ಕುಡ್ಲ : ಇಲ್ಲ್, ಫ್ಲ್ಯಾಟ್ ನೋಂದಣಿಗಾದ್ ಕುಡ್ಲದ ಮಿನಿ ವಿಧಾನಸೌಧದ ಉಪನೋಂದಣಿ ಕಚೇರಿಗ್ ಪೋದು ಬಯೋಮೆಟ್ರಿಕ್ ಕೊರೊಂದು ಇಪ್ಪುನ ಜನಕ್ಲೆನ ಬ್ಯಾಂಕ್ ಖಾತೆಗ್ ಸೈಬರ್ ವಂಚಕೆರ್ ಕನ್ನ ಪಾಡ್ದ್ ಲಕ್ಷಾಂತರ ರೂಪಾಯಿ ವಂಚನೆ ಮಲ್ತಿನ ಆಘಾತಕಾರಿ ಘಟನೆ ನಡತ್ತ್ ದ್ ನೆರ್ದ್ ಸಾರ್ವಜನಿಕೆರ್ ಕಂಗಾಲ್ ಆತೆರ್ ಪಂದ್ ಶಾಸಕೆರ್ ವೇದವ್ಯಾಸ್ ಕಾಮತ್ ಪಂಡೆರ್.
ಕರಿನ ತಿಂಗಲೊರ್ದು ಸಾರ್ವಜನಿಕೆರ್ ಜಾಗೆ ಮಾರಾಟ ಬೊಕ್ಕ ದೆತೊನಿಯೆರೆ ಬಯೋಮೆಟ್ರಿಕ್ ಕೊರ್ನ ಕೆಲವೇ ದಿನಟ್ ಅಕ್ಲೆನ ಅಕೌಂಟ್ ರ್ದ್ 10 ಸಾವಿರ ರೂ. ಡ್ರಾ ಆವೊಂದು ಉಂಡು. ಸೈಬರ್ ವಂಚಕೆರ್ ಮೂಲು ಮೈಕ್ರೋ ಎಟಿಎಂ ಪನ್ಪುನ ಪೊಸ ಮಾದರಿದ ತಂತ್ರಗಾರಿಕೆ ಗಲಸ್ ದ್ ಕಾಸ್ ಡ್ರಾ ಮಲ್ಪುವೆರ್. ನೆಕ್ಕ್ ಒಟಿಪಿ, ಸಿವಿವಿ, ಬ್ಯಾಂಕ್ ವಿವರ ಬೊರ್ಚಿ. ಖಾತೆದಾರೆರ್ನ ಆಧಾರ್ ಬಯೋಮೆಟ್ರಿಕ್ ಗಲಸ್ ದ್ ವಂಚನೆ ಮಲ್ತೊಂದು ಇಪ್ಪುನಕ್ಲೆನ ಬಗ್ಗೆ ದೂರು ದಾಖಲಾತ್ಂಡ್.
ನೋಂದಣಿ ಕಚೇರಿಗ್ ಒವ್ವೆ ಒಂಜಿ ವ್ಯಕ್ತಿ ಬಯೋಮೆಟ್ರಿಕ್ ಕೊರ್ನ ಬೊಕ್ಕ ಅವ್ ಸೈಬರ್ ವಂಚಕೆರೆಗ್ ಎಂಚ ಮುಟ್ಟುಂಡು? ಈ ಬಗ್ಗೆ ಸಮಗ್ರ ತನಿಖೆ ಆವೊಡು. ಸರ್ಕಾರಿ ಕಚೇರಿಗ್ ಬತ್ತ್ ದ್, ಸರ್ಕಾರ ನಿಗದಿ ಮಲ್ತಿನ ತೆರಿಗೆನ್ ಕಟ್ ದ್, ನಿಯಮ ಪಾಲಿಸಾಯಿನ ಬೊಕ್ಕ, ವಂಚಕೆರೆಗ್ ಮಾಹಿತಿ ಸೋರಿಕೆಯಾದ್ ಸಾರ್ವಜನಿಕೆರೆಗ್ ಇಂಚ ಅನ್ಯಾಯವಾದ್ ಕಾಸ್ ಕಳೆವೊಂಡ ಅಯಿತ ನೇರ ಹೊಣೆ ಸರ್ಕಾರನೇ. ಅಂಚಾದ್ ಈ ಕೂಡಲೇ ರಾಜ್ಯ ಸರ್ಕಾರ ಅಧಿಕೃತವಾದ್ ದೂರು ಸಲ್ಲಿಸಾಯಿನ ಮಾತ ಸಂತ್ರಸ್ತೆರೆಗ್ ಕಾಸ್ ಪಿರ ಕೊರ್ದ್ ನ್ಯಾಯ ಕೊರೊಡು ಪಂದ್ ಶಾಸಕೆರ್ ಪನ್ತೆರ್.
ಇಂಚಿಪ್ಪಗ್ ಮೂಡುಶೆಡ್ಡೆದ ಕೂಲಿ ಕಾರ್ಮಿಕೆ ಒರಿ ತಾನ್ ಕಷ್ಟ ಬತ್ತ್ ದ್ ಬೆನ್ ದ್ ಬ್ಯಾಂಕ್ ಡ್ ದೀನ ಪತ್ತ್ ಸಾವಿರ ರೂಪಾಯಿನ್ ಉಂದುವೇ ಮಾದರಿಡ್ ಕಳೆಯೊಂದಿನ ಎನ್ನ ಗಮನಗ್ ಬೈದುಂಡು.
ಸಬ್ ರಿಜಿಸ್ಟ್ರಾರ್ ಕಚೇರಿ ಪನ್ಪುನ ಸರ್ಕಾರದ ವ್ಯವಸ್ಥೆದ ಒಂಜಿ ಭಾಗ. ಮುಲ್ಪರ್ದೆ ಸೈಬರ್ ವಂಚಕರೆಗ್ ಸಾರ್ವಜನಿಕರ ವೈಯಕ್ತಿಕ ಮಾಹಿತಿ ಸೋರಿಕೆಯಾದ್ ಬ್ಯಾಂಕ್ ಖಾತೆರ್ದ್ ಕಾಸ್ ದೋಚೆರೆ ಆವಂದೆ ನನ ಜನಸಾಮಾನ್ಯೆರ್ ಏರೆನ್ ನಂಬುನ?? ಸರ್ಕಾರ ಈ ಬಗ್ಗೆ ನಿರ್ಲಕ್ಷ್ಯ ಮಲ್ಪುನ ಬುಡ್ದು ಈ ಕೂಡ್ಲೆ ಗಮನಹರಿಸಾವೊಡು ಪಂಡೆರ್.
ತಂತ್ರಜ್ಞಾನ ದುಂಬು ಪೋಯಿನಂಚೆನೆ ಸೈಬರ್ ಕಲ್ವೆರ್ ಬುದ್ದಿವಂತೆರ್ ಆವೊಂದು ಉಲ್ಲೆರ್. ಅವೆಕ್ ಸರಿಯಾದ್ ನಮ್ಮ ವ್ಯವಸ್ಥೆ ಅಕ್ಲೆರ್ದ್ ಬುದ್ಧಿವಂತೆರಾದ್ ಜನಸಾಮಾನ್ಯರೆರ್ನ ಹಿತನ್ ಕಾಪಾಡೊಡು ಪಂದ್ ಪೊಲೀಸೆರ್ ಬೊಕ್ಕ ಸರ್ಕಾರಗ್ ಆಗ್ರಹ ಮಲ್ಪುವೆ. ನನ ದುಂಬುಗು ಒವ್ವೆ ನೋಂದಣಿ ಮಲ್ಪುನ ಸಂದರ್ಭಡ್ ಸಾರ್ವಜನಿಕೆರ್, ವಕೀಲೆರ್ ಸೇರಿನಂಚ ಮಾತೆರ್ಲ ಇಂಚಿನ ವಂಚನೆರ್ದ್ ಬಾರಿ ಎಚ್ಚರಿಕೆಡ್ ಇಪ್ಪುನಂಚ ಮನವಿ ಮಲ್ಪುವೆ ಶಾಸಕೆರ್ ಕಾಮತ್ ಪಂಡೆರ್.
pallavi shetty