ತುಲುನಾಡ್ಡ್ ತುಲು ಲಿಪಿತ ಬುಲೆಚ್ಚಿಲ್ ಬಾರಿ ಉಮೇದ್ಡ್ ನಡತೊಂದುಂಡು. ತುಲುವೆರೇ ಈ ಕಜ್ಜೊಗ್ ಜತ್ತ್ದೆರ್. ಪ್ರತಿ ಊರುಡ್ ತುಲು ಲಿಪಿ ಕಲ್ಪುನ ಕಜ್ಜಕೊಟ್ಯ ನಡಪಾವೊಂದುಲ್ಲೆರ್. ಅಂಚನೇ ಊರು ಊರುಡ್ ತುಲು ಲಿಪಿತ ಪುದರ್ ಪಲವೆ ಪಾಡುನ ಬೇಲೆ ಆವೊಂದುಂಡು. ಇಂಚಿಪ್ಪಗ್ ತನ್ನನೇ ಊರುಡ್ ಕಲ್ಕಳ ಪನ್ಪುನ ತುಲು ಲಿಪಿ ಪುದರ್ ಪಲವೆ ಪಾಡುನೆನ್ ತೂದ್ ಎಂಕ್ಲಲ ತುಲು ಲಿಪಿದ ಪುದರ್ ಪಲವೆನ್ ಪಾಡೊಡ್ ಪಂದ್ ಬಾಳಿಲದ ದೈವಶಕ್ತಿ ಯುವ ಸಂಘದಕುಲು ಬಾಳಿಲಡ್ ಪೊನ್ನಿ 23 ಪೋಪುನಾನಿ, ತೇದಿ 06-02-2021 ಸನಿಯಾರ ಬಾಳಿಲ ಪನ್ಪುನ ತುಲು ಲಿಪಿತ ಪುದರ್ ಪಲವೆನ್ ಪಾಡ್ಯೆರ್. ಈ ಪುದರ್ ಪಲವೆನ್ ಶ್ರೀ ಇಷ್ಟದೇವತಾ ಉಳ್ಳಾಕುಲು ಸೇವಾ ಸಮಿತಿ (ರಿ.) ಅಯ್ಯನಕಟ್ಟೆ ಉಂದೆತ ಗುರ್ಕಾರ್ಲು ಆಯಿನ ಶ್ರೀ ಲಕ್ಷ್ಮಣ ಗೌಡ ಬೇರಿಕೆ ಉದಿಪನ ಮಲ್ತೆರ್. ಈ ಲೇಸ್ದ ಮಲ್ಲ ಬಿನ್ನೆರಾಯಿನ ತುಲು ಲಿಪಿ ಶಿಕ್ಷಕೆರ್ ಅಂಚನೆ ಜೈ ತುಲುನಾಡ್ (ರಿ.) ಉಂದೆತ ಒತ್ತು ಸಂಘಟನಾ ಕಾರ್ಯಂತೆರ್ ಶ್ರೀ ಜಗದೀಶ ಗೌಡ ಕಲ್ಕಳ ಮೇರ್ ಪಾತೆರ್ದ್ ತುಲು ಲಿಪಿ ಬುಲೆಚ್ಚಿಲ್ಗ್ ತುಲುನಾಡ್ದ ಅಲ್ಲಲ್ಲ್ ಬೇಲೆ ಆವೊಂದುಂಡು, ಅಂಚೆನೇ ನಮ್ಮ ಊರುಡ್ 2 ನೇ ತುಲು ಲಿಪಿತ ಪುದರ್ ಪಲವೆ ಪಾಡುನ ಲೇಸ್ ನಡತೊಂದುಂಡು. ಪ್ರತಿ ಗ್ರಾಮೊಡ್ಲಾ ತುಲು ಲಿಪಿತ ಪುದರ್ ಪಾಡೊಡ್. ತುಲು ಲಿಪಿ ಬೊಕ್ಕ ತುಲು ಬಾಸೆನ್ ತುಲುವೆರಾಯಿನ ನಮೊನೆ ಒರಿಪಾವೊಡ್ ಪಂದ್ ಪಂಡೆರ್.
ಈ ಲೇಸ್ಡ್ ಬಿನ್ನೆರಾದ್ ಪೆರಿಯ ದೈವ ನರ್ತಕೆರಾಯಿನ ಬಾಬು ಅಜಲ, ಸುದ್ದಿ ಬಿಡುಗಡೆ ವಾರ ಪತ್ರಿಕೆದ ವರದಿಗಾರೆರ್ ಆಯಿನ ಶ್ರೀ ಈಶ್ವರ ವಾರಣಾಶಿ ಒತ್ತುಪಾಲ್ಡಿತ್ತೆರ್. ದೈವಶಕ್ತಿ ಯುವ ಸಂಘದ ಗುರ್ಕಾರ್ಲು ಶ್ರೀ ಜಯರಾಮ ಅಜಲ ಬತ್ತಿನ ಬಿನ್ನೆರೆನ್ ಮೋಕೆಡ್ ಎದ್ಕೊಂದು ಉದಿಪನ ಲೇಸ್ನ್ ನಡಪಾದ್ ಕೊರ್ಯೆರ್.
ಈ ಸಂದರ್ಭೊಡು ಲೇಸ್ಡ್ ಗ್ರಾಮಸ್ಥೆರಾಯಿನ ಪುರುಷೊತ್ತಮ ಮುಪ್ಪೇರ್ಯ, ಬಾಬು ಮರುವಂಜ, ಜಲಜಾಕ್ಷಿ ಬಾಳಿಲ, ನಾಗೇಶ್ ಬಾಳಿಲ, ನವೀನ್ ಬಾಳಿಲ, ದಯಾನಂದ ಗೌಡ ಪಾಲ್ ಪಡೆದಿತ್ತೆರ್.
pallavi shetty