ಅಂಡಮಾನ್ ನಿಕೋಬಾರ್ ಡ್ 5.0 ಬಿರ್ಸ್ ದ ಭೂಕಂಪ
ಕೇಂದ್ರಾಡಳಿತ ಪ್ರದೇಶವಾಯಿನ ಅಂಡಮಾನ್ ಬೊಕ್ಕ ನಿಕೋಬಾರ್ ಡ್ ಇನಿ ಬೊಲ್ಪುಗು 5.0 ಬಿರ್ಸ್ ದ ಭೂಕಂಪ ಆತ್ಂಡ್.
ಈ ಭೂಕಂಪ 10 ಮೀ ಅಡಿಟ್ಟ್ ಕೇಂದ್ರೀಕೃತ ಆತ್ಂಡ್ ಪಂದ್ ಭೂಕಂಪನ ಕೇಂದ್ರ ತೆರಿಪಾದ್ಂಡ್. ನೆರ್ದ್ ಒವ್ವೇ ತೊಂದರೆ ಆತಿಜಿ ಪಂದ್ ತೆರಿದ್ ಬೈದ್ಂಡ್.
Tulu News
ಆ.6: ತೋಕೂರು ಶ್ರೀ ಸುಬ್ರಹ್ಮಣ್ಯ ಮಹಾಗಣಪತಿ ಸ್ಪೋರ್ಟ್ಸ್ ಕ್ಲಬ್ ದ ಚಾವಡಿಡ್ ಆಟಿದ ನೆಂಪು ಲೇಸ್
ಕುಡ್ಲ ನೆಹರು ಯುವ ಕೇಂದ್ರ ಬೊಕ್ಕ ತೋಕೂರು ಶ್ರೀ ಸುಬ್ರಹ್ಮಣ್ಯ ಮಹಾಗಣಪತಿ ಸ್ಪೋರ್ಟ್ಸ್ ಕ್ಲಬ್ (ರಿ.) ಮೊಕ್ಲೆನ ಒಟ್ಟುಸೇರಿಗೆಡ್ ಆಟಿದ ನೆಂಪು 2023 ಲೇಸ್ ಆ.6 ಐತಾರ ಸ್ಪೋರ್ಟ್ಸ್ ಕ್ಲಬ್ ದ ಚಾವಡಿಡ್ ನಡಪರೆ ಉಂಡು.
ಈ ಕೂಟದ ಉದಿಪನನ್ ಕುಡ್ಲ ನೆಹರು ಯುವ ಕೇಂದ್ರದ ಆಡಳಿತಾಧಿಕಾರಿ ಜಗದೀಶ್ ಕೆ., ಮಲ್ಪರೆ ಉಲ್ಲೆರ್. ಕುಡ್ಲ ಕರ್ಮಚಾರಿ ಯೂನಿಯನ್ ಸಂಘ ಎಮ್ ಆರ್ ಪಿಎಲ್, ಒಎನ್ ಜಿಸಿದ ಗುರ್ಕಾರ್ಲು ನಿತಿನ್ ಎಚ್.ಯು ಲೇಸ್ ದ ಗುರ್ಕಾರ್ಮೆನ್ ಒಯಿಸೊನ್ವೆರ್. ಎಂಆರ್ ಪಿಎಲ್ ನಿವೃತ್ತ ಮಹಾಪ್ರಬಂಧಕೆರ್ ವೀಣಾ ಟಿ.ಶೆಟ್ಟಿ ಆಟಿದ ಮದಿಪು ಕೊರಿಯೆರೆ ಉಲ್ಲೆರ್ ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.
ಹಳೆಯಂಗಡಿ ಶ್ರೀ ವಿದ್ಯಾ ವಿನಾಯಕ ಯುವಕ ಮಂಡಲದ ವರ್ಷದ ಸಭೆ, ಪೊಸ ಪದುಕೆರೆನ ಆಯ್ಕೆ
ಹಳೆಯಂಗಡಿ: ಕರ್ನಾಟಕ ರಾಜ್ಯ ಪ್ರಶಸ್ತಿ ಪಡೆಯಿನ ಹಳೆಯಂಗಡಿ ಶ್ರೀ ವಿದ್ಯಾ ವಿನಾಯಕ ಯುವಕ ಮಂಡಲ (ರಿ.) ನೆತ್ತ ಮುತಾಲಿಕೆಡ್ ವರ್ಷದ ಸಭೆ ಜುಲೈ 30 ಕ್ಕ್ ಯುವಕ ಮಂಡಲದ ಚಾವಡಿಡ್ ಮಂಡಲದ ಅಧ್ಯಕ್ಷೆರ್ ಯತೀಶ್ ಕೋಟ್ಯಾನ್ ಮೆರೆನ ಗುರ್ಕಾರ್ಮೆಡ್ ನಡತ್ಂಡ್.
ಈ ಲೇಸ್ ದ ಚಾವಡಿಡ್ ಮಂಡಲದ ಪ್ರಧಾನ ಕಾರ್ಯದರ್ಶಿ ಸುಧಾಕರ ಆರ್ ಅಮೀನ್, ಕೋಶಾಧಿಕಾರಿ ಧನಂಜಯ ಕದ್ರಿತೋಟ, ಸಲಹಾ ಸಮಿತಿದ ಅಧ್ಯಕ್ಷೆರ್ ಮೋಹನ್ ಬಂಗೇರ ಬೊಕ್ಕ ಟ್ರಸ್ಟ್ ದ ಪ್ರಧಾನ ಕಾರ್ಯದರ್ಶಿ ಸ್ಟ್ಯಾನಿ ಡೀ ಕೋಸ್ಟ ಇತ್ತೆರ್.
ಸುವರ್ಣ ಮಹಾ ಉಚ್ಚಯ ಸಮಿತಿದ ಪ್ರಧಾನ ಕಾರ್ಯದರ್ಶಿ ರಾಮದಾಸ್ ಪಾವಂಜೆ ಪ್ರಾರ್ತನೆ ಮಲ್ತೆರ್. ಮಂಡಲದ ಪ್ರಧಾನ ಕಾರ್ಯದರ್ಶಿ ಸುಧಾಕರ ಆರ್ ಅಮೀನ್ ಎದ್ಕೊನಿಯೆರ್. 2022-23 ನೇ ಸಾಲ್ ದ ವಾರ್ಷದ ವರದಿನ್ ಓದಿಯೆರ್.
ಮಂಡಲದ ಕೋಶಾಧಿಕಾರಿ ಧನಂಜಯ ಕದ್ರಿತೋಟ 2022-23ನೇ ಸಾಲ್ ದ ವರ್ಷದ ಆಯ-ವ್ಯಯ ಪಟ್ಟಿ ಬೊಕ್ಕ ಲೆಕ್ಕ ಪರಿಶೋಧಕೆರೆನ ವರದಿನ್ ಓದಿಯೆರ್. ಮಂಡಲದ ಸುವರ್ಣ ಮಹಾ ಉಚ್ಚಯ ಬೊಕ್ಕ ಟ್ರಸ್ಟ್ ದ ರಜತ ಮಹಾ ಉಚ್ಚಯ ಲೇಸ್ ಒಟ್ಟಾದ್ ನಡಾಪುನ ಬಗೆಟ್ಟ್ ಚರ್ಚೆ ಮಲ್ತ್ ದ್ ಸರ್ವೆರೆನ ಸಹಕಾರಗ್ ಬಿನ್ನಾಪು ಮಲ್ತೆರ್.
ಈ ಪೊರ್ತುಡು 2023-24 ನೇ ಸಾಲ್ ದ ಪೊಸ ಪದಾಧಿಕಾರಿಲೆನ್ ಬೊಕ್ಕ ಕಾರ್ಯಕಾರಿ ಸಮಿತಿದ ಸದಸ್ಯೆರೆನ್ ಆಯ್ಕೆ ಮಲ್ಪುನ ಪ್ರಕ್ರಿಯೆನ್ ಟ್ರಸ್ಟ್ ದ ಪ್ರಧಾನ ಕಾರ್ಯದರ್ಶಿ ಸ್ಟ್ಯಾನಿ ಡೀ ಕೋಸ್ಟ ಮೇರ್ ಮಲ್ತೆರ್. ಯುವಕ ಮಂಡಲದ ಕಾರ್ಯಕಾರಿ ಸಮಿತಿಗ್ ಒಟ್ಟು 21 ಸದಸ್ಯೆರೆನ್ ಆಯ್ಕೆ ಮಲ್ತೆರ್. ಸಲಹಾ ಸಮಿತಿಗ್ ಟ್ರಸ್ಟ್ ದ ಪ್ರಧಾನ ಕಾರ್ಯದರ್ಶಿನ್ ಸೇರ್ಸಾದ್ 16 ಜನತ್ತ ಸಲಹಾ ಸಮಿತಿನ್ ರಚನೆ ಮಲ್ತೆರ್.
ಮಂಡಲಡ್ ಇತ್ತೆ ನಡಪುನ ಬೊಕ್ಕ ನನ ನಡಪರೆ ಇಪ್ಪುನ ಲೇಸ್ ದ ಬಗೆಟ್ಟ್, ಕಟ್ವಾನದ ಆಯವ್ಯಯದ ಬಗೆಟ್ಟ್ ಸಭೆ ನಡಪಾದ್ ಇಸೇಸ ಮಹಾಸಭೆ ನಡಪಾವುನ ಬಗೆಟ್ಟ್ ಅನುಮೋದನೆ ಪಡೆಯೆರ್. ಬೊಕ್ಕ ಬೇತೆ ಸುಮಾರ್ ಇಸಯದ ಬಗೆಟ್ಟ್ ಚರ್ಚೆ ಮಲ್ತೆರ್.
ಯುವಕ ಮಂಡಲದ ಹಿರಿಯ, ಕಿರಿಯ ಸದಸ್ಯೆರ್, ಟ್ರಸ್ಟಿಲು ಎಚ್ಚದ ಸಂಖ್ಯೆಡ್ ಪಾಲ್ ಪಡೆದ್, ಸಲಹೆ, ಸೂಚನೆ, ಅನುಮೋದನೆನ್ ಕೊರಿಯೆರ್. ಮಂಡಲದ ಸಹೋದರಿ ಸಂಸ್ಥೆ ಯುವತಿ ಬೊಕ್ಕ ಮಹಿಳಾ ಮಂಡಲದ ಪದಾಧಿಕಾರಿಲು, ಸದಸ್ಯೆರ್ ಈ ಸಭೆಟ್ಟ್ ಪಾಲ್ ಪಡೆದಿತ್ತೆರ್.
2023-24 ನೇ ಸಾಲ್ ದ ಪೊಸ ಕಾರ್ಯಕಾರಿ ಸಮಿತಿ ಬೊಕ್ಕ ಪದುಕೆರ್ನ ಪೊಲಬು:
ಯುವಕ ಮಂಡಲದ ಅಧ್ಯಕ್ಷೆರಾದ್ ನಾಗೇಶ್ ಟಿ. ಜಿ, ಉಪಾಧ್ಯಕ್ಷೆರಾದ್ ಧನಂಜಯ ಕದ್ರಿತೋಟ, ಪ್ರಧಾನ ಕಾರ್ಯದರ್ಶಿ ಹಿಮಕರ ಕೋಟ್ಯಾನ್, ಜತೆ ಕಾರ್ಯದರ್ಶಿ ಪ್ರಾಣೇಶ್ ರಾವ್, ಕೋಶಾಧಿಕಾರಿ ಹನುಮಂತ ಡಿ ಪೂಜಾರ್ ರಾಮನಗರ, ಸಾಂಸ್ಕೃತಿಕ ಕಾರ್ಯದರ್ಶಿ ಲೋಕೇಶ್ ಚಿಲಿಂಬಿ, ಕ್ರೀಡಾ ಕಾರ್ಯದರ್ಶಿ ತಾರಾನಾಥ ಹಳೆಯಂಗಡಿ ಮೊಕುಲು ಅಜತ್ತ್ ಬತ್ತೆರ್.
ಅಂಚೆನೆ ಕಾರ್ಯಕಾರಿ ಸಮಿತಿಗ್ ಯತೀಶ್ ಕೋಟ್ಯಾನ್, ಸುಧಾಕರ ಆರ್ ಅಮೀನ್, ಮೋಹನ್ ಅಮೀನ್, ನಿಶಾಂತ್ ಕೊಪ್ಪಲ, ದಾಮೋದರ ಗೊಳಿದಡಿ, ಶಿವಪ್ರಸಾದ್ ಕೊಪ್ಪಲ, ಆಕಾಂಕ್ಷ ಎಂ ಅಂಚನ್ ಪಾವಂಜೆ, ಪ್ರಶಾಂತ್ ದೇವಾಡಿಗ, ರಾಜೇಶ್ ಚಿಲಿಂಬಿ, ಲಿಖಿತ್ ಕೊಪ್ಪಳ, ಭಾಸ್ಕರ ದೇವಾಡಿಗ ಪಾವಂಜೆ, ಕೇಶವ ಕಾಮತ್, ನಿಖಿಲ್ ಶೇಖರ್ ಪೂಜಾರಿ, ಮಲ್ಲೇಶ್ ಇಂದಿರಾನಗರ ಅಜತ್ ಬತ್ತೆರ್.
ಸಲಹಾ ಸಮಿತಿಗ್ ಅಧ್ಯಕ್ಷೆರಾದ್ ಮೋಹನ್ ಬಂಗೇರ, ಎಸ್. ಎಚ್. ಶೆಟ್ಟಿಗಾರ್, ಆಶೋಕ್ ಪಾವಂಜೆ, ಉಮೇಶ್ ಪಡು ಪಣಂಬೂರು, ರಾಮದಾಸ್ ಪಾವಂಜೆ, ಸೋಮಶೇಖರ ಜೋಕಟ್ಟೆದ ಪಡುತೋಟ, ನಾರಾಯಣ ರಾವ್ ರಾಮನಗರ, ಮಹಾಬಲ ಅಂಚನ್, ಜೀವನ್ ಪ್ರಕಾಶ್ ಕಾಮೆರೊಟ್ಟು, ಯೋಗೀಶ್ ಪಾವಂಜೆ, ವಿನೋದ್ ಕುಮಾರ್ ಕೊಳುವೈಲು, ಅಶೋಕ್ MCF ಕಾಲೊನಿ, ಪಲಿಮಾರ್ ಜಗದೀಶ್ ಪಾವಂಜೆ, ಹರೀಶ್ ಸಾಲ್ಯಾನ್, ಶ್ರೀ ವಿದ್ಯಾ ವಿನಾಯಕ ರಜತ ಸೇವಾ ಟ್ರಸ್ಟ್ (ರಿ.) ಪ್ರಧಾನ ಕಾರ್ಯದರ್ಶಿ ಸ್ಟ್ಯಾನಿ ಡೀ ಕೋಸ್ಟ, ಕಾನೂನು ಸಲಹೆಗಾರೆರ್ ಚಂದ್ರಶೇಖರ ಜಿ. ಆಯ್ಕೆ ಆಯೆರ್.
ರಾಷ್ಟ್ರಗೀತೆದೊಟ್ಟಿಗೆ ಈ ಲೇಸ್ ಮುಗಿತಲ ಆಂಡ್. ಅಕೇರಿಗ್ ಕೋಶಾಧಿಕಾರಿ ಧನಂಜಯ ಸೊಲ್ಮೆ ಸಂದಾಯೆರ್.
ಜಪ್ಪಿನಮೊಗೆರ್ ಬಂಟರ ಸಂಘದ 32ನೇ ವರ್ಷದ ಸಭೆ
ಜಪ್ಪಿನಮೊಗೆರ್ ಬಂಟರ ಸಂಘದ 32ನೇ ವಾರ್ಷಿಕ ಮಹಾಸಭೆ ಸಂಘದ ಅಧ್ಯಕ್ಷೆರ್ ಜೆ. ಸತ್ಯಪ್ರಸಾದ್ ಶೆಟ್ಟಿ ಮೆರೆನ ಗುರ್ಕಾರ್ಮೆಡ್ ನಡತ್ಂಡ್.
ಈ ಸಭೆಟ್ಟ್ 2023-2024 ನೇ ಸಾಲ್ ದ ಕಾರ್ಯಕಾರಿ ಸಮಿತಿನ್ ರಚನೆ ಮಲ್ತೆರ್. ಬೊಕ್ಕ ಬಂಟರ ಯಾನೆ ನಾಡವರ ಮಾತ್ರ ಸಂಘ, ಜಾಗತಿಕ ಬಂಟರ ಸಂಘಲೆನ ಒಕ್ಕೂಟ, ಬೆಂಗ್ಲೂರ್ ಬಂಟರ ಸಂಘ ಬೊಕ್ಕ ಇಂಟರ್ ನ್ಯಾಷನಲ್ ಬಂಟ್ಸ್ ವೆಲ್ಫೇರ್ ಟ್ರಸ್ಟ್ ಮುತಾಲಿಕೆಡ್ “ಆಟಿದ ಕೂಟ ಬೊಕ್ಕ ಪ್ರತಿಭಾ ಪುರಸ್ಕಾರ” ಲೇಸ್ ಲಯನ್ ಸಂಜಿತ್ ಶೆಟ್ಟಿ (ಸುರಭಿ ಗ್ರೂಪ್ ಆಫ್ ಹೋಟೆಲ್ಸ್ ) ಮೇರ್ ತುಡರ್ ಅರ್ಲಾದ್ ಉದಿಪನ ಮಲ್ತೆರ್. ಬೊಕ್ಕ ಆಟಿದ ವಿಶೇಷತೆದ ಬಗೆಟ್ಟ್ ಪೊಲಬುನ್ ಮಾಜಿ ಶಾಸಕಿ ಶಕುಂತಲಾ ಶೆಟ್ಟಿ ಮೇರ್ ಚೆನ್ನೆದ ಮಣೆ ಗೊಬ್ಬುನ ಮುಖೇನ ಕೊರಿಯೆರ್.
SSLC ಬೊಕ್ಕ PUC ಡ್ 85% ರ್ದ್ ಎಚ್ಚ ಮಾರ್ಕ್ ಪಡೆಯಿನ ಗ್ರಾಮದ ಮಾತ ವರ್ಗದ ಜೋಕುಲೆಗ್ ಪ್ರತಿಭಾ ಪುರಸ್ಕಾರ ಪಟ್ಟಿಯೆರ್. ಬೊಕ್ಕ ಕುವೆಂಪು ವಿಶ್ವ ವಿದ್ಯಾಲಯ ಕೊರಿನ ಗೌರವ ಡಾಕ್ಟರೇಟ್ ಪಡೆಯಿನ ಎ. ಸದಾನಂದ ಶೆಟ್ಟಿ ಮೆರೆಗ್ ತಮ್ಮನ ನಡತ್ಂಡ್.
ಈ ಪೊರ್ತುಡು ಮಲ್ಲ ಬಿನ್ನೆರಾದ್ ಚಿತ್ತರಂಜನ್ ಭಂಡಾರಿ ಐಕಳ ಬಾವಾ, ಸಿ. ಎಸ್. ಭಂಡಾರಿ, ರಾಜಕುಮಾರ್ ಶೆಟ್ಟಿ ತಿರುವೈಲ್ ಗುತ್ತು, ಕಾರ್ಪೊರೇಟರ್ ಪ್ರವೀಣಚಂದ್ರ ಆಳ್ವ, ವಸಂತ್ ಶೆಟ್ಟಿ, ದೇವಿಚರಣ್ ಶೆಟ್ಟಿ, ಪುರಂದರ್ ಶೆಟ್ಟಿ ಕೊಂಡೆವೂರ್ ಇತ್ತೆರ್.
ಆಟಿದ ಬೇತೆ ಬೇತೆ ತೆನಸುಲು ಇತ್ತ್ಂಡ್. ಉಮೇಶ್ ಎದ್ಕೊನಿಯೆರ್. ಸೀತಾರಾಮ್ ಶೆಟ್ಟಿ, ಪ್ರಕಾಶ್ ಮೇಲಾಂಟ, ಕೃಷ್ಣ ಶೆಟ್ಟಿ ತಾರೇಮಾರ್ ಸಹಕಾರ ಕೊರಿಯೆರ್.
ಆ.6: ಮುಲ್ಕಿ ಬಂಟರ ಸಂಘದ ಚಾವಡಿಡ್ ಆಟಿದ ತಮ್ಮನ ಲೇಸ್
ಮುಲ್ಕಿ ಬಂಟರ ಸಂಘ (ರಿ.) ದ ಮುತಾಲಿಕೆಡ್ 2023-24 ನೇ ಸಾಲ್ ದ ವಿದ್ಯಾರ್ಥಿವೇತನ, ಪ್ರತಿಭಾ ಪುರಸ್ಕಾರ, ಮುಲ್ಕಿ ಸುಂದರರಾಮ ಶೆಟ್ಟಿ ಪ್ರಶಸ್ತಿ ಪ್ರದಾನ, ಸಾಧಕೆರೆಗ್ ಮಾನಾದಿಗೆ ಮಲ್ಪುನ ಆಟಿದ ತಮ್ಮನ ಲೇಸ್ ಆ.6 ಐತಾರ ಮುಲ್ಕಿ ಬಂಟರ ಸಂಘದ ಚಾವಡಿಡ್ ನಡಪರೆ ಉಂಡು.
ಈ ಲೇಸ್ ದ ಗುರ್ಕಾರ್ಮೆನ್ ಮುಲ್ಕಿ ಬಂಟರ ಸಂಘದ ಗುರ್ಕಾರ್ಲು ಕೆ. ಪುರುಷೋತ್ತಮ ಶೆಟ್ಟಿ ಒಯಿಸೊನ್ವೆರ್. ಕುಡ್ಲ ಜಾಗತಿಕ ಬಂಟರ ಸಂಘಲೆನ ಒಕ್ಕೂಟ (ರಿ.) ದ ಗುರ್ಕಾರ್ಲು ಐಕಳ ಹರೀಶ್ ಶೆಟ್ಟಿ ಈ ಲೇಸ್ ದ ಉದಿಪನ ಮಲ್ಪುವೆರ್. ಮಲ್ಲ ಬಿನ್ನೆರಾದ್ ಬೊಂಬೈ ವಿ.ಕೆ ಸಮೂಹ ಸಂಸ್ಥೆದ ಗುರ್ಕಾರ್ಲು ಬೊಕ್ಕ ಆಡಳಿತ ನಿರ್ದೇಶಕೆರ್ ಕೆ.ಎಂ ಶೆಟ್ಟಿ ಮಧ್ಯಗುತ್ತು, ಬೆಂಗ್ಲೂರ್ ಬಂಟರ ಸಂಘದ ಗುರ್ಕಾರ್ಲು ಮುರಳೀಧರ ಹೆಗ್ಡೆ, ಮುಲ್ಕಿ ಸುಂದರರಾಮ ಶೆಟ್ಟಿ ಚಾರಿಟೇಬಲ್ ಟ್ರಸ್ಟ್ ದ ಟ್ರಸ್ಟಿ ಸುಕುಮಾರ್ ಶೆಟ್ಟಿ ಕಕ್ವಗುತ್ತು ಪಾಲ್ ಪಡೆಯೆರೆ ಉಲ್ಲೆರ್. ಆಟಿದ ಮದಿಪುನ್ ನಿಟ್ಟೆ ವಿಶ್ವವಿದ್ಯಾನಿಲಯದ ಮಾನವಿಕ ವಿಭಾಗದ ಪ್ರಭಾರ ಮುಖ್ಯಸ್ಥೆರ್ ಡಾ. ಸಾಯಿಗೀತಾ ಹೆಗ್ಡೆ ಕೊರಿಯೆರೆ ಉಲ್ಲೆರ್.
ಕುಡ್ಲ ಶ್ರೀ ದೇವಿ ಎಜ್ಯುಕೇಶನ್ ಟ್ರಸ್ಟ್ ದ ಆಡಳಿತ ನಿರ್ದೇಶಕೆರ್ ಎ.ಸದಾನಂದ ಶೆಟ್ಟಿ ಮೆರೆಗ್ 2023 ತ್ತ ಮುಲ್ಕಿ ಸುಂದರರಾಮ ಶೆಟ್ಟಿ ಪ್ರಶಸ್ತಿ ಪುರಸ್ಕಾರ ನಡಪರೆ ಉಂಡು ಪಂದ್ ಮುಲ್ಕಿ ಬಂಟರ ಸಂಘ (ರಿ.) ದ ಅಧ್ಯಕ್ಷೆರ್, ಗೌರವಾಧ್ಯಕ್ಷೆರ್ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಆ.6: ಬಂಟರ ಸಂಘ ಬಜಪೆ ವಲಯ (ರಿ.) ದ ಮುತಾಲಿಕೆಡ್ ಆಟಿದ ನೆಂಪು
ಕುಡ್ಲ: ಬಂಟರ ಸಂಘ ಬಜಪೆ ವಲಯ (ರಿ.) ದ ಮುತಾಲಿಕೆಡ್ ಆಟಿದ ನೆಂಪು “ತರವಾಡ್ ದ ತಮ್ಮನ” ಲೇಸ್ ಆ.6 ಐತಾರ ಬಜಪೆ ಸಂಜೀವ ಶೆಟ್ಟಿ ಸಭಾಗೃಹಡ್ ನಡಪರೆ ಉಂಡು.
ಬೊಲ್ಪುಗು ಪ್ರಾರ್ತನೆ, ಉದಿಪನ, ಜೋಕುಲೆಗ್, ಪೊಂಜೋವ್, ಆಂಜೋವ್ ನಕ್ಲೆಗ್ ಬೇತೆ ಬೇತೆ ಪಂತೊಲು, ಮಧ್ಯಾಹ್ನ ತರವಾಡ್ ತಮ್ಮನ ಉಪ್ಪಡ್, ತಿಮರೆ ಚಟ್ನಿ, ಎಟ್ಟಿ ಚಟ್ನಿ, ಪತ್ರೊಡೆ, ಸೇಮಿಗೆ, ಸೇಮಿಗೆಗ್ ಪೇರ್, ಪದೆಂಗಿ ಸಲಾಯಿ ಗಸಿ, ಪೆಲಕಾಯಿದ ಗಟ್ಟಿ, ನುಪ್ಪು, ಕುಡು ಸಾರ್, ಚಿಕನ್ ಸುಕ್ಕ, ಸಾರ್ ನಡ್ಯೆ, ಪರ್ಂದ್ ಉಂಡು.
ಈ ಲೇಸ್ ಡ್ ಸಂಘದ ವ್ಯಾಪ್ತಿಗ್ ಸೇರುನ ಗ್ರಾಮದ ಬಂಟ ಬಾಂಧವೆರ್ ಕುಟುಂಬ ಸಮೇತರಾದ್ ಬತ್ತ್ ದ್ ಲೇಸ್ ನ್ ಪೊರ್ಲು ಮಲ್ತ್ ದ್ ಕೊರೊಡು ಪಂದ್ ಬಂಟ ಸಂಘ ಬಜಪೆ ವಲಯ (ರಿ.) ದ ಅಧ್ಯಕ್ಷೆರ್, ಪದಾಧಿಕಾರಿಲು ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಆ.6: ಹಳೆಯಂಗಡಿ ನಾರಾಯಣ ಗುರು ಸಂಘಡ್ ಆಟಿದ ರಂಗ್
ಹಳೆಯಂಗಡಿ ಬಿಲ್ಲವ ಸಮಾಜ ಸೇವಾ ಸಂಘ (ರಿ.) ಬೊಕ್ಕ ಯುವವಾಹಿನಿ (ರಿ.) ಹಳೆಯಂಗಡಿ ಘಟಕದ ಒಟ್ಟುಸೇರಿಗೆಡ್ “ಆಟಿದ ರಂಗ್” ಲೇಸ್ ಆ.6 ಐತಾರ ಕಾಂಡೆ 10 ಗಂಟೆರ್ದ್ ಹಳೆಯಂಗಡಿ ಬ್ರಹ್ಮಶ್ರೀ ನಾರಾಯಣ ಗುರು ಮಂದಿರದ ವಠಾರಡ್ ನಡಪರೆ ಉಂಡು.
ಈ ಕೂಟದ ಉದಿಪನನ್ ಬೈಕಂಪಾಡಿ ಎನ್.ಡಿ ಸನ್ಸ್ ಎಂಟರ್ ಪ್ರೈಸಸ್ ದ ಮೋನಪ್ಪ ಪೂಜಾರ್ಲು ಮಲ್ಪರೆ ಉಲ್ಲೆರ್. ಕುಡ್ಲ ಕೆನರಾ ಪಿಯು ಕಾಲೇಜ್ ದ ಪ್ರಾಧ್ಯಾಪಕೆರ್ ರಘು ಇಡ್ಕಿದು ಮದಿಪು ಕೊರ್ರೆ ಉಲ್ಲೆರ್. ಈ ಲೇಸ್ ದ ಗುರ್ಕಾರ್ಮೆನ್ ಹಳೆಯಂಗಡಿ ಬಿಲ್ಲವ ಸಮಾಜ ಸೇವಾ ಸಂಘ (ರಿ.) ದ ಗುರ್ಕಾರ್ಲು ಚಂದ್ರಶೇಖರ್ ನಾನಿಲ್ ಒಯಿಸೊನ್ವೆರ್.
ಮಲ್ಲ ಬಿನ್ನೆರಾದ್ ಕುಡ್ಲ ಯುವವಾಹಿನಿ ಕೇಂದ್ರ ಸಮಿತಿದ ಗುರ್ಕಾರ್ಲು ರಾಜೇಶ್ ಬಿ., ಹಳೆಯಂಗಡಿ ಬಿಲ್ಲವ ಸಂಘ (ರಿ.) ಮಲ್ಲ ಗುರ್ಕಾರ್ಲು ಗಣೇಶ್ ಜಿ. ಬಂಗೇರ್ರ್, ಹಳೆಯಂಗಡಿ ಕಟ್ಟೋಣ ಸಮಿತಿ ದ ಗುರ್ಕಾರ್ಲು ಮೋಹನ್ ಎಸ್ ಸುವರ್ಣೆರ್, ಯುವವಾಹಿನಿ (ರಿ.) ಹಳೆಯಂಗಡಿದ ಗುರ್ಕಾರ್ಲು ಕಿರಣ್ ಪಡುಪಣಂಬೂರು ಪಾಲ್ ಪಡೆಯೆರೆ ಉಲ್ಲೆರ್. ಅಂಚೆನೆ ಕೃಷಿ ಬದ್ ಕ್ ದ ಸಾಧಕೆರ್ ಸುಧಾಕರ ಸುವರ್ಣೆರ್ ಕೊರುವೈಲ್, ಪೆರ್ಮೆದ ಹಿರಿಯ ವೈದ್ಯೆರ್ ಡಾ. ಜಯಕರ್ ಮಲ್ಯ ಮಾನಾದಿಗೆದ ಮಣೆಟ್ಟ್ ಕುಲ್ಲೆರ್ ಉಲ್ಲೆರ್.
ಈ ಪೊರ್ತುಡು ಬಿಲ್ಲವ ಸಂಘ, ಯುವವಾಹಿನಿ ಸದಸ್ಯೆರೆರ್ದ್ ತುಳು ನಲಿಕೆ ಬೊಕ್ಕ ಕುಸೇಲ್ದ ಕೂಟ ನಡಪರೆ ಉಂಡು.
ಅಂಚೆನೆ ಬತ್ತಿ ಬಿನ್ನೆರೆಗ್ ಎಡ್ಡೆಮುಂಚಿದ ಕಷಾಯ, ಗುಜ್ಜೆದ ಹಪ್ಪಳ, ಉಪ್ಪಡ್, ತಿಮರೆದ ಚಟ್ನಿ, ಕುಡುತ ಚಟ್ನಿ, ರಚ್ಚ-ಕುಕ್ಕು-ಗೂಂಜಿದ ಚಟ್ನಿ, ಉಪ್ಪಡ್-ಪಚ್ಚಿಲ್, ತೊಪ್ಪು-ತೊಜಂಕ್, ತೇವು-ತೇಟ್ಲ, ಬಂಬೆ-ಕುಡು ಗಸಿ, ತೇವುದ ಇರೆತ್ತ ಅಡ್ಡೆ, ಸುಗ್ಗಿದ ಅರಿತ್ತ ಉರ್ಪೆಲ್ ನುಪ್ಪು, ಒಗರ್ನೆದ ಪುನರ್ ಪುಲಿತ ಸಾರ್, ಮೆತ್ತೆದ ಗಂಜಿ, ಪೊಸ ಪೊಸ ತೆನಸುಲು ಉಂಡು.
ಈ ಪೊರ್ಲುದ ಕೂಟೊಗು ಮಾತೆರ್ಲಾ ಕುಟುಂಬ ಸಮೇತೆರಾದ್ ಪಾಲ್ ಪಡೆವೊಡು ಪಂದ್ ಲೆಪ್ಪೋಲೆಡ್ ಬಿನ್ನಾಪು ಮಲ್ದೆರ್.
ಪುತ್ತೂರ್ ದ ಸ್ಯಾಕ್ಸೋಫೋನ್ ವಾದಕೆರ್ ಡಾ.ಪಿ.ಕೆ ಗಣೇಶ್ ಮೆರೆಗ್ ಕಲಾನಿಧಿ ಪ್ರಶಸ್ತಿ
ಪುತ್ತೂರ್: ತಮಿಳ್ ನಾಡ್ ದ ಮೈಲಾಡುತುರೈಡ್ ಇಪ್ಪುನ ಧರ್ಮಪುರಂ ಅಧೀನಂ 27ನೇ ಗುರು ಮಹಾ ಸನ್ನಿಧಾನಂ ತಿರುಪ್ಪಾನಂದಲ್ ಕುಂಭಾಭಿಷೇಕಡ್ ನಡತಿನ ಸಂಗೀತ ಕಚೇರಿಡ್ ಪುತ್ತೂರ್ ದ ಸ್ಯಾಕ್ಸೋಫೋನ್ ವಾದಕೆರ್ ಡಾ.ಪಿ.ಕೆ ಗಣೇಶ್ ಮೆರೆಗ್ ಕಲಾನಿಧಿ ಪ್ರಶಸ್ತಿ ತಿಕ್ ದ್ಂಡ್.
ಜುಲೈ 7 ಕ್ಕ್ ನಡತಿನ ಸಂಗೀತ ಕಛೇರಿಡ್ ಪುತ್ತೂರ್ ದ ಇತಿಹಾಸ ಪುಗರ್ತೆದ ಶ್ರೀ ಮಹಾಲಿಂಗೇಶ್ವರ ದೇವಲ್ಯದ ಪ್ರಧಾನ ಸ್ಯಾಕ್ಸೋಫೋನ್ ವಾದಕೆರ್ ಡಾ.ಪಿ.ಕೆ ಗಣೇಶ್ ಮೆರೆಗ್ ಬಂಗಾರ್ ದ ಪದಕ ಬೊಕ್ಕ ಸ್ಯಾಕ್ಸೋಫೋನ್ ಕಲಾನಿಧಿ ಪ್ರಶಸ್ತಿನ್ ಕೊರ್ದು ಮಾನಾದಿಗೆ ಮಲ್ತೆರ್.
ಡಾ.ಪಿ.ಕೆ ಗಣೇಶ್ ಮೇರ್ ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿದೊಟ್ಟಿಗೆ ಸುಮಾರ್ ಪ್ರಶಸ್ತಿನ್ ಪಡೆತೆರ್.
ಇತಿಹಾಸಡೇ ಸುರುತ್ತ ಸರ್ತಿ ತಮಿಳ್ ನಾಡ್ ದ ಧರ್ಮಪುರಂ ಅಧೀನಂ (ಮಠ) ಸ್ಯಾಕ್ಸೋಫೋನ್ ಕ್ಷೇತ್ರಗ್ ಕೊರ್ನ ಪ್ರಶಸ್ತಿ ಬೊಕ್ಕ ಬಂಗಾರ್ ದ ಪದಕ ಉಂದಾತ್ಂಡ್.
ಬೆಂಗ್ಲೂರ್ ಡ್ ಜೈ ತುಲುನಾಡ್ (ರಿ.) ನಿರೆಲ್ಡ್ ಮುತಾಲಿಕೆಡ್ “ತುಲುನಾಡ ಆಟಿ” ಆಚರಣೆ
ಬೆಂಗ್ಲೂರ್ ದ ಬಳೆಪೇಟೆದಲ್ಪ ಇಪ್ಪುನ ಸ್ವಾಗತ್ ಹೋಟೆಲ್ ಡ್ ಜೈ ತುಲುನಾಡ್ (ರಿ.) ಮುತಾಲಿಕೆಡ್ “ತುಲುನಾಡ ಆಟಿ” ಲೇಸ್ ನಡತ್ಂಡ್.
ಜೈ ತುಲುನಾಡ್ (ರಿ.) ಸಂಘಟನೆ ಬೆಂಗ್ಲೂರ್ ಎಗ್ಗೆದ ಗುರ್ಕಾರ್ಲು ವಿಶಾಲ್ ಕೊಡಿಯಾಲ್ ಗುರ್ಕಾರ್ಮೆಡ್ ನಡತಿನ ಈ ಲೇಸ್ ಡ್ ಬೆಂಗ್ಲೂರ್ ದ ಸುಮಾರ್ ತುಲು ಸಂಘಟನೆದ ಪ್ರಮುಖೆರ್ ಪಾಲ್ ಪಡೆದಿತ್ತೆರ್.
ತುಳುವೆರೆ ಚಾವಡಿ ಗೌರವಾಧ್ಯಕ್ಷೆರ್ ಪುರುಷೋತ್ತಮ ಚೇಂಡ್ಲ ಈ ಲೇಸ್ ದ ಉದಿಪನ ಮಲ್ತೆರ್. ಜೈ ತುಲುನಾಡ್ (ರಿ.) ಸಂಘಟನೆದ ಅನುದೀಪ್ ಶೆಟ್ಟಿ ಎದ್ಕೊನಿಯೆರ್. ಸಂಘಟನೆದ ಜಯಪ್ರಸಾದ್ ತುಲುನಾಡ್ ಪ್ರಾಸ್ತಾವಿಕವಾದ್ ಸಂಘಟನೆ ಮಲ್ತಿನ ಕೆಲಸನ್ ತೆರಿಪಾಯೆರ್.
ಸುವರ್ಣ ನ್ಯೂಸ್ ಬೆಂಗ್ಲೂರ್ ನೆತ್ತ ಹಿರಿಯ ಪತ್ರಕರ್ತೆರ್ ಜಯಪ್ರಕಾಶ್ ಶೆಟ್ಟಿ ಉಪ್ಪಲ ಮೇರ್, ತುಲುವೆರೆ ಆಟಿ ತಿಂಗೊಲ್ದ ಮಹತ್ವ, ಇಚಾರ ತೆರಿಯೆರ್. ತುಳುವೆರ್ ಆಟಿ ತಿಂಗೊಲ್ಡ್ ಬಂಗದ ಪೊರ್ತುಡು ಗುಜ್ಜೆದ ಕಜಿಪು, ಪಚ್ಚಿರ್ ದ ಕಜಿಪು, ಪೆಲಕಾಯಿದ ಗಟ್ಟಿ, ಸಾಂತನಿ, ಪೆಲತರಿ ತಿನೊಂದು ಇತ್ತೆರ್. ಇಂಚಿನ ಖಾದ್ಯಲು ತುಳುನಾಡ್ ಡ್ ಮಾತ್ರ ತಿಕಿಯೆರೆ ಸಾಧ್ಯ, ದೈವಾರಾಧನೆ ತುಲುವೆರೆನ ಇಸೇಸ ಆಚರಣೆ. ಬಿನ್ನೆರೆನ್ ಉಪಚಾರ ಮಲ್ಪುನ ರೀತಿ ತುಳುವೆರೆಡ ಇಸೇಸವಾದ್ ಉಂಡು ಪಂದ್ ಜೈ ತುಲುನಾಡ್ (ರಿ.) ಸಂಘಟನೆ, ತುಲು ಭಾಷೆ, ಲಿಪಿಗ್ ಮಲ್ತಿನ ಕೆಲಸನ್ ಮೆಚ್ಚಿಯೆರ್. ತುಳು ಭಾಷೆಗ್ ರಾಜ್ಯದ ರಡ್ಡನೇ ಅಧಿಕೃತ ಸ್ಥಾನಮಾನ ತಿಕೊಡು ಪನ್ಪುನ ಪಾತೆರ ಮಾತ ತುಳು ಸಂಘಟನೆದ ಮುಖಂಡೆರೆನ ಬಾಯಿಡ್ ಬತ್ತ್ಂಡ್.
ಈ ಪೊರ್ತುಡು ತುಳುನಾಡ್ ದ, ಆಟಿ ಕಳೆಂಜೆ, ಕಂಗಿಲ್ ನೃತ್ಯ, ಬೇತೆ ಬೇತೆ ಜನಪದ ನೃತ್ಯನ್ ಬೊಕ್ಕ ಇಸೇಸ ಖಾದ್ಯನ್ ಮಲ್ತ್ ದ್ ಇತ್ತೆರ್. ತುಳುವರೆ ಚಾವಡಿ (ರಿ.) ದ ಅಧ್ಯಕ್ಷೆರಾಯಿನ, ಡಿ.ಉಮೇಶ್ ಪೂಂಜ, ಕೆ.ಎನ್. ಅಡಿಗ ಅಡೂರು, ಬೊಕ್ಕ ತುಳುವೆರುಂಕುಲು ಅಧ್ಯಕ್ಷೆರ್ ವೈ. ಜಯಂತ್ ರಾವ್, ತುಳುನಾಡ ಜವನೆರ್ ಸಂಘಟನೆದ ಮಹೇಶ್ ಶೆಟ್ಟಿ, ರಾಜಾರಾಮ್ ಶೆಟ್ಟಿ ಉಪ್ಪಳ, ತುಳು ಕೂಟದ ಅಧ್ಯಕ್ಷೆರ್ ಸುಂದರ್ ರಾಜ್ ರೈ, ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಮಾಜಿ ಸದಸ್ಯೆರ್ ಕಾಂತಿ ಶೆಟ್ಟಿ, ಜೈ ತುಲುನಾಡ್ (ರಿ.) ಕೇಂದ್ರ ಸಮಿತಿದ ಉಪಾಧ್ಯಕ್ಷೆರ್ ಉದಯ್‌ ಪೂಂಜ ಇತ್ತೆರ್.
ಸಂಘಟನೆದ ನಿಧೀಶ್ ಶೆಟ್ಟಿ ಸೊಲ್ಮೆ ಸಂದಾಯೆರ್. ಬನಶ್ರೀ ಅವಿನಾಶ್ ಬೊಕ್ಕ ಅನುಷಾ ಸಾಲಿಯನ್ ಈ ಲೇಸ್ ದ ಸುಧಾರಿಕೆ ಮಲ್ತೆರ್.
ನಂದಳಿಕೆ ಇಂಚರ ಸೇವಾ ಬಳಗದಕ್ಲೆರ್ದ್ ಬಡಪತ್ತ್ ದ ಕುಟುಂಬಗ್ ಪನವುದ ಸಕಾಯ
ನಂದಳಿಕೆ ಇಂಚರ ಸೇವಾ ಬಳಗದಕುಲು ಒಂಜಿ ಬಡಪತ್ತ್ ದ ಕುಟುಂಬಗ್ ಪನವುದ ಸಕಾಯನ್ ಮಲ್ತೆರ್.
ಸೂಡ ಪಡುಬೆಟ್ಟು ನಿವಾಸಿ ನಾರಾಯಣ ಶೆಟ್ಟಿ ಮೇರೆಗ್ ಕರಿನ ರಡ್ಡ್ ವರ್ಷೊರ್ದಿಂಚ ಲಿವರ್ ಕ್ಯಾನ್ಸರ್ ಇತ್ತ್ಂಡ್. ಆಂಡ ಇಂಚಿಪ್ಪ ಮೇರ್ ಚಿಕಿತ್ಸೆ ಫಲಕಾರಿ ಆವಂದೆ ತೀರ್ ಪೋಯೆರ್. ಮೆರೆನ ಕುಟುಂಬ ಮೆರೆನ ಚಿಕಿತ್ಸೆಗ್ ಸಾಲನ್ ಮಲ್ತ್ ದ್ ಇತ್ತೆರ್. ಅಂಚಾದ್ ಮೊಕುಲು ನಂದಳಿಕೆ ಇಂಚರ ಸೇವಾ ಬಳಗದಕ್ಲೆಗ್ ಬಿನ್ನಾಪು ಮಲ್ತೆರ್. ಈ ಬಿನ್ನಾಪುಗ್ ಸ್ವಂದಿಸಾಯಿನ ಈ ಕೂಟದಕುಲು ತನ್ನ ಕೂಟದ ವತಿರ್ದ್ 10 ಸಾರ ರೂ. ದ ಚೆಕ್ ನ್ ರತ್ನ ಸೂಡ ಮೆರೆನ ಮುಖೇನ ಕೊರಿಯೆರ್.
ಈ ಪೊರ್ತುಡು ಕೂಟದ ಸದಸ್ಯೆರ್ ಸಂತೋಷ್ ಕೋಟ್ಯಾನ್ ಸೂಡ, ಅನಿತಾ ರಮೇಶ್ ಸೂಡ, ಸುಮಲತಾ ದುಗ್ಗಪ್ಪ, ದೀಕ್ಷಾ, ಸುಶ್ಮಿತಾ ರಾಕೇಶ್ ನಂದಳಿಕೆ, ಸಂತೋಷ್ ಪೂಜಾರಿ ಹೊಕ್ಕಾಡಿಗೋಳಿ ಇತ್ತೆರ್.