“ಪರಮ” ಪಾದ ಸೇರಿನ ಪರಮಾನಂದ ಸಾಲ್ಯಾನ್
ಉಡಲ್ದ ಬೇನೆನ್ ದಿಂಗೊಂಡೆರ್..ಮನಸ್ನ್ ಕಡಲ್ ಮಲ್ತೊಂಡೆರ್…
ಅವು ಅರೆನ ಮರಣದ ಪ್ರಾಯ ಅತ್ತ್. 64 ವರ್ಷ ಪ್ರಾಯ ಕರಿನಾತೆ. ಆಂಡ ಅನಾರೋಗ್ಯ ಪನ್ಪಿನವು ಬೆರಿ ಬುಡಂದಿನ ಕಾರಣೊಗು ಇನಿಕ್ಕಾನಗ ಆರ್ ದೇವೆರೆನ ಪಾದ ಸೇರಿಯೆರ್…!
ಅಂದ್ ಹಿರಿಯ ಪತ್ರಕರ್ತೆ, ರಂಗ ನಿರ್ದೇಶಕೆರ್, ಸಾಂಸ್ಕೃತಿಕ ಲೋಕದ ರಾಯಭಾರಿ ಪರಮಾನಂದ ವಿ. ಸಾಲ್ಯಾನ್ (ಜನನ 25-1-1962) ಮೇರ್ ಜುಲೈ 13 ಸೋಮವಾರ ಜಾಮಂದ ಪೊರ್ತುಡು ದೇವೆರೆ ಪಾದ ಸೇರಿಯೆರ್. ಆರ್ ನನ ನಮಕ್ಕ್ ನೆಂಪು ಮಾತ್ರ.
ಸಾಧಾರಣ 2 ವರ್ಷರ್ದಿಂಚಿ ಅನಾರೋಗ್ಯ ಇತ್ತ್ಂಡಲ, ಅರೆನ “ವಿಲ್ ಪವರ್” ಇದಮುಟ್ಟ ಅರೆನ್ ಬದ್ಕಾದ್ಂಡ್ಂದೇ ಪನೊಲಿ. “ಉಡಲ್ದ ಬೇನೆನ್ ದಿಂಗೊಂಡೆರ್ … ಮನಸ್ನ್ ಕಡಲ್ ಮಲ್ತೊಂಡೆರ್…” ಪನ್ಪಿನ ಅರೆನನೇ ಒಂಜಿ ಗೀತಾ ನಾಟಕದ ಪದತ್ತ ಸಾಲ್ದ ಲೆಕ ಅರೆನ ಬೇನೆನ್ ಮನಸ್ಡೇ ದೀವೊಂದು ಗಟ್ಟಿ ಮನಸ್ ಮಲ್ದಿತ್ತೆರ್. ಬೊಡೆದಿಗ್, ಮಗಕ್ಕ್ ಬೊಕ್ಕ ಕುಟುಂಬದಕ್ಲೆಗ್ ಧೈರ್ಯ ಪನೊಂದಿತ್ತೆರ್.
ಸಸಿಹಿತ್ಲು ಶ್ರೀ ಸಾರಂತಾಯ ಗರೊಡಿ ಉಳ್ಳಾಯ ದೈವಸ್ಥಾನದ ಜೀರ್ಣೋದ್ಧಾರ ಸಮಿತಿದ ಕಾರ್ಯಾಧ್ಯಕ್ಷೆರಾದ್ ಸಕ್ರಿಯವಾದ್ ಬೇಲೆ ಮಲ್ತ್ದ್ ಬ್ರಹ್ಮಕಲಶೋತ್ಸವದ ಸಂದರ್ಭಡ್ ಕುಡ ಅಸೌಖ್ಯ ಇತ್ತ್ಂಡಲ ಶ್ರೀ ಉಳ್ಳಾಯ ದೇವೆರೆನೇ ಸದಾ ನೆನೆತೊಂದಿತ್ತೆರ್. ಸಸಿಬಿತ್ತ್ಲ್ದ ಸಿರಿ ಭಗವತಿ ಅಪ್ಪೆನ್ ದಿನಲ ಸುಗಿತೊಂದಿತ್ತೆರ್. ಅಕುಲೇ ಎನ್ನ ಶಕ್ತಿ, ಭಕ್ತಿ, ಪ್ರೀತಿ ಪಂದ್ ಎನ್ನ್ದಿನಾರ್ ಪರಮಾನಂದ ಸಾಲ್ಯಾನ್.
ಪತ್ರಿಕಾ ರಂಗದ ವಿಚಾರೊಡು ಬನ್ನಗ ಮುಂಗಾರು, ಹೊಸದಿಗಂತ ಪತ್ರಿಕೆಗ್ ತನ್ನ ಕ್ರೀಡಾ ವರದಿಗಾರಿಕೆಡ್ ಪುದರ್ ಕನದಿನಾರ್. “ಅಜೇಯ” ಪನ್ಪಿನ ಪತ್ರಿಕೆದ ಸಂಪಾದಕೆರಾದ್ ಅವೆನ್ ಕೆಲವು ವರ್ಷ ನಡಪಾದೆರ್. ಕಡೆ ಕಾಲ ಮುಟ್ಟಲ ಪರಮ ಸತ್ಯ ಪನ್ಪಿನ ಅಂಕಣ ಬರೆದ್ ತನ್ನ ಬರವುದ ತಾಕತ್ತ್ನ್ ತೊಜಪಾದಿನಾರ್.
ವಿಜಯಕುಮಾರ್ ಕೊಡಿಯಾಲ್ ಬೈಲ್ರೆನ “ಶಿವದೂತೆ ಗುಳಿಗೆ” ನಾಟಕದ ಸಂಭಾಷಣೆ ಅರೆಗ್ ಮಲ್ಲ ಪುದರ್ನ್ ಕನತ್ ಕೊರುಂಡು. ಅವೆರ್ದ್ ಪರಮ ಪದ್ಮ ಕಲಾವಿದರು ಕೂಟನ್ ಪುಟ್ಟುಪಾಡ್ದ್ ” ಶಿವ ಪುರ್ಸಾದ ಬೊಬ್ಬರ್ಯೆ” ನಾಟಕ ರಚನೆ, ನಿರ್ದೇಶನ ಮಲ್ತ್ದ್ ಪ್ರದರ್ಶನ ಕೊರಿಯೆರ್.
ಮಸ್ತ್ ವರ್ಷದ ಪಿರವುಡು ಸಸಿಹಿತ್ಲು ಡು ತನ್ನ ಕರಿದ್ ಪೋಯಿನ ಅರುವತ್ತೆ, ಕಲಾವಿದೆ ಸುದರ್ಶನ್ನ ನೆಂಪುಗಾದ್ ರಂಗ ಸುದರ್ಶನ (ರಿ) ಪನ್ಪಿನ ಕಲಾ ಕೂಟ ಕಟ್ದ್ ಊರುಡು ಮಾತ್ರ ಅತ್ತಾಂದೆ ಬೊಂಬೈ, ಬೆಂಗಳೂರು, ದುಬೈ, ಕುವೈತ್, ಮಸ್ಕತ್ ಇಂಚ ಪಿದಯಿ ದೇಶೊಡ್ಲ ರಂಗ ಪ್ರದರ್ಶನ ಮಲ್ತ್ದ್ ತುಳುನಾಡ ಮಣ್ಣ್ದ ಸಾಂಸ್ಕೃತಿಕ ವೈಭವೊನು ಜಗತ್ತ್ಗ್ ಪಸೆರ್ದೆರ್. ಅವೇತೋ ಯುವ ಕಲಾವಿದೆರೆನ್ ತಯಾರ್ ಮಲ್ದೆರ್. ಸಸಿಹಿತ್ಲು ಶ್ರೀ ಭಗವತೀ ದೇವಸ್ಥಾನದ ಆವರಣೊಡು ಪ್ರತಿವರ್ಷ ಅಸ್ಟೆಮಿದಾನಿ ಸಾಂಪ್ರದಾಯಿಕವಾದ್ ನಡತೊಂದಿತ್ತಿನ ಮಸುಲುಡಿಕೆಗ್ (ಮೊಸರುಕುಡಿಕೆ) ಪೊಸ ದೇಖಿದ ರೂಪಕೊಲೆನ್ ಬರೆದ್ ನಿರ್ದೇಶನ ಮಲ್ತ್ದ್ ಪೊಸ ರಂಗ್ ಕೊರ್ತಿನಾರ್ ಪರಮಾನಂದ ಸಾಲ್ಯಾನ್.
ಇಂಚಿತ್ತಿನ ಬಹುಮುಖ ಪ್ರತಿಭೆ, ತುಳು ಬಾಸೆದ ಪ್ರೇಮಿ ಆದಿತ್ತಿನ ಪರಮಾನಂದ ಸಾಲ್ಯಾನ್ರೆನ ಆತ್ಮೊಗು ಸದ್ಗತಿ ತಿಕ್ಕಡ್ ಪಂದ್ “ಟೈಮ್ಸ್ ಆಫ್ ಕುಡ್ಲ” ಪತ್ರಿಕೆದ ಪರವಾದ್ ದೇವೆರೆಡ ಪ್ರಾರ್ಥನೆ ಮಲ್ಪುವ.