July 6, 2026

ಬೈಕಂಪಾಡಿ ದರೋಡೆ ಕೇಸ್‌ದ ಆರೋಪಿಲೆನ ಫೊಟೊ ಬಿಡುಗಡೆ

ಕುಡ್ಲ : ಬಂಗಾರ್‌ದ ವ್ಯಾಪಾರಿ ಕುಟುಂಬನ್ ಬೈಕಂಪಾಡಿದ ಕೈತಲ್ ದರೋಡೆ ಮಲ್ದಿನ ಕೇಸ್‌ದ ಮಾಸ್ಟರ್ ಮೈಂಡ್ ಪಾಂಡಿಚೇರಿ ಮೂಲದ ಶಿಬಿನ್ ಗಂಗಾಧರನ್ ಬೊಕ್ಕ 14 ಆರೋಪಿಲೆನ ಗುರ್ತ್ ಪತ್ತೆ ಮಲ್ತ್‌ದ್ ಅಕ್ಲೆನ ಫೊಟೊ ಬಿಡುಗಡೆ ಮಲ್ದಿನ ಕುಡ್ಲ ಪೊಲೀಸೆರ್ ಆರೋಪಿಲೆನ ಪತ್ತೆಗ್ ಸಹಕಾರ ಮಲ್ಪರೆ ಸಾರ್ವಜನಿಕೆರೆಡ ಬಿನ್ನಾಪು ಮಲ್ದೆರ್.
ಕೇರಳ ಬೊಕ್ಕ ಕೊಡಗು ಪ್ರದೇಶಡ್ ಆರೋಪಿಲೆನ ಪತ್ತೆ ಮಲ್ಪುನ ಬೇಲೆ ನಡತೊಂದುಂಡು.
ಜೂನ್ 29 ಪುಲ್ಯಕಾಂಡೆ ಕೇರಳದ ಬಂಗಾರ್‌ದ ಉದ್ಯಮಿ ವಿಕಾಸ್ ತನ್ನ ಕುಟುಂಬದ ಜತೆಟ್ಟ್ ಬೊಂಬೈರ್ದ್ ಕೇರಳಗ್ ಬೈಕಂಪಾಡಿದಲ್ಪ ಪೋವೊಂದುಪ್ಪುನಗ ಆರೋಪಿಲು ಕಾರ್‌ನ್ ಅಡ್ಡ ಕಟ್ಟ್‌ದ್ ವಿಕಾಸ್, ಬೊಕ್ಕ ಅರೆನ ಬೊಡೆದಿ, ಮಗನ್ ಅಪಹರಣ ಮಲ್ತ್‌ದ್ 180 ಗ್ರಾಂ ಬಂಗಾರ್ ಬೊಕ್ಕ ಲೂಟಿ ಮಲ್ತ್‌ದ್ ಪರಾರಿ ಆದಿತ್ತೆರ್.