ಪ್ರಿಯದರ್ಶಿನಿ ಸೊಸೈಟಿದ ಸಮಾಜ ಸೇವೆ ಮೆಚ್ಚೊಡಾಯಿನ: ಸಾತ್ವಿಕ್ ಪ್ರಮೋದ್
ಪಡ್ಡೆದ್ರ : ನಾಲ್ ವರ್ಸೊದ ದುಂಬು ಸುರು ಆಯಿನ ಪ್ರಿಯದರ್ಶಿನಿ ಕೋ-ಆಪರೇಟಿವ್ ಸೊಸೈಟಿದ ಪಡ್ಡೆದ್ರದ ಶಾಖೆದ ಮುಕೇನ ಮುಲ್ಪದ ಜನಕ್ಲೆಗ್ ಎಡ್ಡೆ ಸೇವೆ ಕೊರ್ಪಿನ ಮುಕೇನ ಜನಕ್ಲೆನ ಮನಸ್ ಗೆಂದ್‌ದ್ಂಡ್. ಅತ್ತಂದೆ, ಇಂಚಿನ ಸಮಾಜಮುಖಿ ಲೇಸ್‌ನ್ ಮಲ್ತೊಂದು ಬರ್ಪಿನವು ಪುಗರೊಡಾಯಿನ ಸಂಗತಿ. ಪ್ರಿಯದರ್ಶಿನಿ ಸೊಸೈಟಿ ನನಲಾ ಮಸ್ತ್ ಎತ್ತರೊಗು ಬುಳೆಯಡ್” ಪಂದ್ ಪಡ್ಡೆದ್ರ ಇಎಸ್ಐ ಆಸ್ಪತ್ರೆದ ಮೆಡಿಕಲ್ ಆಫೀಸರ್ ಡಾ| ಸಾತ್ವಿಕ್ ಪ್ರಮೋದ್ ಪಂಡೆರ್.
ಆರ್ ಪ್ರಿಯದರ್ಶಿನಿ ಕೋ-ಆಪರೇಟಿವ್ ಸೊಸೈಟಿದ ಪಡ್ಡೆದ್ರ ಶಾಖೆದ 4 ನೇ ವಾರ್ಷಿಕೋತ್ಸವದ ಲೇಸ್‌ಡ್ ಮುಲ್ಪದ ಅಂಗನವಾಡಿ ಶಾಲೆಲೆಗ್ ಏರ್ ಕೂಲರ್ ಪಟ್ಟ್‌ದ್ ಪಾತೆರಿಯೆರ್.
ಮಲ್ಲ ಬಿನ್ನೆರಾದ್ ಬೈದಿನ ರಾಜ್ಯ ಪ್ರಶಸ್ತಿ ಪಡೆತಿನ ಸಾಹಿತಿ ಫಾತಿಮಾ ರಲಿಯಾ ಹೆಜಮಾಡಿ ಮೇರ್ ಪಾತೆರ್ದ್, ಪ್ರಿಯದರ್ಶಿನಿ ಸೊಸೈಟಿ ಬೇತೆ ಸೊಸೈಟಿದಲೆಕ ವ್ಯವಹಾರೊಗು ಮಾತ್ರ ಸೀಮಿತ ಆವಂದೆ, ಅಂಗನವಾಡಿದ ಬಡ ಜೋಕ್ಲೆಗ್ ಎಡ್ಡೆ ಸೌಕರ್ಯೊ ಒದಗಾದ್ ಕೊರ್ಪಿನವು ಎಡ್ಡೆ ಚಿಂತನೆ. ಇಂಚಿನ ಸೇವೆ ನನಾತ್ ನಡಪಡ್ ಪಂದ್ ಪಂಡೆರ್.
ಲೇಸ್‌ದ ಅಧ್ಯಕ್ಷತೆ ಒಯಿಸೊಂದಿನ ಸೊಸೈಟಿದ ಅಧ್ಯಕ್ಷೆರ್ ಹೆಚ್. ವಸಂತ್ ಬೆರ್ನಾರ್ಡ್ ಮೇರ್ ಪಾತೆರ್ದ್, ಪಡ್ಡೆದ್ರ ಶಾಖೆ ಎಡ್ಡೆ ಲಾಭದ ಒಟ್ಟುಗು ಬುಳೆಯರೆ ಸಾಯ ಮಲ್ತಿನ ಮುಲ್ಪದ ಗ್ರಾಹಕರೆಗ್, ಸದಸ್ಯರೆಗ್ ಸೊಲ್ಮೆ ಸಂದಾಯೆರ್.
ಅಬ್ಬೇಡಿ ಅಂಗನವಾಡಿದ ಶ್ಯಾಮಲಾ, ಗಣಪತಿ ದೇವಸ್ಥಾನ ಕೆಳಗಿನಪೇಟೆ ಅಂಗನವಾಡಿದ ಅನಿತಾ, ಸಾಗರ್ ವಿದ್ಯಾಮಂದಿರ ಅಂಗನವಾಡಿದ ಶೋಭಾ, ಬೀಡಿನ ಕೆರೆ ಅಂಗನವಾಡಿದ ಲೀಲಾ ಮೊಕುಲು ಸೊಸೈಟಿದ ಕೊಡುಗೆಗ್ ಕೃತಜ್ಞತೆ ಸಂದಾಯೆರ್.
ಈ ಲೇಸ್‌ಡ್ ಸೊಸೈಟಿದ ನಿರ್ದೇಶಕೆರಾಯಿನ ಗಣೇಶ್ ಪ್ರಸಾದ್ ದೇವಾಡಿಗ, ಧನಂಜಯ ಮಟ್ಟು, ಅನಿಲ್ ಪೂಜಾರಿ ಸಸಿಹಿತ್ಲು ಪಾಲ್ ಪಡೆದಿತ್ತೆರ್. ಪಡ್ಡೆದ್ರ ಶಾಖೆದ ಮ್ಯಾನೇಜರ್ ಅಂಜಲಿ ಉಳ್ಳಾಲ್ ಎಸ್ ಸ್ವಸಗತ ಮಲ್ತೆರ್. ಕಾರ್ಯನಿರ್ವಹಣಾಧಿಕಾರಿ ಸುದರ್ಶನ್ ಪೂಜಾರಿ ಸೊಲ್ಮೆ ಸಂದಾಯೆರ್. ಸಿಬ್ಬಂದಿಲಾಯಿನ ಪರ್ಣಾಲಿ ಕಿಣಿ ಬೊಕ್ಕ ರಕ್ಷಿತ್ ಮೊಕುಲು ಲೇಸ್‌ನ್ ಸುಧಾರಣೆ ಮಲ್ತೆರ್.