ಕರ್ಣಾಟಕ ಬ್ಯಾಂಕ್ ಡ್ ಬೇಲೆಗ್ ನೇಮಕಾತಿಗ್ ಅಧಿಸೂಚನೆ ಬುಡುಗಡೆ ಮಲ್ದ್ಂಡ್.
ಆಸಕ್ತ ಬೊಕ್ಕ ಅರ್ಹ ಅಭ್ಯರ್ಥಿಲು ಡಿ.15 ತ್ತ ಉಲಯಿ ಆನ್ ಲೈನ್ ಮುಖೇನ ಅರ್ಜಿ ಸಂದಾವೊಲಿ. ಕಾನೂನು ಇಸಯಡ್ ಪದವಿ ಇಜ್ಜಿಂಡ ಸ್ನಾತಕೋತ್ತರ ಪದವಿ ಆದಿಪ್ಪೊಡು. ನೆಕ್ಕ್ ಲಾ ಆಫೀಸರಾದ್ ಬೇಲೆ ಖಾಲಿ ಉಂಡು. 63000 ರೂ. ಪ್ರತಿ ತಿಂಗೊಲ್ ಗ್ ಸಂಬಳ ಉಂಡು. ಅರ್ಜಿ ಸಂದಾವುನ ಅಭ್ಯರ್ಥಿಲೆಗ್ 30 ವರ್ಷ ಆದಿಪ್ಪೊಡು. ಅಂಚೆನೆ ನೆತ್ತ ಅರ್ಜಿ ಶುಲ್ಕ 600 ರೂ. ಉಂಡು. ಎಚ್ಚದ ಪೊಲಬುಗಾದ್ karnatakabank.com ವೆಬ್ ಸೈಟ್ ಗ್ ಭೇಟಿ ಕೊರೊಲಿ.
10 ಟನ್ ತೂಕದ 50 ಮೀಟರ್ ಎತ್ತರದ ಮೊಬೈಲ್ ಟವರ್ ನ್ ಕಲ್ವೆರ್ ಕಂಡಿನ ಘಟನೆ ಉತ್ತರ ಪ್ರದೇಶದ ಕೌಸಂಬಿ ಜಿಲ್ಲೆದ ಉಜ್ಜಯಿನಿ ಗ್ರಾಮಡ್ ನಡತ್ಂಡ್.
ಟವರ್ ತೋಜೊಂದು ಇಜ್ಜಿ ಪಂದ್ ಕೋಡೆ ತಂತ್ರಜ್ಞೆರ್ ಪೊಲೀಸೆರೆಗ್ ದೂರು ಕೊರ್ತೆರ್. ಟವರ್ ದೊಟ್ಟಿಗೆ 8.5 ಲಕ್ಷ ಬಿಲೆತ್ತ ಶೆಲ್ಟರ್ ಬೊಕ್ಕ ಬೇತೆ ಉಪಕರಣಲು ನಾಪತ್ತೆ ಆತ್ಂಡ್ ಪಂದ್ ಎಫ್ ಐಆರ್ ಡ್ ತೆರಿಪಾದೆರ್.
ಬೆಂಗ್ಲೂರು : ಈ ಸರ್ತಿದ 10ನೇ ಕ್ಲಾಸ್ ದ ವಾರ್ಷಿಕ ಪರೀಕ್ಷೆ ಮಾ.25 ರ್ದ್ ಎ.6 ಮುಟ್ಟ ನಡಪರೆ ಉಂಡು.
ಎಸ್ಸೆಸ್ಸೆಲ್ಸಿ ಪರೀಕ್ಷೆದ ತಾತ್ಕಾಲಿಕ ವೇಳಾಪಟ್ಟಿನ್ ಶಿಕ್ಷಣ ಇಲಾಖೆ ಇನಿ ಪ್ರಕಟ ಮಲ್ದ್ಂಡ್.
ಮಾ.25 ಕ್ಕ್ ಕನ್ನಡ, ಮಾ.27 ಕ್ಕ್ ಸಮಾಜ ವಿಜ್ಞಾನ, ಮಾ.30 ಕ್ಕ್ ವಿಜ್ಞಾನ, ಎ.2 ಕ್ಕ್ ಗಣಿತ, ಎ.4 ಹಿಂದಿ, ಎ.6 ಕ್ಕ್ ಇಂಗ್ಲಿಷ್ ಪರೀಕ್ಷೆ ನಡಪರೆ ಉಂಡು.
ಬೆಂಗ್ಲೂರು: ಸೆಕೆಂಡ್ ಪಿಯುಸಿ ವಾರ್ಷಿಕ ಪರೀಕ್ಷೆ ಮಾರ್ಚ್ 2-22 ಮುಟ್ಟ ನಡಪರೆ ಉಂಡು.
ಮಾ.2 ಕ್ಕ್ ಕನ್ನಡ, ಮಾ.4 ಕ್ಕ್ ಇತಿಹಾಸ, ಮಾ.6 ಕ್ಕ್ ಸಮಾಜ ಶಾಸ್ತ್ರ, ಗಣಕ ವಿಜ್ಞಾನ, ಮಾ.7 ಕ್ಕ್ ಹಿಂದಿ, ಮಾ.9 ಕ್ಕ್ ರಾಜ್ಯಶಾಸ್ತ್ರ, ಸಂಖ್ಯಾಶಾಸ್ತ್ರ, ಮಾ.11 ಕ್ಕ್ ಇಂಗ್ಲಿಷ್, ಮಾ.13 ಕ್ಕ್ ವ್ಯವಹಾರ ಅಧ್ಯಯನ, ಮಾ.16 ಕ್ಕ್ ಭೂಗೋಳಶಾಸ್ತ್ರ, ಜೀವಶಾಸ್ತ್ರ, ಮಾ.18 ಕ್ಕ್ ರಸಾಯನಶಾಸ್ತ್ರ, ಮಾ.20 ಕ್ಕ್ ಐಚ್ಚಿಕ ಕನ್ನಡ, ಲೆಕ್ಕಶಾಸ್ತ್ರ, ಮಾ.22 ಕ್ಕ್ ಅರ್ಥಶಾಸ್ತ್ರ ಪರೀಕ್ಷೆ ನಡಪರೆ ಉಂಡು.
ಸಮಾಜಪರ ಚಿಂತಕೆರ್, ಶಿಕ್ಷಣ ಪ್ರೇಮಿ, ಸಮಾಜ ಸೇವಕೆರ್ ಮಹೇಶ್ ಮೇರ್ ಬಂಟರ ಸಂಘ ಬೊಂಬೈದ ಒತ್ತು ಗುರ್ಕಾರೆಯಾದ್ ಆಯ್ಕೆ ಆತೆರ್.
ಕರಿನ 23 ವರ್ಷೊದಿಂಚ ಪೊವಾಯಿ ಪಾಸ್ಪೋಳಿ ಕನ್ನಡ ಶಾಲೆದ ಜೋಕುಲೆಗ್ ಮಾತ ರೀತಿಡ್ ಸಹಕಾರ ಮಲ್ತ್ ದ್, ಶಾಲೆಗ್ ಗೌರವ ಶಿಕ್ಷಕೆರೆನ್ ಕೊರ್ನ ಅಪ್ಪಟ ಕನ್ನಡ ಪ್ರೇಮಿ ಮೇರ್, ಬೊಂಬೈ ಮಹಾನಗರಡ್ ಬಂಟರ ಸಂಘದ ಬೇತೆ ಬೇತೆ ಜಬದಾರಿ ದೆತೊಂದು ಶಿಕ್ಷಣಗ್ ಎಚ್ಚದ ಮಹತ್ವ ಕೊರ್ದು, ಒವ್ವೇ ಜಾತಿ ಮತ ಭೇದ ಭಾವ ಮಲ್ಪಂದೆ ಸಮಾಜದ ಪರ ಬೇಲೆ ಮಲ್ಪುನ ಮಹೇಶ್ ಒರಿ ಎಡ್ಡೆ ಮನಸ್ ದ ವ್ಯಕ್ತಿ.
ಹುಷಾರ್ ದಾಂತಿನಕ್ಲೆನ್ ಅಕ್ಲೆನ ಇಲ್ಲಗ್ ಭೇಟಿ ಕೊರ್ದು ಅಕ್ಲೆನ ಚಿಕಿತ್ಸೆಗ್ ಸಕಾಯ ಆಪುನ ಮೇರ್ ಒವ್ವೇ ಪ್ರಚಾರನ್ ಬಯಸಂದೆ ತನ್ನೆರ್ದ್ ಆಪುನ ಸಹಾಯನ್ ಮಲ್ತೊಂದು ಬೈದೆರ್. ಸಮಾಜದ ಒವ್ವೇ ಜಾತಿ ಧರ್ಮದ ಬಡಪತ್ತ್ ದ ಪೊಣ್ಣು ಜೋಕ್ಲೆನ ಮದಿಮೆಗ್ ಸಕಾಯ ಮಲ್ತೊಂದು ಬಂಟರ ಸಂಘದ ಮುಖೇನ ಬಡ ವರ್ಗದ ಪೊಣ್ಣು ಜೋಕ್ಲೆನ ಮದಿಮೆದ ಮಾತ ಖರ್ಚ್ ನ್ ದೆತೊನುನ ಯೋಜನೆನ್ ಕನಯೆರೆ ಮಸ್ತ್ ಶ್ರಮ ಪಾಡ್ದೆರ್.
ಪೊವಾಯಿ ಕನ್ನಡ ಸೇವಾ ಸಂಘದ ಮತ ಯೋಜನೆಲೆಗ್ ಸಕಾಯ ಆಯೆರೆ ಮಹೇಶ್ ಮೆರೆನ ಕೊಡುಗೆ ಮಸ್ತ್ ಉಂಡು. ಪದವೀಧರೆರ್ ಆಯಿನ ಮೇರ್ ಮದ್ಯಗುತ್ತು ಶ್ಯಾಮ ಶೆಟ್ಟಿ ಬೊಕ್ಕ ಪಡ್ಡೆದ್ರ ಕಾಜಲ್ ನಿವಾಸ ಲೀಲಾವತಿ ಶೆಟ್ಟಿ ದಂಪತಿಲೆನ ಮಗೆ ಆತೆರ್. ಸಂಸಾರ ಜೀವನಡ್ ಬೊಡೆದಿ ವಿಜಯಲಕ್ಷ್ಮಿ, ಜೋಕುಲು ಅಶ್ವಿನ್ ಬೊಕ್ಕ ಸಾಗರ್ ಉಲ್ಲೆರ್. ವೃತ್ತಿಡ್ ಬಾಬಾ ಗ್ರೂಪ್ಸ್ ಆಪ್ ಕಂಪನೀಸ್ ಸಂಸ್ಥೆದ ಮಾಲಕೆರ್ ಆಯಿನ ಮೇರ್ ಬಂಟರ ಸಂಘದ ಮಲ್ಲ ಮಟ್ಟದ ತಾನಗ್ ಏರ್ದೆರ್.
ಜೈ ತುಲುನಾಡ್ (ರಿ.) ಕುಡ್ಲ ಎಗ್ಗೆದ ಮುತಾಲಿಕೆಡ್, ಎ.ಜೆ ಹಾಸ್ಪಿಟಲ್ ದ ಒಟ್ಟುಸೇರಿಗೆಡ್ ನೆತ್ತೆರ್ ಉಂಬೊಲಿ ಡಿ.10 ಐತಾರ ಬಜ್ಪೆ ಬ್ರಹ್ಮಶ್ರೀ ನಾರಾಯಣ ಗುರು ಸಮುದಾಯ ಭವನಡ್ ನಡಪರೆ ಉಂಡು.
ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆದ್, ನೆತ್ತೆರ್ ದಾನ ಮಲ್ಪೊಲಿ ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.
ಲಡಾಖ್ ಡ್ 3.4 ಬಿರ್ಸ್ ದ ಭೂಕಂಪ ಆತ್ಂಡ್.
ಭೂಕಂಪನದ ರಾಷ್ಟ್ರೀಯ ಕೇಂದ್ರದ ಪ್ರಕಾರ ಬೊಲ್ಪುಗು ಆತ್ಂಡ್ ಪಂದ್ ತೆರಿದ್ ಬೈದ್ಂಡ್. ಭೂಮಿ ನಡ್ ಗ್ನಗ ಜನಕುಲು ಇಲ್ಲರ್ದ್ ಪಿದಯಿ ಬೈದೆರ್. ಆಂಡ ಇಡೇ ಮುಟ್ಟ ಒವ್ವೇ ತೊಂದರೆ ಆತಿಜಿ.
ಗಡಿನಾಡ ಸಾಹಿತ್ಯ ಸಾಂಸ್ಕೃತಿಕ ಅಕಾಡೆಮಿ (ರಿ.) ಯುಎಇ ಘಟಕ ದುಬೈದ ಮುತಾಲಿಕೆಡ್ ದುಬೈ ಗಡಿನಾಡ ಉತ್ಸವ-2023, ಡಿ.10 ಕ್ಕ್ ದುಬೈದ ಅಲ್ ಕುಸೈಸ್ ವುಡ್ಲೆಮ್ ಪಾರ್ಕ್ ಶಾಲೆಡ್ ನಡಪರೆ ಉಂಡು.
ಈ ಲೇಸ್ ನ್ ಕರ್ನಾಟಕ ವಿಧಾನ ಪರಿಷತ್ತ್ ದ ಗುರ್ಕಾರೆ ಬಸವರಾಜ ಎಸ್ ಹೊರಟ್ಟಿ ಉದಿಪನ ಮಲ್ಪರೆ ಉಲ್ಲೆರ್. ಈ ಲೇಸ್ ದ ಗುರ್ಕಾರ್ಮೆನ್ ಗುರ್ಕಾರೆ ಸರ್ವೋತ್ತಮ ಶೆಟ್ಟಿ ಅಬುದಾಬಿ ಒಯಿಸೊನ್ವೆರ್.
ಮಲ್ಲ ಬಿನ್ನೆರಾದ್ ಮಾಜಿ ಮುಖ್ಯಮಂತ್ರಿ ಡಿ.ವಿ. ಸದಾನಂದಗೌಡ, ರಾಜ್ಯಸಭೆ ಸಂಸದೆರ್ ಡಾ.ಎಲ್ ಹನುಮಂತಯ್ಯ, ಮಂಜೇಶ್ವರ ಕ್ಷೇತ್ರದ ಶಾಸಕೆರ್ ಎಕೆಎಂ ಅಶ್ರಫ್ ಪಾಲ್ ಪಡೆಯೆರೆ ಉಲ್ಲೆರ್.
ಅಂಚೆನೆ ಈ ಲೇಸ್ ಡ್ ಶಾಲೆದ ಕೆಲಸಗಾರೆ ಜಫರುಲ್ ಖಾನ್ ಮಂಡ್ಯ, ಯು.ಎ.ಇ. ಕನ್ನಡ ಸಂಘಟಕೆರ್ ಜೋಸೆಫ್ ಮಥಿಯಾಸ್, ಕೈಗಾರಿಕೋದ್ಯಮಿ ಅಶ್ರಫ್ ಶಾ ಮಂತೂರು, ಜಿ.ಸಿ.ಸಿ Bcom ACFE ಕನ್ನಡ ಸಂಘಟಕೆರ್ ಎನ್ ರಾಮವಂದ್ರ ಪ್ರಭು ಸಿಎ ಮೊಕ್ಲೆಗ್ ಗಡಿನಾಡ ರತ್ನ ಪ್ರಶಸ್ತಿ ಪ್ರದಾನ ಮಲ್ಪೆರೆ ಉಂಡು.
ಕರ್ನಾಟಕ ಅರಣ್ಯ ಇಲಾಖೆಡ್ ಖಾಲಿ ಇಪ್ಪುನ 540 ಅರಣ್ಯ ರಕ್ಷಕ ಗ್ರೂಪ್ ಸಿ ಬೇಲೆದ ನೇಮಕಾತಿಗ್ ಅಧಿಸೂಚನೆ ಪ್ರಕಟ ಮಲ್ದ್ಂಡ್.
ಆಸಕ್ತಿ ಇತ್ತಿನ ಅಭ್ಯರ್ಥಿಲು ಡಿ.1-30 ಮುಟ್ಟ ಆನ್ ಲೈನ್ ಮುಖೇನ ಅರ್ಜಿ ಸಂದಾಯೆರೆ ಅವಕಾಶ ಉಂಡು. ನೇಮಕ ಆಪುನ ಅರಣ್ಯ ರಕ್ಷಕೆರೆಗ್ ಪಿಂಚಣಿ ಸೌಲಭ್ಯ ಬೊಕ್ಕ ಇಸೇಸ ಸಂಬಳದೊಟ್ಟಿಗೆ ತಿಂಗೊಲ್ ಗ್ 18600 ರೂ.ರ್ದ್ 32600 ರೂ. ಮುಟ್ಟ ಸಂಬಳ ಕೊರ್ಪುಂಡು.
ಬಾಳ ಗ್ರಾಮಾಭ್ಯುದಯ ಸಂಘ (ರಿ.) 21 ನೇ ವರ್ಷದ ಸಾಮೂಹಿಕ ಶ್ರೀ ಅಶ್ವತ್ಥ ಪೂಜೆ, ಶ್ರೀ ಶನೀಶ್ವರ ಪೂಜೆ ಬೊಕ್ಕ ಶ್ರೀ ಸತ್ಯನಾರಾಯಣ ಪೂಜೆ ಡಿ.9 ಸನಿಯಾರ ಬಾಳ ಕಂಬುಲಕೆರೆ ನಿತ್ಯಾನಂದ ಕಟ್ಟೆಡ್ ನಡಪರೆ ಉಂಡು.
ಬೊಲ್ಪುಗು ಸಾಮೂಹಿಕ ಶ್ರೀ ಅಶ್ವತ್ಥ ಪೂಜೆ, ಮಹಾಪೂಜೆ ಬೊಕ್ಕ ಪ್ರಸಾದ ಪಟ್ಟುನ ಲೇಸ್, ಬಯ್ಯಗ್ ಕಲಶ ಪ್ರತಿಷ್ಠೆ, ಸಾಮೂಹಿಕ ಪ್ರಾರ್ತನೆ, ಸಾಮೂಹಿಕ ಶ್ರೀ ಶನೀಶ್ವರ ಪೂಜೆ ಬೊಕ್ಕ ಶ್ರೀ ಸತ್ಯನಾರಾಯಣ ಪೂಜೆ ಬೊಕ್ಕ ದೀಪೋತ್ಸವ, ರಾತ್ರೆ ಮಹಾಪೂಜೆ, ಪ್ರಸಾದ ಪಟ್ಟುನ ಲೇಸ್, ನುಪ್ಪು ಪ್ರಸಾದ ಸೇವೆ ನಡಪರೆ ಉಂಡು ಪಂದ್ ಬಾಳ ಗ್ರಾಮಾಭ್ಯದಯ ಸಂಘ (ರಿ.) ದ ಗುರ್ಕಾರೆ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
