ಕುಡ್ಲ: ದಿಲ್ಲಿಡ್ ನಡಪುನ 2022ನೇ ವರ್ಷದ ಗಣರಾಜ್ಯೋತ್ಸವ ಪೆರೇಡ್ಡ್ ಪಾಲ್ ಪಡೆವುನ ಟ್ಯಾಬ್ಲೊದ ವಿಚಾರೊಡು ಬಾರಿ ಚರ್ಚೆ ಆವೊಂದುಂಡು. ಕೇರಳ ಸರಕಾರದ ಬ್ರಹ್ಮಶ್ರೀ ನಾರಾಯಣ ಗುರುಕ್ಕುಲೆನ ಅಂಚೆನೆ ಜಟಾಯು ಪಾರ ಪನ್ಪಿನ ಸ್ತಬ್ಧಚಿತ್ರೊನು ಕೇಂದ್ರ ಸರಕಾರ ತಿರಸ್ಕಾರ ಮಲ್ದಿನ ವಿಚಾರೊಡು ವಿರೋಧ ಬೊಕ್ಕ ಸಮರ್ಥನೆದ ನಡುಟ್ಟೆ ಚರ್ಚೆ ನಡತೊಂದುಂಡು. ಕೇರಳ ಮಾತ್ರ ಅತ್ತಾಂದೆ ತುಳುವ ಮಣ್ಣ್ಡ್ಲ ಸಮಾಜ ಸುಧಾರಣೆ ಮಲ್ದಿನ ನಾರಾಯಣ ಗುರುಕ್ಕುಲೆಗ್ ಅವಮಾನ ಆತಿನ ವಿಚಾರೊಡು ಅವ್ವೇತೊ ಸಂಘಟನೆದಕುಲು ಖಂಡಿಸಾದ್, ತಪ್ಪುನು ಸರಿ ಮಲ್ಪರೆ ಒತ್ತಾಯ ಮಲ್ತೊಂದುಲ್ಲೆರ್.ಆಂಡ ಅವೆನ್ ಸರಿ ಮಲ್ಪುನ ವಿಚಾರ ಕೇಂದ್ರ ಸರಕಾರೊಗು ಬುಡ್ತಿನವು. ಇಂಚಿನ ಪೊರ್ತುಡು ೨೦೧೨ನೇ ಇಸ್ವಿದ ಗಣರಾಜ್ಯೋತ್ಸವ ಪೆರೇಡ್ಡ್ ತುಳುನಾಡ್ದ ದೈವಾರಾಧನೆದ ಟ್ಯಾಬ್ಲೋಗು ಬಾರಿ ಗೌರವ ತಿಕ್ದ್ಂಡ್ ಪನ್ಪಿನ ವಿಚಾರದ ವೀಡಿಯೊ ಬಾರಿ ವೈರಲ್ ಆವೊಂದುಂಡು.
೨೦೧೨ನೇ ಇಸ್ವಿದ ಗಣರಾಜ್ಯೋತ್ಸವದ ಪರೇಡ್ಡ್ ಗೋವಾ ರಾಜ್ಯದ ಟ್ಯಾಬ್ಲೊರ್ದು ಬೊಕ್ಕ ಬತ್ತಿನ ಟ್ಯಾಬ್ಲೊ ಕರ್ನಾಟಕದ. ತುಳುನಾಡ ದೈವಾರಾಧನೆ ಪನ್ಪಿನ ಕಾನ್ಸೆಪ್ಟ್ನ್ ಅಪಗದ ಕರ್ನಾಟಕ ಸರ್ಕಾರ ಮಲ್ದಿತ್ತ್ಂಡ್. ತುಳುನಾಡ್ದ ದೈವಸ್ಥಾನ ಪ್ರತಿಕೃತಿದ ಎದುರುಡು ತಾಸೆ, ವಾದ್ಯ ಬ್ಯಾಂಡ್ದ ಹಿನ್ನೆಲೆ ಸೊರೊಟ್ಟು ಮಂತ್ರದೇವತೆನ ನಲಿಕೆದೊಟ್ಟುಗು ಮಾತಾ ದೈವೊಲೆನ ಪ್ರತಿನಿಧಿನಕುಲು ಸಿರಿ ಸಿಂಗಾರಾದ್, ಗಗ್ಗರ ಕಟ್ಟೊಂದು, ಅಣಿ ಕಟ್ಟ್ದ್, ಮುಗ ಏರ್ದ್ ದಿಲ್ಲಿದ ರಾಜಮಾರ್ಗೊಡು ನಡತೊಂದು ಪೋಪಿನ ಆ ತುಳುನಾಡ ದೈವಾರಾಧನೆದ ವೈಭವ ಬಾರಿ ಮೆಚ್ಚಿಗೆನ್ ಪಡೆದಿತ್ತ್ಂಡ್.
ಆ ಪೊರ್ತುಡು ಕೇಂದ್ರಡ್ ಕಾಂಗ್ರೆಸ್ ಸರಕಾರ ಇತ್ತ್ಂಡ್. ಪ್ರಧಾನಿಯಾದ್ ಮನಮೋಹನ್ ಸಿಂಗ್ ಇತ್ತೆರ್. ಎದುರುಪಕ್ಷದ ನಾಯಕೆರ್ ಲಾಲ್ ಕೃಷ್ಣ ಆಡ್ವಾಣಿ, ಕಾಂಗ್ರೆಸ್ದ ಮುಖಂಡೆರ್ ವೀರಪ್ಪ ಮೊಯಿಲಿ, ಎಸ್.ಎಂ.ಕೃಷ್ಣ ಇಂಚಿನ ಮಾತಾ ನಾಯಕೆರ್ನ ಎದುರುಡು ಕರ್ನಾಟಕ ರಾಜ್ಯ ಸರಕಾರದ “ತುಳುನಾಡಿನ ದೈವಾರಾಧನೆ’ ಪನ್ಪಿನ ಪರಿಕಲ್ಪನೆದ ಟ್ಯಾಬ್ಲೊ ಮೆರವಣಿಗೆ ಪೋವೊಂದಿತ್ತ್ಂಡ್. ಆ ಪೊರ್ತುಡು ಥೈಲ್ಯಾಂಡ್ ದೇಶದ ಪ್ರಧಾನಿ ಯಂಗ್ಲಾಕ್ ಶೀನವ್ರತ ಮಲ್ಲ ಬಿನ್ನೆರಾದ್ ಬತ್ತಿತ್ತೆರ್. ಇಂಚ ಆ ಕಾಲೊಡು ತುಳುನಾಡ್ದ ದೈವಾರಾಧನೆ ಪಂಡ ದಾದ ಪಂಡ್ದ್ ಲೋಕೊರ್ಮೆ ಪುಗರ್ತೆ ಪಡೆದಿತ್ತ್ಂಡ್.
pallavi shetty