ಗಡಿನಾಡ್ದ ಪುಗಾರ್ತೆದ ರಡ್ಡ್ ನಾಟಕ ಕೂಟೊಲಾಯಿನ ಶಾರದ ಆರ್ಟ್ಸ್ ಕಲಾವಿದೆರ್ ಬೊಕ್ಕ ಐಸಿರಿ ಕಲಾವಿದೆರ್ ಮಂಜೇಶ್ವರ ಮೊಕ್ಲೆನ ಈ ವರ್ಷದ ಪೊಸ ನಾಟಕದ ಶುಭ ಮುಹೂರ್ತ 9/7/2026 ಕ್ಕ್ ಕಡಂಬಾರ್ ಶ್ರೀ ಮಹಾವಿಷ್ಣುಮೂರ್ತಿ ದೇವಸ್ಥಾನಡ್ ಬಾರಿ ಪೊರ್ಲುಡು ನಡತ್ತ್ಂಡ್. ಗಡಿನಾಡ ಕಲಾನಿಧಿ ಕೃಷ್ಣ ಜಿ ಮಂಜೇಶ್ವರರೆನ ಮುತಾಲಿಕೆದ ರಡ್ಡ್ ನಾಟಕ ಕೂಟಲ ಈ ವರ್ಷ ವಿಭಿನ್ನ ದೇಖಿಡ್ ಕಲಾಭಿಮಾನಿಲೆನ ಮನಸ್ಸ್ ಗೆಂದೆರೆ ತಯಾರಾದುಂಡು. “ಕಲಾ ತೇಜಸ್ವಿ” ಸು ಫ್ರಂ ಸೋ ಪುಗಾರ್ತೆದ ಜೆ.ಪಿ ತೂಮಿನಾಡ್ ಬರೆದ್ ನಿರ್ದೇಶನ ಮಲ್ಪಿನ “ಎನ್ನ Family” ಪನ್ಪಿನ ನಾಟಕಗ್ “ತುಳುನಾಡ ಕಲಾ ಕದಿಕೆ” ರಾಜೇಶ್ ಮುಗುಳಿ ಪೊರ್ಲುದ ಸಾಹಿತ್ಯನ್ ಬರೆತೆರ್, ಹಿನ್ನೆಲೆ ಸಂಗೀತ ಗಣೇಶ್ ಕೊಡಕ್ಕಲ್ ರೆನ ಕೈ ಚಲಕೊಡು ಮೂಡ್ದ್ ಬೈದಿನ ಈ ನಾಟಕೊಗು “ತುಳುವ ಸೌರಭ” ಪ್ರಕಾಶ್ ತೂಮಿನಾಡ್ ಸಲಹೆ ಸಹಕಾರೊನು ಕೊರ್ತೆರ್.
ಜೈ ಭಜರಂಗ ಬಲಿ ಪನ್ಪಿನ ಯಶಸ್ವಿ ನಾಟಕೊಡ್ದ್ ಬೊಕ್ಕ ಐಸಿರಿ ಕಲಾವಿದೆರ್ ಮಂಜೇಶ್ವರ ಕೂಟೊಗು ತಂಡದ ಗುರ್ಕಾರೆ “ಗಡಿನಾಡ ಕಲಾನಿಧಿ” ಕೃಷ್ಣ ಜಿ ಮಂಜೇಶ್ವರರೆನ ಬರವುದ ಬಂಡಸಾಲೆಡ್ ಪುಟ್ಟಿನ ಈ ವರ್ಷದ ಪೊಸ ನಾಟಕ “ಎನಡ ಗೊಬ್ಬೊಡ್ಚಿ” ವಿಭಿನ್ನ ಕಥೆತೊಟ್ಟು ಕಲಾಭಿಮಾನಿಲೆನ ದುಂಬಪ್ಪ ಬರೊಂದುಂಡು. ” ಕಲಾ ಮಾಣಿಕ್ಯ” ವಿಕ್ರಂ ದೇವಾಡಿಗ ಚಿತ್ರಾಪುರ ಮೆರೆನ ನಿರ್ದೇಶನೊಡು “ತುಳುನಾಡ ರಂಗಭೂಷಣ” ಪುಷ್ಪರಾಜ್ ಬೊಳ್ಳಾರ್ ಬೊಕ್ಕ “ತುಳುನಾಡ ರಂಗಬೊಳ್ಳಿ” ರವಿ ರಾಮಕುಂಜ ಅಭಿನಯ ಮಲ್ಪಿನ ಈ ನಾಟಕೊಗು ಪ್ರವೀಣ್ ಕಣಿಯೂರ್ ಹಿನ್ನೆಲೆ ಸಂಗೀತ ಕೊರ್ತೆರ್.
✍️ ಸಂದೇಶ್ ಕರ್ಕೇರ