊಂದು ಭಾಸ್ಕರ ಕೆ. ಸೊಲ್ಮೆ ಸಂದಾಯೆರ್.