Tulu News

ಪ್ರಯೋಗ ಶಾಲೆ ಕಲ್ಪಾರ್ಥಿಲೆನ ಕಂಪ್ಯೂಟರ್ ಜ್ಞಾನಾರ್ಜನೆಗ್ ಅಡಿಪಾಯ: ಡಾ.ನಿಂಗಯ್ಯ

ಸುಬ್ರಹ್ಮಣ್ಯ: ಇತ್ತೆದ ಕಾಲಡ್ ಕಂಪ್ಯೂಟರ್ ದ ಜ್ಞಾನ ಅಗತ್ಯ. ಕಂಪ್ಯೂಟರ್ ಲು ಶಾಲೆ ಕಾಲೇಜ್ ಗ್ ಅತ್ಯವಶ್ಯಕ, ಅವ್ವೇ ರೀತಿ ವಿದ್ಯಾಸಂಸ್ಥೆಲೆಡ್ ವ್ಯವಸ್ಥಿತವಾಯಿನ ಪ್ರಯೋಗ ಶಾಲೆ ಇಪ್ಪುನವು ಅತ್ಯವಶ್ಯಕ, ಉತ್ಕೃಷ್ಠ ಮಟ್ಟದ ಸುಸಜ್ಜಿತ ಪ್ರಯೋಗ ಶಾಲೆಲು ಕಂಪ್ಯೂಟರ್ ದ ಜ್ಞಾನಾರ್ಜನೆಗ್ ಅಡಿಪಾಯ ಆತ್ಂಡ್. ಎಸ್‌ಎಸ್‌ಪಿಯು ಕಾಲೇಜ್ ಡ್ ಜಿಲ್ಲೆಡೇ ಪುದರ್ ಪಡೆಯಿನ ಶ್ರೇಷ್ಠ ಮಟ್ಟದ ಕಂಪ್ಯೂಟರ್ ಬೊಕ್ಕ ವಿಜ್ಞಾನ ಪ್ರಯೋಗ ಶಾಲೆ ಉಂಡು ಪನ್ಪುನವು ಗ್ರಾಮೀಣ ಭಾಗದ ಪೆರ್ಮೆ ಪಂದ್ ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವಲ್ಯದ ಕಾರ್ಯನಿರ್ವಹಣಾಧಿಕಾರಿ, ಎಸ್‌ಎಸ್‌ಪಿಯು ಕಾಲೇಜ್ ದ ಕಾರ್ಯದರ್ಶಿ ಡಾ.ನಿಂಗಯ್ಯ ಪಂಡೆರ್.

ಮೇರ್ ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವಲ್ಯದ ಆಡಳಿತ ಎಸ್‌ಎಸ್‌ಪಿಯು ಕಾಲೇಜ್ ಗ್ ಡಾ.ಚಂದನ್ ಬೆಂಗ್ಲೂರು ಮೇರ್ ಕೊರ್ನ 10 ಕಂಪ್ಯೂಟರ್ ನ್ ದೆತೊಂದು ಪಾತೆರಿಯೆರ್.

ಶ್ರೀ ದೇವಲ್ಯರ್ದ್ ತಿಕಿನ ಕಂಪ್ಯೂಟರ್ ದೊಟ್ಟಿಗೆ ಇತ್ತೆ ದಾನಿಲು ಕೊರ್ನ ಪೊಸ ಕಂಪ್ಯೂಟರ್ ಲು ಪ್ರಯೋಗ ಶಾಲೆಡ್ ಉಂಡು. ನೆತ್ತ ಉಪಯೋಗನ್ ಕಲ್ಪಾರ್ಥಿಲು ಪಡೆವೊನೊಡು. ಕಾಲೇಜ್ ಡ್ ಇತ್ತೆ 1000 ರ್ದ್ ಎಚ್ಚ ಕಲ್ಪಾರ್ಥಿಲು ಕಲ್ತೊಂದು ಉಲ್ಲೆರ್. ಗಣಕ ವಿಜ್ಞಾನ ವಿಭಾಗಲ ಉಂಡು. ಅತ್ತಂದೆ ಕಲೆ ಬೊಕ್ಕ ವಾಣಿಜ್ಯ ವಿಭಾಗಗ್ ಕಂಪ್ಯೂಟರ್ ತರಬೇತಿ ನಡತೊಂದು ಉಂಡು. ಈ ಪೊರ್ತುಡು ಪೊಸ ಕಂಪ್ಯೂಟರ್ ಲು ಕಲ್ಪಾರ್ಥಿಲೆಗ್ ಎಚ್ಚದ ಅನುಕೂಲತೆ ಕೊರ್ಪುಂಡು ಪಂದ್ ಪಂಡೆರ್.

ಈ ಪೊರ್ತುಡು ದೇವಲ್ಯದ ವ್ಯವಸ್ಥಾಪನಾ ಸಮಿತಿ ಸದಸ್ಯೆರ್, ದಾನಿ ಡಾ.ಚಂದನ್ ಬೆಂಗ್ಲೂರು, ಆರೆನ ದೋಸ್ತಿ ಶ್ರೀವತ್ಸ ಬೆಂಗ್ಲೂರು, ಕಾಲೇಜ್ ದ ಪ್ರಾಚಾರ್ಯೆರ್ ಸೋಮಶೇಖರ ನಾಯಕ್, ಕೆಎಸ್‌ಎಸ್ ಕಾಲೇಜ್ ದ ಪ್ರಾಂಶುಪಾಲೆರ್ ಡಾ. ದಿನೇಶ್ ಪಿ.ಟಿ, ಗ್ರಂಥಪಾಲಕೆರ್ ಜಯಪ್ರಕಾಶ್ ಆರ್.ವಿ, ಕುಕ್ಕೆ ದೇವಲ್ಯದ ಶಿವ ಸುಬ್ರಹ್ಮಣ್ಯ ಭಟ್, ನಂದೀಶ್ ಕಟ್ರಮನೆ, ಪ್ರವೀಣ್ ಸುಬ್ರಹ್ಮಣ್ಯ, ಪ್ರಶಾಂತ್, ಎಸ್‌ಎಸ್‌ಪಿಯು ಕಾಲೇಜ್ ದ ಉಪನ್ಯಾಸಕೆರ್, ಶಿಕ್ಷಕೆರ್, ಸಿಬ್ಬಂದಿ ವರ್ಗದಕುಲು ಪಾಲ್ ಪಡೆದಿತ್ತೆರ್.

ಡಾ.ಚಂದನ್ ಬೆಂಗ್ಲೂರು ಮೇರ್ ಕುಕ್ಕೆ ದೇವಲ್ಯದ ಆಡಳಿತದ ಕೆ.ಎಸ್.ಎಸ್ ಕಾಲೇಜ್ ಗ್ 10 ಕಂಪ್ಯೂಟರ್ ಕೊರಿಯೆರ್. ಈ ಮುಕೇನ ಒಟ್ಟು 20 ಕಂಪ್ಯೂಟರ್ ನ್ ಶ್ರೀ ದೇವಲ್ಯದ ವಿದ್ಯಾಸಂಸ್ಥೆಗ್ ಕೊರ್ಲೆಕ್ಕ ಆಂಡ್.

ಫೆ.25: ಶ್ರೀ ಸಂತ ಸೇವಾಲಾಲ್ 285ನೇ ಜಯಂತಿದ ಲೆಕ್ಕೊಡು ಬಂಜಾರ ಬಾಯ್ಸ್ ಯುವಕ ಸಂಘ ತೋಗುಣಶಿದ ಮುತಾಲಿಕೆಡ್ ಸ್ಯಾಟ್ ಲೈಟ್ ಕಬಡ್ಡಿ ಪಂತೊ

ಶ್ರೀ ಸಂತ ಸೇವಾಲಾಲ್ 285ನೇ ಜಯಂತಿದ ಲೆಕ್ಕೊಡು ಬಂಜಾರ ಬಾಯ್ಸ್ ಯುವಕ ಸಂಘ ತೋಗುಣಶಿದ ಮುತಾಲಿಕೆಡ್ ಸುರುತ್ತ ಸರ್ತಿ 55 ಕೆಜಿ ವಿಭಾಗದ ಸ್ಯಾಟ್ ಲೈಟ್ ಕಬಡ್ಡಿ ಪಂತೊ ಫೆ.25 ಕ್ಕ್ ಬಾಗಲಕೋಟೆ ಜಿಲ್ಲೆದ ಗುಳೇದಗುಡ್ಡ ತಾಲೂಕ್ ದ ತೋಗುಣಶಿ ಎಲ್ ಟಿ ಗ್ರಾಮಡ್ ನಡಪರೆ ಉಂಡು.

ಈ ಪಂತೊಡು ಗೆಂದಿನಕ್ಲೆಗ್ ಸುರುತ್ತ ಇನಾಮು 7001 ಬೊಕ್ಕ ಟ್ರೋಫಿ, ರಡ್ಡನೇ ಇನಾಮು 5001 ಬೊಕ್ಕ ಟ್ರೋಫಿ, ಮೂಜಿನೇ ಇನಾಮು 3001 ಬೊಕ್ಕ ಟ್ರೋಫಿ, ನಾಲ್ ನೇ ಇನಾಮು 2001 ಬೊಕ್ಕ ಟ್ರೋಫಿ ತಿಕ್ಕುಂಡು.

ಈ ಪಂತೊದ ನಿಯಮಲು:
•ಒಂಜಿ ಕೂಟಡ್ ಗೊಬ್ಬಿನ ಗೊಬ್ಬುಗಾರೆರ್ ಕುಡೊಂಜಿ ಕೂಟಡ್ ಗೊಬ್ಬೆರೆ ಇಜ್ಜಿ.
•ನಿರ್ಣಾಯೆಕೆರೆನ ನಿರ್ಣಾಯನೇ ಅಕೇರಿ.
•ಗೊಬ್ಬುಗಾರೆರೆಗ್ ದಾದಂಡಲ ಕಮಿಟಿದ ಜಬದಾರಿದ ಅತ್ತ್.
•ಒಂಜೇ ಊರುದ ಗೊಬ್ಬುಗಾರೆರ್ ಇಪ್ಪೊಡು.
•ಆಧಾರ ಕಾರ್ಡ್ ಕಡ್ಡಾಯವಾದ್ ಕನವೊಡು.
•ತೂಕಗ್ 2 ಸರ್ತಿ ಅವಕಾಶ ಉಂಡು.
•ನನ ಒರಿನ ನಿಯಮನ್ ಮೈದಾನಡೇ ತೆರಿಪಾವೆರ್.

ಈ ಪಂತೊದ ಎಚ್ಚದ ಪೊಲಬುಗಾದ್ ತರುಣ 9845403158, ಲಕ್ಷ್ಮಣ 6363671796, ಮಂಜುನಾಥ 7892114951 ಮೊಕ್ಲೆನ್ ಸಂಪರ್ಕ ಮಲ್ಪೊಲಿ.

ರೇಡಿಯೊ ಮಣಿಪಾಲಡ್ ಹೊಂಬೆಳಕು-ವ್ಯಕ್ತಿತ್ವ ವಿಕಸನ ಸರಣಿ ಲೇಸ್

ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಸಮುದಾಯ ಬಾನುಲಿ ಜೆಸಿಐ ಕಲ್ಯಾಣಪುರದ ಒಟ್ಟುಸೇರಿಗೆಡ್ ಹೊಂಬೆಳಕು-ವ್ಯಕ್ತಿತ್ವ ವಿಕಸನ ಸರಣಿ ಲೇಸ್ ದ 46ನೇ ಸಂಚಿಕೆ ಫೆ.20 ಕ್ಕ್ ಅಂಗಾರೆ ಬಯ್ಯಗ್ 5.30 ಕ್ಕ್ ಪ್ರಸಾರ ಆಪುಂಡು.

ಈ ಲೇಸ್ ನ್ ಶಿಕ್ಷಕೆರ್, ಬರವುಗಾರೆ ನರೇಂದ್ರ ಕುಮಾರ್ ಕೋಟ ನಡಪಾದ್ ಕೊರಿಯೆರೆ ಉಲ್ಲೆರ್. ಫೆ.21 ಕ್ಕ್ ಮಧ್ಯಾಹ್ನ 1.30 ಕ್ಕ್ ಕುಡೊರ ಪ್ರಸಾರ ಆಪುಂಡು.

ಈ ಲೇಸ್ ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್‌ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.

ಫೆ.22-ಮಾ.1: ವೇಣೂರುಡು ಮಹಾಮಸ್ತಕಾಭಿಷೇಕ

ಬೊಲ್ಪುರ್ದ್ ರಾತ್ರೆ ಮುಟ್ಟ ಬಾಹುಬಲಿ ಮೂರ್ತಿಗ್ ಮಜ್ಜನ

ಬೊಲ್ತೇರ್: ವೇಣೂರು ಶ್ರೀ ದಿಗಂಬರ ಜೈನ ತೀರ್ಥ ಕ್ಷೇತ್ರಡ್ ಪ್ರತಿ 12 ವರ್ಷಗೊರ ನಡಪುನ ಮಹಾಮಸ್ತಕಾಭಿಷೇಕ ಫೆ.22 ರ್ದ್ ಮಾ.1 ಮುಟ್ಟ ನಡಪರೆ ಉಂಡು.

ಕ್ರಿ.ಶ.1604 ಟ್ಟ್ 35 ಅಡಿ ಎತ್ತರದ ಏಕಶಿಲಾ ಬಾಹುಬಲಿ ಮೂರ್ತಿನ್ ಅಜಿಲರಸೆರ್ ತಿಮ್ಮಣ್ಣ ಅಜಿಲೆರ್ ಪ್ರತಿಷ್ಠಾಪನೆ ಮಲ್ತ್ ದ್, ಸುರುತ್ತ ಮಹಾಮಸ್ತಕಾಭಿಷೇಕ ಮಲ್ತೆರ್. ಬೊಕ್ಕ 1928, 1956 ಸೇರಿನಂಚೆನೆ 2000, 2012 ಟ್ಟ್ ಆದ್ 2024 ಪಂಡ ಈ ವರ್ಷದ 3ನೇ ಮಹಾಮಸ್ತಕಾಭಿಷೇಕಗ್ ತಯಾರಿ ಆತ್ಂಡ್ ಪಂದ್ ಸ್ಥಾಪಕ ವಂಶೀಯ ಅರಸೆರ್, ಕಾರ್ಯಾಧ್ಯಕ್ಷೆರ್ ತಿಮ್ಮಣ್ಣರಸುಲು ಡಾ. ಪದ್ಮಪ್ರಸಾದ್ ಅಜಿಲೆರ್ ಪ್ರತಿಕಾಗೋಷ್ಠಿಡ್ ತೆರಿಪಾಯೆರ್.

ವೇಣೂರು ಶ್ರೀ ದಿಗಂಬರ ಜೈನ ತೀರ್ಥಕ್ಷೇತ್ರ ಸಮಿತಿ ಮುತಾಲಿಕೆಡ್ ಧರ್ಮಾಧಿಕಾರಿ ಡಾ| ಡಿ. ವೀರೇಂದ್ರ ಹೆಗ್ಗಡೆರೆನ ಗುರ್ಕಾರ್ಮೆಡ್ ಪರಮಪೂಜ್ಯ 108 ಶ್ರೀ ಅಮೋಘಕೀರ್ತಿ ಮುನಿ ಮಹಾರಾಜೆರ್, ಪರಮಪೂಜ್ಯ 108 ಶ್ರೀ ಅಮರಕೀರ್ತಿ ಮುನಿ ಮಹಾರಾಜೆರ್ ಸೇರಿನಂಚೆನೆ ನಾಡ್ ದ ಜೈನಪರಂಪರೆದ ಮಾತ ಮಹಾಧೀಶೆರ್ ಬೊಕ್ಕ ಜೈನ ಆರ್ಯಿಕೆರೆನ ಸಾನಿಧ್ಯಡ್ 9 ದಿನ ಬಯ್ಯಗ್ ಧಾರ್ಮಿಕ ಸಭೆ, ಸಾಂಸ್ಕೃತಿಕ ಲೇಸ್ ನಡಪರೆ ಉಂಡು ಪಂದ್ ಪಂಡೆರ್.

ಫೆ.22 ಕ್ಕ್ ಮಧ್ಯಾಹ್ನ ಬೆದ್ರ ಜೈನ ಮಠ ಡಾ| ಭಟ್ಟಾರಕ ಚಾರುಕೀರ್ತಿ ಪಂಡಿತಾಚಾರ್ಯವರ್ಯ ಮಹಾ ಸ್ವಾಮೀಜಿ, ಶ್ರವಣಬೆಳಗೊಳ ಜೈನ ಮಠತ್ತ ಚಾರುಕೀರ್ತಿ ಭಟ್ಟಾರಕ ಪಟ್ಟಾಚಾರ್ಯವರ್ಯ ಮಹಾ ಸ್ವಾಮೀಜಿ ಸಾನಿಧ್ಯಡ್ ಉಪಮುಖ್ಯ ಮಂತ್ರಿ ಡಿ.ಕೆ ಶಿವಕುಮಾರ್ ಉದಿಪನ ಮಲ್ಪುವೆರ್. ಡಾ| ಡಿ. ವೀರೇಂದ್ರ ಹೆಗ್ಗಡೆ ಗುರ್ಕಾರ್ಮೆನ್ ಒಯಿಸೊನ್ವೆರ್. ಉಸ್ತುವಾರಿ ಸಚಿವೆರ್ ದಿನೇಶ್ ಗುಂಡೂರಾವ್ ಸ್ಮರಣ ಸಂಚಿಕೆ ಬುಡುಗಡೆ ಮಲ್ಪುವೆರ್. ಸಂಸದೆರ್ ನಳಿನ್ ಕುಮಾರ್ ಕಟೀಲ್ ವಸ್ತುಪ್ರದರ್ಶನ ಉದಿಪನ ಮಲ್ಪುವೆರ್ ಪಂದ್ ಪಂಡೆರ್.

9 ದಿನಟ್ಟ್ ಜೈನ ಶ್ರಾವಕರ 30 ರ್ದ್ ಎಚ್ಚ ಉಪಸಮಿತಿ, 1500 ಸ್ವಯಂ ಸೇವಕೆರ್ ಸೇರ್ದ್ 3 ಸಾರರ್ದ್ ಎಚ್ಚ ಜನ ಸೇವೆಡ್ ಪಾಲ್ ಪಡೆಯೆರೆ ಉಲ್ಲೆರ್. ಪ್ರತಿದಿನ ಬಯ್ಯಗ್ ಅಗ್ರೋದಕ ಮೆರವಣಿಗೆ ಆದ್ ಬಾಹುಬಲಿ ಮೂರ್ತಿಗ್ ನೀರ್, ಕಷಾಯ, ಕಲ್ಕಚೂರ್ಣ, ಮಂಜಲ್, ಶ್ರೀಗಂಧ, ಚಂದನ, ಅಷ್ಟಗಂಧ, ಪೇರ್, ಬೊಂಡ, ಕೇಸರಿ ದ್ರವ್ಯಲೆರ್ದ್ ಮಸ್ತಕಾಭಿಷೇಕ ಮಲ್ತ್ ದ್ ಪುಷ್ಪವೃಷ್ಠಿ, ಮಹಾ ಮಂಗಳಾರತಿ, ಶಾಂತಿಮಂತ್ರದೊಟ್ಟಿಗೆ ರಾತ್ರೆ ಸಂಪನ್ನ ಆಪುಂಡು. ಫೆ.25 ಕ್ಕ್ ಇಸೇಸವಾದ್ ಬೊಲ್ಪುಗು ಮಜ್ಜನ ನಡಪರೆ ಉಂಡು. ಫೆ.29 ಕ್ಕ್ ಸಮವಸರಣ ಪೂಜೆ ನಡಪರೆ ಉಂಡು.

ಈ ಲೇಸ್ ಡ್ 1300 ಕಾರ್, 700 ದ್ವಿಚಕ್ರ ಗಾಡಿ ಉಂತಾಯೆರೆ ವ್ಯವಸ್ಥೆ ಪಾರ್ಕಿಂಗ್ ಮಲ್ದ್ಂಡ್. 200 ಕಲ್ಪಾರ್ಥಿಲು ಈ ಸೇವೆಡ್ ಪಾಲ್ ಪಡೆಯೆರೆ ಉಲ್ಲೆರ್. 75 ರ್ದ್ ಎಚ್ಚ ಜನತ್ತ ಪೊಲೀಸ್ ಭದ್ರತೆ ಉಂಡು. ಯಾತ್ರಿಕೆರೆಗ್ ಇಪ್ಪೆರೆ ಶಾಲೆ, ಖಾಸಗಿ ವಸತಿ ಗೃಹಲೆಡ್ ವ್ಯವಸ್ಥೆ ಮಲ್ದ್ಂಡ್ ಪಂದ್ ಪಂಡೆರ್.

ಪ್ರಧಾನ ಕಾರ್ಯದರ್ಶಿ ವಿ.ಪ್ರವೀಣ್ ಕುಮಾರ್ ಇಂದ್ರ ಪಾತೆರ್ದ್, ಮಸ್ತಕಾಭಿಷೇಕದ ಪೊರ್ತುಡು ಭಕ್ತೆರೆನ ಮೂಲಸೌಕರ್ಯಗಾದ್ ಅಲ್ಪಸಂಖ್ಯಾತ ಅಭಿವೃದ್ಧಿ ನಿಗಮರ್ದ್ 1 ಕೋಟಿ ರೂ. ಸಕಾಯ ಕೊರ್ನೆದಾವೆರ 2 ಬಸದಿ ಜೀರ್ಣೋದ್ಧಾರದೊಟ್ಟಿಗೆ ಬೇತೆ ಕಾಮಗಾರಿ ನಡತ್ ದ್ಂಡ್. ಬೇತೆ ಬೇತೆ ಇಲಾಖೆಲೆನ ಅನುದಾನರ್ದ್ ಕ್ಷೇತ್ರದ ಸುತ್ತ ಮಾರ್ಗ, ಶೌಚಾಲಯ, ಕರೆಂಟ್ ವ್ಯವಸ್ಥೆ ನೀರ್ ದ ಟ್ಯಾಂಕ್, ತಡೆಗೋಡೆದಂಚಿನ ಅಗತ್ಯ ಸೌಕರ್ಯನ್ ಮಲ್ದ್ಂಡ್. ‌ಶಾಸಕೆರ್ ಹರೀಶ್ ಪೂಂಜ ನಗರಾಲಂಕಾರ ಕಲ್ಪಿಸಾದೆರ್. 25 ಕೊಠಡಿದ ವಸತಿಗೃಹಲು ಪ್ರವಚನ ಮಂಟಪಗ್ 50 ಲಕ್ಷ ರೂ. ಕೊರ್ಪುಲೆಕ್ಕ ಮುಖ್ಯಮಂತ್ರಿಲೆಗ್ ಬಿನ್ನಾಪು ಮಲ್ತ್ ದ್ಂಡ್ ಪಂದ್ ಪಂಡೆರ್. ಕೋಶಾಧಿಕಾರಿ ಜಯರಾಜ್ ಕಂಬ್ಳಿ ಪಾಲ್ ಪಡೆದಿತ್ತೆರ್.

ಈ ಲೇಸ್ ದ ವ್ಯವಸ್ಥೆಲು:
•1 ಸಾರ ಜನಕ್ಕ್ ಆಸನ ವ್ಯವಸ್ಥೆ
•ಪ್ರತಿ ದಿನ 10-20 ಸಾರ ಜನತ್ತ ನಿರೀಕ್ಷೆ
•ಮಾತ ಕಡೆಟ್ಲಾ ಹೆಚ್ಚುವರಿ ಸರಕಾರಿ ಬೊಕ್ಕ ಖಾಸಗಿ ಬಸ್ ವ್ಯವಸ್ಥೆ
•ಮಾ.1 ಕ್ಕ್ 1008 ಕಲಶದ ಮಹಾ ಮಜ್ಜನ
•ಪ್ರತಿದಿನ ಅನ್ನದಾಸೋಹ ರಾತ್ರೆ ಸಾಂಸ್ಕೃತಿಕ ಲೇಸ್
•30 ಉಪಸಮಿತಿ, 1500 ಜನ ಸ್ವಯಂ ಸೇವಕೆರ್
•ಎಸ್ ಡಿಎಂ ಕಲ್ಪಾರ್ಥಿಲು, ಶೌರ್ಯ ವಿಪತ್ತು ರಕ್ಷಣ ಕೂಟರ್ದ್ ಸೇವೆ

ರಾಜ್ಯಪಾಲೆರ್, ಒಡೆಯೆರೆನ ಪಾಲ್ವಿಕೆ:
ಫೆ.23 ಕ್ಕ್ ಸಚಿವೆರ್ ಜಮೀರ್ ಅಹ್ಮದ್ ಖಾನ್, ಫೆ.24 ಕ್ಕ್ ವಿಧಾನಸಭಾ ಸ್ವೀಕರ್ ಯು.ಟಿ ಖಾದರ್, ಫೆ.25 ಕ್ಕ್ ಮಾಜಿ ಮುಖ್ಯಮಂತ್ರಿ ಬಸವರಾಜ್ ಬೊಮ್ಮಾಯಿ, ಸಚಿವೆರ್ ಎನ್ ಎಸ್ ಬೋಸರಾಜ್, ಫೆ.26 ಕ್ಕ್ ಮೈಸೂರು ಮಹಾಸಂಸ್ಥಾನದ ಯದುವೀರ್ ಕೃಷ್ಣದತ್ತ ಚಾಮರಾಜ ಒಡೆಯೆರ್, ಫೆ.27 ಕ್ಕ್ ಮಾಜಿ ಮುಖ್ಯಮಂತ್ರಿ ವೀರಪ್ಪ ಮೊಯಿಲಿ, ಫೆ‌.28 ಕ್ಕ್ ಬಿಜೆಪಿ ರಾಜ್ಯಾಧ್ಯಕ್ಷೆರ್ ಬಿ.ವೈ ವಿಜಯೇಂದ್ರ, ಮಾ.1 ಕ್ಕ್ ರಾಜ್ಯಪಾಲೆರ್ ಥಾವರ್ ಚಂದ್ ಗೆಹ್ಲೋಟ್ ಪಾಲ್ ಪಡೆಯೆರೆ ಉಲ್ಲೆರ್.

ಶ್ರೀ ಕೊಂಡೇಲ್ತಾಯ ದೈವೊಲ್ಯಡ್ ಧಾರ್ಮಿಕ ಲೇಸ್ ಸುರು

ಕಟೀಲ್ ಕೈತಲ್ದ ಕೊಂಡೇಲಡ್ ಪೊಸತಾದ್ ನಿರ್ಮಾಣ ಆಯಿನ ಶ್ರೀ ಕೊಂಡೇಲ್ತಾಯ, ಶ್ರೀ ರಕ್ತೇಶ್ವರೀ, ಶ್ರೀ ಪಂಜುರ್ಲಿ ದೈವೊಲ್ಯಡ್ ದೈವೊಲೆನ ಪ್ರತಿಷ್ಠೆ ಕಲಶಾಭಿಷೇಕದ ನಿಲೆಟ್ಟ್ ಧಾರ್ಮಿಕ ವಿಧಿ ವಿಧಾನಲು ಸುರು ಆತ್ಂಡ್.

ಸಿತ್ಲ ರಾಮಚಂದ್ರ ರಾವ್, ವಿನಾಯಕ ಕಾರಂತ ಮೊಕ್ಲೆನ ಪೌರೋಹಿತ್ಯಡ್ ಜಾಗೆಶುದ್ಧಿ, ಆಲಯ ಪರಿಗ್ರಹ ಇಂಚಿನ ಧಾರ್ಮಿಕ ವಿಧಿವಿಧಾನಲು ಸುರು ಆತ್ಂಡ್.

ಕಟೀಲ್-ಕೊಂಡೇಲ ಗ್ರಾಮಸ್ಥೆರೆರ್ದ್ ಪುದೆ ಕಾಣಿಕೆ ಮೆರವಣಿಗೆ ಕಟೀಲ್ ಶ್ರೀ ದುರ್ಗಾಪರಮೇಶ್ವರೀ ದೇವಲ್ಯಗ್ ಬತ್ತ್ ದ್ ಸಾಮೂಹಿಕ ಪ್ರಾರ್ತನೆ ಸಂದಾಯಿನ ಬೊಕ್ಕ ರಥಬೀದಿರ್ದ್ ಕೊಂಡೇಲ್ತಾಯ ಕ್ಷೇತ್ರಗ್ ಬತ್ತ್ಂಡ್.

ಕಟೀಲ್ ದೇವಲ್ಯದ ಅರ್ಚಕೆರ್ ಕೆ. ಲಕ್ಷ್ಮೀನಾರಾಯಣ ಆಸ್ರಣ್ಣ ಮೆರವಣಿಗೆಗ್ ಚಾಲನೆ ಕೊರಿಯೆರ್. ಕೊಂಡೇಲ್ತಾಯ ಕ್ಷೇತ್ರಡ್ ತೋರಣ ಮೂರ್ತ, ಉಗ್ರಾಣ ಮೂರ್ತ ನಡತ್ಂಡ್.

ಈ ಪೊರ್ತುಡು ಸಮಿತಿ ಪ್ರಧಾನ ಸಂಚಾಲಕೆರ್ ಕೊಂಡೇಲಗುತ್ತು ಎ. ಜಯರಾಮ ಶೆಟ್ಟಿ, ದೈವೊಲ್ಯದ ಆಡಳಿತ ಸಮಿತಿ ಗುರ್ಕಾರೆ ಲೋಕಯ್ಯ ಸಾಲ್ಯಾನ್ ಕೊಂಡೇಲ, ಈಶ್ವರ ಕಟೀಲ್, ಕಿರಣ್ ಕುಮಾರ್ ಶೆಟ್ಟಿ, ದೊಡ್ಡಯ್ಯ ಶೆಟ್ಟಿ, ಪ್ರಶಾಂತ್ ದೇವಾಡಿಗ, ಅಭಿಲಾಷ್ ಶೆಟ್ಟಿ, ವಿಖೇಶ್ ಕೋಟ್ಯಾನ್, ಜಯಶೀಲ ಶೆಟ್ಟಿ ಪಾಲ್ ಪಡೆದಿತ್ತೆರ್.

ತುಳು ಪಾತೆರ್ಗ ತುಳು ಒರಿಪಾಗ ದುಬೈ ಯುಎಇ ದ 11ನೇ ವರ್ಷದ “ಗೌಜಿ ಗಮ್ಮತ್” ತುಳುನಾಡ ಗೊಬ್ಬುಲೆನ ಲೇಸ್ ದ ಅಟ್ಟಣೆ ಸಭೆ, ಲೆಪ್ಪೋಲೆ ಬುಡುಗಡೆ

ತುಳು ಪಾತೆರ್ಗ ತುಳು ಒರಿಪಾಗ ದುಬೈ ಯುಎಇ ದ 11ನೇ ವರ್ಷದ “ಗೌಜಿ ಗಮ್ಮತ್” ತುಳುನಾಡ ಗೊಬ್ಬುಲೆನ ಲೇಸ್ ದ ಅಟ್ಟಣೆ ಸಭೆ ಬೊಕ್ಕ ಲೆಪ್ಪೋಲೆ ಬುಡುಗಡೆ ಲೇಸ್ ದುಬೈದ ಝಾಬೀಲ್ ಪಾರ್ಕ್ ಡ್ ನಡತ್ಂಡ್.

ಸಂಸ್ಥೆದ ಪೆರಿಯ ಸದಸ್ಯೆರಾಯಿನ ಸತೀಶ್ ಉಳ್ಳಾಲ್, ನೋವೆಲ್ ಡಿ ಅಲ್ಮೇಡ, ಅಜ್ಮಲ್ ದುಬೈ, ಸಂದೀಪ್ ಕೋಟ್ಯಾನ್, ಸುಲೋಚನಾ ಜಯ ಅಮೀನ್, ಸುಶೀಲ ಸಂಜೀವ ಪೂಜಾರಿ ಮೊಕುಲು ಮಾ.3 ಐತಾರ ದುಬೈದ ಝಾಬೀಲ್ ಪಾರ್ಕ್ ಡ್ ನಡಪರೆ ಇಪ್ಪುನ ತುಳುನಾಡ ಗೊಬ್ಬುಲೆನ ಲೇಸ್ ದ ಲೆಪ್ಪೋಲೆನ್ ಬುಡುಗಡೆ ಮಲ್ತೆರ್.

ಬೊಲ್ಪುಗು 10 ಗಂಟೆರ್ದ್ ಬಯ್ಯ 6 ಗಂಟೆ ಮುಟ್ಟ ಆಂಜೋವ್ಲೆಗ್, ಪೊಂಜೋವ್ಲೆಗ್ ಬೊಕ್ಕ ಜೋಕ್ಲೆಗ್, ತುಳುನಾಡ್ ದ ಗೊಬ್ಬುಲಾಯಿನ ಲಗೋರಿ, ಕಬ್ಬಡಿ, ಬಲ್ಲ್ ಒಯಿಪುನ, ಸೈಕಲ್ ಚಕ್ರ ಗಿಡಪೆರೆ ಇಂಚ ಗೊಬ್ಬುಲು ಬೊಕ್ಕ ಬೇತೆ ಬೇತೆ ಕ್ಷೇತ್ರಡ್ ಸಾಧನೆ ಮಲ್ತಿನ ಸಾಧಕೆರೆಗ್ ಸನ್ಮಾನ ಲೇಸ್ ನ್ ಆಯೋಜನೆ ಮಲ್ದ್ಂಡ್ ಪಂದ್ ಸಂಸ್ಥೆದ ಕಾರ್ಯದರ್ಶಿ ರಿತೇಶ್ ಅಂಚನ್ ಮೇರ್ ತೆರಿಪಾಯೆರ್. ದುಬೈಡ್ ಇಪ್ಪುನ ತುಳುವೆರ್ ಮಾತೆರ್ಲಾ ಈ ಲೇಸ್ ಡ್ ಪಾಲ್ ಪಡೆದ್ ಯಶಸ್ವಿ ಮಲ್ಪೊಡು ಪಂದ್ ಆರ್ ಕೇನೊಂಡೆರ್.

ಈ ಪೊರ್ತುಡು ಸಂಸ್ಥೆದ ಗುರಿಕಾರೆರ್ ಬೊಕ್ಕ ಸರ್ವಸದಸ್ಯೆರ್ ಪಾಲ್ ಪಡೆದ್ ಲೇಸ್ ದ ವ್ಯವಸ್ಥೆದ ಬಗ್ಗೆ ಚರ್ಚೆ ಮಲ್ತೆರ್.

‌ಜೆಸಿಐ ಕೊಕ್ಕಡ ಕಪಿಲ ಘಟಕದ ಎಲ್ ಡಿಎಂಟಿದ ತರಬೇತಿ

ಜೆಸಿಐ ಕೊಕ್ಕಡ ಕಪಿಲ ಘಟಕದ ಮುತಾಲಿಕೆಡ್ ಫೆ.18 ಕ್ಕ್ ಜೆಸಿಐದ ಸದಸ್ಯೆರೆರ್ದ್ ಆಡಳಿತಾತ್ಮಕ ತರಬೇತಿ ಲೇಸ್ ನ್ ಜೆಸಿಐ ವಲಯದ ಉಪಾಧ್ಯಕ್ಷೆರ್ ಜೆಸಿ ಜೆ ಎಫ್ ಎಂ ಶಂಕರ್ ರಾವ್ ನಡಪಾದ್ ಕೊರಿಯೆರ್.

ಗ್ರಾಮಭ್ಯುದಯ ಕಾರ್ಯಕ್ರಮ ಅನುಷ್ಠಾನ ಸಮಿತಿ (ರಿ.) ಶಿಬರಾಜೆ ಪಾದೆ ಚಾವಡಿಡ್ ಜೆಸಿಐದ ಗುರ್ಕಾರೆ ಜೆಸಿ ಎಚ್ ಜಿ ಎಫ್ ಸಂತೋಷ್ ಜೈನ್, ಯೋಜನಾ ನಿರ್ದೇಶಕೆರ್ ಜೆಸಿಜೆ ಎಫ್ ಮ್ ಕೆ ಶ್ರೀಧರ್ ರಾವ್, ವಲಯದ ಒತ್ತು ಗುರ್ಕಾರೆ ಜೆಸಿ ಜೆ ಎಫ್ ಮ್ ಶಂಕರ್ ರಾವ್, ಕಾರ್ಯದರ್ಶಿ ಜೆಸಿ ಅಕ್ಷತ್ ರೈ, ಲೇಡಿ ಜೆಸಿ ಗುರ್ಕಾರೆ ಜೆಸಿ ಶೋಭಾ ಪಿ, ಜೂನಿಯರ್ ಜೆಸಿ ಗುರ್ಕಾರೆ ಜೆಸಿ ಹರ್ಷಿತ್ ಗೌಡ ಇತ್ತೆರ್.

ಈ ಪೊರ್ತುಡು ಜೆಸಿಐದ ಕೋಶಾಧಿಕಾರಿ ಜೆಸಿ ವಿದ್ಯೆಂದ್ರ ಯಸ್, ಒತ್ತು ಗುರ್ಕಾರೆ ಜೆಸಿ ಪಿಟಿ ಸೆಬಾಸ್ಟಿನ್, ಜೆ ಸಿ ಎಚ್ ಜಿ ಎಫ್ ಜೋಸೆಫ್ ಪಿರೇರ, ಜೆ ಸಿ ವಿಜಯಚಂದ್ರ ಬಲ್ಕಾಜೆ, ಜೆಸಿ ವಿನ್ಸೆಂಟ್ ಸುವಾರಿಸ್, ಪಂಚಾಯತ್ ಸದಸ್ಯೆರ್ ಟಿ ಎಸ್ ನಿತ್ಯಾನಂದ ರೈ, ಅರಣ್ಯ ಸಮಿತಿ ಗುರ್ಕಾರೆ ಧನಂಜಯ ಗೌಡ, ಕ್ರೀಡಾ ಸಮಿತಿ ಗುರ್ಕಾರೆ ಹರೀಶ್ ಗೌಡ, ಪ್ರಗತಿಪರ ಕೃಷಿಕೆರ್ ಬಾಬುಗೌಡ ಬೊಕ್ಕ ಸದಸ್ಯೆರ್, ಕಲ್ಪಾರ್ಥಿಲು ಪಾಲ್ ಪಡೆದಿತ್ತೆರ್.

ಈ ಲೇಸ್ ನ್ ಜೆಸಿ ಎಚ್‌ ಜಿ ಎಫ್ ಜೋಸೆಫ್ ಪಿರೇರ ಸುಧಾರಿಕೆ ಮಲ್ತೆರ್. ಶಂಕರ್ ರಾವ್ ಮೆರೆನ ಪರಿಚಯನ್ ಜೆಸಿ ಹರ್ಷಿತ್ ಗೌಡ ತೆರಿಪಾಯೆರ್. ಪ್ರಿಯ ಜೆ ಅಮೀನ್ ಅಭಿಪ್ರಾಯ ಪಟ್ಟೊಂಡೆರ್. ಜೆಸಿ ವಾಣಿನ್ ಚಂದನ ಜೈನ್ ತೆರಿಪಾಯೆರ್. ಜೆಸಿ ಎಚ್ ಜಿ ಎಫ್ ಸಂತೋಷ್ ಜೈನ್ ಎದ್ಕೊನಿಯೆರ್. ಜೆಸಿ ಅಕ್ಷತ್ ರೈ ಸೊಲ್ಮೆ ಸಂದಾಯೆರ್.

ದಮ್ಮಾಮ್ ಡ್ ವಿಶ್ವ ಕನ್ನಡ ಸಂಸ್ಕೃತಿ ಸಮ್ಮೇಳನದ ಲೆಕ್ಕೊಡು ಕಬಿಗೋಷ್ಠಿ

ದಮ್ಮಾಮ್: 17ನೇ ವಿಶ್ವ ಕನ್ನಡ ಸಂಸ್ಕೃತಿ ಸಮ್ಮೇಳನದ ಲೆಕ್ಕೊಡು ದಮ್ಮಾನ್ ದ ಸಫಾಡ್ ಇಪ್ಪುನ ಅಲ್ ಹಿನಾಬಿಲ್ ಚಾವಡಿಡ್ ಇಂಚಿಪ್ಪ ಬಹುಭಾಷಾ ಕಬಿಗೋಷ್ಠಿ ಲೇಸ್ ಗೌಜಿಡ್ ನಡತ್ಂಡ್.

ಪುಗರ್ತೆದ ಕಬಿ ಹುಸೈನ್ ಕಾಟಿಪಳ್ಳ ಮೆರೆನ ಗುರ್ಕಾರ್ಮೆಡ್ ಈ ಲೇಸ್ ನಡತ್ಂಡ್. ಯಾಕೂಬ್ ಖಾದರ್ ಗುಲ್ವಾಡಿ, ಹಿರಿಯ ಪತ್ರಕರ್ತೆರ್ ಬಶೀರ್ ಅಹ್ಮದ್ ಕಿನ್ಯಾ, ಪ್ರಭಾ ಸುವರ್ಣ ಬೊಂಬೈ, ಶಮೀಮಾ ಕುತ್ತಾರ್, ರೈಹಾನ್ ವಿ.ಕೆ ಸಚ್ಚರಿಪೇಟೆ, ಫೌಝಿಯಾ ಹರ್ಷಾದ್, ಅನಿವಾಸಿ ಕಬಿ ಆರಿಫ್ ಜೋಕಟ್ಟೆ ಮೇರ್ ಕಬಿತೆ ಓದಿಯೆರ್.

ಲೇಸ್ ಡ್ ಸಮ್ಮೇಳನದ ಸ್ವಾಗತ ಸಮಿತಿ ಮಾನಾದಿಗೆದ ಗುರ್ಕಾರೆ ಝಕಾರಿಯಾ ಜೋಕಟ್ಟೆ, ಶೇಕ್ ಕರ್ನಿರೆ, ಶಾಸಕೆರ್ ಅಶೋಕ್ ರೈ, ಪ್ರಧಾನ ಕಾರ್ಯದರ್ಶಿ ರಫೀಕ್ ಸೂರಿಂಜೆ, ಖಜಾಂಚಿ ಅಝಾಝ್ ಕೈಕಂಬ, ಕೋ ಆರ್ಡಿನೇಟರ್ ಫಾರೂಕ್ ಪಾಲ್ ಪಡೆದಿತ್ತೆರ್.

ಬೊಕ್ಕ ಕುಡ್ಲದ ಪುಗರ್ತೆದ ಗಾಯಕೆರ್ ಸಮದ್ ಗಡಿಯಾರ, ಶಮೀರ್ ಮುಲ್ಕಿ, ಫಾಯಿಝ್ ಕಾಟಿಪಳ್ಳ ಪದ್ಯ ಪಂಡೆರ್.

ಫೆ.21: ತಿಬಾರ ಕೊಡಮಣಿತ್ತಾಯ ಕ್ಷೇತ್ರಡ್ ಪೊಸ ಕೊಡಿಮರ ಸ್ಥಾಪನೆ

ಸುರತ್ಕಲ್: ತಿಬಾರ್ ದ ಶ್ರೀ ಕೊಡಮಣಿತ್ತಾಯ ಕ್ಷೇತ್ರಡ್ ಪೊಸ ಕೊಡಿಮರ ಸ್ಥಾಪನೆದ ಲೇಸ್ ಫೆ.21 ಬುದಾರ ಮಧ್ಯಾಹ್ನ 12.21 ಕ್ಕ್ ನಡಪರೆ ಉಂಡು.

ಶಿಬರೂರು ವೇದವ್ಯಾಸ ತಂತ್ರಿಲೆನ ಪೌರೋಹಿತ್ಯಡ್ ಕಟೀಲ್ ದ ಅಸ್ರಣ್ಣ ಬಂಧುಲೆನ ಸಮಕ್ಷಮಡ್ ಪೊಸ ಕೊಡಿಮರ ಸ್ಥಾಪನೆ ಆಪುಂಡು.

ಶ್ರೀ ಕ್ಷೇತ್ರ ಕಟೀಲ್ ದ ಅನುವಂಶಿಕ ಪ್ರಧಾನ ಅರ್ಚಕೆರ್ ಲಕ್ಷ್ಮೀ ನಾರಾಯಣ ಅಸ್ರಣ್ಣೆರ್ ಆಶೀರ್ವಚನ ಕೊರಿಯೆರೆ ಉಲ್ಲೆರ್.

ಈ ಲೇಸ್ ಡ್ ಸಂಸದೆರ್ ನಳಿನ್ ಕುಮಾರ್ ಕಟೀಲ್, ಶಾಸಕೆರ್ ಉಮಾನಾಥ ಕೋಟ್ಯಾನ್, ಹರಿಕೃಷ್ಣ ಪುನರೂರು, ಅಭಯಚಂದ್ರ ಜೈನ್, ಐಕಳ ಹರೀಶ್ ಶೆಟ್ಟಿ, ಕನ್ಯಾನ ಸದಾಶಿವ ಶೆಟ್ಟಿ, ಶಶಿಧರ ಶೆಟ್ಟಿ ಬರೋಡಾ, ತೋನ್ಸೆ ಆನಂದ ಶೆಟ್ಟಿ, ಕೃಷ್ಣ ಜೆ ಪಾಲೇಮಾರ್, ಮಿಥುನ್ ರೈ, ಬೋಳ ಸುಬ್ಬಯ್ಯ ಶೆಟ್ಟಿ, ದಿವಾಕರ ಶೆಟ್ಟಿ ಕೊಂಜಾಲಗುತ್ತು, ರವಿ ಶೆಟ್ಟಿ ಸಾಯಿರಾಧ, ರಾಮಚಂದ್ರ ಶೆಟ್ಟಿ ಶಿಬರೂರು ಗುತ್ತು, ಸುಧಾಕರ ಎಸ್ ಪೂಂಜ, ಮನೋಜ್ ಸರಿಪಳ್ಳ, ಯದು ನಾರಾಯಣ ಶೆಟ್ಟಿ ಕೆದಿಂಜೆ ಪರಾರಿ, ಬಿವಂಡಿ ಸಂತೋಷ್ ಶೆಟ್ಟಿ, ಸಿಎ ಉದಯ ಕುಮಾರ್ ಶೆಟ್ಟಿ, ಕಿಶೋರ್ ಎಮ್ ಶೆಟ್ಟಿ ಶಿಬರೂರುಗುತ್ತು, ಅಂಕಿತ್ ಬನ್ಸಾಲ್, ಬಾಲಕೃಷ್ಣ ಕೊಟ್ಟಾರಿ, ಲೋಕೇಶ್ ಬೊಳ್ಳಾಜೆ, ಗೀತಾ ಎಸ್ ಶೆಟ್ಟಿ ಪಾಲ್ ಪಡೆಯೆರೆ ಉಲ್ಲೆರ್.

ಶಿಬರೂರುಗುತ್ತು ಉಮೇಶ್ ಎನ್ ಶೆಟ್ಟಿ, ಎಸ್ ವಾಸುದೇವ ಶಿಬರಾಯೆರ್, ಹರ್ಷವರ್ಧನ್ ಎಸ್ ಜೆ, ಪುರಂದರ ಎಂ ಶೆಟ್ಟಿ, ಪ್ರಭಾಕರ ಶೆಟ್ಟಿ ಕೊಂಜಾಲುಗುತ್ತು ಈ ಲೇಸ್ ಗ್ ಬರಿಯೆರೆ ಉಲ್ಲೆರ್.

ಫೆ.21: ನಡಿಕುದ್ರು ಧರ್ಮದೈವ ಜಾರಂದಾಯ ದೈವೊಲ್ಯಡ್ ನೇಮ

ಮುಲ್ಕಿ: ಪೆಜಮಾಡಿ ಕೋಡಿದ ನಡಿಕುದ್ರು ಧರ್ಮದೈವ ಜಾರಂದಾಯ ದೈವೊಲ್ಯಡ್ ವರ್ಷಾಧಿದ ನೇಮ ಫೆ‌.21 ಬುದಾರ ನಡಪರೆ ಉಂಡು.

ಆನಿ ಬೊಲ್ಪುಗು ನವಕ ಕಲಶಾಭಿಷೇಕ, ನಾಗದೇವೆರೆಗ್ ಪೇರ್ ದ ಅಭಿಷೇಕ, ವಿದ್ಯಾರ್ಥಿ ವೇತನ ಪಟ್ಟುನ ಲೇಸ್, ಮಧ್ಯಾಹ್ನ ಅನ್ನ ಪ್ರಸಾದ ಸೇವೆ, ರಾತ್ರೆ ಭಂಡಾರ ಜಪ್ಪೆರೆ, ಅನ್ನ ಪ್ರಸಾದ ಸೇವೆ, ಮೈಸಂದಾಯ ನೇಮ, ಧರ್ಮದೈವ ಜಾರಂದಾಯ, ಬಂಟ ಪರಿವಾರ ದೈವೊಲೆನ ಗಡಿನಾಡು ನೇಮ ನಡಪರೆ ಉಂಡು.

ಫೆ.17 ಸನಿಯಾರ ಬೊಲ್ಪುಗು ಪಂಚಕಜ್ಜಾಯ ಸೇವೆ, ಶ್ರೀ ಜಾರಂದಾಯ ಸೇವಾ ಯುವಕ ವೃಂದದ 46ನೇ ಭಜನಾ ಮಂಗಳ ನಡತ್ಂಡ್.

ಈ ಲೇಸ್ ಡ್ ಭಕ್ತೆರ್ ಮಾತೆರ್ಲಾ ಪಾಲ್ ಪಡೆದ್, ಗಂಧ ಪ್ರಸಾದ ದೆತೊಂದು, ಶ್ರೀ ಧರ್ಮದೈವೊದ ಕೃಪೆಗ್ ಪಾತ್ರರಾವೊಡು ಪಂದ್ ಅರ್ಚಕೆರ್ ಗಂಗೆ ಬೈದೆತಿ ನಟ್ಟಿ ಸಾನದಮನೆ, ನಡಿಕುದ್ರು ಗ್ರಾಮದ ಗುರಿಕಾರೆರ್, ಪತ್ತ್ ಸಮಸ್ತೆರ್, ಶ್ರೀ ಜಾರಂದಾಯ ಸೇವಾ ಸಮಿತಿ, ಶ್ರೀ ಜಾರಂದಾಯ ಸೇವಾ ಯುವಕ ವೃಂದ, ಮಹಿಳಾ ವೃಂದ ಲೆಪ್ಪೋಲೆಡ್ ತೆರಿಪಾದೆರ್.