‘ಕೋಟಿ ವಿದ್ಯೆರ್ದ್, ನಾಟಿ ವಿದ್ಯೆ ಮೇಲು’ ಪನ್ಪುನ ಪಾತೆರದಂಚನೆ ಮುಲ್ಪ ಒರಿ ವ್ಯಕ್ತಿ, ಆರೆಗ್ ವಂಶಪಾರಂಪರ್ಯವಾದ್ ಬತ್ತಿನ ನಾಟಿವಿದ್ಯೆದ ಜ್ಞಾನನ್ ಗಲಸ್ ದ್ ಆಸ್ಪತ್ರೆಡೇ ಗುಣ ಮಲ್ಪರೆ ಆವಂದಿನ ಕೆಲವೊಂಜಿ ಸೀಕ್ ಲೆಗ್ ಚಿಕಿತ್ಸೆ ಕೊರ್ದು ಸುಮಾರ್ ಜನಕ್ ಸೀಕ್ ಗುಣ ಮಲ್ತಿನಾರ್ ನಾಟಿವೈದ್ಯೆರ್ ಶ್ರೀನಿವಾಸ ಪಂಡಿತ್.
ಮೇರ್ ಸರಳ ವ್ಯಕ್ತಿಯಾದ್ ತೋಜಿಂಡಲ ಮೆರೆನ ಸೇವೆರ್ದ್ ನೂದೆರ್ದ್ ಎಚ್ಚ ಜನಕ್ ಪ್ರಯೋಜನ ಆತ್ಂಡ್. ದಕ್ಷಿಣ ಕನ್ನಡ ಜಿಲ್ಲೆದ ಕುಕ್ಕೆ ಸುಬ್ರಹ್ಮಣ್ಯ ಕೈತಲ್ ದ ಏನೇಕಲ್ಲು ಪನ್ಪುನ ಊರುಡ್ ಎಲ್ಯ ಬಾಡಿಗೆ ರೂಮ್ ಡ್ ಇತ್ತ್ ದ್ ಅಲ್ಪ ಮೆರೆನ ಕೈತಡೆ ಚಿಕಿತ್ಸೆಗಾದ್ ಬರ್ಪುನ ಜನಕ್ ಮರ್ದ್ ಕೊರೊಂದು ಉಲ್ಲೆರ್. ಇತ್ತೆ ಮೇರ್ ‘ನಾಟಿವೈದ್ಯ ಪಂಡಿತೆರ್” ಪಂದೇ ಪುದರ್ ಪಡೆತೆರ್.
ಮೂಲತಃ ಕೇರಳ ರಾಜ್ಯದ ಕಾಸ್ರೋಡು ಜಿಲ್ಲೆದ ಕೊಡ್ಲಮೊಗರು ಗ್ರಾಮದ ಮುಗುಳಿ ನಿವಾಸಿ ಪುಗರ್ತೆದ ನಾಟಿವೈದ್ಯೆ, ಪಂಡಿತೆರ್ ದಿ. ಮಾಯನಪ್ಪು ಬೆಳ್ಚಡ, ಬೊಕ್ಕ ಶಾರದಾ ದಂಪತಿಲೆನ ಮಗೆನೇ ಶ್ರೀನಿವಾಸೆರ್.
ಮೇರ್ ಅಜ್ಜೆರ್ ಬೊಕ್ಕ ಅಮ್ಮೆರೆರ್ದ್ ವಂಶಪಾರಂಪರ್ಯವಾದ್ ಬತ್ತಿನ ನಾಟಿವಿದ್ಯೆದ ಪಾಂಡಿತ್ಯರ್ದ್ ಪಕ್ಷಪಾತ (ಪಾರ್ಶ್ವವಾಯು), ಗಂಟ್ ಬೇನೆ, ಮೂಲವ್ಯಾಧಿ, ಸಕ್ಕರೆ ಕಾಯಿಲೆ, ಸರ್ಪಸುತ್ತು, ಕೆಂಪು, ಕಿರಾಣಿ, ಪಡಿಕೆಡ್ ಕಲ್ಲ್, ತರೆಹೊಟ್ಟು, ಚರ್ಮರೋಗ, ಮಂಜೊಲು ಸೀಕ್, ಬೊಕ್ಕ ಪೊಂಜೋವ್ ನಕ್ಲೆಗ್ ತೋಜಿದ್ ಬರ್ಪುನ ಬಿಳಿಸೆರಗು, ತಿಂಗೊಲ್ದ ಪಿದಯಿದ ಸಮಸ್ಯೆ, ಬಂಜೆತನ, ಅತ್ತಂದೆ ವಿಷತ ಚಾಲಿಯೆ ತುಚ್ಚಿನ ಇಂಚಿನ ಮಾತ ಗಂಭೀರ ಸಮಸ್ಯೆಗ್ ಪರಿಣಾಮಕಾರಿ ಆಯಿನ ಮರ್ದ್ ಕೊರೊಂದು ಉಲ್ಲೆರ್.
ಪ್ರಕೃತಿಡ್ ತಿಕ್ಕುನ ಮರ ದೈತ ಬೊಕ್ಕ ಮೂಲಿಗೆದ ಇರೆ, ಬೇರ್, ಕೆತ್ತೆ ಬೊಕ್ಕ ನವಧಾನ್ಯಲೆನ್ ಗಲಸ್ ರ್ದ್ ಅಯಿರ್ದ್ ತಾನೇ ಸ್ವತಃ ವಾದ್ ಎಣ್ಣೆ, ಕಷಾಯ, ಲೇಹ್ಯ ತಯಾರ್ ಮಲ್ತ್ ದ್, ಚಿಕಿತ್ಸೆಗಾದ್ ಬತ್ತಿನಕ್ಲೆನ ನಾಡಿ ಪರೀಕ್ಷೆ ಮಲ್ತ್ ದ್, ಸೀಕ್ ದ ಸ್ವರೂಪನ್ ತೆರಿವೊಂದು ಚಿಕಿತ್ಸೆ ಕೊರೊಂದು ಉಲ್ಲೆರ್.
ಕರಿನ 9 ವರ್ಷೊರ್ದಿಂಚಿ ಏನೇಕಲ್ಲ್ ಡ್ ಇಪ್ಪುನ ಮೇರ್ ತನ್ನ 14 ನೇ ವರ್ಷಡ್ ನಾಟಿಮರ್ದ್ ಕೊರಿಯೆರೆ ಸುರು ಮಲ್ದೆರ್. ಇಡೇ ಮುಟ್ಟ ಸರಿ ಸುಮಾರ್ 10 ಸಾರರ್ದ್ ಎಚ್ಚ ಜನಕ್ ನಾಟಿವೈದ್ಯೆ ಪದ್ಧತಿಡ್ ಮರ್ದ್ ಕೊರ್ದು ಸೀಕ್ ಗುಣ ಮಲ್ದೆರ್.
ಪಿರಾಕ್ ದ ಕಾಲದ ಈ ನಾಟಿವೈದ್ಯ ಪದ್ಧತಿ ನನದ ಪೀಳಿಗೆಡ್ಲಾ ಒರಿವೊಡು ಪನ್ಪುನ ಉದ್ದೇಶರ್ದ್ ನಾಟಿವಿದ್ಯೆಡ್ ಆಸಕ್ತಿ ಇಪ್ಪುನಕ್ಲೆಗ್ ತನ್ನ ಮುಖೇನ ನಾಟಿವೈದ್ಯೆ ಪದ್ಧತಿನ್ ಕಲ್ಪುನ ಇರಾದೆನ್ ಮಲ್ತೊಂದು ಉಲ್ಲೆರ್. ತನ್ನ ಕೈತಡೇ ಚಿಕಿತ್ಸೆಗಾದ್ ಬರ್ಪುನಕ್ಲೆಗ್ ಒವ್ವೇ ಸಮಯಡ್ಲಾ ಲಭ್ಯ ಇಪ್ಪುನ ಮೇರ್ ಜೋಕುಲೆನ ಆರೋಗ್ಯದ ಬಗೆಟ್ ಪೊಲಬು ಕೊರ್ಪುನ ಸಂಪನ್ಮೂಲ ವ್ಯಕ್ತಿಯಾದ್ ಸುಮಾರ್ ಕಡೆ ಪೊಲಬುಲೆನ್ ಕೊರ್ತೆರ್. ತನ್ನ ಈ ಸಮಾಜಮುಖಿ ಕಾರ್ಯಗ್ ತಮ್ಮನ ಬಯಸಂದಿನ ಸರಳ ವ್ಯಕ್ತಿ ಮೇರ್. ಅತ್ತಂದೆ ತನ್ನ ಈ ಕಾರ್ಯಗ್ ಏನೇಕಲ್ಲು ಪನ್ಪುನ ಈ ಎಲ್ಯ ಊರುದಕ್ಲೆನ ಸಂಪೂರ್ಣ ಸಹಕಾರ, ಸಕಾಯ ಉಂಡು ಪಂದ್ ಪನ್ಪೆರ್.
ಮೆರೆನ ವಿಳಾಸ:
ಶ್ರೀನಿವಾಸ್ ಪಂಡಿತ್, ಶ್ರೀ ಕನಿಲ ನಾಟಿ ವೈದ್ಯೆರ್, ಏನೇಕಲ್ಲು, ಮೊಬೈಲ್: 9148719183
(ಬರವು: ಚಂದ್ರಶೇಖರ ಕೊಡಿಯಾಲ)
pallavi shetty