Tulu News

ಉಪ್ಪಳ, ಸಸಿಹಿತ್ಲು ನೆಲ್ಲಿಕತ್ತಿದ ತರವಾಡು ಇಲ್ಲಲ್ ಬೇತೆ ಬೇತೆ ವೈದಿಕ ಲೇಸ್

ಉಪ್ಪಳ, ಸಸಿಹಿತ್ಲು ನೆಲ್ಲಿಕತ್ತಿದ ತರವಾಡು ಇಲ್ಲಲ್ ಬೇತೆ ಬೇತೆ ವೈದಿಕ ಲೇಸ್ ನಡಪರೆ ಉಂಡು.

ಫೆ.4 ಕ್ಕ್ ಶ್ರೀ ದೈವೊಲೆನ ಬಾಲಾಲಯಡ್ ಪ್ರತಿಷ್ಠೆ, ವೆಂಕಟರಮಣ ಮುಡಿಪುನ್ ತಿರುಪತಿಗ್ ಕೊನೊಯೆರೆ ಉಂಡು.

ಫೆ.24 ಕ್ಕ್ ನಾಗದೇವೆರೆನ ಪೊಸ ಕಲ್ಲ್ ನ್ ಪಾಡಿಯೆರೆ ಉಂಡು. ಅನಿರ್ದ್ ಕುಟುಂಬದ ಮಾತ ಸದಸ್ಯೆರ್ ವ್ರತಡ್ ಇಪ್ಪೊಡು ಪಂದ್ ಪ್ರಶ್ನೆಡ್ ತೆರಿದ್ ಬೈದ್ಂಡ್.

ಏ.5 ಕ್ಕ್ ಪೊಸ ತರವಾಡು ಇಲ್ಲದ ಇಲ್ಲ್ ಒಕ್ಕೆಲ್, ನಾಗದೇವೆರೆನ ಪ್ರತಿಷ್ಠೆ, ಬೊಕ್ಕ ರಕ್ತೇಶ್ವರಿ ದೇವಿನ ಪುನರ್ ಪ್ರತಿಷ್ಠೆ ನಡಪರೆ ಉಂಡು.

ಏ.12 ಕ್ಕ್ ಬೊಲ್ಪುಗು ಧರ್ಮ ದೈವೊಲೆನ ಪ್ರತಿಷ್ಠೆ ಲೇಸ್, ವೆಂಕಟರಮಣ ಮುಡಿಪು ಕಟ್ಟೆರೆ, ಬೊಕ್ಕ ಅವ್ವೆ ದಿನ ಬಯ್ಯಗ್ ವರ್ಷಾವಧಿದ ಪರ್ವ, ಮತ ದೈವೊಲೆಗ್ ಕೋಲ ನಡಪರೆ ಉಂಡು.

ಏ.13 ಕ್ಕ್ ಗುಳಿಗನ ಕೋಲ ಬೊಕ್ಕ ಮರುಪುತ್ತರಿ ನಡಪರೆ ಉಂಡು.

ಈ ಮತ ಲೇಸ್ ನ್ ಸರಿಯಾಯಿನ ಪೊರ್ತುಡು ನಡಪಾಯೆರೆ ಬೊಕ್ಕ ಇಲ್ಲದ ಕೆಲಸನ್ ಮುಗಿಪೆರೆ ಕಾಸ್ ದ ಭಂಗ ಉಂಡು. ಅಂಚಾದ್ ಕುಟುಂಬದ ಪ್ರತಿಯೊರಿ ಸದಸ್ಯೆರ್ ಅಕ್ಲೆಗ್ ಪಾಡಿನ ವಂತಿಗೆ ಕಾಸ್ ನ್ ಆಯಿನಾತ್ ಬೇಗ ತರವಾಡ್ ಕನತ್ ದ್ ಕೊರ್ದು ದೈವೊಲೆನ ಕೃಪೆಗ್ ಪಾತ್ರರಾವೊಡು ಪಂದ್ ಉಪ್ಪಳ ಸಸಿಹಿತ್ಲು ನೆಲ್ಲಿಕತ್ತಿ ತರವಾಡುದ ಗುರ್ಕಾರೆ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಫೆ.10,11: ಪೆಜಮಾಡಿ ಬಸ್ತಿಪಡ್ಪು ರಾಜೀವ್ ಗಾಂಧಿ ಕ್ರೀಡಾಂಗಣಡ್ ಬಿರುವೆರ್ ಟ್ರೋಫಿ 2024

ಪೆಜಮಾಡಿ ಬಿರುವೆರ್ ಬ್ರದರ್ಸ್ ದ ಮುತಾಲಿಕೆಡ್ ಸುರುತ್ತ ಸರ್ತಿ ರಾಜ್ಯಮಟ್ಟದ ಕ್ರಿಕೆಟ್ ಪಂತೊ ಬಿರುವೆರ್ ಟ್ರೋಫಿ 2024 ಫೆ.10 ಬೊಕ್ಕ 11 ಕ್ಕ್ ಪೆಜಮಾಡಿ ಬಸ್ತಿಪಡ್ಪು ರಾಜೀವ್ ಗಾಂಧಿ ಕ್ರೀಡಾಂಗಣಡ್ ನಡಪರೆ ಉಂಡು.

ಈ ಮ್ಯಾಚ್ ಡ್ ಗೆಂದಿನಕ್ಲೆಗ್ ಸುರುತ್ತ ಇನಾಮು 2,22,222 ಬೊಕ್ಕ ಬಿರುವೆರ್ ಟ್ರೋಫಿ, ರಡ್ಡನೇ ಇನಾಮು 1,22,222 ಬೊಕ್ಕ ಬಿರುವೆರ್ ಟ್ರೋಫಿ ತಿಕ್ಕುಂಡು. ಅಂಚೆನೆ ಪ್ರತಿ ಮ್ಯಾಚ್ ಗ್ ಪಂದ್ಯ ಶ್ರೇಷ್ಠ, ಫೈನಲ್ ಪಂದ್ಯ ಶ್ರೇಷ್ಠ, ಸರಣಿ ಶ್ರೇಷ್ಠ, ಉತ್ತಮ ದಾಂಡಿಗ, ಉತ್ತಮ ಎಸೆತಗಾರ ಇನಾಮುನ್ ಕೊರ್ದು ಮಾನಾದಿಗೆ ಮಲ್ಪೆರೆ ಉಲ್ಲೆರ್. ಈ ಪಂತೊಡು ಪಾಲ್ ಪಡೆಪುನ ಗೊಬ್ಬುಗಾರೆರ್ ತನ್ನ ಪುದರ್ ನ್ ಜ.20 ತ್ತೊಲಯಿ ನೊಂದಣಿ ಮಲ್ಪೊಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.

ರೇಡಿಯೊ ಮಣಿಪಾಲಡ್ ಬನ್ನಂಜೆ ಬತ್ತೆರ್ ಸರಣಿ ಲೇಸ್

ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಬನ್ನಂಜೆ ಬತ್ತೆರ್ ತುಳು ಸರಣಿ ಲೇಸ್ ದ ಸಂಚಿಕೆ ಡಿ.7 ಗುರುವಾರ ಬಯ್ಯಗ್ 5‌ ಗಂಟೆಗ್ ಪ್ರಸಾರ ಆಪುಂಡು.

ಈ ಲೇಸ್ ಡ್ ಜಾನಪದ ವಿದ್ವಾಂಸೆರ್ ಬನ್ನಂಜೆ ಬಾಬು ಅಮೀನ್ ಪಾತೆರಿಯೆರೆ ಉಲ್ಲೆರ್. ಡಿ.8 ಕ್ಕ್ ಮಧ್ಯಾಹ್ನ 1 ಗಂಟೆಗ್ ಕುಡೊರ ಪ್ರಸಾರ ಆಪುಂಡು. ಈ ಲೇಸ್ ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.

ಡಿ.24: ಕುದ್ರೋಳಿದ ಶ್ರೀ ಗೋಕರ್ಣನಾಥ ಕ್ಷೇತ್ರಡ್ ಆತ್ಮಶಕ್ತಿ ದ್ವಿದಶಮಾನೋತ್ಸವ

ಕುಡ್ಲ ಬ್ರಹ್ಮಶ್ರೀ ನಾರಾಯಣ ಗುರುಸ್ವಾಮಿ ಪ್ರಕಾಶನ, ಚಾರಿಟೇಬಲ್ ಟ್ರಸ್ಟ್ (ರಿ.) ಬೊಕ್ಕ ಆತ್ಮಶಕ್ತಿ ಪತ್ರಿಕೆದ ದ್ವಿದಶಮಾನೋತ್ಸವ ಡಿ.24 ಐತಾರ ಕುದ್ರೋಳಿದ ಶ್ರೀ ಗೋಕರ್ಣನಾಥ ಕ್ಷೇತ್ರದ ಕೊರಗಪ್ಪ ಸಭಾಭವನಡ್ ನಡಪರೆ ಉಂಡು.

ಈ ಲೇಸ್ ಡ್ ಕುದ್ರೋಳಿ ಶ್ರೀ ಗೋಕರ್ಣನಾಥ ದೇವಲ್ಯದ ಗುರ್ಕಾರೆ ಸಾಯಿರಾಮ್ ತುಡರ್ ಅರ್ಲಾವೆರೆ ಉಲ್ಲೆರ್. ಗೌರವ ಉಪಸ್ಥಿತಿಡ್ ಕುಡ್ಲ ನಗರ ಪಾಲಿಕೆದ ಮೇಯರ್ ಸುಧೀರ್ ಶೆಟ್ಟಿ ಕಣ್ಣೂರು, ವಿರೋಧ ಪಕ್ಷದ ನಾಯಕೆ ಪ್ರವೀಣ್ ಚಂದ್ರ ಆಳ್ವ ಪಾಲ್ ಪಡೆಯೆರೆ ಉಲ್ಲೆರ್.

ಬಯ್ಯಗ್ ನಡಪುನ ಸಭಾ ಲೇಸ್ ದ ಗುರ್ಕಾರ್ಮೆನ್ ಬ್ರಹ್ಮಶ್ರೀ ನಾರಾಯಣ ಗುರುಸ್ವಾಮಿ ಪ್ರಕಾಶನ ಬೊಕ್ಕ ಚಾರಿಟೇಬಲ್ ಟ್ರಸ್ಟ್ (ರಿ‌.) ದ ಗುರ್ಕಾರೆ ವಾಮನ್ ಕುದ್ರೋಳಿ ಒಯಿಸೊನ್ವೆರ್. ಮಾಜಿ ವಿತ್ತ ಸಚಿವೆರ್ ಬಿ. ಜನಾರ್ದನ ಪೂಜಾರಿ ತುಡರ್ ಅರ್ಲಾವೆರೆ ಉಲ್ಲೆರ್. ವಿಧಾನ ಪರಿಷತ್ ಸದಸ್ಯೆರ್ ಬಿ.ಕೆ ಹರಿಪ್ರಸಾದ್ ಆತ್ಮಶಕ್ತಿ ಪ್ರಶಸ್ತಿ ಪ್ರದಾನ ಮಲ್ಪುವೆರ್. ಮಾಜಿ ಸಚಿವೆರ್ ಕೋಟ ಶ್ರೀನಿವಾಸ ಪೂಜಾರಿ ಸಾಧನಾ ಶ್ರೇಷ್ಠ ಪ್ರಶಸ್ತಿ ಪುರಸ್ಕಾರ ಮಲ್ಪುವೆರ್. ವಿಧಾನಸಭೆ ಸಭಾಧ್ಯಕ್ಷೆರ್ ಯುಟಿ ಖಾದರ್, ವಿಧಾನ ಪರಿಷತ್ ಸದಸ್ಯೆರ್ ಹರೀಶ್ ಕುಮಾರ್ ಬೊಲ್ತೇರ್ ಪ್ರತಿಭಾವಂತೆರೆಗ್ ಸನ್ಮಾನ ಮಲ್ಪೆರೆ ಉಲ್ಲೆರ್. ಮಾಜಿ ಸಚಿವೆರ್ ವಿನಯ ಕುಮಾರ್ ಸೊರಕೆ ಆತ್ಮಶಕ್ತಿ ವಿಶೇಷಾಂಕ ಬುಡುಗಡೆ ಮಲ್ಪುವೆರ್. ಶಾಸಕೆರ್ ಉಮಾನಾಥ ಕೋಟ್ಯಾನ್ ಅಭಿನಂದನಾ ಗ್ರಂಥ ತ್ರಿವಿಕ್ರಮ ಬುಡುಗಡೆ ಮಲ್ಪುವೆರ್. ಶಾಸಕೆರ್ ವೇದವ್ಯಾಸ ಕಾಮತ್ ಅಸಹಾಯಕೆರೆಗ್ ಪನವುದ ಸಕಾಯನ್ ಪಟ್ಟುವೆರ್. ಸಹಾಯಕ ಪೊಲೀಸ್ ಆಯುಕ್ತೆರ್ ಮಹೇಶ್ ಕುಮಾರ್ ಎಸ್ ವಿದ್ಯಾರ್ಥಿವೇತನ ಬುಡುಗಡೆ ಮಲ್ಪುವೆರ್. ಕುದ್ರೋಳಿ ಶ್ರೀ ಗೋಕರ್ಣನಾಥ ಕ್ಷೇತ್ರದ ಕೋಶಾಧಿಕಾರಿ ಪದ್ಮರಾಜ್ ಆರ್, ಪ್ರಬಂಧ ಪಂತೊಡು ಗೆಂದಿನಕ್ಲೆಗ್ ಇನಾಮು ಕೊರಿಯೆರೆ ಉಲ್ಲೆರ್. ಈ ಲೇಸ್ ಡ್ ನಿವೃತ್ತ ಗ್ರಂಥಪಾಲಕೆರ್ ಡಾ.ಎಂ.ಕೆ ಬಂಡಿ, ಆತ್ಮಶಕ್ತಿ ಪತ್ರಿಕೆದ ವ್ಯವಸ್ಥಾಪಕ ಸಂಪಾದಕೆರ್ ಸಹಕಾರರತ್ನ ಚಿತ್ತರಂಜನ್ ಬೋಳಾರ್ ಪಾಲ್ ಪಡೆಯೆರೆ ಉಲ್ಲೆರ್.

ಅಂಚೆನೆ ಸಂದೇಶ ಬೆಳ್ಳೂರು ಮೆರೆರ್ದ್ ಸ್ಟ್ಯಾಂಡ್ ಅಪ್ ಕಾಮಿಡಿ, ಕು. ರಕ್ಷಾ ಸತೀಶ್ ಮೆರೆರ್ದ್ ಭರತನಾಟ್ಯ ಬೊಕ್ಕ ಆತ್ಮಶಕ್ತಿ ವಿವಿಧೋದ್ದೇಶ ಸಹಕಾರಿ ಸಂಘದ ಸಿಬ್ಬಂದಿಲೆರ್ದ್ ಸಾಂಸ್ಕೃತಿಕ ಲೇಸ್ ನಡಪರೆ ಉಂಡು ಪಂದ್ ಆತ್ಮಶಕ್ತಿ ಪತ್ರಿಕೆದ ಗುರ್ಕಾರೆ ವಾಮನ್ ಕುದ್ರೋಳಿ, ಒತ್ತು ಗುರ್ಕಾರೆ‌ ಚಂದ್ರಹಾಸ ಮರೋಳಿ, ಕಾರ್ಯದರ್ಶಿ ಗೋಪಾಲ್ ಎಂ, ವ್ಯವಸ್ಥಾಪಕ ಸಂಪಾದಕೆರ್ ಸಹಕಾರ ರತ್ನ ‌ಚಿತ್ತರಂಜನ್ ಬೋಳಾರ್ ಬೊಕ್ಕ ಟ್ರಸ್ಟಿಲು ಲೆಪ್ಪೋಲೆಡ್ ತೆರಿಪಾದೆರ್.

ಡಿ.16,17: ಇಚ್ಛಾಪೂರ್ತಿ ಅಯ್ಯಪ್ಪ ಮಂದಿರಡ್ ವರ್ಷದ ಪ್ರತಿಷ್ಠಾಪನಾ ಉಚ್ಚಯ, 28ನೇ ವರ್ಷದ ಅಯ್ಯಪ್ಪ ಮಹಾಪೂಜೆ, ಸಾಂಸ್ಕೃತಿಕ ಲೇಸ್

ಬೊಂಬೈ: ಬೋರಿವಾಲ್ ದ ಇಚ್ಛಾಪೂರ್ತಿ ಅಯ್ಯಪ್ಪ ಮಂದಿರಡ್ ವರ್ಷದ ಪ್ರತಿಷ್ಠಾಪನಾ ಉಚ್ಚಯ ಬೊಕ್ಕ 28ನೇ ವರ್ಷದ ಅಯ್ಯಪ್ಪ ಮಹಾಪೂಜೆ, ಸಾಂಸ್ಕೃತಿಕ ಲೇಸ್ ಡಿ.16 ಬೊಕ್ಕ 17 ಕ್ಕ್ ನಡಪರೆ ಉಂಡು.

ಡಿ.16 ಸನಿಯಾರ ಬಯ್ಯಗ್ ಅಯ್ಯಪ್ಪ ಉಚ್ಚಯ ಮೂರ್ತಿದ ಮೆರವಣಿಗೆ ಬೊಕ್ಕ ಸುದರ್ಶನ ಹೋಮ ನಡಪರೆ ಉಂಡು.

ಡಿ.17 ಐತಾರ ಬೊಲ್ಪುಗು ಅಷ್ಟದ್ರವ್ಯ ಗಣ ಹೋಮ, ನವಕ ಪ್ರಧಾನ ಹೋಮ, ನವಕ ಕಲಶಾಭಿಷೇಕ, ಸಹಸ್ರ ನಾಮಾರ್ಚನೆ, ಫಲ್ಲಪೂಜೆ, ಸಂದಾಯ ಪೂಜೆ, ಮಹಾಪೂಜೆ‌ ಮಧ್ಯಾಹ್ನ ಮಹಾ ಆರತಿ ಬೊಕ್ಕ ನುಪ್ಪು ಪ್ರಸಾದ ಸೇವೆ, ಬಯ್ಯಗ್ ಸಾಂಸ್ಕೃತಿಕ ಲೇಸ್, ಕಿರುನಾಟಕ, ಜಾನಪದ ನೃತ್ಯ, ಸಾಂಪ್ರದಾಯಿಕ ಫ್ಯಾಷನ್ ಶೋ, ಸ್ಟ್ಯಾಂಡ್ ಅಪ್ ಕಾಮಿಡಿ ಬೊಕ್ಕ ಭಾವಗೀತೆ ನಡಪರೆ ಉಂಡು.

ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆದ್ ಅಯ್ಯಪ್ಪನ ಕೃಪೆಗ್ ಪಾತ್ರರಾವೊಡು ಪಂದ್ ಶ್ರೀ ಅಷ್ಟವಿನಾಯಕ ಅಯ್ಯಪ್ಪ ಭಕ್ತ ವೃಂದ (ರಿ.) ಲೆಪ್ಪೋಲೆಡ್ ತೆರಿಪಾದ್ಂಡ್.

ರೇಡಿಯೊ ಮಣಿಪಾಲ್ ಡ್ ಕಥೆ ಕೇಳೋಣ ಸರಣಿ ಲೇಸ್

ಮಣಿಪಾಲ: ರೇಡಿಯೊ ಮಣಿಪಾಲ್ 90.4 ಮೆಗಾಹರ್ಟ್ಸ್ ಡ್ ಕೇಂದ್ರ ಕನ್ನಡ ಸಾಹಿತ್ಯ ಪರಿಷತ್ ಒಡಿಪು ಜಿಲ್ಲೆ ಬೊಕ್ಕ ತಾಲೂಕ್ ಘಟಕದ ಒಟ್ಟುಸೇರಿಗೆಡ್ ಕಥೆ ಕೇಳೋಣ ಸರಣಿ ಲೇಸ್ ದ 83ನೇ ಸಂಚಿಕೆ ಡಿ.2 ಸನಿಯಾರ ಬಯ್ಯಗ್ 4.30 ಕ್ಕ್ ಪ್ರಸಾರ ಆಪುಂಡು.

ಈ ಸಂಚಿಕೆಡ್ ಸಾಹಿತ್ಯಾಸಕ್ತೆರ್ ಅಶ್ವಿನಿ ಮಯೂರ್ ಭಟ್ ಕುಂಜಿಬೆಟ್ಟು ಪಾಲ್ ಪಡೆಯೆರೆ ಉಲ್ಲೆರ್. ಡಿ.3 ಕ್ಕ್ ಮಧ್ಯಾಹ್ನ 12.30 ಕ್ಕ್ ಕುಡೊರ ಪ್ರಸಾರ ಆಪುಂಡು. ಈ ಲೇಸ್ ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್‌ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.

ಡಿ.24-25: ಪುತ್ತೂರು ದೇವರಮಾರು ಕಂಡಡ್ ಶ್ರೀನಿವಾಸ ಕಲ್ಯಾಣೋತ್ಸವ

ಪುತ್ತಿಲ ಪರಿವಾರದ ಮುತಾಲಿಕೆಡ್ ಪುತ್ತೂರು ಶ್ರೀ ಮಹಾಲಿಂಗೇಶ್ವರ ದೇವೆರೆನ ದೇವರಮಾರು ಕಂಡಡ್ ಡಿ.24-25 ಕ್ಕ್ ಶ್ರೀನಿವಾಸ ಕಲ್ಯಾಣೋತ್ಸವ ಬೊಕ್ಕ ಸನಾತನ ಸಮಾಗಮದ ಕಾರ್ಯಾಲಯ, ಪೊಲಬು ಕೇಂದ್ರ ಉದಿಪನ ಲೇಸ್ ನಡಪರೆ ಉಂಡು.

ಅಂಚೆನೆ ಶ್ರೀ ಮಹಾಲಿಂಗೇಶ್ವರ ದೇವಲ್ಯದ ದೇವರಮಾರು ಕಂಡದ ಬ್ರಹ್ಮರಥ ಮಂಟಪದ ಕೈತಲ್ ಇಪ್ಪುನ ನಟರಾಜ ವೇದಿಕೆಡ್ ಡಿ.2 ಕ್ಕ್ ಬೊಲ್ಪುಗು ಶ್ರೀನಿವಾಸ ಕಲ್ಯಾಣೋತ್ಸವದ ಅಟ್ಟಣೆ ಸಭೆ ನಡಪರೆ ಉಂಡು.

ಈ ಲೇಸ್ ಗ್ ಹಿಂದೂ ಬಾಂಧವೆರ್ ಎಚ್ಚದ ಸಂಖ್ಯೆಡ್ ಪಾಲ್ ಪಡೆವೊಡು ಪುತ್ತೂರು ಶ್ರೀನಿವಾಸ ಕಲ್ಯಾಣೋತ್ಸವ ಸಮಿತಿ ಲೆಪ್ಪೋಲೆಡ್ ತೆರಿಪಾದೆರ್.

SBI ಡ್ 8283 ಬೇಲೆ

SBI ದ ಬೇತೆ ಬೇತೆ ಶಾಖೆಡ್ ಖಾಲಿ ಇಪ್ಪುನ ಬೇಲೆದ ನೇಮಕಾತಿಗಾದ್ ಅಧಿಸೂಚನೆನ್ ಕೊರ್ತುಂಡು.

ನೆಟ್ಟ್ ಒಟ್ಟು 8283 ಕ್ಲರಿಕಲ್ ಕೇಡರ್ – ಜೂನಿಯರ್ ಅಸೋಸಿಯೇಟ್ ಬೇಲೆ ಖಾಲಿ ಉಂಡು. ಆಯಿಟ್ಟ್ ಕರ್ನಾಟಕಡ್ 450 ಬೇಲೆ ಉಂಡು. ಅರ್ಜಿ ಸಂದಾವೊನ ಅಭ್ಯರ್ಥಿಲು ಡಿ.7 ತ್ತೊಲಯಿ ಆನ್ ಲೈನ್ ಮುಖೇನ ಸಂದಾವೊಲಿ.

ಡಿ.9: ಸುಳ್ಯ ಅಯ್ಯಪ್ಪ ಸೇವಾ ಸಮಿತಿದ 29ನೇ ವರ್ಷದ ದೀಪೋತ್ಸವ

ಸುಳ್ಯ ಸಾರ್ವಜನಿಕ ಶ್ರೀ ಅಯ್ಯಪ್ಪ ಸ್ವಾಮಿ ಸೇವಾ ಸಮಿತಿದ ವತಿರ್ದ್ 29ನೇ ವರ್ಷದ ಶಬರಿಮಲೆ ಶ್ರೀ ಅಯ್ಯಪ್ಪ ಸ್ವಾಮಿನ ದೀಪೋತ್ಸವ ಸುಳ್ಯ ಶ್ರೀ ಚೆನ್ನಕೇಶವ ದೇವಲ್ಯದ ಎದುರುಡು ಜಟ್ಟಿಪಳ್ಳ ಎಸ್‌. ಕೆ.ಸತೀಶ್ ಗುರುಸ್ವಾಮಿ ಮೆರೆನ ಮುತಾಲಿಕೆಡ್ ನಡಪರೆ ಉಂಡು.

ಬೊಲ್ಪುಗು ಗಣಪತಿ ಹವನ ಆದ್ ಉನಾ ಪೂಜೆ, ಮಧ್ಯಾಹ್ನ ಮಹಾಪೂಜೆ, ನುಪ್ಪು ಪ್ರಸಾದ ಸೇವೆ, ಬಯ್ಯಗ್ ಅಯ್ಯಪ್ಪ ಭಕ್ತೆರೆನ ಪಾಲ್ ಕೊಂಬು ಮೆರವಣಿಗೆ, ರಾತ್ರೆ ಗಾಯಕೆ ಶಿವಪ್ರಸಾದ್‌ ಶೆಟ್ಟಿ ನಿರ್ದೇಶನದ ಶಿವ ಸ್ವರ ಮೆಲೋಡೀಸ್ ಮೊಕ್ಲೆರ್ದ್ ಭಕ್ತಿಗಾನ ಸುಧಾ ಲೇಸ್ ಬೊಕ್ಕ ಶ್ರೀ ಬೆಂಕಿನಾಥೇಶ್ವರ ಕೃಪಾಪೋಷಿತ ದಶಾವತಾರ ಯಕ್ಷಗಾನ ಮಂಡಳಿ ಕಳವಾರು ಬಾಳ ಮೊಕ್ಲೆರ್ದ್ ಧರ್ಮದೈವ ಧೂಮಾವತಿ ತುಳು ಆಟ ನಡಪರೆ ಉಂಡು.

ಡಿ.10 ಕ್ಕ್ ಬೊಲ್ಪುಗು ಅಯ್ಯಪ್ಪ ವೃತಧಾರಿಲೆರ್ದ್ ಅಗ್ನಿ ಸೇವೆ ನಡಪರೆ ಉಂಡು ಪಂದ್ ಸಮಿತಿದ ಗುರ್ಕಾರೆ ಜನಾರ್ದನ ದೋಳ ತೆರಿಪಾದೆರ್.