ಅಮೆರಿಕಡ್ ಒರಿ ಮುದಲೆದ ಮಿತ್ತ್ ಸವಾರಿ ಮಲ್ತಿನ ಭಯಾನಕ ವೀಡಿಯೋವೊಂಜಿ ಸಾಮಾಜಿಕ ಜಾಲತಾಣಡ್ ವೈರಲ್ ಆತ್ಂಡ್.
ಈ ಜನ ಮುದಲೆದ ಮಿತ್ತ್ ಆನೆ ಮಿತ್ತ್ ಸವಾರಿ ಮಲ್ತಿಲೆಕ್ಕ ಮಲ್ದೆರ್. ಮುದಲೆಲ ಎಡ್ಡೆ ಮೂಡ್‌ ಡ್ ಇತ್ತಿಲೆಕ್ಕ ಈ ಜನಕ್ಕ್ ದಾಲ ಮಲ್ಪಂದೆ ಮನಿಪಂದೆ ನೀರ್ ಗ್ ಪೋತ್ಂಡ್. ಈ ಮುದಲೆದ ಮಿತ್ತ್ ಸುರುಕ್ಕು ಕುಲ್ಲುದು ಬೊಕ್ಕ ಜೆತ್ತ್ ದ್ ಸವಾರಿ ಮಲ್ತಿನೆನ್ ವೀಡಿಯೋಡ್ ತೂವೊಲಿ. ಈ ಜನತ್ತ ಧೈರ್ಯನ್ ತೂಯಿನ ಜನ ಈ ಜನಕ್ಕ್ ದಾದತ್ಂಡ್ ಪಂದ್ ಕಾಮೆಂಟ್‌ಡ್ ಪಂತೆರ್.
ಒಡಿಪು: ತುಳುನಾಡು ರಕ್ಷಣಾ ವೇದಿಕೆ ಒಡಿಪು ತಾಲೂಕ್ ಘಟಕದ ಪೊಸ ಸದಸ್ಯೆರೆನ ಸೇರ್ಪಡೆ ಬೊಕ್ಕ ಪದಾಧಿಕಾರಿಲೆನ ಆಯ್ಕೆ ಲೇಸ್ ಕಿದಿಯೂರು ಹೋಟೆಲ್ ಡ್ ಜುಲೈ 30 ಕ್ಕ್ ಬಯ್ಯಗ್ 4 ಗಂಟೆಗ್ ನಡತ್ಂಡ್.
ಈ ಪೊರ್ತುಡು ಪಾತೆರಿನ ತುಳುನಾಡು ರಕ್ಷಣಾ ವೇದಿಕೆ ಸ್ತಾಪಕಾಧ್ಯಕ್ಷೆರ್ ಯೋಗೀಶ್ ಶೆಟ್ಟಿ ಜಪ್ಪು ಮೇರ್, ಕರ್ನಾಟಕ ರಾಜ್ಯದ ಅಧಿಕೃತ ಭಾಷೆ ಆಯೆರೆ ಒವ್ವೇ ತ್ಯಾಗಗ್ಲಾ ಕಾರ್ಯಕರ್ತೆರ್ ತಯಾರ್ ಇಪ್ಪೊಡು ಪಂದ್ ಪಂಡೆರ್. ಅಂಚೆನೆ ತುಳುನಾಡ ಅಭಿವೃದ್ಧಿ ತುಳುವೆರೆನ ಹಿತ ರಕ್ಷಣೆಗ್ ಎಪಲ ತಯಾರ್ ಇಪ್ಪುವೆ ಪಂದ್ ತೆರಿಪಾಯೆರ್.
ಒಡಿಪು ಜಿಲ್ಲಾ ವೀಕ್ಷಕೆರಾದ್ ಸಮಾಜ ಸೇವಕೆರಾಯಿನ ಫ್ರ್ಯಾಂಕಿ ಡಿಸೋಜಾ ಕೊಳಲಗಿರಿ ಮೆರೆನ್ ನೇಮಕ ಮಲ್ತೆರ್. ಈ ಪೊರ್ತುಡು ಚಿತ್ರ ನಿರ್ದೇಶಕೆರ್ ಇಸ್ಮಾಯಿಲ್ ಮುಡುಶೆಡ್ಡೆ, ತಾಲೂಕ್ ಗೌರವಾಧ್ಯಕ್ಷೆರ್ ರವಿ ಆಚಾರ್ಯ, ಸಲಹೆಗಾರೆರ್ ಸುಧಾಕರ್, ತಾಲೂಕ್ ಅಧ್ಯಕ್ಷೆರ್ ಕೃಷ್ಣ ಕುಮಾರ್, ಪ್ರಧಾನ ಕಾರ್ಯದರ್ಶಿ ಸುನಿಲ್ ಫೆರ್ನಾಂಡಿಸ್, ಉಪಾಧ್ಯಕ್ಷೆರ್ ಜಯರಾಮ್ ಪೂಜಾರಿ, ಗಣೇಶ್ ಮಲ್ಯ, ಮಾಧ್ಯಮ ಕಾರ್ಯದರ್ಶಿ ರೋಷನ್ ಡಿಸೋಜ, ಯುವ ಘಟಕ ಅಧ್ಯಕ್ಷೆರ್ ರಾಹುಲ್, ಮಹಿಳಾ ಅಧ್ಯಕ್ಷೆ ಶೋಭಾ ಪಾಂಗಳ, ಮಹಿಳಾ ಘಟಕ ಪ್ರಧಾನ ಕಾರ್ಯದರ್ಶಿ ನಾಗಲಕ್ಷ್ಮಿ, ಸಾಂಸ್ಕೃತಿಕ ಕಾರ್ಯದರ್ಶಿ ವಿಜಯಲಕ್ಷ್ಮಿ ಇತ್ತೆರ್. ಪೊಸ ಸದಸ್ಯೆರೆಗ್ ಅಧಿಕೃತವಾದ್ ಸಾಲ್ ಪಾಡುನ ಮುಖೇನ ಸಂಘಟನೆಗ್ ಸೇರ್ಸಾಯೆರ್.
ಬಂಟ್ವಾಳ: ಬೈಕ್ ಗ್ ಖಾಸಗಿ ಬಸ್ ಗುದ್ದುದು ಬೈಕ್ ಸವಾರೆ ತೀರ್ ಪೋಯಿನ ಘಟನೆ ಕಲ್ಲಡ್ಕಡ್ ಕೋಡೆ ಬಯ್ಯಗ್ ನಡತ್ಂಡ್.
ಕಲ್ಲಡ್ಕ ಗೋಳ್ತಮಜಲು ಮುರಬೈಲು ನಿವಾಸಿ ಲತೀಶ್ ತೀರ್ ಪೋಯಿನಾರ್.
ಕುಡ್ಲಡ್ ಮ್ಯೆಕಾನಿಕ್ ಆದ್ ಬೇಲೆ ಮಲ್ತೊಂದು ಇತ್ತಿನ ಮೇರ್, ಐತಾರ ರಜೆತ್ತ ದಿನವಾಯಿನೆರ್ದಾವೆರ ಬೊಲ್ಪುಗು ಪಣೋಲಿಬೈಲ್ ಗ್ ಪೋದು ಇಲ್ಲಗ್ ವಾಪಸ್ ಆನಗ ಕಲ್ಲಡ್ಕಡ್ ಈ ಘಟನೆ ನಡತ್ ದ್ಂಡ್.
ಕಲ್ಲಡ್ಕರ್ದ್ ವಿಟ್ಲ ಮಾರ್ಗಡ್ ಪೋಪುನ ಪೊರ್ತುಡು ವಿಟ್ಲರ್ದ್ ಭಾರೀ ಬಿರ್ಸ್ ಡ್ ಬರೊಂದು ಇತ್ತಿನ ಸೆಲಿನಾ ಖಾಸಗಿ ಬಸ್ ಬೈಕ್ ಗ್ ಗುದ್ದುಂಡು. ಉಂದು ಗುದ್ದಿನ ಬಿರ್ಸ್ ಗ್ ಲತೀಶ್ ಮೆರೆಗ್ ಮಸ್ತ್ ಪೆಟ್ಟಾತ್ಂಡ್. ಮೆರೆನ್ ಕೂಡ್ಲೆ ಕುಡ್ಲ ಖಾಸಗಿ ಆಸ್ಪತ್ರೆಗ್ ದಾಖಲ್ ಮಲ್ದೆರ್. ಚಿಂತಾಜನಕ ಸ್ಥಿತಿಡ್ ಇತ್ತಿನ ಮೆರೆಗ್ ಐಸಿಯು ಘಟಕಡ್ ಚಿಕಿತ್ಸೆ ಕೊರ್ತೆರ್. ಆಂಡ ಲತೀಶ್ ಬಯ್ಯಗ್ ಚಿಕಿತ್ಸೆ ಫಲಕಾರಿ ಆವಂದೆ ತೀರ್ ಪೋತೆರ್. ಟ್ರಾಫಿಕ್ ಎಸ್. ಐ.ಸುತೇಶ್ ಜಾಗೆಗ್ ಭೇಟಿ ಕೊರ್ದು, ಕೇಸ್ ದಾಖಲ್ ಮಲ್ದೆರ್.
ಮಿಜಾರ್ ತುಳುನಾಡ ಪೊರ್ಲು ಚಾರಿಟೇಬಲ್ ಟ್ರಸ್ಟ್ (ರಿ.) ವತಿರ್ದ್ ಒಂಜಿ ಬಡಪತ್ತ್ ದ ಕುಟುಂಬಗ್ ಪನವುದ ಸಕಾಯ ಮಲ್ತೆರ್.
ಬೆದ್ರ ಬಿರಾವು ನಿವಾಸಿ ಆಯಿನ ಪ್ರಥ್ವಿ ಪ್ರಸಾದ್ ಮೇರ್ ಲ್ಯೂಕೆಮಿಯಾ (ನೆತ್ತೆರ್ ದ ಕ್ಯಾನ್ಸರ್) ಸೀಕ್ ಡ್ ಕುಡ್ಲದ (ಕೃಷ್ಣ ನರ್ಸಿಂಗ್ ಹೋಮ್) ಆಸ್ಪತ್ರೆಡ್ ಚಿಕಿತ್ಸೆ ಪಡೆವೊಂದು ಇತ್ತೆರ್. ಮುಲ್ಪ ಚಿಕಿತ್ಸೆ ಫಲಕಾರಿ ಆವಂದೆ ತೀರ್ ಪೋಯೆರ್. ಮೆರೆನ ಚಿಕಿತ್ಸೆಗಾದ್ ಇಲ್ಲದಕುಲು ಸಾಲ ಮಲ್ತಿನೆರ್ದಾವೆರ ತುಳುನಾಡ ಪೊರ್ಲು ಚಾರಿಟೇಬಲ್ ಟ್ರಸ್ಟ್ ಗ್ ಬಿನ್ನಾಪು ಮಲ್ತ್ ದ್ ಇತ್ತೆರ್. ಈ ಬಿನ್ನಾಪುಗ್ ಸ್ಪಂದಿಸಾಯಿನ ಈ ಕೂಟ 15 ಸಾರ ರೂ.ನ್ ದಕ್ಷಿಣ ಕನ್ನಡ ಬಿಜೆಪಿದ ಜಿಲ್ಲಾಧ್ಯಕ್ಷೆರ್ ಸುದರ್ಶನ್ ಎಂ ಬೆದ್ರ ಮೆರೆನ ಮುಖೇನ ಅಯ್ಯಪ್ಪ ಮಂದಿರ ಮಾರಿಗುಡಿ ಬೆದ್ರಡ್ ಸಹಾಯಧನದ ಚೆಕ್ ನ್ ಕೊರಿಯೆರ್.
ಈ ಪೊರ್ತುಡು ಕೂಟದ ಪದಾಧಿಕಾರಿಲು ಬೊಕ್ಕ ಪನವುದ ಸಕಾಯ ಮಲ್ತಿನಕುಲು ಇತ್ತೆರ್.
ಮುಲ್ಕಿ: ಪತ್ರಕರ್ತೆರೆಗ್ ಪ್ರತಿಯೊಂಜಿ ಎಲ್ಯ ವಿಷಯದ ಮಿತ್ತ್ ಗೇನ ಕೊರ್ಪಿನ ಸೂಕ್ಷ್ಮದೃಷ್ಟಿ ಬೋಡು. ಅಂಚಿನ ಎಲ್ಯ ವಿಷಯೊಡ್ಲ ರಾಜ್ಯ ಮಟ್ಟದ ವರದಿ ಮಲ್ತ್ ದ್ ಪುದರ್ ಪಡೆವೊಲಿ ಪಂದ್ ಕಾಪು ತಾಲೂಕು ಪತ್ರಕರ್ತೆರ್ನ ಅಧ್ಯಕ್ಷೆರ್ ಎಚ್ಕೆ ಹೆಜ್ಮಾಡಿ ಪಂಡೆರ್.
ಆರ್ ಮುಲ್ಕಿದ ಪುನರೂರು ಟೂರಿಸ್ಟ್ ಹೋಮ್ ದ ಚಾವಡಿಡ್ ಸನಿವಾರ ಮುಲ್ಕಿ ಪ್ರೆಸ್ ಕ್ಲಬ್ ಮುತಾಲಿಕೆಡ್ ನಡತಿನ ಪತ್ರಿಕಾದ ದಿನಾಚರಣೆಡ್ ಸಾಧಕೆರ್ನ ನಿಲೆಟ್ಟ್ ಮಾನಾದಿಗೆ ದೆತೊಂದು ಪಾತೆರಿಯೆರ್.
ಮುಲ್ಕಿ ನಗರ ಪಂಚಾಯತ್ ಮುಖ್ಯಾಧಿಕಾರಿ ಎನ್.ಎಂ.ಮೇಸ್ತ ಲೇಸ್ ದ ಗುರ್ಕಾರ್ಮೆ ಒಯಿಸೊಂಡೆರ್.
ಮಲ್ಲ ಬಿನ್ನೆರಾದ್ ಬತ್ತಿತ್ತಿನ ಹಿರಿಯ ಪತ್ರಕರ್ತೆರ್, ತುಳು ಕನ್ನಡ ಬರವುಗಾರೆರ್ ಕೆ.ಎಲ್.ಕುಂಡಂತಾಯ ಮೇರ್ ಪತ್ರಿಕಾ ದಿನತ್ತ ಎಡ್ಡೆಪ್ಪು ಬಯಕ್ ದ್ ಪತ್ರಕರ್ತೆರೆಗ್ ಆಶೀರ್ವಾದದ ಮದಿಪು ಮದಿತೆರ್.
ಪುನರೂರು ಪ್ರತಿಷ್ಠಾನದ ಅಧ್ಯಕ್ಷೆರ್ ದೇವಪ್ರಸಾದ್ ಎಚ್.ಪುನರೂರು ಮೇರ್ ಪಾತೆರ್ದ್, ಪತ್ರಕರ್ತೆರೆಗ್ ಸಮಾಜೊಡು ಮಲ್ಲ ಶಕ್ತಿ ಬೊಕ್ಕ ಜಬದಾರಿ ಉಂಡು. ಆ ಶಕ್ತಿನ್ ಸಮಾಜದ ಎಡ್ಡೆಪ್ಪುಗಾದ್ ಗಲಸ್ ಲೆ ಪಂದ್ ಪಂಡೆರ್.
ಲೇಸ್ ಡ್ ಹೊಸ ಅಂಗಣ ಸಂಪಾದಕೆರ್ ಡಾ.ಹರಿಶ್ಚಂದ್ರ ಸಾಲ್ಯಾನ್, ಲಯನ್ಸ್ ಇನ್ ಸ್ಪೈರ್, ಬಪ್ಪನಾಡು ಅಧ್ಯಕ್ಷೆರ್ ವೆಂಕಟೇಶ್ ಹೆಬ್ಬಾರ್ , ಉಪಾಧ್ಯಕ್ಷೆರ್ ಸುಧೀರ್ ಬಾಳಿಗ, ವಕೀಲೆರ್ ರವೀಶ್ ಕಾಮತ್ ಮೊಕುಲು ಮಾತ ಇತ್ತೆರ್.
ಮುಲ್ಕಿ ಪ್ರೆಸ್ ಕ್ಲಬ್ ಅಧ್ಯಕ್ಷೆರ್ ನಿಶಾಂತ್ ಕಿಲೆಂಜೂರು ಬಿನ್ನೆರೆನ್ ಎದ್ಕೊಂಡೆರ್. ಕೋಶಾಧಿಕಾರಿ ರಘುನಾಥ ಕಾಮತ್ ದೇವೆರೆನ್ ಸುಗಿತೆರ್. ಕಾರ್ಯದರ್ಶಿ ಪ್ರಕಾಶ್ ಸುವರ್ಣ ಸೊಲ್ಮೆ ಸಂದಾಯೆರ್. ಹಿರಿಯ ಪತ್ರಕರ್ತೆರ್ ಶರತ್ ಶೆಟ್ಟಿ ಲೇಸ್ ಸುಧಾರಿಕೆ ಮಲ್ತೆರ್.
ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಅಂತರಾಷ್ಟ್ರೀಯ ಪಿಲಿ ಸಂರಕ್ಷಣೆ ದಿನತ್ತ ಇಸೇಸ ಪಾತೆರಕತೆ ಜು.29 ಕ್ಕ್ ಸನಿಯಾರ ಬಯ್ಯಗ್ 6 ಗಂಟೆಗ್ ಪ್ರಸಾರ ಆಂಡ್.
ಈ ಲೇಸ್ ಡ್ ವನ್ಯಜೀವಿ ಸ್ನೇಹಿ ಬೊಕ್ಕ ಸಿವಿಲ್ ಎಂಜಿನಿಯರ್ ಕೆ.ಹರೀಶ್ ಕುಮಾರ್ ಒಡಿಪು ಮೇರ್ ಪಿಲಿ ಸಂರಕ್ಷಣೆದ ಮಹತ್ವ ಬೊಕ್ಕ ಪಿಲಿತ್ತ ಬಗೆಟ್ಟ್ ಪೊಲಬು ಕೊರಿಯೆರ್. ಜು.30 ಕ್ಕ್ ಮಧ್ಯಾಹ್ನ 2 ಗಂಟೆಗ್ ಕುಡೊರ ಪ್ರಸಾರ ಆಪುಂಡು ಪಂದ್ ಮಣಿಪಾಲ ಮಾಹೆದ ಮಣಿಪಾಲ್ ಇನ್ಸ್ಟಿಟ್ಯೂಟ್ ಆಫ್ ಕಮ್ಯುನಿಕೇಶನ್ ಕ್ಯಾಂಪಸ್ ಡ್ ಇಪ್ಪುನ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರಡ್ ಸಹಾಯಕ ಪ್ರಾಧ್ಯಾಪಕೆರ್ ಬೊಕ್ಕ ಸಂಯೋಜಕೆರ್ ಡಾ.ರಶ್ಮಿ ಅಮ್ಮೆಂಬಳ ಪ್ರಕಟಣೆಡ್ ತೆರಿಪಾದೆರ್.
ಸ್ಯಾಂಡಲ್ ವುಡ್ ನಟೆ ಕಿಚ್ಚ ಸುದೀಪ್ ಇನಿ ತಿರುಪತಿ ದೇವಲ್ಯಗ್ ಭೇಟಿ ಕೊರ್ದು, ದರ್ಶನ ಪಡೆತೆರ್.
ಮೇರ್ K-46 ಪಿಚ್ಚರ್ ಸುರು ಮಲ್ಪುನ ದುಂಬು ತಿರುಪತಿ ದೇವೆರೆನ ದರ್ಶನ ಪಡೆಯೆರೆ ಬೈದೆ ಪಂದ್ ಪಂಡೆರ್. ಈ ಪಿಚ್ಚರ್ ದ ಶೂಟಿಂಗ್ 70 ದಿನತ್ತ ಕಾಲ ಮಹಾಬಲಿಪುರಂಡ್ ನಡಪರೆ ಉಂಡು. ಇಂಚಿಪ್ಪ ಈ ಪಿಚ್ಚರ್ ದ ಟೀಸರ್ ದ ಬುಡುಗಡೆ ಆತ್ಂಡ್.
ಜಾರ್ಖಂಡ್: ಮೊಹರಂ ಮೆರವಣಿಗೆ ಪೊರ್ತುಡು ಕರೆಂಟ್ ಶಾಕ್ ಹಾಕ್ ದ್ ನಾಲ್ ಜನ ತೀರ್ ಪೋದ್, 10 ಜನಕ್ಕ್ ಪೆಟ್ಟಾಯಿನ ಘಟನೆ ಜಾರ್ಖಂಡ್ ದ ಬೊಕಾರೊ ಜಿಲ್ಲೆದ ಪೀಟರ್ ವಾರ್ ಬ್ಲಾಕ್ ದ ಖೆಟ್ಕೊ ಗ್ರಾಮಡ್ ನಡತ್ಂಡ್.
ಇನಿ ಬೊಲ್ಪುಗು ಸುಮಾರ್ 6 ಗಂಟೆಗ್ ಮೊಹರಂ ಮೆರವಣಿಗೆ ಸುರು ಆತ್ಂಡ್. ಈ ಮೆರವಣಿಗೆಡ್ ಕೊನೊಂದು ಇತ್ತಿನ ಧ್ವಜ 11,000 ವೋಲ್ಟ್ ಹೈ-ಟೆನ್ಶನ್ ಕರೆಂಟ್ ವೈರ್ ಗ್ ತಾಗ್ ದ್ ಈ ಘಟನೆ ನಡತ್ ದ್ಂಡ್. ನೆರ್ದ್ ಪೆಟ್ಟಾಯಿನಕ್ಲೆನ್ ಕೈತಲ್ ದ ಆಸ್ಪತ್ರೆಗ್ ದಾಖಲ್ ಮಲ್ದ್ಂಡ್ ಪಂದ್ ಪೊಲೀಸ್ ಅಧಿಕಾರಿಲು ತೆರಿಪಾದೆರ್.
ಜಾಗೆಗ್ ಬತ್ತಿನ ಬೊಕಾರೊದ ಪೊಲೀಸ್ ವರಿಷ್ಠಾಧಿಕಾರಿ ಪ್ರಿಯದರ್ಶಿ ಅಲೋಕ್ ಮೇರ್ ಈ ಬಗೆಟ್ಟ್ ತನಿಖೆ ನಡಪಾದೆರ್. ಈ ಘಟನೆದ ಬಗ್ಗೆ ವರದಿ ದೆತೊಂದ ಪಂದ್ ಪಂಡೆರ್.
ಡೆಲ್ಲಿ: 11 ಜನ ಮಹಿಳಾ ಪೌರಕಾರ್ಮಿಕೆರ್ ಸೇರ್ದ್ ದೆತೊನ್ನ ಲಾಟರಿ ಟಿಕೆಟ್ಗ್ 10 ಕೋಟಿ ಕಾಸ್ ಬೈದ್ಂಡ್. ಈ ಕಾಸ್ ಮಲಪ್ಪುರಂ ಜಿಲ್ಲೆದ ಪರಪ್ಪನಂಗಡಿ ನಗರಸಭೆತ್ತ 11 ಜನ ಮಹಿಳಾ ಪೌರ ಕಾರ್ಮಿಕೆರೆಗ್ ತಿಕ್ ದ್ಂಡ್.
ಹರಿತ ಕರ್ಮ ಸೇನೆದ ಕಾರ್ಯಕರ್ತೆರ್ ಒಟ್ಟಾದ್ ಕಾಸ್ ಸಂಗ್ರಹ ಮಲ್ಪುನ ಮುಖೇನ ಮಾನ್ಸೂನ್ ಲಾಟರಿ ಬಂಪರ್ ಟಿಕೆಟ್ ನ್ ಒರಿಯೊರಿ 25 ರೂ. ಒಟ್ಟು ಮಲ್ತ್ ದ್ ಟಿಕೆಟ್ ದೆತೊಂದೆರ್. ಕುಟ್ಟಿಮಾಲು, ಬೇಬಿ, ಶೋಭಾ, ಪಾರ್ವತಿ, ರಾಧಾ, ಲಕ್ಷ್ಮಿ, ಲೀಲಾ, ಬಿಂದು, ಶೀಜಾ, ಚಂದ್ರಿಕಾ ಬೊಕ್ಕ ಕಾರ್ತ್ಯಾಯನಿ ಮಾನ್ಸೂನ್ ಬಂಪರ್ ದ ಸುರುತ್ತ ಇನಾಮು ಪಡೆಯಿನಕುಲು.
MB 200261 ನಂಬರ್ದ ಸುರುತ್ತ ಇನಾಮು 10 ಕೋಟಿ ರೂ. ಮೊಕ್ಲೆಗ್ ತಿಕ್ ದ್ಂಡ್. ಪಾಲಕ್ಕಾಡ್ ನ್ಯೂ ಸ್ಟಾರ್ ಲಾಟರಿ ಸುರುತ್ತ ಇನಾಮುದ ಟಿಕೆಟ್ ನ್ ಮಾರಾಟ ಮಲ್ದ್ಂಡ್. ಮಲಪ್ಪುರಂದ ಕುಟ್ಟಿಪುರಂಡ್ ಮಣಿ ಪನ್ಪುನ ಏಜೆಂಟ್ ಮುಖೇನ ಟಿಕೆಟ್ ಮಾರಾಟ ಮಲ್ತ್ ದ್ ಇತ್ತೆರ್. ಈ ಕಾಸ್ ಡ್ ತೆರಿಗೆ ಬೊಕ್ಕ ಏಜೆಂಟ್ ಕಮಿಷನ್ ದೆತ್ತ್ ದ್ ಒರಿನ ದುಡ್ಡುನು ಅಕ್ಲೆನ ಅಕೌಂಟ್ ಗ್ ಪಾಡುವೆರ್ ಪಂದ್ ತೆರಿದ್ ಬೈದ್ಂಡ್.
ಕುಡ್ಲ: ಅಮಲ್ ಸೊತ್ತು ಎಂಡಿಎಂಎನ್ ಕಾರ್ ಡ್ ದೀದ್ ಮಾರೊಂದು ಇತ್ತಿನ ಆರೋಪಿನ್ ಕುಡ್ಲ ಸಿಸಿಬಿ ಪೊಲೀಸೆರ್ ಅರೆಸ್ಟ್ ಮಲ್ದೆರ್.
ಬೋಳಿಯಾರು ಗ್ರಾಮದ ಆರೀಫ್ (28) ಅರೆಸ್ಟ್ ಆಯಿನ ಆರೋಪಿ. ಆಯಡ ಇತ್ತಿನ 25 ಗ್ರಾಂ ತೂಕದ 1,25,000 ರೂ. ಬಿಲೆತ್ತ ಎಂಡಿಎಂಎ, ಮಾರುತಿ ಅಲ್ಟೋ 800 ಕಾರ್, ಮೊಬೈಲ್ ಫೋನ್, ಡಿಜಿಟಲ್ ತೂಕ ಮಾಪನನ್ ವಶಕ್ಕ್ ಪಡೆತೆರ್. ನೆತ್ತ ಬಿಲೆ ಒಟ್ಟು 6,35,500 ರೂ. ಆವು ಪಂದ್ ಅಂದಾಜಿ ಮಲ್ದೆರ್. ಈ ಬಗೆಟ್ಟ್ ಕೊಣಾಜೆ ಪೊಲೀಸ್ ಠಾಣೆಡ್ ಕೇಸ್ ದಾಖಲ್ ಆತ್ಂಡ್.
ಈ ಕಾರ್ಯಾಚರಣೆಡ್ ಸಿಸಿಬಿ ಘಟಕದ ಇನ್‌ಸ್ಪೆಕ್ಟರ್ ಶ್ಯಾಮ್ ಸುಂದರ್ ಹೆಚ್‌ಎಂ, ಎಸ್ಸೈ ರಾಜೇಂದ್ರ ಬಿ., ಸುದೀಪ್ ಎಂವಿ, ಶರಣಪ್ಪ ಭಂಡಾರಿ ಬೊಕ್ಕ ನರೇಂದ್ರ ಇತ್ತೆರ್.
