Tulu News

ಡಿ.30: ನಿಟ್ಟೆ ಜಸ್ಟೀಸ್ ಕೆ. ಎಸ್. ಹೆಗ್ಡೆ ಉದ್ಯಮಾಡಳಿತ ಶಿಕ್ಷಣ ಸಂಸ್ಥೆದ ಸಭಾಂಗಣಡ್ ವಿಶ್ವ ಹಿರಿಯ ವಿದ್ಯಾರ್ಥಿಲೆನ ಸಭೆ-2023

ಕಾರ್ಲ: ಡಾ.ನಿಟ್ಟೆ ಶಂಕರ ಅಡ್ಯಂತಾಯ ಪ್ರಥಮ ದರ್ಜೆ ಕಾಲೇಜ್ ಬೊಕ್ಕ ಮುಲ್ಪದ ಹಿರಿಯ ವಿದ್ಯಾರ್ಥಿ ಸಂಘದ ಒಟ್ಟುಸೇರಿಗೆಡ್ ವಿಶ್ವ ಹಿರಿಯ ವಿದ್ಯಾರ್ಥಿಲೆನ ಸಭೆ-2023 ಬೊಕ್ಕ 1996-1998ತ್ತ ಅವಧಿಡ್ ಶಿಕ್ಷಣ ಮುಗಿತಿನ ಸಂಸ್ಥೆದ ವಿದ್ಯಾರ್ಥಿಲೆನ ಬೊಳ್ಳಿ ಪುನರ್ಮಿಲನ ಲೇಸ್ ಡಿ.30 ಸನಿಯಾರ ನಿಟ್ಟೆ ಜಸ್ಟೀಸ್ ಕೆ. ಎಸ್. ಹೆಗ್ಡೆ ಉದ್ಯಮಾಡಳಿತ ಶಿಕ್ಷಣ ಸಂಸ್ಥೆದ ಸಭಾಂಗಣಡ್ ನಡಪರೆ ಉಂಡು.

ಈ ಪೊರ್ತುಡು ಸಂಸ್ಥೆಡ್ ನೆರ್ದ್ ದುಂಬು ಬೇಲೆ ಮಲ್ತಿನ ಉಪನ್ಯಾಸಕೆರ್, ಶಿಕ್ಷಕೇತರ ಸಿಬ್ಬಂದಿಲು ಬೊಕ್ಕ ಹಿರಿಯ ವಿದ್ಯಾರ್ಥಿಲು ಪಾಲ್ ಪಡೆಯೆರೆ ಉಲ್ಲೆರ್. ಅವೆರ್ದ್ ಬೊಕ್ಕ ಹಿರಿಯ ವಿದ್ಯಾರ್ಥಿಲು ಬೊಕ್ಕ ಉಪನ್ಯಾಸಕೆರೆನ ಸ್ನೇಹ ಮಿಲನ, ಸಾಂಸ್ಕೃತಿಕ, ಕ್ರೀಡಾ ಪಂತೊಲು ನಡಪರೆ ಉಂಡು ಪಂದ್ ಸಂಸ್ಥೆದ ಪ್ರಾಂಶುಪಾಲೆರ್ ಡಾ. ವೀಣಾ ಬಿ.ಕೆ ಮೇರ್ ತೆರಿಪಾದೆರ್.

ಬೆದ್ರ ಸಾರಕಂಬದ ಬಸದಿಡ್ ಲಕ್ಷ ದೀಪೋತ್ಸವ

ಬೆದ್ರ ಸಾರ ಕಂಬದ ಬಸದಿಡ್ ಸೋಮಾರ ರಾತ್ರೆ ಭ॥ ಶ್ರೀ ಚಂದ್ರನಾಥ ಸ್ವಾಮಿ ಪಂಚಾಮೃತ ಅಭಿಷೇಕ ಅಷ್ಟವಿಧಾರ್ಚಾನೆ ಪೂಜೆ ಬೊಕ್ಕ ಲಕ್ಷ ದೀಪೋತ್ಸವ ನಡತ್ಂಡ್.

ಈ ಲೇಸ್ ಆರ್ಯಿಕಾ ಪ್ರಸನ್ನ ಮತಿ, ಆರ್ಯಿಕಾ ಕೀರ್ತಿಮತಿ ಮಾತಾಜಿ ಮೆರೆನ ಉಪಸ್ಥಿತಿಡ್ ನಡತ್ಂಡ್. ಬೊಕ್ಕ ಡಾ| ಚಾರುಕೀರ್ತಿ ಭಟ್ಟಾರಕ ಪಂಡಿತಾಚಾರ್ಯ ವರ್ಯ ಮಹಾ ಸ್ವಾಮೀಜಿಲು ಆಶೀರ್ವಚನ ಕೊರಿಯೆರ್.

ಈ ಪೊರ್ತುಡು ಮಾಜಿ ಸಚಿವೆರ್ ಕೆ.ಅಭಯಚಂದ್ರ, ಶಂಭವ್ ಕುಮಾರ್, ಬಸದಿ ಮೊಕ್ತೇಸರೆರ್ ಪಟ್ಟಶೆಟ್ಟಿ ಸುಧೇಶ್ ಕುಮಾರ್, ದಿನೇಶ್ ಕುಮಾರ್, ಆದರ್ಶ್, ಅರಮನೆ ಕುಲದೀಪ ಎಂ., ಶೈಲೇಂದ್ರ ಜೈನ್, ಡಾ| ರೇಷ್ಮಾ ವಕೀಲ ಎಂ. ಆರ್. ಬಲ್ಲಾಳ್ ಪಾಲ್ ಪಡೆದಿತ್ತೆರ್.

ಕಡಂಬು ಶ್ರೀ ಕಲ್ಲುಡ ಕಲ್ಲುರ್ಟಿ, ಕೊಡಮಣಿತ್ತಾಯ, ರುದ್ರಾಂಡಿ ಬೊಕ್ಕ ಪರಿವಾರ ದೈವೊಲೆನ ದೈವೊಲ್ಯಡ್ ಪುನರ್ ಪ್ರತಿಷ್ಠಾ ನವಕ ಕಲಶ

ವಿಟ್ಲ: ಕಡಂಬು ಶ್ರೀ ಕಲ್ಲುಡ ಕಲ್ಲುರ್ಟಿ, ಕೊಡಮಣಿತ್ತಾಯ, ರುದ್ರಾಂಡಿ ಬೊಕ್ಕ ಪರಿವಾರ ದೈವೊಲೆನ ದೈವೊಲ್ಯಡ್ ಪುನರ್ ಪ್ರತಿಷ್ಠಾ ನವಕ ಕಲಶ ಡಿ.27 ಬೊಕ್ಕ 28 ಕ್ಕ್ ನಡತ್ಂಡ್.

ಡಿ.27 ಬುಧಾರ ಬಯ್ಯಗ್ ಪ್ರಾರ್ತನೆ, ವಾಸ್ತು ಪವನ ಪೂಜೆ, ರಾತ್ರೆ ಅನ್ನ ಪ್ರಸಾದ ಸೇವೆ ನಡತ್ಂಡ್.

ಡಿ.28 ಗುರುವಾರ  ಬೊಲ್ಪುಗು ಪ್ರಾರ್ತನೆ, ಸಾನಿಧ್ಯ ಹವನ, ದೈವೊಲೆನ ಪುನರ್ ಪ್ರತಿಷ್ಠೆ, ನವಕ ಕಲಶ, ತಂಬಿಲ ಸೇವೆ, ಪಟ್ಟ ಕಾಣಿಕೆ ಸಮರ್ಪಣೆ, ನಾಗ ಪ್ರತಿಷ್ಠೆ, ಆಶ್ಲೇಷ ಬಲಿ, ನಾಗ ತಂಬಿಲ ಸೇವೆ, ಮಂಗಳಾರತಿ ಮಧ್ಯಾಹ್ನ ಮಹಾಪೂಜೆ, ಅನ್ನ ಪ್ರಸಾದ ಸೇವೆ ನಡತ್ಂಡ್.

ವಿಧಾನಸೌಧಡ್ ತುಳುಕೂಟದ ಕ್ಯಾಲೆಂಡರ್ ಬುಡುಗಡೆ ಮಲ್ತಿನ ಶಾಸಕೆರ್ ಅಶೋಕ್ ಕುಮಾರ್ ರೈ

ವಿಧಾನಸೌಧಡ್ ನಡತಿನ ತುಳುಕೂಟದ 50ನೇ ವರ್ಷದ ಗೌಜಿಡ್ ಪುತ್ತೂರು ಶಾಸಕೆರ್ ಅಶೋಕ್ ಕುಮಾರ್ ರೈ ಇನಿ ಕ್ಯಾಲೆಂಡರ್ ಬುಡುಗಡೆ ಮಲ್ತೆರ್.

ತುಳುಕೂಟ ಗುರ್ಕಾರೆ ಸುಂದರ್ ರಾಜ್ ರೈ, ಮಾಜಿ ಗುರ್ಕಾರೆ ಕೆಸಿ ಬಳ್ಳಾಲ್, ಶ್ರೀ ಪ್ರೇಮ್ ಪ್ರಸಾದ್ ಅಡ್ಯಂತಾಯ, ರಾಜ್ ರಾಮ್ ಶೆಟ್ಟಿ ಉಪ್ಪಳ, ಸೃಷ್ಟಿ ಕಲಾ ರಂಗಭೂಮಿದ ಮಂಜುನಾಥ್ ಅಡ್ಪೆರ್, ದ.ಕ ವಿಶ್ವ ಬ್ರಾಹ್ಮಣ ಸಂಘದ ಪ್ರಶಾಂತ್ ಕುಮಾರ್ ಜಿ, ಯಕ್ಷಮಿತ್ರೆರ್ ನಾಗರಾಜ ಆಚಾರ್ಯ, ಮುರಳೀಧರ್ ರೈ, ಜಯರಾಜ್ ಅರಿಗ, ನವೀನಾ ಶೆಟ್ಟಿ, ಸುಧಾ ಪುತ್ತರಾಯ, ತುಳುಕೂಟದ ಸದಸ್ಯೆರ್ ಪಾಲ್ ಪಡೆದಿತ್ತೆರ್.

ಕಡಂದಲೆ ಹಾಲು ಉತ್ಪಾದಕರ ಸಹಕಾರ ಸಂಘದ ಗುರ್ಕಾರೆಯಾದ್ ಸುಚರಿತ್ ಶೆಟ್ಟಿ ಕುಡೊರ ಆಯ್ಕೆ

ಕಡಂದಲೆ ಹಾಲು ಉತ್ಪಾದಕರ ಸಹಕಾರಿ ಸಂಘ (ನಿ.) ದ ನನದ 5 ವರ್ಷದ ಆಡಳಿತ ನಿರ್ದೇಶಕೆರೆನ ಮಂಡಳಿದ ತಾನಗ್ ಡಿ.23 ಕ್ಕ್ ನಡತಿನ ವೋಟುಡು ನೆರ್ದ್ ದುಂಬುದ ಮಾತಾ ನಿರ್ದೇಶಕೆರ್ ಆವಿರೋಧವಾದ್ ಆಯ್ಕೆ ಆತೆರ್.

ಗುರ್ಕಾರೆಯಾದ್ ದ.ಕ. ಹಾಲು ಉತ್ಪಾದಕರ ಸಹಕಾರಿ ಒಕ್ಕೂಟದ ಗುರ್ಕಾರೆ ಕೆ.ಪಿ. ಸುಚರಿತ್ ಶೆಟ್ಟಿ ಬೊಕ್ಕ ಒತ್ತು ಗುರ್ಕಾರೆಯಾದ್ ಕೆ. ಪಾಂಡುರಂಗ ಶೆಟ್ಟಿ ಕುಡೊರ ಆಯ್ಕೆ ಆತೆರ್. ಮೊಕುಲು 5 ನೇ ಸರ್ತಿ ಆಯ್ಕೆ ಆತೆರ್. ಅಂಚೆನೆ ನಿರ್ದೇಶಕೆರಾದ್ ಕೆ. ಬಾಬು ಶೆಟ್ಟಿ, ರಮೇಶ ಪೂಜಾರಿ, ವಿಲಿಯಂ ಡಯಾಸ್, ಜಯಂತ ಗೌಡ, ವಿಕ್ಟ‌ರ್ ಡಿ’ಸೋಜಾ, ಜಯಂತಿ, ಟಾಕು ಹರಿಜನ, ನಾರಾಯಣ ಮಡಿವಾಳ, ಚಂದ್ರಶೇಖರ ತಿಮ್ಮಯ್ಯ ಶೆಟ್ಟಿ ಗೀತಾ ಯಾನೆ ಗಾಯತ್ರಿ ಭಟ್, ಅಮಿತಾ ಶೆಟ್ಟಿ ಇಂಚ 13 ಜನ ಕುಡೊರ ಆಯ್ಕೆ ಆತೆರ್.

ಎಕ್ಕಾರ್ ಶ್ರೀ ಕೊಡಮಂದಾಯ ದೈವೊಲ್ಯಡ್ ನೇಮೋಚ್ಚಯ

ಬಜಪೆ: ಎಕ್ಕಾರು ಶ್ರೀ ಕೊಡಮಂದಾಯ ದೈವೊಲ್ಯಡ್ ವರ್ಷಾವಧಿ ಜಾತ್ರೆದ ಲೆಕ್ಕೊಡು ಡಿ.25 ಸೋಮಾರ ರಾತ್ರೆ ಶ್ರೀ ಕೊಡಮಂದಾಯ ದೈವೊದ ನೇಮ ನಡತ್ಂಡ್.

ಈ ಪೊರ್ತುಡು ದೈವೊಲ್ಯದ ಆಡಳಿತ ಮೊಕ್ತೇಸರೆರ್ ತಿಮ್ಮ ಕಾವ (ನಿತಿನ್ ಹೆಗ್ಡೆ ಕಾವರ ಮನೆ), ಮೊಕ್ತೇಸರೆರ್ ಎಕ್ಕಾರು ಶ್ರೀ ಗೋಪಾಲಕೃಷ್ಣ ಮಠತ್ತ ವೇ।ಮೂ। ಹರಿದಾಸ ಉಡುಪ, ಭಾಸ್ಕರ ಮುದ್ದ ನದ್ದೋಡಿಗುತ್ತು, ರತ್ನಾಕರ ಶೆಟ್ಟಿ ಬಡಕರೆ ಬಾಳಿಕೆ, ರಮೇಶ್ ಭಂಡಾರಿ ಮಿತ್ತೊಟ್ಟು ಬಾಳಿಕೆ ಪಾಲ್ ಪಡೆದಿತ್ತೆರ್.

ಡಿ.28: ಉದ್ಯಾರ ಬಲಯಿಪಾದೆ ಯುವವಾಹಿನಿ ಸಭಾಭವನಡ್ ಬಲೆ ತುಲು ಲಿಪಿ ಕಲ್ಪುಗ ಲೇಸ್ ಉದಿಪನ

ಒಡಿಪು: ಯುವವಾಹಿನಿ (ರಿ.) ಒಡಿಪು ಘಟಕ ಬೊಕ್ಕ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ಜೈ ತುಲುನಾಡ್ (ರಿ.) ದ ಒಟ್ಟುಸೇರಿಗೆಡ್ ಡಿ.28 ಗುರುವಾರ ಉದ್ಯಾವರದ ಬಲಯಿಪಾದೆ ಯುವವಾಹಿನಿ ಸಭಾಭವನಡ್ ಬಲೆ ತುಲು ಲಿಪಿ ಕಲ್ಪುಗ ಲೇಸ್ ದ ಉದಿಪನ ನಡಪರೆ ಉಂಡು.

ಈ ಲೇಸ್ ಡ್ ತುಲು ಲಿಪಿ ಶಿಕ್ಷಕೆರ್ ಸಂತೋಷ್ ಕಟಪಾಡಿ, ಸುಶೀಲ ಕೊಡವೂರು, ಪ್ರಜ್ಞಾಶ್ರೀ ಎಂ ಪಾಲ್ ಪಡೆಯೆರೆ ಉಲ್ಲೆರ್.

ರೇಡಿಯೊ ಮಣಿಪಾಲಡ್ ಬನ್ನಂಜೆ ಬತ್ತೆರ್

ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಬನ್ನಂಜೆ ಬತ್ತೆರ್ ತುಳು ಸರಣಿ ಲೇಸ್ ಡಿ.28 ಗುರುವಾರ ಬಯ್ಯಗ್ 5‌ ಕ್ಕ್ ಪ್ರಸಾರ ಆಪುಂಡು.

ಈ ಲೇಸ್ ಡ್ ಜಾನಪದ ವಿದ್ವಾಂಸೆರ್ ಬನ್ನಂಜೆ ಬಾಬು ಅಮೀನ್ ಪಾತೆರಿಯೆರೆ ಉಲ್ಲೆರ್. ಡಿ.29 ಕ್ಕ್ ಮಧ್ಯಾಹ್ನ 1 ಗಂಟೆಗ್ ಕುಡೊರ ಪ್ರಸಾರ ಆಪುಂಡು. ಈ ಲೇಸ್ ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್‌ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.

ಕೊರೊನಾ ಸೀಕ್ ಡ್ ದೇವೆರೆ ಪಾದೊ ಸೇರಿಯೆರ್ ತಮಿಳು ನಟೆ ವಿಜಯಕಾಂತ್

ತಮಿಳ್ ಚಿತ್ರರಂಗದ ಹಿರಿಯ ನಟೆ, ಡಿಎಂಡಿಕೆ ಪಕ್ಷದ ಮುಖ್ಯಸ್ಥೆರ್ ವಿಜಯಕಾಂತ್ (71) ದೇವೆರೆ ಪಾದೊ ಸೇರಿಯೆರ್.

ಆರೋಗ್ಯ ಸಮಸ್ಯೆ ಬೊಕ್ಕ ಕೊರೊನಾ ಸೀಕ್ ರ್ದ್ ಚೆನ್ನೈ ಆಸ್ಪತ್ರೆಡ್ ಚಿಕಿತ್ಸೆ ಪಡೆವೊಂದು ಇತ್ತಿನ ಮೇರ್ ಗುರುವಾರ ತೀರ್ ಪೋಯೆರ್.

ವಿಜಯಕಾಂತ್ ಮೇರ್ 25 ಆಗಸ್ಟ್‌ 1952 ಕ್ಕ್ ಅಪಗದ ಮದ್ರಾಸ್ ಡ್ ಪುಟ್ಟಿಯೆರ್. 1990 ಟ್ಟ್ ಪ್ರೇಮಲತಾ ಮೆರೆನ್ ಮದಿಮೆ ಆತೆರ್. ಸಿನಿಮಾ ನಟೆಯಾದ್, ನಿರ್ಮಾಪಕೆಯಾದ್ ಇತ್ತಿನ ಮೇರ್ ರಾಜಕೀಯಡ್ಲಾ ಬೇಲೆ ಮಲ್ದೆರ್.

ತುಳುನಾಡ ಐತಿಹಾಸಿಕ ಪಟ್ಟದ ಬಂಕಿ ನಾಯ್ಗೆರೆಗ್ ಮಾನಾದಿಗೆ

ಮುಲ್ಕಿ: ತುಳುನಾಡ್ ದ ಪ್ರತಿಷ್ಠಿತ ಐತಿಹಾಸಿಕ ಪಟ್ಟ ಪಡೆದಿನ, ಧಾರ್ಮಿಕ ಕ್ಷೇತ್ರದ ಮಲ್ಲ ಸಾಧಕೆರ್, ಹಳೆಯಂಗಡಿ ಗರಡಿದ ಬಂಕಿ ನಾಯ್ಕೆರ್ ಮೆರೆಗ್ ಗುರುವಾರ ಹೊಸ ಅಂಗಣ ಪತ್ರಿಕೆದ ತಿಂಗಳ ಬೆಳಕು ಲೇಸ್ ಡ್ ಮಾನಾದಿಗೆ ನಡತ್ಂಡ್.

ಧರ್ಮದರ್ಶಿ ಹರಿಕೃಷ್ಣ ಪುನರೂರು ಲೇಸ್ ದ ಗುರ್ಕಾರ್ಮೆ ಒಯಿಸ್ ದಿತ್ತೆರ್.

ಮಲ್ಲ ಬಿನ್ನೆರಾದ್ ಎಲ್ ಐಸಿ ಅಧಿಕಾರಿ ಕೆ.ಪ್ರಕಾಶ್,
ಮಯೂರಿ ಪ್ರತಿಷ್ಠಾನದ ಜಯ ಕೆ. ಶೆಟ್ಟಿ, ಮೊಗವೀರ ಪತ್ರಿಕೆ ಸಂಪಾದಕೆರ್ ಅಶೋಕ್ ಸುವರ್ಣ, ಮುಲ್ಕಿ ಬಿಲ್ಲವ ಸಂಘದ ಮಾಜಿ ಅಧ್ಯಕ್ಷೆರ್ ಗೋಪಿನಾಥ ಪಡಂಗ, ಬಪ್ಪನಾಡು ಲಯನ್ಸ್ ಇನ್ ಸ್ಫೈರ್ ದ ವೆಂಕಟೇಶ್ ಹೆಬ್ಬಾರ್ ಇತ್ತೆರ್.

ಹೊಸ ಅಂಗಣ ಸಂಪಾದಕೆರ್ ಡಾ. ಹರಿಶ್ಚಂದ್ರ ಸಾಲ್ಯಾನ್ ಬಿನ್ನೆರೆನ್ ಸ್ವಾಗತ ಮಲ್ತೆರ್. ಚಿತ್ರಾಪು ವಾಸು ಪೂಜಾರಿ ಪ್ರಾರ್ಥನೆ ಮಲ್ತೆರ್. ವಿಜಯಕುಮಾರ್ ಕುಬೆವೂರು ಸನ್ಮಾನ ಪತ್ರ ಓದಿಯೆರ್. ದಿನೇಶ್ ಕೊಲ್ನಾಡು ಸೊಲ್ಮೆ ಸಂದಾಯೆರ್. ವೈ.ಎನ್.ಸಾಲ್ಯಾನ್ ನಿರೂಪಣೆ ಮಲ್ತೆರ್.