ಬೊಂಬೈ ಕನ್ನಡ ಸಂಘದ ಮುತಾಲಿಕೆಡ್ ಇಸ್ರೋ ವಿಜ್ಞಾನಿ ಚಿದಾನಂದ ಮಗದಮ್ ಮೆರೆಗ್ ಸನ್ಮಾನ

ಬೊಂಬೈ: ಚಂದ್ರಯಾನ-3 ತ್ತ ಯಶಸ್ಸ್ ಗ್ ತನ್ನ ಅಮೂಲ್ಯ ಯೋಗದಾನ ಕೊರ್ನ ಭಾರತೀಯ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆ ಇಸ್ರೋದ ವಿಜ್ಞಾನಿ, ಬೊಂಬೈ ಕನ್ನಡ ಸಂಘದ ಕಾರ್ಯಕಾರಿ ಸಮಿತಿದ ಸದಸ್ಯೆರ್ ಚಿದಾನಂದ ಮಗದಮ್ ಮೆರೆಗ್ ಸೆ.9 ಸನಿಯಾರ ಬೊಂಬೈ ಕನ್ನಡ ಸಂಘದ ಮುತಾಲಿಕೆಡ್ ದಾದರ್ ಹಿಂದೂ ಕಾಲನಿಡ್ ಇಪ್ಪುನ ಸಂಘದ ಕಾರ್ಯಾಲಯಡ್ ಸನ್ಮಾನ ಮಲ್ತೆರ್.

ಈ ಲೇಸ್ ದ ಗುರ್ಕಾರ್ಮೆನ್ ಕನ್ನಡ ಸಂಘದ ಗುರ್ಕಾರೆ ಗುರುರಾಜ ಎಸ್. ನಾಯಕ್ ಒಯಿಸೊಂದಿತ್ತೆರ್.‌ ಸಂಘದ ಗೌರವ ಪ್ರಧಾನ ಕಾರ್ಯದರ್ಶಿ ಸೋಮನಾಥ ಎಸ್ ಕರ್ಕೇರ, ಚಿದಾನಂದ ಮಗದಮ್ ಬೊಕ್ಕ ಆರೆನ ಮಗಲ್ ಮಧುರಾ ಮಗದಮ್ ಮೊಕ್ಲೆನ್ ಎದ್ಕೊನಿಯೆರ್. ಬೊಕ್ಕ ಗುರುರಾಜ ಎಸ್ ನಾಯಕ್ ಮಗದಮ್ ಆರೆಗ್ ಪೂವು ಕೊರ್ದು ಮಾನಾದಿಗೆ ಮಲ್ತೆರ್.

ಸನ್ಮಾನ ಸ್ವೀಕಾರ ಮಲ್ತಿನ ಚಿದಾನಂದ ಮಗದಮ್ ಪಾತೆರ್ದ್, ಎನನ್ ಮೋಕೆಡ್ ಲೆತ್ತ್ ದ್, ಸನ್ಮಾನ ಮಲ್ತಿನೆಕ್ಕ್ ಕುಸಿ ಆಂಡ್.‌ ಚಂದ್ರಯಾನ 3 ತ್ತ ಯಶಸ್ಸ್ ಡ್ ವಿಜ್ಞಾನಿಲೆನ, ತಂತ್ರಜ್ಞಾನೆರೆನ ಯೋಗದಾನ ಉಂಡು. ನೆಟ್ಟ್ ಕನ್ನಡಿಗೆರ್ ಎಚ್ಚ ಸಂಖ್ಯೆಡ್ ಉಲ್ಲೆರ್. ಚಂದ್ರನಲ್ಪ ತಿಂಗೊಲ್ಡ್ 15 ದಿನ ಪಗೆಲ್ ಬೊಕ್ಕ ಒರಿನ 15 ದಿನ ಕತ್ತಲೆ ಇಪ್ಪುಂಡು.‌ ಸದ್ಯಗ್ ಅಲ್ಪ ಕತ್ತಲೆ ಇಪ್ಪುರ್ನೆದಾವರ ಪ್ರಗ್ಯಾನ್ ಲ್ಯಾಂಡ್‌ ರೋವರ್ ನ್ ಸ್ಲೀಪ್ ಮೋಡ್ ಡ್ ದೀತೆರ್.‌ ಚಂದ್ರನ ಮಿತ್ತ್ ಸೂರ್ಯನ ಬೊಲ್ಪು ಬೂರ್ನಗ ಕುಡ 15 ದಿನ ಅವೆರ್ದ್ ಬೊಕ್ಕ ಅವು ಸಕ್ರಿಯವಾದ್ ತನ್ನ ಕೆಲಸನ್ ಸುರು ಮಲ್ಪುಂಡು ಪಂದ್ ಪಂಡೆರ್. ‌

ಈ ಪೊರ್ತುಡು ಸಂಘದ ಸಮಿತಿ ಸದಸ್ಯೆರ್ ಸಂಧ್ಯಾ ಎ‌.ಪ್ರಭು ಮೆರೆನ ಮಗಲ್ ಅಮೃತಾ ಪ್ರಭು ಬ್ಯಾಚುಲರ್ ಆಫ್ ಮ್ಯಾನೇಜ್ ಮೆಂಟ್ ಸ್ಟಡೀಸ್ ಡ್ ಎಡ್ಡೆ ಮಾರ್ಕ್ ಪಡೆದ್ ಪಾಸಾಯಿನ ಸಲುವಾದ್ ಮೆರೆಗ್ ಚಿದಾನಂದ ಮಗದಮ್ ಸನ್ಮಾನ ಮಲ್ತೆರ್.

ಈ ಪೊರ್ತುಡು ಮಯೂರವರ್ಮ ಸಾಂಸ್ಕೃತಿಕ ಪ್ರತಿಷ್ಠಾನದ ವಿಶ್ವನಾಥ ಡೊಡ್ಮನೆ, ಸಂಘದ ಸಮಿತಿ ಸದಸ್ಯೆರ್ ನಾರಾಯಣ ರಾವ್, ಎಸ್ ಕೆ ಪದ್ಮನಾಭ, ಸತೀಶ್ ಎಸ್ ಬಂಗೇರ, ಸುಧಾಕರ ಸಿ ಪೂಜಾರಿ, ಸಂಧ್ಯಾ ಎ ಪ್ರಭು ಪಾಲ್ ಪಡೆದಿತ್ತೆರ್. ಜತೆ ಕಾರ್ಯದರ್ಶಿ ಮಲ್ಲಿಕಾರ್ಜುನ ಬಡಿಗೇರರ್ ಸೊಲ್ಮೆ ಸಂದಾಯೆರ್.