ಮಡಂತ್ಯಾರ್ : ಸೇಕ್ರೆಡ್ ಹಾರ್ಟ್ ಪದವಿ ಪೂರ್ವ ಕಾಲೇಜ್ ಡ್ ವಿದ್ಯಾರ್ಥಿಲೆಗ್ ಇಪ್ಪುನ ವೈವಿಧ್ಯಮಯ ಪ್ರತಿಭೆಲೆನ್ ತೂಪಾವುನ ಉದ್ದೇಶರ್ದ್ ಆಯೋಜನೆ ಮಲ್ತಿನ ವರ್ಷೊದ ಅಂತರ್ ತರಗತಿ ವೈವಿಧ್ಯಮಯ ಮನರಂಜನಾ ಪಂತೊ ಲೇಸ್ ಟ್ಯಾಲೆಂಟ್ ಹ್ಯೂಸ್ 2026 ಅಂಗಾರೆ ಕಾಲೇಜ್ ದ ಸಭಾಭವನಡ್ ಗೌಜಿಡ್ ನಡತ್ಂಡ್.
ಪುಗರ್ತೆದ ಶಾಸ್ತ್ರೀಯ ಗಾಯಕಿ, ಯಕ್ಷಗಾನ ಕಲಾವಿದೆ, ಸರಕಾರಿ ಪದವಿಪೂರ್ವ ಕಾಲೇಜ್ ಮಣಿನಾಲ್ಕೂರ್ ದ ಪ್ರಾಂಶುಪಾಲೆರ್ ಶಾಲಿನಿ ಮೆಹಂದಳೆ ಮಲ್ಲ ಬಿನ್ನೆರಾದ್ ಪಾಲ್ ಪಡೆದ್, ಲೇಸ್ ನ್ ಉದಿಪನ ಮಲ್ತ್ ದ್ ಪಾತೆರ್ದ್, ವಿದ್ಯಾರ್ಥಿಲು ಅಕ್ಲೆಡ ಇಪ್ಪುನ ಪ್ರತಿಭೆನ್ ಗುರುತಿಸಾದ್ ಬುಲೆಪಾವೊನೊಡು. ವಿದ್ಯಾರ್ಥಿ ಜೀವನದ ಅಮೂಲ್ಯ ಕ್ಷಣನ್ ಸಾರ್ಥಕವಾದ್ ಗಲಸೊನೊಡು ಬೊಕ್ಕ ಮೊಬೈಲ್, ತಂತ್ರಜ್ಞಾನನ್ ಎಡ್ಡೆ ಅವಕಾಶನ್ ಸೃಷ್ಟಿ ಮಲ್ಪೆರೆ ಜಬದಾರಿಡ್ ಗಲಸೊಡು ಪಂದ್ ಸಲಹೆ ಕೊರಿಯೆರ್.
ಕಾಲೇಜ್ ದ ಪ್ರಾಂಶುಪಾಲೆರ್ ಸುರಜ್ ಚಾರ್ಲ್ಸ್ ನ್ಯೂನಸ್ ಲೇಸ್ ದ ಅಧ್ಯಕ್ಷತೆನ್ ಒಯಿಸೊಂದಿತ್ತೆರ್. ವಿದ್ಯಾರ್ಥಿಲೆನ ಉತ್ಸಾಹ, ಸೃಜನಶೀಲತೆ ಬೊಕ್ಕ ಸಮರ್ಪಣಾ ಮನೋಭಾವನ್ ನೆಂಪು ಮಲ್ತೆರ್. ಲೇಸ್ ನ್ ಪೊರ್ಲುಡು ಆಯೋಜನೆ ಮಲ್ತಿನ ಸಂಘಟಕೆರೆಗ್ ಅಭಿನಂದನೆ ಸಂದಾಯೆರ್.
ಸಾಂಸ್ಕೃತಿಕ ಸಮಿತಿದ ಸಂಯೋಜಕಿ ಅನಿತಾ ಲೋಬೊ ಎದ್ಕೊನಿಯೆರ್. ವಿದ್ಯಾರ್ಥಿ ಕಾರ್ಯದರ್ಶಿ ಶ್ರಾವ್ಯ ಸೊಲ್ಮೆ ಸಂದಾಯೆರ್. ಸಫಾನ ಲೇಸ್ ನ್ ಸುಧಾರಿಕೆ ಮಲ್ತೆರ್.
ಸಭಾ ಲೇಸ್ ದ ಬೊಕ್ಕ ಆಯೋಜನೆ ಮಲ್ತಿನ ಟ್ಯಾಲೆಂಟ್ ಹ್ಯೂಸ್ 2026 ಅಂತರ್ ತರಗತಿ ಸಾಂಸ್ಕೃತಿಕ ಪಂತೊ ಲೇಸ್ ಡ್ ವಿದ್ಯಾರ್ಥಿಲು ಉತ್ಸಾಹಡ್ ಪಾಲ್ ಪಡೆದಿತ್ತೆರ್.